كيف تعرفتي على خطيبك أو زوجك حياكم

يا حظي انا اول من رد هذي
بس ما فيه احلى من قصتي
تخيلوا انا الصيف مو هذا الي قبله رايحين دبي كنت امشي اناوامي واختي مع بعض وبنفس السوق فيه اخوي وولد خالتي وصديق اخوي
امي واختي دخلوا محل وانا كنت في المحل الي قبله وانا مشيي بطئ عكسهم فلنا طلعت من المحل ما لقيتهم عاد انا خوافه وموبايلي كنت ناسيته في الهوتيل
لما طلعت من المحل ما لقيتهم (انا كنت امص حلاوه مص عرفتوها حلاوه كذا صغيره) فمن الروعه اني ضيعت اهلي>>>عاد اختكم في الله خوافه مره<<< من الروعه غصيت بالحلاوه خلاص ما قدرت اتنفس وكنت بنص السوق كذا وقفت الناس استغربوا شكلي لاني كنت اكح (مبين علي اني غصيت بشي) وبدا وجهي يزرق
مادريت الى يجون ولدين سعوديين زي واحد مسكني من ورا وحط يده تحت صدري و قاعد يطق ظهري كان يحسب اني شرقت بمويه او شي والثاني كان قدامي يوم شاف فكره صديقه ما نفعت سحب لثمتي (انا كنت لابسه اللثمه) انتم تخيلوا الوضع الناس تجمعوا علي ولا كان في الليل يعني السوق زحمه وفتح فمي ودخل اصبعه يبغى يحاول يطلع الحلاوه والحمد طلعها وانا الحين حيه ارزق بس مسكيين لما طلعها استفرخت عليه وجا على طرف بلوزته تخيلوا الفشيله >>>في هذي اللحظه لما كان الولد ماسكني من ورا والثاني فاتح فمي يطلع الحلاوه كان اخوي وصديقه ولد خالتي توهم جايين يشووفون ليه الناس متجمهرين فلا شاافوا >>>>
طبعا اخوي ولد خالتي عيونهم ما جت في جبهتهم ولا عصبوا ابد لانهم ما يدرون وش السالفه يحسبون ان احد بيخطفني ولا شي(شوفوا تفكير العيال كيف) طبعا ولد خالتي انا من فتره بديت اتغطى عنه بس هو يذكرني عشان كذا تنح وصديق اخوي ما يدري وش السالفه وكان يقول لاخوي ولد خالتي ياليتني بدال ذا العيال >>>>في هذي اللحظه لف عليه ولد خالتي ةسكته واخووي جا عند الاولاد وشوي ويطقهم بس لما عرف السالفه تشكر منهم بس كان معصب شوي
ومسكين صديق اخوي الى الحين متنح
طبعا قبل كذا اول ما طلع الحلاوه قال الولد بسرعه احد معاه مويه يجييبها جا ولد سعودي وعطاهم مويته وشربووني المويه حقه الولد >>>يع <<انا عييت بس شربوني المويه بالغصب
بعدين عادي قمت ومن التناحه رحت للولد الي عطاني مويته وعطيته المويه>>المشكله القاروره فاضيه بس من الروعه<< وقلتله شكرا وانا اصيح لان الناس والعيال يطاالعون ويسألوني ها كيفك الحين وبعدين جا الولدين واخوي عندي لان الولدين كانوا بيعتذرون انهم يعني مسكوني واني كنت في احظان واحد منهم>>على قوله ولد خالتي<< قلت لا عادي انا الي آسفه اني احرجتكم وتأسفت من الي استفرغت عليه وكنت توني شاريه تيشيرتات لاخوي رحت عطيته وحده منهم عشان بلووزته انا وصختها الله يكرمكم
وبس
بس ايش صار بعدين
طبعا ولد خالتي من زمان يبغااني بس انا ما ابغى اقارب ومصر انه يبغاني فبعد ما شافني اصر ورجع كلم اخوي بس انا رافضه
وصديق اخوي كان هناك في دبي دائما يقول يا حلوها البنت هذيك>>>يقصدني انا << طبعا اخوي وولد خالتي ساكتين لما خلاص وصلت مع اخوي قاله خلاص اسكت ذيك البنت اختي
فلما رجعنا الرياض بعد شهرين خطبني صديق اخوي بس انا رفضت لان بيني وبينه بس 3 سنين
وبس انتهت السالفه على كذا
بس في بدايه الصيف هذا الي راح دقت وحده على امي وخطبتني
وسألنا عن الولد اخلاق وكل شي
فحددنا يوم يجي يشوفني
المفاجئه اني لما دخلت تخيلوا مين صار الولد
صار الولد الي استفرغت عليه تخيلوا وكان لابس التيشيرت الي عطيته بعد ما وصخت حقه
طبعا هو كان عارف انها انا بس ما في احد من اهلي كان يدري الى اخوي لما فتح للولد الباب عرف (طبعا اخوي ماعصب)
طبعا انا لما دخلت ما انتبهت لوجهه بس لما جلست ورفعت راسي من الروعه قمت وتنحت في وجهه بعدين اغمى علي ما لقيت نفسي الى على الكنبه وقداامي ابوي واخوي وعريس الخفله وعمي
بعد اسبوعين ردينا عليهم بالموافقه
والحين انا توني متملكه يمكن من شهر وقاعد يذكرني بوقف دبي وتخيلوا الولد الي صار معاه الي مسكني من ورا ميين صار ؟؟؟؟؟
صار
اخوه يعني اخوه حافظ وجهي
عاد يقولي انو التي شيرت من اول ما لبستها الى الحين ما غسلتها ابد عشانها مين ريحه الحبايب ويقول اني حلفت من بعد الموقف الى صار اني اخطبك والبس التي شيرت لما اجي اشووفك
بس ما سألتوا من وين جاب الرقم
تخيلوا اول ما طلعنا دخل كل محلات السوق وقعد يسأل اذا كنت حاطه رقمي او لا الحمد لله اني ما احط رقمي كنت حاطه رقم الهوتيل وتحويله الغرفه
فاتصل على الهوتيل واخذ رقمنا في الرياض
شفتوا المشاوير
بس ادعولي انو ربي يكتبلي الخيره المباركه ونولني الي في بالي
وبس

واو ماشاء الله عليك ,, قصتك فله
وربي ضحكتيني ههه ..
يالله يارب يسعدك ويوفقك .. بس بجد قصتك قصه ..
ههه الله يوفقك يارب ..
وينولك الي في بالك ..
انا أكتب لكم قصتي قريب بعد ..
مشكورة على مرورك وقصتك الروعة

صراحة قصتك خطيره ولا فلم هندي .............. بس انشالله ربي يتمم لك على خير وينولك كل اللي فبالك
المهم انا مملكة لي 5 شهور وخطيبي يصير ولد عمتي الحين كل وحدة بيجي فبالها انا من احنا صغار نبي بعض للأسف لأ لإن بيني وبينه 10سنوات يعني عمر مستحيل يفكر فيني وانا عمري 10 سنوات وهو تقريبا20 المهم انه كان يلعبني وانا صغيرة ويوديني البقالة ويوديني يشتريلي العاب بس برضو كان يسوي كل هذا لي من دون البنات اللي بعمري بدون ما يحبني على ذمته هو الحين يقولي ان شي كان يشدني لك من انتي صغيرة بس عمره ما جافباله اني اكون حلاله بيوم من الأيام المهم نرجع لموضوعنامرت الأيام وجت الأيام والعروسة الصغيرة كبرت وخلصت الثانوية ومن عقبها وعمتها حاطة عينها عليها وتلمح من هنا وتقول لمحمد اللي هو خطيبي من هنا لحد ما الصدفة جمعتنا بسفر ه للشرقيةورحنا احنا وهم عند عمتي وطبعا بيت واحد وطلعات وحدة وهناك شافني وكان له فترة طويلة مو شايفني وطبعا انا كمان ما كنت شايفته وبصراحة من اول ما شفته دق قلبي ترى صدق مو كلام مسلسلات ا لمهم بديت احس بالنظرات وكان بأي وسيلة يحاول يكلمني المهم قعدنا فترة بالشرقية ورجعنا الرياض بعدها جاب رقمي من اخته وحاول يكلمني اكثر من مرة بس ما عطيته وجه لحد ما قالي بس قوليلي بتوافقي لو جيت خطبتك ما ابغى اجي واتفشل وياحرام يوم انه شافني كذا مارديت وماعطيته وجه قالي مو ظروري تردي برسالة نغميلي نغمة اذا موافقة او في امل انك توافقي واذا لأ لا تعبريني واتركيني بهمي طبعا انا رحمته ونغمتله بس مو على طول بعد فتره وبعدها على طول جا خطبني والحمدلله وربي يتمملي على خير ويتمم لكل البنات قولو آمين.

اهلين حورية ..
قصتك حلوة بعد ماشاء الله عليكم .. الله يوفقكم ويسعدكم ..
جاء دوري بكتب لكم قصتي ..
كانت ليلة وفاة جدي وفي رمضان وكان الكل منصدم ورايح في بيت جدي ومتجمعين هناك ..
الا مرت أخوي وانا جلسنا في بيتنا .. وقلت لها خلينا نفتح النت شوي .. فتحنا النت ..وفتحت مرت أخوي الماسنجر وكانت جالسه بنت خالها الي عايشة بره السعودية جلست تسولف معها وانا جالسه جنب مرت أخوي ..
قالت بنت خال مرت أخوي من جنبك قالت لها أخت زوجي قالت عطيني أتعرف عليها ..
خذت أيميلي وضافتني وجلسنا ندردش اسبوعين مع بعض ,, ماكان يخطر في بالي ابداً انها تخطبني لأخوها ..
كانت مجرد صداقة .. المهم بعد فترة فاتحتني بالموضوع أنا أستقربت وانصدمت بس سكت .. وللمعلومة ولامرة تقابلنا بس عالنت ,, وبعد مافاتحتني بالموضوع ألتقيت فيها في زواجها وشافتني وعجبتها
وعلى طول كلمت عمتها الي هي كانت بعد صديقة أمي .. وجاو خطبوني ..
ماكنت مفتكرة ليلة وفاة جدي يكون أول لقاء مع حماتي ( أخت زوجي ) !!
اصلاً كانت ذيك الليلة كيئبه لي وماكان يخطر ببالي أي شيء ..
بس سبحان الله
وبعد فترة رديت عليهم بالموافقه ..
وانا لي الحين أسبوعين من ملكت ...
عقبال لكم بنوتاات ..

الهم راكبني قصتك احلى قصة سمعتها بحياتيالله يوفقك ياربانا لسة ما انخطبت ان شاء الله انخطب بقصة مثل قصتك يا الهم راكبني هههبالتوفيق للجميع

والله حبيبتي انا زوجي ولد خالتي الله يخليه لي وكان زواجنا تقليدي بس كان خاطبني من اول ثانوي وهو في اول جامعة حتى ما اطير من ايده وجلس خاطبتي شي خمس سنوات وبعدين تملكنا في اول الشهر وتزوجنا يعني الدخلة في في اخر الشهر نفسه.... والحين صارلي ست سنوات متزوجة وعندي شمعتين ينورون بيتي سعود وراشد

الله يوفقكم ويسعدكم

الهم راكبني
بصراحه ماشاء الله قصت زواجك خطيره الله يخليكم لبعض ويديم المحبه
انا بالنوسبه ليه زواج تقليدي
خطبوني اهله لواحد من اقاربهم بس كنت صغيره مره
فرفضوا اهلي
وبعدها بسنتين خطبوني لزوجي
وتم كل شي الحمد لله
بس الغريب في السالفه اني مره شفت زوجي بالتلفزيون وماكنت ادري انه نصيبي
ياسبحان الله

اهلين الحزن الدفين وصدق سبحان الله والنصيب لما يجي ما يعرف وقت محدد ربي يوفقك انشالله