كيف أصارح زوجي تجاربكم يا بنات

السلام عليكم ورحمة الله وبركاته
صبآح / مسآء الفل واليآسمين
أخباركم يا أحلى فراشآت
الموضوع هذا محيرني شخصياً ويمكن فيه بعض البنات مثلي
وكثير أفكر فيه ..
فقلت أطرح الموضوع عليكم
وكل وحده تعطينا رأيها أو حتى تجربتها الشخصيه
واحتسبوا الأجر لأنكم بتفيدون أخواتكم
طبعاً مثل ماهو باين في الموضوع .. كيف أصارح زوجي ؟
مثلاً :

• أنا إنسانه عاطفيه يهمني الكلمه الحلوه ،، القبله ،، الضمه ،، وهو ولا همه .. الرومانسيه صوب وهو صوب

ما تجي رومانسيته الا في الأوقات اللي تعرفونها ...
يعني مو لله .. ساعة ما يحصل اللي يبغى خلاص
ما أقول أبي مثل المسلسلات والأفلام وهالخرابيط لا طبعاً أصلاً كل وحده عاقله ما تؤمن بهالأشياء
لكن بحدود المعقول كل أنثى تحتاج للعاطفه أكثر من أي شيء ثاني؟
أحياناً أبادر أنا وأقول يمكن يفهمها أو تكون بدايه للتغيير
لكن الرجال يروح تفكيره للشيء الثااني
طيب أنا محتاجه شيء يطلع من القلب مو بس وسيله علشان يحقق اللي بباله
كيف أوصل له هالفكره ؟

• أسلوبه في شيء معين مو عاجبني ولا ودي أجرحه ..

بنفس الوقت الأسوب هذا مره يقهرني كيف أوصل له فكرتي بدون ما ألمس مشاعره ؟

• بعض الكلمات اللي يقولها تجرحني وتحسسني بالإهانه وهو موو حاس أبداً ويعتبرها كلمه عاديه

كيف أفهمه شعوري وبنفس الوقت ما أحسسه بالغلط ؟

• داايم يقولون ان الرجل ما يعبر عن حبه بالكلام لكن بالأفعال

طيب خلونا من الكلام وين الأفعال هاذي ؟؟ إذا عند الفاتورة كل شهر سالفه ودخلة السوق بالمحاولات وعسى
وكل ما يعطيني ريال يقول خلاص هاذا يكفي .. ولو طلبت زياده معقوله ليش،، ومافيه،، وأخذتي اللي يكفي ،،و ،،و
وإذا طلع كم ريال قال لي خلاص ماعاد فيه شايفتني الراجحي ؟؟
مع أنه ميسور الحال والحمد لله يعني مو قاعده أضيق عليه أبداً بالعكس إقتصاادية في كل شيء
الموضوع هذا يقهر ويحسسك بالإهاانه حتى تقولين عساني أتوظف وأفتك
طيب ما توظفتي ولا قدرتي تتحملين الأسلوب هذا .. كيف تفهمينه مشاعرك ؟؟

• ما يهتم بنفسه الا بالأعياد وإذا طلع لأصحابه وأنت تتمنين تشمين ريحة العطر منه وهو مطنش لا لبس ولا عطر ولا زين كيف توصلين له رغبتك ؟

بنآآت أدري طولت وهذرت وااجد لكن أتمنى تتفاعلون مع الموضوع
وكل وحده تعطينا رأيها أو تجربتها
وان شآء الله يكون فيه الفائدة للجميع
وهاذي وردة لكل وحدة ترد ودعوه حلوه
ربي يوفقها ويسخر لها زوجها ويسعدها دنيا وآآخره
آآآمي،،،ن