كل من أرادة ان تسحر زوجها بسحر

هذه طريقة فعالة ..
جربوها ولن تندموا ..
1- زوجك ليس نداً لكي ..
زوجك رجل ..
له كرامة وكيان وشخصية تمتلئ بالشموخ والكرامة وعزة النفس ..
فلا تكوني ندا له ..... وين المشكلة؟؟ !!
2- بيتك جنة .. وأطفالك هم عصافير الجنة ..
فلا تجعليهم غربان تحوم حول الزوج حين يحتاج للهدوء ..
الانسحاب أحيانا مفيد جدا,, وين المشكلة؟؟ !!
3- خليه يفتح موضوع جدي معاك ..
اتركيه يناقش حتى النهاية ..
إذا قرب يخلص فاجئيه بالعبارة التالية : بس في نقطة مهمة نسيتها ..
راح ينتبهلك ..
وأكيد راح يسأل: وش هي ؟؟!! ,, قولي : إنا أموت فيك .. وين المشكلة؟؟ !!
4- كل الأمور تحلينها أنتي ؟؟!! برافو ..
كفو والله وعساك عالقوة ..
بس مو ضروري تعيرينه ..
دعي له مساحة يتحرك فيها ..
شاركيه بالقرارات ...
ارجعي له دائما ..
حتى في الأمور المحسومة سلفا ..
خليه يحس أن له دور مهم مو سبير طايح .. وين المشكلة؟؟ !!
5- دائما دعيه يشعر انه القوة الكاملة في البيت ..
دعيه يشعر انك ضعيفة لكن مو بشخصيتك ..
بل بجسمك ,, الجأي له مثل الأطفال ..
حتى لو أصبعك أنجرح ... عطيه بلا ستر وخليه يلف أصبعك .. وين المشكلة؟؟ !!
6- خليه دايما يحس انك بحاجته ..
وان عداداتك وبوصلاتك ما تشتغل ألا بوجوده .. وين المشكلة؟؟ !!
7- أشعريه أن شخصيته هي الأقوى ..
حتى لو كنتي كونداليزا رايس .. وين المشكلة؟؟ !!
8- العطور السحر كله ..
اجعلي بيتك مريحا للأعصاب ودايما استبدلي عبق البصل والثوم اللي تحوس في البيت ..
برائحة معطر الجو إير ويك برائحة الورد << دعاية مدفوعة الثمن خ حواس الأنف مفتاح الدماغ ..
9- يقولون الرجل طفل كبير ..
أنا أقول الرجل جنين وليس طفل ..
الطفل ممكن ينزف... ينطق ..
بس الجنين محمي بحنان رباني و بعالم هادئ بتدليل أمومي ..
الرجل مهما لقي من صفات رائعة في زوجته ..
دائما يبحث عن حنان أمه فيها ..
والحنان يلين الصخر .. وين المشكلة؟؟ !!
10- كوني له أمة يكن لك عبدا .. نعم لاتستغربين !!!
صيري صديقته وقت الضيق ..
أخته وقت الفزعة و أمة وقت الدمعة ..
حبيبته لما كل الدنيا تخليه وزوجته لما يضيع ..
و بنته لما يحتاج يحس بالألفة ..
كوني له كل نساء الأرض .. وين المشكلة؟؟ !!
11- علمي أولادك أن يقبلوا رأسه كلما رأوه ...
لا تقولين الزمن تغير وما عاد أحد يبوس رأس أحد
كل شي ممكن يتطور ..
بس يبقى احترام الأب هو الجهل الوحيد اللي لازم نزرعه بقلوب أولادنا ..
وباستماتة.. وين المشكلة؟؟ !!
12- نسى هدية العيد لولده أو بنته ..
::×:: عادي ::×::
اشتري هدية وحطي عليها أسمه وجهزيها له ..
أو إذا انشغل قدميها باسمه فنتيجة انتماء الطفل لأبويه انتو الاثنين راح تحصدونها ..
مو بس هو ..
بس لا تنسين ترسلي له مسج تعلمينه بالهدية ..
لا يصير مثل الأطرش بالزفة .. وين المشكلة؟؟ !!
13- أحذري من عبارة أبوك لاهي عنك ..
شدعوة داري عنك و ليش وينه أبوكم ,, أبوك مو فاضيلك ..
الطفل ما ينسى قومي أنتي بالمهمة ..
أو على الأقل لاقي عذر مناسب يكبر الأب بعين عياله ..
مو يكرهونه .. وين المشكلة ؟؟ !!
14- تتضايقين من نظراته لمذيعات القنوات اللبنانية وهيفاء وهبي؟؟ !!
قهر مو ؟؟ !! غلطان ..
اسألي نفسك سؤال واحد هي امرأة وأنتي مو امرأة؟؟ !!
ليش تخلينه يطالع برا وأنتي موجودة ؟؟ !!
أيش ناقصك ؟؟ !!
ليش ما تصيرين أنتي لبنانية بنكهة الدرابيل والهيل ..
يعني خليجية النكهة ..
أيش محتاج الموضوع أم ..
قصة شعر؟؟ !!
ريجيم ؟؟ !!
صبغة حلوة ؟؟ !!
ابتسامة جميله ؟؟ !!
تدليع؟؟ !!
وين المشكلة؟؟ !!
15- دلعيه ثم دلعيه ثم دلعيه ..
حبيبي ,, قلبي ,, حياتي ,, ما في منك ,, مشكور عساك عالقوة ..
صباح الحب ,, مساء الورد ,, تصبح على حب ,, عيوني لك ,, أنت تأمر ..
ومن هالحتسي .. وراح تشوفين كيف راح تضيع علومه ..
اعتبريه موضوع تعبير لازم تكتبينه في المدرسة ويتوقف عليه تخرجك... وين المشكلة؟؟ !!
16- يوه ليش ما جبت الطماط ...... انا لله ... إنا كل ما أوصيك على شي تنساه !!!!!!
والله لو رايحة أنا أبرك !!!!!
ليش ليش سواق هو؟؟ !!
شوي شوي ..
صحيح مهمته وشغلته وواجب عليه ندري ..
بس كان ممكن لما تكتشفين النقص تقولين الآتي مع ابتسامة ناعمة ..
عادي حبيبي ولا يهمك يعطيك العافية يا قلبي ..
روح أنت الحين وأنا أسويلك كوكتيل عالسريع ..
حرام يتعب وما ندلعه !!!! ما يصير ..
حتى لو أكلتك كلها تعتمد على الطماط وخير يا طير ,, تتدبر ..
لو تفكرين شوي راح تعرفين أنها تتدبر.. وين المشكلة؟؟ !!
17- لا تنتقدينه أبدا ..
حتى لو كان من رأسه لساسه عيوب ..
حتى لو كان صبار كله شوك ..
الصبار ترى داخله مويه وعلشان توصلين للمويه لازم تشيلين الشوك وجربي شيليه بسرعة ومرة واحدة ..
ما تجنين ألا الألم ..
بالحب والحنية والصبر كل شي يصير ..
حتى لو طولتي تشيلين الشوك ..
راح يجي وقت تلاقينه هو يشيل معاك .. من كيفه .. وين المشكلة؟؟ !!
18- إياكي وإياكي أن تظهري عيبه أمام الآخرين الرجل ما ينسى ..
والشعور بالإحراج يخليه يدفن بقلبه ضيق عليك ما يروح بسهولة وخليك ستر وغطا على عيوبه ..
حتى لو تافهة وعادية.. وين المشكلة؟؟ !!
19- خلي ايدك بإيده ..
خليه يحس انك مستأنسة لوجوده جنبك ..
مو تنتظرين الساعة اللي يروح فيها برا ... وين المشكلة؟؟ !!
20- طلعي الشغالة برا أظن الدوام الجزئي كافي ..
هذي مملكتك لا تتنازلين عنها ...
وين المشكلة ؟؟ !!
الواحدة منا إذا حبت شغلها تكرف فيه بدون حساب ..
وبابتسامة.... مو بيتك أدوم لك؟؟!! .. وين المشكلة؟؟ !!
21- عطيه حريته ..
خليه يطلع الشاليه أو المخيم مع الربع ..
خليه يتنفس ..
وراح يرجع لك مشتاق وممنون... وين المشكلة ؟؟ !!
22- تعلمي الإبداع بالطبخ ..
نوعي بأكلاتك ..
حسسيه أن ذوقه مهم عندك... وين المشكلة؟؟ !!
23- جددي بنفسك وخليك أنيقة وكشخة .. وين المشكلة؟؟ !!
24- تذكريه برسالة على الجوال مو لا تنسى العيال ولا مر الجمعية ..
قولي له كلمة واحدة بس ..
اشتقتلك .. وين المشكلة؟؟ !!
25- لا تخالفينه قدام عيالك خلي رايك من رايه وعيالك لازم يفهمون هالشي ..انك معاه مو ضده ..
ولا تعاندين ..
لو شلتي أيدك من ثقب السفينة عناد ..
راح تغرق السفينة فيكم كلكم.. وهنا المشكلة منقول