قصه جديده اسمها سيد الحب

1. هب نسناس الهوى لي من شمال ... حامل ريح الخزاما والنفل


2. من فياض ظبيها يلعب دلال ... لي لمح خله من النشوى جفل


3. بو عبيد وحرمته وعياله كان الهم معارف من جيرانهم الي في العزب ...


4. عبيد: الوالد يالله بنا ويهناا .. جانكم تقفظتو وخلصتو ..


5. ميره : وضاحي شوفي ..... مب هوه هذا ..؟

السلام عليكم ورحمة الله وبركاته
هذاي حلوه اذا عجبتكم اكملها (الجز الاول )
سيد الحب

هب نسناس الهوى لي من شمال ... حامل ريح الخزاما والنفل

من فياض ظبيها يلعب دلال ... لي لمح خله من النشوى جفل

بعض البشر يتعلقون بذكريات قديمه وتكون عزيزه على قلوبهم وتربطهم هذي الذكريات بمراحل معينه وفترات من حياتهم .. وكل مايحين موعد هذي الفتره تلقى القلب يحن ويشتاق وخاصه اذا كان له علاقه ببعض الاشخاص الي يحبهم ويريد انه يشوفهم ويستعيد ذكرياته معاهم ...
من عادة عايلة بو عبيد انهم يسيرون كله سنه وفي عطلة الربيع .. البر عند عزبهم .. بو عبيد متعود يشل عايلته ويسكنون في بيت العزبه والمزرعه ... يعيش هله عيشة البدو ويربي عياله على البداوه.. من تعليمهم ركوب النوق والخيل والقنص وطبعا خوان شما مايستغنون عن الدراجات وكل ما تهواه انفسهم يسوونه هناك.. والبنات يطلعن يتمشن ويسولفن ويعيشن حياه بسيطه .. وطبعا ماكان يخلى المكان من الكهربا ومن التلفزيون والدش و كل شي كان متوفر .. يعني محد يحس بملل ..
وفي نفس المكان عزب ومزارع وايد حذال عزبتهم وكل الي فيهن ناس من بدو عايشين في المدن كانو يظهرون في الإجازات ويسكنون في عزبهم ويغيرون جو ..
كان الجو هذي السنه يهبل .. الامطار والعشب والكل كان متحمس للعطله ..

بو عبيد وحرمته وعياله كان الهم معارف من جيرانهم الي في العزب ...

بو محمد كانت عزبته عدال عزبة بو عبيد .. تعارفو هناك من زمان وهم جيران وتوطدت علاقاتهم مع السنين وصار بو عبيد صديق بو محمد الروح بالروح .. والعايلتين كونو صداقات قويه مع بعض ...
بنات بو محمد كانن مرابعات بنت بو عبيد وضحى... كانت وضحى البنت الوحيده بين ست اخوان .. كانت دلوعة اهلها .. وبنات بو محمد ميثا وميره من نفس عمر وضحى وعندهن اخت اصغر عنهن نوره.. كانن متعلقات ببعض وايد .. تعارفن من يوم هن اصغار في منازلهم وعزبهم .. وتواصلن بالتيلفون وكانن يترين اجازة الربيع كل سنه علشان يقظن ويا بعض اطول وقت ممكن .. سوالف وحواطه ودراجات .. وكانن مايفترقن مول طول الاجازه وسهر مع بعض لين الفير ...
في بيت بو عبيد الصبح العايله كلها مشتطه بيطلعون العزبه .. مرتبين اغارضهم من البارحه .. وام عبيد ماخلت شي ماشلته للعزبه.. وعيالها كل واحد منهم مشغول شو بيشلون وياهم .. الصغار بالسوني والقيم بوي والعابهم وساييرهم .. ولكبار كانو ويا دريولهم مشغولين بدراجاتهم والي يحتاجونه ويحملونهن في السياره علشان يودونهن قبلهم العزبه..
اما الوضيحي فكانت ترتب شنطتها واغراضها .. وتحط مع الخدامه ثياب اخوانها وتساعد امها في الترتيب .. وضحى كانت وايد مستانسه بطلوعها للعزبه وخاصه في هالجو .. وكل يوم ترمس ميثا وميره متولهه عليهن ومستعيله على لمتهن ..
ظهر بو عبيد من حجرته يدور ام عبيد .. الريال بعد مشغول بعمره واغراضه والبنادق مال الصيد واموره الباقيه..
بو عبيد: فاطمه ماخلصو عيالج .. يالله دهديه بعدكم وراكم طريج مايمديكم الوقت..
ام عبيد: خلاص انحن خالصين .. بس يحملون السامان في السياره ويتقفظون لعيال..
وضحى : انا جاهزه خلاص .. وابى اخبركم ان اجازت الجامعه شهر .. يعني من الحين اقولكم لازم نرد قبل بسبوع علشان ارتب للجامعه واخذلي اغراض يديده .
بو عبيد: انا ماعندي مشكله الشور عندكم وعلى كيفكم.. بس عاد انتي من تشوفين خوياتج هناك بروحج مابترضين تردين البيت .. و مابنرومج ههه
ام عبيد: فديتن والله تولهنا عليهم ربعنا والبنيات وامهن اسميهم عرب طيبين .
وضحى : صدقج .. والله ياماه انهم ناس ماشي مثلهم .. وفديت انا ميثا وميره ونوره اسميهن شيخات ..
حدر عبيد اخو وضحى العود كان اكبر عنها واصغر منه مبارك والي اصغر كانو تحت وضحى ..منصور وسلطان وغانم الصغير وعمر ..

عبيد: الوالد يالله بنا ويهناا .. جانكم تقفظتو وخلصتو ..

بو عبيد: يالله خالصين .. قفلو البيت وانا بسير اوصي الطباخ عثمان على البيت والزراعه ..
ظهرو كلهم من البيت .. عبيد و وضحى ومبارك ومنصور في سياره عبيد.. وبو عبيد وحرمته وعيالهم والخدامات في سيارة بو عبيد.. كانو يبالهم ساعتين لين العزبه ..وكانو بيلاقون في الدرب بو محمد وعايلته .. من تخطو الطريج العام ونزلو على الكدش سايرو يتريون ربعهم .. والتيلفون بينهم .. نزلو من السيارات اشوي يمشون اريولهم لين إيون ربعهم ..
عبيد: ياالله يالجو والله انه رهيب .. يباله مخاوين شما وكشته شبابيه ههه
وضحى : وشو شايفنا جدامك مسويلك كشته شوابيه والا شوه ..!!؟.. ههه
عبيد: ههه لا فديتج الشباب غير .. لاتنسين سيايير وسباقات وسوالف غير ههه..
وضحى : اها .. انزين شو الفرق تراك بتلقى محمد واخوانه عيال عمي سالم وبتسون هذا كله واكثر بعد ..
عبيد : صدقتي ..بس عاد محمد ولد عمي سالم توه رادلنا من الخارج الله يعلم تغير علينا والا بعده بو جسيم طيب الطبع .. شيخ المعاني شرات قبل!! ولا يمكن الحين ما تليقله حياتنا وتبدلت اموره علينا؟..
بو عبيد: الريال يوم يربيه ريال ماتغير به الدنيا وتميلبه شرق غرب.. الاصيل يتم اصيل ..وبو محمد يابوك ريال وربى عياله ومحمد ما ظن انه بيخيب ظن حد فيه
ام عبيد: حافظ عليك يا بو جسيم الساع انه سنافي ومحفوظ عن طبع المدانيس..
وضحى تذكرت محمد .. لماتهم قبل سوالفهم سهرهم .. ربو رباعه من يوم هم صغار .. وكبرو رباعه.. كانو العايلتين تجمعهم علاقه طيبه من اصغر واحد فيهم لين اكبرهم .. كانو اخوان ميثا وميره هم خوان لوضحى و العكس بعد كان صحيح.. وضحى كانت تسير ويا عيال بو محمد مثل ماتسير ويا خوانها .. ما كانت تستوي حساسيه بين العايلتين.. كانو الاولاد والبنات من يوم هم صغار يظهرون لعب بالدراجات وسهر وسوالف .. لمات في الخيمه والضو ويستمتعون بالعطله لاخر درجه..
محمد اكبر خوانه درس في الخارج وكمل دراسات عليا .. يعني اخر فتره كانت العايله مفتقده محمد في اجازاتها.. ومحمد قد اما كان يقدر يحاول ايي في اجازة الربيع بس الظروف مرات ماتساعده..
وصلت سيارات عايلة بو محمد .. نزلو من سياراتهم عند ربعهم الي يتريونهم وتوايهو وياهم وسلمو على بعض..
بو عبيد: مربحبا والله بو محمد حي هالويوه الطيبه ..
بو محمد: تحيى ودوم طال عمرك.. شحالكم ربكم ابخير..
بو عبيد: الحمدلله بخير ومانشكي باس طال عمرك.. شحالك محمد وعلوم الدراسه انشالله خلصت وماباقي عليك شي..؟
محمد: والله بخير من شفناكم طال عمرك والدراسه لاتخبر خلصنا الحمدلله الا باقي الشهاده تظهر..وانشالله الله يسهلها ..
عبيد: ماشالله يامحمد عمر طاف وانته في الخارج ربك مانسيتنا والا اهل الخارج ما نسوك ربعك ههه
محمد: افا والله حرام ان داري وهلي محد يعوظني فيهم .. مره لاترمس هالرمسه..الله يعلم بحالنا هناك ..وشوقنا للبلاد والي فيها .
ام عبيد: الحمدلله يابوك يوم خلصت ورديت والله هالبلاد الي سرتلها ماتنطاح الله ياخذها ههه
ام محمد: والله ان قلبي نار عليه ما يرتاح وما حسيت بالراحه وهنتلي العيشه الا من رد وردت لنا الروح ورتحنا بشوفه عندنا.
تلاقن البنات ويا بعض .. وستانست وضحى بشوف ميثا واخواتها ميره ونوره..
وضحى: والله إلكن وحشه .. اباكن تخبرني كل شي سويتنه من الاجازه الي فاتت لين اليوم ..لاتفوتن شي .. ههه
ميثا : ههه انشالله وبنخبرج بعد مته انش الصبح ومته نسير الحمام ..بعد شو تبين تعرفين..!! شو كنا نسوي في الحمام ؟ههه
ميره : ههه الله يقطعج ممصخج عيب قطعي.. فديت انا لوضيحي والله اني تولهت عليج موت
وضحى : تولهت عليج العافيه فديت روحج..
وقالت لميثا : الا انتي يام السانين ميثوه ماباج تخبريني شي عنج ....انتي اصلا شو حياتج كلها في الحمام ههه
ميثا : ههه فديتني انا .. والله محد يسواني .. عرب عيونهم سود هم الي بيتخبرون عني وبتهمهم اموري ههه
ميثاني كانت تغايضهن وتضحك عليهن...
وضحى : ومنو هم هيلا انشالله العرب الي عيونهم سود.. شو مستوي من ورايا وانا مادري .. ها اعترفي ههه
ميره: ههه مهببه وايد هاي من وراج ماعليج بتيج لعلوم ..انا ناويه افضحها اليوم ههه
ميثا : ههه بليز عاد لاتطرون بوعيون عند حد خلو الي بيني وبينه سر فديته ههه
وضحى : لحقو و تتفداه بعد .. ماعليه مافضحتج وخبرت عليج محمد وعبيد ههه
ميثا : يالله عاد ههه خلن لكبار في حالهم .. تفاهمن معايه ومع بو عيون سود بس مانبى تدخلات من برا ههه
ميره: والله ومصدقه عمرج انتي بعد .. حرام انه لو حد هناك على قولتج بو عيون سود ينقبرج انتي وهوه ..هنيه في هالبر ومحد بيعرفلكم طريق ههه
وضحى : ومابنخلي الذبان الاخضر يعرفلكم طريق قره..ههه
ميثا : حشه رقيه وسكينه ههه مب ميره و وضحى
وضحى : ههه عاد خبرني شو مواصفاته هذا بو عيون سود.. لين الحين ما وصلني الا لون عيونه .. نبى خبر عن الخشم والحلج والبياض لايطلع هندي خلاف ههه
ميره : ههه اظني الا صديق راعي الدكان هيه ما تشوف حد غيره كل يوم تتصلبه وتتطلب من عنده ..
وضحى : شكلها بنت العم طاحت طيحه محد سما عليها ههه
ميثا : بس غربلاتكن شكلكن صدقتن وبتسولي قصه بعد ... حشه ماترزا عليه هالسوالف ههه
وضحى : فديت روحكن والله وحشتني و وحشتني سواليفكن ..
ركبو كلهم سياييرهم وسارو صوب عزبهم .. في العزب نزلو كلهم وكلن انشغل في بيته وترتيب الاغراض .. والبيوت كانت منظفه وزاهبه من قبل كمن يوم ..وماكان باقي الا انهم يحطون اغراضهم ..
وضحى : اماه انا بسير صوب ميثوه وميره
ام عبيد : ههه لعنبوه توها العرب تقول بسم الله خلي العرب ترتاح
وضحى : ههه اماه من شوه يرتاحون خليني اسير صوبهم ماروم ايلس عنهم
ظهرت وضحى صوب قوم بو محمد .. العزبتين عدال بعض.. زقرت وضحى على البنات من عند الباب ..توايبتلها ميثا ..
ميثا: ياويلي انا على الوضيحي والله انج بنت حلال تونا كنا بنظهر صوبج.. ههه
وضحى : يالله عيل اشوف ظهرن .. حرام الواحد ييلس داخل في هالجو الحلو
ميره : حوه صبرن انا راسي يعورني ابى جاي حليب بخلي الخدامه تسوي دله وتيبها النا عند العرقوب .
وضحى : ههه يالهنديه ماتصبر عن جاي كرك
ميثا : كرك والا برك انا بعد راسي يعورني من السياره ابالي كوب ههه
وضحى : يالله اترياكن بسرعه
ظهرن البنات وسارن يتمشن ويطالعن اخوانهن وهم يعابلون في الدراجات ومحتشرين
ميره : ها شو بلاكم ضاربيلكم صره حشرتونا ههه
عبيد : هلا ميروه شحالج .. وشحالج ميثا
ميره : امبوني بخير بس من زقرتني ميروه وزقرت ميثا بسمها كامل شكلي هب بخير الحين ههه
ميثا : ههه خليه اول مره حد يحترمني ويزقرني بسمي كامل
عبيد : ثركن هب متعودات حد يعطيكن فيس ..سمحلي جني غلطة عليكن ههه
وضحى : ههه زين جيه يبتن الرمسه لعماركن
محمد التفت من سمع صوت وضحى : بنت عبيد هنيه ..مرحبا ملايين ولا يسدن .. ؟؟ هلا والله
وضحى : مرحب باجي بو جسيم ..وهلا فيك.. حمدلله على السلامه
محمد : الله يسلمج ياربي.. شحالج الغلا؟
وضحى : يسرك الحال بو جسيم الحمدلله .. شحالك انت عساك مرتاح؟
محمد : والله لاباس يابنت العم .. اهم شي اني رجعت للبلاد وفتكيت من الغربه
عبيد : الي يسمعك يقول انك ماكنت مرتاح .. و لو انته مب مرتاح هناك مايلستلك هالكثر تكمل دراسات عليا وضيعت عمرك ههه
محمد : شو تباني اسوي عندي رغبه في شهاده زينه والحين الزمن مايمشي بليا شهادات والوظايف صعبه .
وضحى : صدقت بو جسم .. الحين انته امنت مستقبلك والله يوفقك انشالله
مبارك اخو عبيد اصغر عنه واكبر عن وضحى ويدرس في الجامعه ..كان يسوق الدراجه وياي صوبهم ..وبعد ما سلم على البنات
مبارك : وضاحي حبيبي الوالده تباج ..
وضحى : شو تبى الوالده ..؟ مافيه ارد لين هناك ..
مبارك: تعالي ركبي بوديج ههه
وضحى : ههه لا شكرا ماابى اركب وياك ..بسير اشوفها اسمحولي.. ونتن تعالن ويايه ..واشرت لميثا وميره ايين وياها
سارن البنات صوب ام وضحى يشوفنها شو تبى !! ... وفي الطريج كانن البنات يرمسن عن اخوهن محمد .. كيف انه تخرج والحين بيتوظف في وظيفه قويه.. ويدورن له بنت الحلال الي بيستر عليها وتستر عليه ..
دخلت وضحى بتشوف امها شو تبى وتمن ميثا وميره يالسات على العرقوب يترينها يابت البشكاره الجاي والسندويجات وعقب يتهن وضحى يايبه وياها نوره اخت ميره وميثا ..
يلسن يسولفن البنات ..
ميره : وضاحي حبيبي .. ماقلتي لي مبروك ..
وضحى فجت اعيونها : مبروك على شوه .. شو مستوي ومحد خبرني..؟ يالخاينات اكيد بتعرسن عني ..؟
ميثا : ههه هيه بنعرس .. الله يسمع منج .. وعقبالج لا تعنسين
ميره: لا بسم الله على الوضيحي اظني الا انحن بنعنس وهيه بتخطف عنا ..
وضحى : يعني هب بلاج فديت روحج ... انتي الي فيهم والله ههه
ميره : قولي مبروك عاد .. ههه
وضحى : مبروك والف مبروك ياربي .. ها شو خبريني
ميره : انخطبت
فجت وضاحي عيونها ومن الفرحه صرخت ولوت على ميره وضمتها
وضحى : مبروك الف الف مبروك .. فديت روحج يالدبه مته انخطبتي وماخبرتيني ههه
ميره : السالفه يديده الا من يومين .. والوالد شاورني وانا بعدني مارديت عليه .. قالي تشاوري
ميثا : والله لو منج بوافق سيده بعد ليش مأخره العرب وتتشاورين ههه صدق خقاقه
ميره : ههه غربلاتج انتي سكتي حرام انج مستقطعه الا محد عاطنج ويه
وضحى : لا ماعليج هذي اخر شي يوم بتمل ومحد بييها بتسير اتلف ادورلها معرس وتخطب لعمرها ههه
ميثا : ياالله يعلني انشالله اعرس قبلكن وتموتن حره ههه ولو ماباه المعرس باخذه بس غياض فيكن
وضحى : ههه انشالله تعرسين ..ونفتك منج ومن لسانج ههه
ميثا فجت عيونها في وضحى: والله اني فرحت قلت فديتها وضاحي تتدعالي اثرج تبين الفكه ههه
خلاص انا قررت اغير عنكن بسير صوب امي وخالتيه فديتهن هن الي بيزوجني مب انتن ههه
بالباجر نشن البنات الصبح ..متفقات يظهرن بعد الصلاه ويشلن الدراجات يلعبن ابهن قبل لا ينشون الشبيبه ..
ميره : ياي برد والله بموت صبرن خلن الشمس تظهر ليش مستعيلات ..؟
وضحى : ماعليج تلبسي كوت وبتدفين وبعد اللعب بيدفيج .. يالله عاد
ميثا : ياربي موت ماروم انا اتحرك تعالن بنيلس بنوري الضو وبنعدل جاي
وضحى : ههه مالت عليكن مابنخلص جيه .. كل مااقولكن شي قلتلي تبن جاي
ميره : ابى اعرف ليش انتي مستعيله على اللعب صبري بنحط شي في بطونا ندفابه شوي ههه
وضحى : زين يالله تريقن خلنا نخلص ونسير
ميثا : والله ادفع مليون واعرف الوضيحي شو الي في بالها ومخلنها مستعيله على الطلعه جي؟
وضحى : قبل خلي يكون عندج مليون خلاف راهني على انج تعرفين الي عندي ههه
ميره وهي تناظر وضحى بطرف عينها : احم .. وضاحي جنج صدق شي في بالج ومستعيله علشانه .. اعترفي شوه ..؟
وضحى : لا تسولي إشاعات ماشي عندي .. يالله قومن ماشي وقت ههه يوم بنرد يتتريقن..
وضحى غصبت على البنات وظهرن على الدراجات .. المكان كان هاادي و وايد برد ..وطلعن في طريقهن.. وهن متعودات ياخذن طريق اليبل لانه فاضي ومحد ناس .. وفي نفس الوقت كانت المناظر تهبل ..
وقفت وضاحي على مكان مرتفع وتمت تطالع لبعيد.. وضحى كانت تتريا حد .. كانت تعرف ان في حد يكون موجود هالوقت ونفس هالمكان .. وراحت تبى تشوفه .. كانت تفكر وبالها مشغول فيه..
ميره : وضحى انتي تتريينه ..؟ تتوقعين انج بتشوفينه هنيه ..؟
ميثا : انتي بعدج مانسيتيه ..!! وضاحي لاتتخبلين شو تبين به .. هذا مانعرفه منوه ولا شو من صيره ..؟
وضحى : ههه انا مااباه بس عندي فضول .. خاطري اعرف اذا هوه بعده على عادته الجديمه والا لا ..؟
ميثا : ههه اذا هوه من كم سنه هنيه وعلى خيله معقوله السنه بتتغير العاده .. لا انتي قولي ان خاطرج تشوفينه .. وفكي عمرج
ميره : ههه الفارس الحين راقد لاتتعبين عمرك وتتريينه .. يالله ردينا انا يوعانه .. لاتقولين انج بتخلينا نيلس نتريا لين حضرته ينش من رقاده ويشرف ..!!
تمت وضحى ساكته شوي وتفكر وماتبى ترد البيت الحين ..
وضحى : هذا وقته ليش تأخر .. يمكن يكون مريض والا شي بلاه ..؟
ميثا : ويمكن يكون عرس وراقد ويا مدامته الحين .. يالله يالله روحنا .. خلاص راحت علينا
وضحى : ههه الله يسقيج حته هذا حطيتي عينج عليه

ميره : وضاحي شوفي ..... مب هوه هذا ..؟

دق قلب وضحى بسرعه والتفتت تشوف ... كان هوه .. كان على خيل اسود وعنده مجموعة خيول تركض وراه.. تمت واقفه تطالع .. هلا والله.. قالت في خاطرها .. والله ان لك وحشه .. وحشني هالخيل وراعيه ..
كان الخيال ماخذ عقل وضحى من كم سنه .. كانت متعوده عليه كل يوم تشوفه من اييون العزبه .. ماكانت تعرف منو هذا .. !! بس كانت تعرف انها من تروح العزبه اكيد بتلقاه .. كان فارس .. الكل كان يطريه .. يقولون انه يعيش في مزرعه كبيره وراعي خير .. وهله من الكباريه .. ولكن هوه مايفارج هالمزرعه وحياته فيها .. ومخلي المدن ومايدانيهن .. ومودر السيارات وكل شي .. كان الفضول يذبح وضحى وتعرف عنه اكثر .. !!!
ميره : ها مليتي عيونج منه .. خلاص ارتحتي ههه
ميثا : لا يمكن بعدها شوي .. صبري خليها تتهنى بشوفة حبيب القلب ههه
وضحى : ههه بس سكتن عاد شو حبيب القلب بعد .. عقب بصدق كلامكن وتراني با حبه صدق ..
ميثا : ليش وانتي بعدج ما حبيتيه ..؟ههه
ميره : مب جنج مظهرتنا بلا ريوق ومربعتنا في هالبرد عسبه ..؟ والحين يايه تقولين با تحبينه !! ههه
وضحى : يو ووهوه منكن والله تراكن تخورطن وايد .. انا ماحبه ولا بحبه بعد .. شباه ماناقصني الا اني احب هذا..
وفي خاطرها تقول .. فديته .. هوه صح شاغلني وايد .. بس مااقدر احبه .. شو بيقولون عني ..!! تحب واحد لاتعرفه ولا يعرفها ولا هوه يدريبها حته.. بس يكفيني اني اشوفك واحبك حته لو من بعيد .. والله يهنيه ويحميه يارب
ميره : وشو بلاه هذا ..!! هذا فارس وريال ولد عرب .. يعني مافيه عيب علشان ما تحبينه ..؟
وضحى : انا مابحب واحد مااعرفه .. يالله فديتكن ردينا البيت .
ردن البنات صوب اهلهن .. كان عقل وضحى مشغول بالفارس وماخذ كل تفكيرها.. ميره وميثا فاهمات الوضيحي وشو في بالها .. بس ماحبن يحرجنها بكلامهن يوم هيه ماتبى تقول الي عندها الهن ..