لب قلبك ي قصه حلوه ادخلوا ومابتندمون

في بيت سهى صديقة العنود
سهى أمها توفت بولادة أخوها الصغير سالم كانت الولاده عسره عليها ومو في وقتها كانت في الشهر الثامن الحمد لله بقدرة الله نجى الولد بس الأم توفت وعندها أخوها الكبير فيصل 23 يدرس بالجامعه واحد أهبل وفله يونس ويوسع الصدر ....أما أبوها تزوج بعد وفاة أمهم بشهور اضطر لان ولده سالم كان صغير ويبيله من يرعاه والحمد لله كانت زوجته يسرىتعاملهم كأنهم عيالها وما قصرت معاهم بشي إخوانها من أبوها راكان وعمره 10 سنوات ولينا وعمرها 6 سنوات ...<<نبذه عن العائله ههه
سهى الي كانت قاعده في الصاله :يو يمى فيصل متى بيجي
في دخلة فيصل عليهم الي سمعها: فيصل وجاء شتبين فيه
سهى: عمرك طويل ماشاء الله
فيصل : شخبارج يمى
يسرى: الحمد لله بخير أنت شخبارك وينك ما تنشاف
فيصل :موجود بس انتم ما تدرورون علي (يلف على سهى) والغاليه شخبارها شفيها تسئل عني
سهى : الغاليه بخير وشوفة عيونك بس اذا ما عليك أمر توديها السوبر ماركت
فيصل: بس ما طلبتي نتغدى ونعين خير وبعد العصر أوديج
سهى : أي عصر لازم ألحين العصر ببدأ أجهز البنات بيجون بعد العشا
فيصل: مدام فيها بنات يلا مشينا
يسرى: ههه وانت ما عمرك بتعقل أنا بقوم أحط الغدا أبوكم اكيد ألحين بيجي
سهى: لا صدق فصول عقب الغدى توديني فديتك
فيصل: وشو تعطيني
سهى: الي تامر به
فيصل: ام أفكر خليها بعدين
سهى : يعني توديني
فيصل : بعد الغداء فورا عشان يمديني ارتاح شوي قبل العصر
سهى: أوكي بقوم أنزل عبايتي من ألحين
فيصل: ما شاء الله عليج مطيعه فورا يعني فورا
من جهه ثانيه في بيت عبد العزيز
العنود: هنوف يلا قومي ننزل نتغدى
الهنوف : أحس اني شبعانه
العنود: نعم نعم والغدا ان شاء الله من بياكله
الهنوف : في ناس ثانين بياكلون ما في الا انا
العنود : في بس الغدا مسوينه عشانج يلا قومي عن الدلع تراني ميته جوع على لحم بطني من الصبح
الهنوف : يالشلخ والاسكريم الي كلتيه
العنود: هذاك ما يعتبر أكل بعدين ذكرتيني يلا عشان نحلي بالكيك
الهنوف: ما شاء الله على كثر ما تاكلين ما يبين عليج ما ادري وين يروح
العنود : قولي ما شاء الله
الهنوف : قلت لا تخافين مب معطيتج عين
العنود: تدرين قريت معلومله تقول ان الثرثره تساعد على الهضم فأنا مهما اكل بسرعه ينهضم الأكل فما يبين
الهنوف بطناز : لا ا أحلفي
العنود: والله
الهنوف : وانتي الحين قاعده تشرحين سبب عدم متنج
العنود: طبعا هذا سبب من الأسباب و..
الهنوف قاطعتها : أقول عن الفلسفه يلا جعت
العنود: عاش مصرف على قول عمي سلمان
ونزلو
بعد الغدا
طلعو فوق الغرفه عشان ينامون شوي في دخلتهم الا تسمع جوالها يدق وانقطع..
سهى: ياربي ماترد كله منك قلت لي فورا ونسيته
فيصل:انزين ارسلي لها انج انتي
سهى : يو صح فكره ورسلت ( العنود ردي أنا سهى)
العنود : يو هاذي سهى
الهنوف: انزين دقي علليها أكيد تبغاج ضروري
العنود دقت عليها : الو
سهى: هلا والله
العنود: أهلين
سهى: سوري على الازعاج
العنود: أي ازعاج الله يسلمج قاعده اسولف مع الهنوف
سهى : وي أجل ما في نوم
العنود: لا يمى عاد كلش ولا النوم وخااصه بعد اخر يوم في الإختبارات لازم
سهى : اوكي ما أطول عليج بس ابيج تعطيني مقادير العصير
العنود: أي عصير
سهى: وفي غيره هذاك حق الفراوله والمنجى
العنود:احم احم الناس يدقون على العنود عشان ياخذون منها طبخات
سهى :مالت كلها عصير قالت طبخات
العنود:ههه حمدو ربكم عرفت أسوي شي
سهى: الله يستر ما يجينا شي منه
فيصل : ألحين كل هالزحمه عشان عصير صدق انكم حريم الشي الي في دقيقه يصير بعشر دقايق
سهى : أقول اسكت بس
العنود: تكلميني
سهى: لا لا يلا عطيني المقادير
العنود: منجى مثلجه مع حليب سائل واخلطيه بالخلاط
سهى: كم كيس منجى
العنود على حسب الكميه الي تبينها
سهى : اوكي
العنود: فراوله مثلجه مع فيمتو وسكر طبعا هاذي الطبقه خليه أثقل من الي قبل
سهى: أسوي ألاولى بروحها والثانيه بروحها صح؟
العنود : أي وبعدين حطي قطعة أيس كريم فوقها
سهى: اوكي مشكوره
العنود: العفو
سهى: يلا نشوفج اليوم
العنود: ان شاء الله الساعه 8 حكم
سهى: ههه ان شاء الله
العنود: يلا مع السلامه
سهى : باي
أول ما سكرت سهى قالها فيصل: ياحليلها عالعنود شكلها رجه
سهى: أي رجه الا رجه وبقوه بس تهبل فديتهامافي أطيب منها في الدنيا
نرجع للبنات
الهنوف:اف اف ما أقدر أنا على الطباخه
العنود: شفتي واله اني موهوبه بس مااحد حاس فيني
الهنوف بطناز : أي موهوبه الحمد لله سهى تداركت الوضع واكتشفت مهارة الطبخ عندج
العنود: مالت عليج تطنزين اسم الله عليج يالطباخه
الهنوف: ههه ترى أعرف أسوي بيض وشاهي وقهوه وكبسه ومكرونه فطاير وحلى
العنود: امحق حلى ..أجل من الي سوى الحلى ذاك اليوم وطلع مر من كثر الكاكاو الي فيه والا المكرونه الي كلها ملح
الهنوف: هذاك أول ألحين كبرنا
العنود:ايه كبرنا مرره ما كأنها قبل شهرين أو ثلاثه
الهنوف : ماشاء الله عليج مانسيتي
العنود: شلون أنسى بغيتي تذبحينا بأكلج
الهنوف : على الأقل أحسن منج أدخل المطبخ وأجرب
العنود: لا يمى أنا ما أقص على روحي ما أعرف يعني ماأعرف ما أحب أتفلسف زي بعض الناس
الهنوف: انزين خلينا ننام الساعه 2
العنود: عاش مصرف ههه
الهنوف ظربتها بالمخده على وجهها وقامو يضحكون بعدين انسدحو وناموا....<<<
الساعه 5 العصر
ريم : يلا يمى أنا طالعه تامرين بشي
ساره: لا سلامتج سلمي على خالتج خلود وجدتج والكل
ريم : ان شاء الله
ساره : الا تعالي الهنوف والعنود قعدو من النوم ؟
ريم: ما ادري عنهم ..يالله مع السلامه
طلعت ساره تصحي الهنوف والعنود من النوم
ساره: العنود العنود
العنود :هاه
ساره: يلا قومي ...الهنوف الهنوف أنتم ماينفع معاكم إلا....( وتفتح الستاره)
العنود: يمى
ساره: قومي ألحين صليتي العصر الساعه خمس يلا قوموا
الهنوف نقزت من مكانها : الساعه خمس ما بقى شي على المغرب (وراحت الحمام تتوضأ)
العنود: يمى ترجع الهنوف وأروح
ساره : يلا لا تنسين يبيلج وقت عشان تتجهزين لعزيمتج
العنود : ان شاء الله
طلعت أمها من هنا وغمضت عيونها من هنا بس وين تنام والهنوف موجوده

وصلت ريم بيت عمها عبد الله فتحت الشاغله لها الباب
ريم: وين دانه
ماريا : كلو روه بيت ماما فوزيه
ريم: كلهم؟
ماريا: ايوه كلو
ريم :طيب أوكي
فصخت عبايتها وعدلت شعرها وراحت بيت جدها دخلت من باب المطبخ سألت ميري قالت لها كلهم في الصاله راحت الصاله وشافتهم كلهم متجمعين
ريم: بو
الكل تخرع
دانه :ياحماره ولاتقولين انج بتجين
الجده: زوغتي قلوبنا صج ما تستحين
بدور: الناس يسلمون ما يقولون بو
خلود: مسكينه خلوها تاخذ نفس أول
ريم : شفتي خالتي كلوني وانا ما قلت الا حرفين باء و واو
شهد:وهاء انتي قلتي بوه ه ه
ريم: ههه فديتج تعالي سلمي علي جاتها ولمتها وباستها
دلال : حياج تفضلي
ريم وهي تحب راس جدتها: الله الله شو هالحركات
منى : هاذي حفله صغيرونه عشان دلال خلصت الاختبارات
بدور: ليش ما جبتي العنود معاج
ريم : والله قالت لي دلال بس بتطلع هي والهنوف عند صديقتهم
دانه تكلم دلال : انتي مكلمتها
ريم : الي فديتها أحسن منج تبلعين وناسيتني
دانه: والله جت على السريع بعدين توقعتج معزومه كالعاده
ريم: اسفط العزيمه
بدور: أقول عن القرقه تعالي اقعدي
الساعه 7وربع
سهى كانت برى في الملحق تحط الاغراض وترتبهم وأهلها كلهم طلعو عشان يخلون سهى وصديقاتها ياخذون راحتهم على انهم قاعدين في الملحق بس اصلا اربعاء وطالعين يتمشون
في بيت عبد العزيز:
العنود: هنوف خليج جاهزه بد نص ساعه بنطلع
الهنوف :جاهزه وقاضيه ما بقى الا أحط مكياج
العنود: واو ماشاء الله مره حلو
الهنوف: صدق
العنود : أي والله يهبل
الهنوف كانت لابسه تنوره رصاصي كاروهات وردي قصيره مع بلوزه ورديه وأطرافها نقش ناعم فيه زري (ترتر)
وكانت ماسكه نص شعرها الي تحت مخليته طايح والي مرفوع ملفلفته ومنزله خصلتين على عيونها وصندل وردي ناعم مو عالي مرره وسط طبعا مع اكسسوارات ناعمه <<عاد يالبنات تعرفون هالحركات
المكياج الي حطته ناعم يعني مو مكياج مره كح لرصاصي وظل وردي فاتح وبلشرو ردي وطبعا lipstick وردي فاتح <<<على فكره أنا اعشق الوردي
أما العنود كانت لابسه تنوره قصيره قصتها فرنسي من النوع الي يكون قطع مختلفه ألوان كثيره وكل وحده شكل وفيها زري مع بلوزه حمره جبنيز والأبه الصينيه وصندل الي يكون مسكر من قدام ومفتوح من ورى (شب شب) ولونه أسود لان أرضيه التنوره سوده وفوقها القطع مع شدو أسود بس حلو مو دفش وملمع للشفايف لأن حاطه ظل غامق وشعرها رافعته ومنزله خصل وحاطه مشابيك ألوان فيها لمعه <<أدري تعبتو من الوصف ههه بس أنا أحب أدقق ان شاء الله يكون ذوقي حلو ههه
الهنوف كانت ناعمه والعنود كشخه بس ثنتينهم حلوات
العنود دقت سونا <<الشغاله باإنتركوم وقالت لها تجهز الحلا الي بتاخذه معاها <<قالت لكم طباخه بس ما تحسون فيها
العنود بدق على سهى بشوف اذا تبي شي قبل مانطلع
الهنوف : يلا دقي ما باقي الا عشر دقايق ونطلع
العنود خذت جوالها ودقت عليها : يو شفيها ما ترد
الهنوف : دقي على البيت
العنود: اوكي ........ هم ما ترد
الهنوف : غريبه وينها
العنود: بدق مرره ثانيه على جوالها ...توت توت توت توت يو ماترد تدرين بدق على الرقم الي دقت منه اليوم أكيد عندها
الهنوف : ياخوفي حق السواق
العنود وهي حاطه السماعه على اذنها :عاادي قولي ياخوفي حق أخوها والا أمها
فيصل: نعم
العنود: نعم الله عليك أخوي ممكن أكلم سهى
فيصل في قلبه أكيد هاذي العنود من صوتها مبين عليها مرجوجه مبحوح بس حلو ههه
العنود: الو الو
فيصل : ايوه الو
العنود : ممكن أكلم سهى
فيصل : من معي بالأول
العنود:أنا صديقتها هي داقه علي اليوم من هذا الرقم
فيصل : أنت العنود ؟
العنود في قلبها وجع شدراه: ايه
فيصل: والله يا أختي ما أدري شقولج
العنود: سهى فيها شي ؟؟
فيصل : الصراحه إي سهى .....
العنود وهي خايفه : شفيها سهى ؟؟
فيصل: والله يا أختي ما أدري شقولج
العنود: سهى فيها شي ؟؟
فيصل : الصراحه إي سهى .....
العنود وهي خايفه : شفيها سهى ؟؟
فيصل الي كاتم الضحكه :والله هي في المستشفى
العنود: ليه عسى ما شر ؟؟
فيصل: اليوم وهي طالعه من السوبر ماركت صدمتها سياره وعلى طول انقلوها للمستشفى و....
العنود انصدمت اشهقت شهقه قويه الهنوف خافت وصرخت : شفيج ؟؟
العنود ودمعه على خدهاوصوتها متغير: وش صار؟؟
فيصل : ادعيلها بالرحمه
العنود وهي تشهق وتصيح : لا مستحيل هي توها مكلمتني أنت تمزح صح ؟ ...وتصيح
الهنوف خافت من شافت الهنوف كذا خذت التلفون وشافت الخط انقطع : العنود شفيج شصار لسهى ودموعها على خدها تنزل
العنود وهي مو قادره تتكلم من كثر الصياح :سهى ..وتشهق.. ما...وتشهق.....تت ...ماتت وتصيح
الهنوف ماهي مصدقه دموعها قامت تنزل ومو عارفه شتسوي
من جهه ثانيه فيصل تحسف انه قالها: ياربي أنا شسويت ما توقعتها بتسوي كذا ياحليلج يا سهى أثرج غاليه على صديقاتج وبعدين هاذي العنود على طول صاحت وخذ الجوال ودق على رقم العنود
العنود وهي تصيح وتكلم الهنوف :توها كانت تكلمني وتضحك معاي شللون تموت شلون كانت مستانسه مخلصه اختبارات ..وتشهق.
الهنوف الي كانت اهدأ من العنود كانت دموعها تسيل وهي ساكته بدون أي انفعالات
العنود على هبالها ورجتها بس في المواقف الي كذا ما تستحمل وخاصه مع صديقاتها لأنها دائما مواقف وياهم وهبال والصراحه ماتنلام وسهى كانت معاها من المتوسط وهي صديقتها مره
دق جوال العنود الهنوف خذت الجوال لان العنود كانت حاطه راسها على السرير وتصيح
الهنوف وصوتها مبحوح: هنود شوفي مو كأنه هذا نفس الرقم
العنود لفت وجهها الي كان مليان دمع والشدو الي على عيونها نازل : أي هذا
الهنوف : ردي أكيد شي ضروري
العنود تمسح دموعها وتاخذ الجوال من الهنوف رفعت وهي تشهق وصوتها مره متغير: ألو
فيصل ياويلي أنا شسويت البنت شكلها ماتت عز الله رحت فيها : الو السلام عليكم
العنود: وعليكم السلام
فيصل :لو سمحتي بقولج شي بس لا تعصبين ولا تصارخين
العنود الي انصمت من الي قاله : خير
فيصل : كنت أمزح معاج
العنود: وش تقصد؟؟
فيصل : يعني سهى لا ماتت ولا شي حية ترزق والحمد لله وأنا بس كنت أمزح معاج
العنود الي كانت معصبه وواصله حدها بصراخ: مين حضرتك عشان تمزح معاي شنو شايفني لعبه تقولي ماتت بعدين ترجع تقولي لأ ما ماتت أنت ما تستحي الشرهه مو عليك علي أنا البقره الي صدقتك .
فيصل: أو مره أشوف بقره تعترف وتقول أنا بقره
العنود وصلت معها وسكرت السماعه في وجهه
العنود بصراخ : حمار
الهنوف الي كانت مو فاهمه ولا شي : هي انتي شفيج تصارخين
العنود : أنا عمري شفت ناس بس زي هذا ما شفت صج قليل الأدب ما يستحي
الهنوف : فهمني شالسالفه شقالج ؟؟
العنود: ايش قال_ وتقلد صوته_ كنت أمزح وياج
الهنوف : يعني ؟؟؟
العنود: يعني وااحد كذاب ويستهبل
الهنوف: ههه ماتت من الضحك
العنود : وانتي الثانيه ليش تضحكين قايله نكته أنا ؟
الهنوف : أي نكته الا مسرحيه ولا بعد أحلى مسرحيه شفتها في حياتي
العنود : لا أحلفي أنتي بس ؟
الهنوف: والله .. الصراحه انتي الغلطانه أحد قالج صدقيه
العنود: حطي نفسج مكاني أخو صديقتج يقولج ان أختي ماتت ما تصدقين هذا انتي ما سمعتيه وصحتي شلون لو انتي الي سامعه الخبر بنفسج ؟؟
الهنوف : والله انا صحت من شفت شكلج الي يشوف يقول ميت واحد من أهلها
العنود : وسهى صدقتي ومكانة أختي بعد أصيح عليها مثل ما أصيح لأهلي
الا يدق الجوال وتشوف الا رقم سهى
العنود: هاذي سهى والله لاقولها عن الي صار
الهنوف : يالخبله مو وقته
العنود : الا وقته ونص
الهنوف : حراام عليج البنت مستانسه لا تخلينها تتخانق مع أخوها على شي ما يسوى
العنود : ودموعي ما تسوى ......وترد على الجوال
سهى : حشى وينج ما بغيتي تردين
العنود : هلا والله بس كنت اتناقر مع الهنوف
سهى : أي قعدو تناقر وخل يروح الوقت ولا تجون الا اخر الناس
العنود: لا تخافين ما اخرنا الا ...وتنقز الهنوف وتحط يدها على فم العنود
سهى : شفييج؟
العنود: وجع الو لا ولا شي بس الهنوف ذبحتني
سهى : شفت لج مس كول بغيتي شي ؟
العنود: لا سلامتج بس كنت بسألج اذا تبين شي قبل لا أجي
سهى : لا مشكوره يالغاليه بس تعالي
العنود: يالله مسافة الطريق وأنا عندج
سهى : أستناج يالله مع السلامه
العنود: مع السلامه
تسكر العنود : يلا الهنوف لبسي عبايتج
الهنوف : قومي صلحي وجهج أول
العنود: وش فيه وجهي ان شاء الله قمر
الهنوف : طلي في المرايه
العنود وتطالع نفسها في المرايه : يو شالهعيون الكحل كله نزل من الصياح الله لا يعطيك عافيه يا فيصلوو
الهنوف : انزين يلا بسرعه
العنود : اوكي دقايق بس
سهى أول ما سكرت من العنود كان فيصل توه داخل البيت ويضحك من الي صار له مع العنود وشاف سهى
فيصل : هلا والله بالغاليه
سهى : هلا فيك شفيك تضحك شكلك مستانس
فيصل : مستانس وبقوه
سهى :ونسنا وياك
فيصل : لا بس مسوي مقلب في واحد من الربع
سهى : أما انت ومقالبك
فيصل والله ما دريتي انها صديقتج كان قلبتي الدنيا علي الله يستر بعد هي لا يكون تقولج ؟اكيد بتقولها على الصياح الي سوته ماراح تخليني كذا بترد الصاع صاعين يو عاد سهى كلش ولا صديقاتها
سهى : هيي وين سرحت ؟
فيصل : ما سرحت ولاشي معاج
سهى : بتطلع ؟
فيصل: أي بس داخل اخذ شور وابدل واطلع ..تامرين بشي
سهى: لا مشكور
على الساعه 8 العنود وصلت مع الهنوف ودخلو الملحق
سهى: أما هاليوم يكتب في التاريخ العنود جايه أول الناس
الهنوف : هذا انتي قلتيها يووم فقط
العنود: مالت عليكم ..هاج هذا الحلى الي كنت مشتهيته هذيك المره
سهى : أي حلا وهي تاخذ الصحن وتفتحه يو ياقلبي شدعوه تعبتي روحج
الهنوف : أي تعب يا حافظ الله يخلي سونا
العنود: اقول انتي سكتي يا أم الفضايح ..تبتسم لسهى عادي تعبج رااحه
سهى : ههه مصره انتي الي مسويته
شوي الا تجي الجازي وأسيل ووهديل ونوره وساره ورشا و وفا <<هذا بنات الشله
والبنات يرقصون وردحه ووناسه عاد تعرفون البنات اذا تجمعوا
في بيت الجد وبالتحديد في بيت عبد الله _الله يرحمه_في غرفة دلال الي كانت قاعده على النت
دلال فتحت الماسنجر ولقت إضافه من صديقتها لطيفه (هاذي لطيفه كانت معها في المدرسه وجات لأبوها بعثه الى لندن قبل الأختبارات بأسبوعين وبعد ما وصلت لندن بأسبوع تقريبا دقت على دلا واتفقو ان اول ما تفتح لطيفه خط في بيتهم راح يتلاقون على الماسنجر وخذت ايميل دلال )المهم اول ما شافت الإضافه ltooooofh
وشافت مشتاق لبلادي أضافتها على طوول وكانت اون لاين
القمره دلول : هلا
مشتاق لبلادي: أهلين
القمره دلول : شخبارج والله وحشتينا
مشتاق لبلادي: بخير وعافيه ما تشوفين وحش
القمره دلول : متى فتحتي لج ايميل
مشتاق لبلادي: والله من فتره
القمره دلول : يو عاد انا لي تقريبا 3 أسابيع ما فتحت النت عشان الاختبارات
مشتاق لبلادي: ها شسويتي في الإختبارات ان شاء الله زينه
القمره دلول: والله الحمد لله عاد تعرفين ثالث يبغاله شدة حيل وانتي شخبارج مع الدراسه هناك
مشتاق لبلادي : الحمد لله زينه الىالان ماشيه والله يسهل
وتمو يسولفون
نرجع للبنات الي كانو في الملحق وفاتحين باب الملحق الي قدلمه بركه والجو روعه
سهى راحت تشوف العشا اذا جاهز ولحقتها العنود: سهى سهى انتظري
سهى وقفت : هلا
العنود : وين بتروحين
سهى: بروح أشوف العشا
العنود : اوكي بجي معاج
سهى : يلا
العنود تفكر ياربي أقولها لا ماله داعي اخاف تكبر السالفه بس يستاهل اجل الحركه الي سواها مو كبيره بس لو تدري الهنوف اني بقولها اخاف تزعل ..
تقطع افكارها سهى : عنود
العنود: هلا
سهى : وين سرحتي سنه اناديج وتغمز لها الي ماخ عقلج يتهنى به
العنود:ما ماخذ عقلي أحد لا تخافين
البنات في الملحق
أسيل كانت قاعده ويا هديل ويتكلمون عن محمد يوم جا للعنود اليوم ويطالعون في الهنوف
الهنوف كانت متضايقه من نظراتهم عاد هي خلقه ما تحب أسيل ما تعجبها حركاتها تحس انها وحده صايعه
شوي الا الهنوف قعدت مع نوره مقابلين هديل وأسيل
الهنوف: يوه تعبت من كثر الرقص
نوره : أما انا مو بس تعبت الا مت عاد وسوير معانا لازم نستهبل مايجوز عندها رقص زي الناس لازم هبال
أسيل: هنوف انقلبت طماطه من كثر الرقص
الهنوف في قلبها بدينا ابتسمت : مت من الحر
اسيل : طلعي بره الجو حلو
نوره : كانت بتطلع بس قلت لها تعالي قعدي معي
هديل: هنوف
الهنوف: هلا والله
هديل : الي اليوم ركبتو معاه انتي والعنود هذا محمدأخوها
نوره: وانتي شكو
هديل : سؤال ليه فيها شي ؟؟
الهنوف : لا عادي شدعوه أي اخوها
أسيل : اخوها ياحليله يهبلل يجنن
هديل : الا يطيح الطير من السما
أسيل : عاد كلش ولا النظاره الشمسيه الي كان لابسها
هديل : والا يوم يشيل الكبوس من على راسه ويطيح شعره على عيونه
نوره : حشا بل عليكم من بنات والله ما تستحون قزيتو الولد من ...الى
أسيل : حتى هو ما قصر
نوره: اكيد انتم الي متحرشين فيه وال قعدتو تقزون فيه وانتبه لكم عاد أسيل وانا اعرفج
الهنوف الي كانت واصله حدها من كلام أسيل وتنرفزت كل الي سوته انها لفت وجهها عنها
هديل حست ان الهنوف تضايقت: الهنوف شفيج ؟
الهنوف : مافيني شي بس بروح عند البنات
أسيل : يلا خل نروح كلنا ليش قاعدين هنا
الهنوف يعني الا تلحقني وجع :يلا قومو
نرجع للعنود وسهى
وسهى قاعده تشوف الأغرض حق العشا وترتبهم عشان تخلي الشغاله توديهم للملحق
العنود : أقول عندج شريط هذيك الطقاقه الي قلتي عنه ذاك اليوم
أي مو جود فوق في غرفتي ليه؟
العنود: ابي ارقص عليه
سهى : الحين عندنا الاصلي تروحين تاخذين التقليد
العنود : الطقاقه تونس اكثر وين حاطته انا بروح اجيبه
سهى : تشوفينه في غرفتي في الدرج لون الشريط ازرق مكتوب عليه (أغاني طقاقات )
العنود: مافي احد في البيت
سهى : لا تخافين الكل طالع
العنود: اوكي
سهى : والله البنات بفقعون عليج من الضحك انتي ويا هالطقاقات
العنود وهي تعلي صوتها لانها طلعت من المطبخ : مالت عليهم يلبعد عمري سوير هي الي بيعجبها
فيصل الي يوم طلع غرفته انسدح على السرير وراحت عليه نومه وقام على رنه الجوال خويه داق عليه قام بسرعه واخذ شور ولبس ويبي يستشور شعره لان كان مبلل وهومستعجل دور الاستشوار ما لقاه
فيصل: اكيد في غرفة سهى ..وطلع لغرفة سهى
دخل الغرفه وفتح النور وأخذ الاستشوار وتوه بيطلع الا يسمع صوت بنت ويركض ورى الباب
العنود: يو اللمبه مفتوحه وتدق الباب هل هناك احد ..أكيد ناسيه البه مفتوحه من الرجه الزايده
وتروح لعن الدرج الي فوقه المسجل وتفتح الدرج وهي تقول :
ياللي تطالع وكأنك ما تطالعني نظرتك حبيبي هاذي لاتكررها
صحيح شاطر لكن صعب تخدعني انا على الطاير افهمها واطيرها
فيصل : كان واقف زي الصنم انا عز الله ميت ميت الليله في التلفون مع هذيك والحين مع هاذي لو وصل لسهى بتحسبني متعمد يالله سترك ياربي اني عبدك ابن عبدك ابن امتك انقذني من ورطتي يارب
الا يسمع سهى : العنود العنود
فيصل بقق عيونه
العنود: هلا
سهى : لقيتيه والا أطلع
فيصل : لا ياربي ..لاإله الا أنت سبحانك إني كنت من الظالمين <<دعاء الكرب
العنود : لا خلاص لقيته <<طبعا كله بصراخ
تقوم العنود وفيصل عيونه متعلقه بفتحه الباب عشان يشوفها
خذت الشريط وهي تكمل
انا مزاجي واطيع الي يطاوعني ان كان لي خلق امررها امررها
وهي طالعه من الباب يو نسيت اللمبه وتلف وجهها على فتحت الباب وعينها بعين فيصل وعلى طول تلف وتسكر النور وتنزل
فيصل شافها بس هي طبعا لا لأن كان ورى الباب ومو مبين ويوم تطيح عينها بعينه كان طبيعي ومو قصدها بس فيصل هنا الي يشوف هي لا
فيصل الله العالم به في ذيك الساعه يحمد ربه على انه طلع من هالورطه والا يحمد ربه على الي شافه ؟؟؟
سهى :سنه ؟؟؟
العنود: بالموت لقيته انتي وهالدرج الي محيوس فوق تحت
سهى: ههه اوكي يلا نطلع ألحين بحط العشا تراني ميته جوع
العنود حتى أنا يلا مشينا
فيصل راح لغرفته واستشور شعره عالسريع وحط كبوس عشان مو مرتبه زين وطلع وهو طول هالفتره يفكر بالعنود ....
البنات بعد العشا بدو يطلعون الهنوف والعنود الساعه 11 طلعو وهم طالعين
سهى: اقعدو تو الناس
الهنوف : شوفي الساعه كم ؟11 أي تو الناس
العنود: امي ذبحتني اتصالات سهى ان شاء الله مره ثانيه
سهى بأسى: ان شاء الله عاد لا تقطعون
سلمت عليهم وطلعو وهم في السياره
العنود : والله استانسنا اليوم صح؟؟
الهنوف : الا استانسنا مووت
العنود: بس انهد حيلي احس اني داايخه ولا كأني نمت الظهر
الهنوف :أقول العنود قلتي لسهى الي صار
العنود: ليه تسألين
الهنوف : قبل لا تروح تحط العشا شفتج لحقتيها قلت أكيد رحتي تقولين لها بس يوم جات طبيعيه شكيت
العنود: ارتاحي ما قلت لها بس بقول لا تخافين
الهنوف تقلب عيونها وتلف وجهها على الشباك وقبللا تنزل بيتهم
العنود: يلا أشوفج بكره ان شاء الله بيت جدي
الهنوف: ان شاء الله يالله مع السلامه
العنود: مع السلامه وتسأل (إيشا)بابا جا البيت
إيشا الي هي الشغاله زوجه راجو :أي بابا جا
العنود: في نوم
إيشا: مادري
العنود: الله يستر ياخوفي يعصب عشان تأخرت
دخلت العنود شافت امها وطبعا لقت لها كم تهزيئه صغيره عشان تأخرت بس تعذرت لها ان اخر يوم الاختبارات ووناسه والبنات ما خلوها تطلع ومن هالكلام المهم دخلت غرفتها دخلت وخذت دش وطلعت وصلت الشفع والوتر <<هاذي عاده حلوه في العنود سمعت شريط حق محاضره دينيه وتأثرت منه ومن هذاك اليوم وهي تصليها >>ورمت روحها فوق السرير توها غمضت عيونها الا تسمع نغمة رساله خذت الجوال الي كان في الشنطه فتحت الرساله
محد يشق القلب من غير<تفكير>
حتى الكبيب يرتجف ثم<يحتار>
الا انت شقي الجوف من غير <تخدير>
وبنيت قصور داخل القلب و<انهار>
وجهه نظر كتبتها بصدق <تعبير>
وارسلتها للي داخل القلب له < مقدار>
الي كان راسل رقم فيصل هي انصدمت ما توقعته يرسل او يتصل بعد الي سواه
اليوم الي بعده كانو متجمعين كلهم في بيت الجد على الغدا كالعاده كل خميس وكانت الأمور طبيعيه
يوم الجمعه العصر في بيت عبد العزيز كانو قاعدين في الصاله يتقهوون
عبد العزيز: يابنات ترى يوم السبت أنا وأمكم بنروح الإمارات
ريم:واحنا يبى بنروح وياكم ؟
ساره:أبوكم عنده شغل مب رايح يتمشى
العنود: كم بتقعدون هناك؟
عبد العزيز: أسبوع تقريبا
ريم: الله شالهشغل الي يخليكم تقعدون أسبوع
العنود: وانتي كل شي لازم تعرفينه قالو شغل خلاص انتي شدخلج
ريم: أنا ما كلمتج
ساره ولا كأنها سمعت شي من الي قالوه: بتقعدون هنا والا ترحون بيت جدتكم
ريم : أنا عن ن فسي بروح شقعدني بين أربع جدران ومع مين ياحسره
العنود: حظرتج وأنا مو ماليه عينج؟
ريم وهي قايمه يتطلع فوق: أنا قلت انتي؟؟بروح أقعد مع دانه أوسع صدري عن اذنكم بروح غرفتي
العنود تكش عليها وتفس في وجهها
عبد العزيز :وانتي مب رايحه
العنود:ما ادري ؟
ساره : أختج بتروح انتي شقعدج ؟؟ بعدين الهنوف هم بتروح
العنود: ليش عمي وخالتي بعد بيروحون معاكم ؟
عبد العزيز: أي الشغل لي أنا وعمج بعدين عندنا عرس يوم الخميس
العنود: او عشان كذا امي وخالتي بيروحون؟؟
عبد العزيز : تقدرين تقولين كذا؟؟
ساره : بترحون اليوم في الليل والا بكره
العنود :لا شدعوه اليوم بكره ؟؟ ليه انتم متى طيارتكم ؟
ساره : بكره الساعه 7 الصباح
العنود:الله مو كأنه بدري ؟
عبد العزيز: مافي حجز الا هالوقت الي في الليل زحمه
العنود: الله يعينكم
في بيت الجد
دلال قاعده مع جدتها في الصاله يتقهوون ودانه توها داخله عليهم : السلام عليكم وحبت راس جدتها
فوزيه: وينج ما نزلتي الظهر تتغدين معانا
دانه : والله يا أمي اني كنت تعباانه ميته فيني النوم
فوزيه: وتوج تقومين
دانه : لا قمت قبل ساعه ونص تقريبا
فوزيه: والله انتم يا عيال هالزمن ما أدري شلون
دلال: مب كلنا يا أمي الحنونه أنا غير عنهم
دانه: مالت عليج ألحين انتي مب من عيال هالزمن ؟؟
فوزيه:أي من عياله بس سنعه احسن منكم طالعه على جدتها
دلال تمد لسانها لدانه
دانه تكش عليها بيدها: أقول أمي وين جدي؟
فوزيه : ما ادري أخذ شهد وطلع معاها من شوي
دلال: اذا ما كنت غلطانه كأنه رايح للبعارين
دانه : ههه حلوه ذي للبعارين والله اني مشتهيه أروح من زمان عنها وتلف على جدتها أقول أمي شرايج لا جاو بنات عمي نقول لجدي نروح نقعد هناك كم يوم ؟
دلال : أي بنات عم ومتى بيجون
دانه : يعني كم بنات عم عندنا بنات عمي عبد العزيز والهنوف
فوزيه : وانتي متى دريتي؟
دانه :توها داقه علي ريم وقالت لي
دلال: والله وناسه لو جاو ونروح مع بعض للبر
دانه: جده واللي يعافيج قولي لجدي
فوزيه: والله ما هقيته يخالف انتو قولو له
دلال: اكيد بيستانس عاد هو ياحبه للحوش حقه والبعارين
دانه : والخرفان والأرانب والطيور والدجاج والزحمه كلها
دلال: بالمختصر المفيد حديقة حيوانات بريه
دانه : أما هالحيوانات ما ادري شلون يستحملون الحر في الصيف
دلال: جدي باني لهم مكان عن الشمس والحر بعدين الدجاج توه موديه يوم قام يزعجناكوكوكوكو كوكوكوكو
دانه: اعصابج لا تتفاعلين
الا بدور ومنى داخلين عليهم : السلام عليكم
الكل : وعليكم السلام
عاد بدور جت قامت الصجه

الساعه 9 في الليل العنود في غرفتها فاتحه دولابها وترتب شنطتها وكانت فاتحه FM عشان تسمع الأشعار الي تجي <<<هي طايحه في الشعر هاليومين
الا جوالها يدق المتصل الهنوف
العنود: هلا
الهنوف : هلا والله شخبارج؟
العنود: الحمد لله انتي شخبارج؟
الهنوف: بخير ومستاانسه ألف
العنود: يابعد عمري كل هذا عشان بتقعدين وياي أسبوع
الهنوف: ههه يالله عشان ماأطيح وجهج
العنود: والله خوش مجامله
الهنوف : متى بتروحين
العنود: بكره ان شاء الله الصباح بس بالضبط ما ادري متى وانتي
العنوف: وهم طالعين بكره بقطوني أنا ونوافو عند جدي
الا تدخل الريم وبصراخ والتلفون الا سلكي بيدها والإبتسامه شاقه وجهها:العنود
العنود متخرعه:الناس يطقون الباب قبل لا يدخلون وجع شفيج خرعتيني
الهنوف : هاذي شفيها تصارخ
ريم: عندي بشاره حزري؟؟
العنود : أنا قلت الحين هاذي فيها شي قالت عندي بشاره
الهنوف :أقول فتحي السبيكر
العنود : فتحته
الهنوف: الريم
الريم: قبل لا تقولين أي شي وشو تعطيني انتي وياها على هالبشاره
العنود: انزين وشو بالأول
الريم: دانه على التلفون تقول...
الهنوف والعنود:اي
الريم بصوت أعلى: جهزو ملابس للبر
العنود: قولي والله
الريم : والله قالت لجدي ووافق
الهنوف: واي وناسه خوش خبر عنود بوسيها عني
العنود: يا فرحتي تعالي وتبوس ريم هاذي حق الهنوف وتبوسها مره ثانيه هاذي حقتي
الريم: الله الله شصاير بالدنيا العنود تبوسني
العنود: ههه تستاهلين وبوسي دانوه على هالخبر الحلو
الريم وهي طالعه وترجع تحط التلفون على اذنها : هنود تبوسج على هالخبر
الهنوف : زين انها قالت عشان ناخذ احتياطنا
العنود: وناسه احس الدنيا مو ماليتني من الفرحه
الهنوف : اوكي اخليج بروح اقول لندى واقهرها ومره وحده اقول لنوافو عشان يجهز اغراضه للبر
العنود: يلا سلام
وطلعت العنود وعلى طول نزلت تحت عشان تقول لامها وابوها وفي نزلتها الا محمد داخل وامها وابوها و
عبد الله في الصاله
العنود: يمى يمى
محمد :هي هي شفيج تصارخين
العنود ولا كأنها تشوفه وتدخل الصاله وهي تلهث من الركض
ساره: شفيج تصارخين
الا ريم وراها: بنروح البر
العنود: بنكشت
عبد الله : الحين هالصراخ عشان بتروحون البر
محمد: الي يشوف ما عمرهم راحو بر
عبد العزيز وهو يبتسم: بناتي ومستانسين انتم شدخلكم فيهم
العنود تروح تقعد جنب ابوها : يابعد عمري ابوي هو الي يحس فينا
ريم تلف على محمد: وانت يعني تسوي نفسك مو مستانس وامس اسمعك تقول والله مشتهي اكشت من زمان عن البر
محمد: بل بل بل عليج ما يخفى عليج شي كل شي تعرفه
ريم: قول ما شاء الله
ساره : مع مين بترحون
العنود: مع جدي وطبعا الكل معانا
عبد العزيز: ياني مشتاق للبر من زمان عنه
العنود : انزين تعالوا معانا
الريم : حاولو ترجعون بدري وتعالوا
عبدر العزيز: بنحاول احنا وحظنا يا نلحق يا ما نلحق
محمد: يمى بطني يحقرص جوعان
ساره : العشا جاهز بس دقايق اجهز الطاوله هنود وريم قوموا ساعدوني
بعد العشا قعدوا يتقهون شوي بعدين كلن طلع غرفته
النود طلعت غرفتها وهي مستانسه وتغني
العنود : بدق على الهنوف اشوفها جهزت أغراضها خذت الجوال الا تلقى 3 مس كول رقم غريب ما عرفته توها بتدق على الهنوف الا يدق جوالها نفس الرقم رفعت : نعم
المتصل زين ردت : نعم الله عليج ما بغيتي تردين؟
العنود :نعم مين حظرتك ؟
المتصل: ماعرفتيني ؟
العنود انتبهت للصوت وبعصبيه : نعم خيير؟؟
فيصل: ليش معصبه
العنود: ما يخصك شتبغى؟
فيصل: ما بغيت شي بس حبيت أسلم وأتأسف على الي صار
العنود: أسفك مش مقبول بغيت شي ثاني
فيصل: انتي ليش كذا ؟؟
العنود: لاني كذا
فيصل: ههه
العنود: مافي شي يضحك مع السلامه
فيصل: دقيقه دقيقه
العنود وهي تتأفف: نعم
فيصل: ممكن نتكلم شوي
العنود: قسم بالله انك قليل الأدب ما تستحي ولك وجه بعد الي سويته انا الغلطانه الي ساكته لك صدق من قال الي ما يستحي يفعل ما يشتهي بس أنا اوريك وسكرت السماعه في وجهه
فيصل: ياربي من هالبنت بس يا أنا يا هي ورجع دق عليها وهي ما ترد ويدق ويدق ويدق وصلت حدها رفعت
العنود بصراخ: يعني والنهايه وياك تراك مصختها
الهنوف: هي هي شفيج تصارخين بعدين سنه يالله تردين
العنود: الهنوف سوري والله حسبالي هالحمار
الهنوف: منو؟
العنود: هالزفت أخو سهى لوع كبدي
الهنوف: رجع دق ياربي شهالشباب حسبالهم كل البنات وااحد وهذا بعد يدري انج صديقة أخته بس شتقولين
العنود: صبري علي والله لأقول لسهى
الهنوف: أي والله هالأشكال ما ينسكت عنهم
العنود: ما علينا منه جهزتي أغراضج
الهنوف: أي خلصت وانتي
العنود: أي بس بقالي اشياء بسيطه
الهنوف: تصدقين العنود أحس في روحة البر هاذي بتصير أشياء فله
العنود: الا احنا بنخليها تصير والله ما اخلي شي في خاطري الا واسويه ابرد حرتي بعد هالمذاكره
الهنوف : الله يعينا على مغامراتج
العنود: ههه تذكرين ذيك المره واحنا في البر يوم نطلع في الليل مسوين فيها عصابات ويشوفنا عبد الله ويقوم التهزيئ
الهنوف: ههه هذا انتي وافكارج يا مبدعه زمانج
العنود: انا بنهبل من هالولد
الهنوف : أي ولد؟
العنود: هالزفت فيصلو في غيره
الهنوف : تدرين سكري الجوال
العنود هذا الي بيصير
الهنوف : اوكي يلا اشوفج بكره ان شاء الله عاد لا تتأخرين تعالوا بدري
العنود ان شاء الله يالله مع السلامه
الهنوف باي
سكرت من الهنوف وعلى طول سكرت الجوال ورتبت أغراضها ونامت .
اليوم الثاني الساعه 6 الصباح كانو متجمعين على طاولة الفطور الا ريم ومحمد
عبد العزيز: عبد الله عاد لاأوصيك على خواتك
عبد الله: لا توصي حريص روح وانت متطمن
العنود: يبى شدعوه احنا عند جدي مب عند أحد غريب
ساره : الا ريم وينها ما قامت
العنود: لا تقوم مستحيل لا هي ولا محمد
الا ريم داخله عليهم: هذاني قمت مافي شي مستحيل
الكل : ههه
قعدت ريم وفطرت
ساره :ريم والعنود لا أوصيكم عن الهبال الزايد والمناقر والخناق
ريم: شدعوه يمى افا عليج
العنود: شوف مين يتكلم
ريم مطنشه ولا كأنها تسمع
عبد العزيز: بناتي عاقلات وان شاء الله ماراح يسوون شي
العنود: يمى يبى شدعوه كأنكم أول مرره تخلونا بعدين ترانا كبار مو لهالدرجه
ساره: بناتي واعرفكم مع الوناسه تنسون عمركم
العنود: على كل حال ان شاء الله ما يصير الا كل الي يسركم
عبد العزيز : ان شاء الله يالله ساره مابقىشي وتجي سبع يالله يمدينا نوصل للمطار
ساره: يالله أنا خاصه
سلمو البنات عليهم وطلعو الأهل من هنا وعبد الله معاهم على الدوام
ريم: هنود هالوقت ما يذكرج بشي
العنود: المدرسه الله يلوع كبدها
الريم: ويا حافظ هي عندها كبد
العنود:ههه أي والله اقول جهزتي أغراضج
الريم : أي خلاص بس بروح أبدل
العنود:اوكي بدلي وقومي محمد معاج ونزلي أغراضج
طلعت العنود تسبح وجهزت أغراضها ودقت على الهنوف كالعاده
ريم طلعت بدلت وراحت تقوم محمد دخلت عليه الغرفه
ريم : محمد ..محمد...يو عاد هذا شقومه ألحين محمد قوم
محمد:..............
ريم فتحت الستاره : محمد قوم يالله
محمد: سكري الستاره وطلعي بره
ريم : ماني مسكره الستاره يالله قوم بسك نووم
محمد وهو يصارخ: ريمو والله اذا قمت عليج يا ويلج طلعي وفكيني أحسن لج
ريم عرفت انه وصل حده من صراخه القوي وطلعت وهي تتحلطم ونزلت تحت ونزلت أغراضها قعدت في الصاله تقلب في التلفزيون تستنى العنود
العنود على الساعه 8 كانت خالصه نزلت أغراضها ونزلت شافت ريم: هاه وين محمد ما قام
ريم: مب راضي يقوم تعبت وانا اقومه
العنود: أي انتي تعرفين تقومين كله صراخ في صراخ
ريم: يو كيفه بخلي ايشا تدق على راجو
الا محمد نازل من الدرج : لا تخلين ايشا تدق ولا شي هذاني قمت
العنود: صباح الخير
محمد: هلا والله صباح النور انتي ما لقيتي الا ريم تجي تقومني كان جيتي انتي ما بياخذ منج وقت
العنود: والله نسيت انها زفته لا جات تقوم
الريم: أنا بسكت عشان ما اسوي سالفه امي قالت كبري عقلج
العنود : اسم الله عليج يالكبيره خلي عقلج لج ما ابيه
محمد الي قعد يضحك عليهم: يالله مشينا
العنود: ماتبي تفطر
محمد : لا بفطر هناك مع سلمانو
العنود: اوكي يلا
وطلعو
في بيت الجد : الي كانت الجده والهنوف ودلال قاعدين في الصاله
دخلت عليهم ريم : السلام عليكم
الكل وعليكم السلام
ريم سلمت على جدتها اول شي وحبت راسها وسلمت على البنات : اقول جده وينهي دانه
الجده: انتي بعقلج دانوه تقوم هالحزه
ريم: انا اقومها عن اذنكم
وهي رايحه الا بدخلة العنود : على طول درعمت عند دانوه ومخليه اغراضج حظرتج مين بيشيلهم
ريم: الله يخلي اخوي محمد بعد كلي
محمد: والله ماأنزلهم لج روحي انتي نزليهم
ريم: والي يعافيك حمود والي يخليك انا اختك الصغيره
محمد: يمه كلتينا نزلتهم شوفيهم عند الباب لا تخافين
العنود دخلت الصاله وسلمت على جدتها والبنات
فوزيه: كأني اسمع حس محمد
العنودوهي تطالع الهنوف : أي هو الي جايبنا
فوزيه : محمد .. محمد
محمد: لبيه ادخل
فوزيه : أي ادخل
الهنوف ودلال يحطون الجلال عليهم
محمد: السلام عليكم أجمعين
الكل : وعليكم السلام
فوزيه: هلا والله بوليدي وأخيرا شفناك احنا ما نشوفك الا بالعافيه
محمد حب راس جدته وجلس جنبها: سامحيني يالغاليه أدري اني مقصر بحقج خبريني بعلومج عساج بخيير
فوزيه: والله الحمد لله بخير وعافيه انت شخبارك شمسوي
الهنوف كانت تطالع محمد أول مره تشوفه بشكله الطبيعي كان لابس ثوب بيت مخطط مخصر على جسمه وحاط فوق راسه كبوس أسود العاده كله كاشخ ما شالت عيونها من عليه
دلال تنغزها: بسج قزيتي الولد قز والا نسيتي تراني وياج في نفس الجلال
الهنوف انقلب وجهها احمر وتفشلت: ههه لا مانسيت
محمد انتبه لهم: وانتو الي قاعدين تحت الجلال منو؟<<<<هو دايم كذا طاق الميانه
الهنوف ودلال :..................
العنود: هنوف ودلال
محمد: شخباركم؟؟
دلال : الحمد لله بخير
محمد: هاذي وحده والثانيه شفيها ما تنطق ؟؟ شي يعورها
الهنوف ساكته وكل مالها وتحمر أكثر
محمد: وي لايكون بلعتي لسانج
فوزيه : خلهم عنك تراهم يستحون
محمد: ما اقدر انا على الي يستحون
العنود: استح على وجهك تغازل وقدام اختك وجدتك
محمد: انا ما اغازل انا قاعد اسولف مع بنات عمي الا أقول امي وين سلماان
فوزيه : أكيد نايم بعد وينه
محمد: اوكي انا بطلع أصحيه عن اذنكم
فوزيه: فطرت؟
محمد: لا الغاليه اقوم سلمان وانزل افطر معه
فوزيه : لا تصيفون ؟
أول ما طلع محمد شالو البنات الجلال من عليهم
الهنوف : حر
العنود: الله وجهج احمر
محمد وهو يصارخ : لا والله مو حر المكيف فوقج بس عاش مصرف
الهنوف الله العالم بحالها أما البقيه فقامو يضحكون عليها.
= = = = = = = = = = =
اتمنى تعجبكم الأجزاء
على فكره ترى الجزء الجاي مره حلو تعرفون البر وهباله ووناسته..
أنتظر ردودكم وآرائكم
دمتم
م حبي ع
* أمي الذكريات رة *

بنزلها وبقراها ولي عودة للتعليق
مشكورة ياقلبي

أسماء الكويت
هلا وغلا
العفو يالغاليه
أنتظر تعليقك..
>>لاحرمني الله منكم<<

ودي اقولكم شي في البدايه انا قلت ان اخو الهنوف اللي يدرس في لندن اسمه طلال هو اسمه عبد اللطيف انا غلطت بس انا ما كتبت عنه شي فأتوقع ما تفرق وادري الاسم الاول احلى بس لازم يصير عبد اللطيف
====== وهالجزء لعيونك أسومه ======
الجزء الثالث
محمد طلع فوق غرفة سلمان دخل عليه الغرفه بارده وظلمه قرب عند راسه
محمد:سلمان سلمان ويعلي نبرة صوته سلمانوه
سلمان قام وهو متخرع : هاه هاه وش صار
محمد فتح الستاير وهو يضحك:قوم يلا
سلمان:محمد ؟؟ وش جايبك صاير شي
محمد: لا سلامتك ماصاير الا كل خير ؟؟بعدين الناس يقولون حياك الله مو وش جايبك ؟
سلمان رجع انسدح وغطى نفسه بالفراش
محمد يجر الفراش : اقولك قوم ترجع تنام
سلمان : حياك انسدح جنبي ادري قوموك غصب النوم فعيونك
محمد: لا الرجال مخرف أقوم اجيب لك كاس مياي اصبه فوقك _وقام_
سلمان : لا خلاص قمت
محمد: ههه يلا اشوف قم غسل وجهك ويلا
سلمان : انا بسبح رح اسبقني وانا بلحقك
محمد: ليه ان شاء الله سابق ولاحق على غفله لا يبى ما تمشي علي هالحركات يلا قوم وانا بستناك
سلمان ياخذ نفس : نقوم وامرنا لله
قام سلمان ودخل الحمام قعد محمد الا يسمع نغمة رساله يقوم ياخذ جوال سلمان ويفتح الرساله ويضحك ويقعد يحوس بالرسايل الثانيه وهو كل شوي يضحك بصوت أعلى من الي قبله
سلمان وهوفي الحمام : انت شفيك استخفيت قاعد تضحك بروحك
محمد: لا والله مااستخفيت قاعد أضحك على هالبنات ورسايلهم مساكين قاص عليهم
سلمان وهو طالع من الحمام وفوطه على راسه ينشف شعره: تدري لوعو كبدي كل يوم والثاني طالعتلي وحده رصيدي خلص والثانيه والله مشتهيه هالجوال <<يقلد صوتهم
محمد:ههه
سلمان : لا وطالعتلي وحده هاليومين تقول تعال اخطبني كثرو الخطاب وانا اردهم
محمد: هذا ما جنت يداك ههه والله حاله الخطاب قامو يردون عشانك
سلمان : والله ناوي اتركهم الصراحه لاعت كبدي
محمد: الله يعينك عاد بنات شفكك منهم
سلمان: هذا انت قلتها بناات
محمد: لا ياعمري أصابعك مو سوى
سلمان يطالعه بنظره وهو رافع حواجبه: انزين قوم ننزل تراني ميت جوع
محمد: يلا
نزلو تحت سلم على أمه وقعد
فوزيه : يمى العنود قولي لميري تجيب الفطور
العنود: ان شاء الله
البنات أول ما سمعو حس الشباب قامو وطلعو للصاله الخارجيه (هي صالتين الداخليه تصميمها تراثي جلسه أرضيه وفيها تلفزيون وحتى التلفون القديم الي الأرقا تدور وصوته مزعج تصميمها تراثي بس حلو وراقي أما الخارجيه الي كان يفصل بينها وبين الداخليه باب خشب الي يشوفه يقول ديكور لان شكله قديم الي من فوق زي القوس بس الصاله الخارجيه عادي تصميم حديث بس متناسق مع الصاله الداخليه وفيها تلفزيون )
جاء الفطور للشباب وقعدو يسولفون مع فوزيه والبنات في الصاله الخارجيه فاتحين التلفزيون وسوالف وضحك
شوي الا تجي بدور تسلم على البنات وراحت قعدت في الصاله الداخليه <<لازم تروح تتناقر مع فيصل
والا تجي الريم ودانه وشهوده ومنى وشوي الا يجي الجد<<< يعني العائله كلها اكتملت
بدور:يبى خلاص ان شاء الله بكره بنروح البر
الجد: أي ان شاء الله بس انتو خلكم جاهزين
شهد: جدي بنروح البر بكره
الجد: أي ان شاء الله
شهد: بننام
الجد: أي بننام
شهد: هي وناثه
بدور: ههه فديت الوناثه لا طلعت من فمج
العنود: جدي خلاص ميه بالميه رايحين بكره للبر
سلمان : انتو شفيكم كلتو ابوي اليوم
العنود: ترى مثل ماهو ابوك تراه جدي
سلمان : وينج انتي تتكلمين من خلف الكواليس
العنود قامت ووقفت عند الباب : هلا والله ادري انك ماتقدر تسمع صوتي ولا تشوفني
سلمان بطناز : ههه
العنود: مالت تطنز بل عليكم الى الان ما خلصتو فطور
محمد: أقول سكتي بس انتي يا أم لسانين الحين يجينا مغص
سلمان :عادي أنا متعود البركه في اختي ما تقصر كل يوم طاقتني بعين وياليته على شي مسكين انا غيرانه لاني أضعف منها
بدور:أنا بدور اغار منك انت ههه حلوه النكته
سلمان :بدور منو الي أكل صندق الكتكات بأسبوع واحد
العنود: الله عميمه بأسبوع وأنا اقول شفيج ماتنه هاليومين وتغمز لسلمان
سلمان: حتى اسبوع ما كمل
بدور : والله ما أكلت منه الا حبه والباقي عنادا فيك وزعته على عيال الجيران
سلمان: ايوا عاش مصرف
بدور: سلمانو
فوزيه: بسكم خناق ماعندكم احترام لنا شطولكم شعرضكم ولسانكم شطوله الحين هالصغار شيقولون عنكم
ريم: جده عاادي انا والعنود نسوي أكثر
الجد: والله انتو ياعيال هالزمن ما ادري شلون
العنود: احنا لم نكن ولن نكن
فوزيه: وشو وشو وشو ؟؟
محمد: أمي ما عليج منها الحين تقعد تتفلسف عليج
فهد: أقول انا بطلع ارتاح شوي لاأذن الظهر قعدوني
بدور: رح ارتاح يبى وانا علي اني اجي بنفسي أقعدك لأذن
طلع فهد يرتاح شوي
البنات قعدو يسولفون اما محمد وسلمان طلعو بره البيت<<شباب يموتون لو يقعدون في البيت
اول ما اذن الظهر راحت بدور وقعدت ابوها وراح يصلي
فوزيه: يابنات قومو صلو
الكل : ان شاء الله
فوزيه: الهنوف وين اخوج ما اشوفه
الهنوف : يوم نزلت عندكم الصباح قال بروح عند عمتي منيره البيت كله بنات
منى : ياحليله والله وكبر نوافو
بدور: متوسط بعد شتبين عاد ياشين العيال في هالسن
العنود: ههه كلنا مجربين لا تخافين
فوزيه : انزين عن السوالف والهذره الزايده قومو صلو وانتي ( تكلم العنود) قومي دقي على اخوج عبد الله قولي له يجي يتغدى عندنا
العنود : ان شاء الله
البنات قامو يصلون والساعه 1 كان الغدا جاهز البنات تغدو في غرفة الطعام الما الرجال ويا جدتهم في الصاله الداخليه كالعاده بعد الغدا راح الكل يرتاح
دلال الي كانت في غرفتها على النت تكلم لطوف صديقتها على الماسنجر
القمره دلول : لا ياعمري وأنا بنت عبدالله وجدي فهد ال......
مشتاق لبلادي صعقت صاعقه مب صاحيه :.................<<<لا يفوتكم التعبير صاعقه بس المقصود انها انصدمت
القمره دلول : ألو وينج
القمره دلول: لطوف
مشتاق لبلادي : هلا والله
القمره دلول : وينج؟
مشتاق لبلادي : لا ولا شي تعالي شخبار العنود والهنوف بنات عمج
دلول القمور: والله الحمد لله كلهم بخير يسألون عنج
مشتاق لبلادي وصاعقه ثانيه فوق راسها : تعالي بغيت أسألج
دلول القمور: امري
مشتاق لبلادي : انتي مو قلتيلي ان عندج ولد عم يدرس في لندن
دلول القمور : أي ليش تسألين
مشتاق لبلادي : لا بس أمس كنا في السوق واخوي شاف واحد سعودي وقام يسولف معاه اسمه عبد اللطيف قلت يمكن هو
دلول القمور : ياحليله حتى ولد عمي اسمه عبد اللطيف لايكون هو
مشتاق لبلادي : يا سبحان الله رب صدفه خير من ألف ميعاد
دلول القمور: عاد يمكن مب هو
مشتاق لبلادي : يمكن بس انا كنت ناويه اقولج تعطينا رقمه عشان أخوي يتعرف عليه
دلول : ولا يهمج أشوف لج رقمه وأعطيج اياه
مشتاق لبلادي : أوكي الغاليه تامرين بشي
دلول القمور: سلامتج بتطلعين؟؟
مشتاق لبلادي : أي أشوفج الليله
دلول القمور: ان شاء الله يالله حتى انا بطلع اليوم بنات عمي متجمعين عندنا من الصبح وبكره بنروح البر فعشان كذا بروح انام عشا السهره اليوم
مشتاق لبلادي : ههه سلمي عليهم كلهم وحبيلي راس جدتي فوزيه وقولي لها مشتاق لها واجد
دلول القمور : تقصدين جدتي ومشتاقه مو مشتاق ما اسرع لندن قلبت كلامج
مشتاق لبلادي: ههه اوكي اشوفج الليله
دلول القمور: ان شاء الله يالله مع السلامه
مشتاق لبلادي: سلام
وسكرت النت وراحت حطت راسها ونامت
الساعه 9 ليلا الكل كان مختبص ويجهز الأغراض والكل كان يصارخ من جهه
فوزيه: الهنوف كلمتي أخوج
الهنوف : أي قال بيجي هو ونصور بعد شوي
فوزيه: وعمتج ماراح تجي
الهنوف: ماادري عنها
فوزيه: بدور قومي كلمي أختج شوفيها متى بتجي
بدور: يمى تو الناس شوي وأكلمها
العنود قاعده تحت التلفزيون : ياهو يا عالم ماأحد جوعان
بدور: انا ليه ناويه تسوين عشا سويلي معاج
الهنوف : أي احلمي
العنود: والله مشتهيه شابوره ونواشف
منى: والله من زمان عن النواشف حقتنا
الهنوف : ههه تذكرون اول فطورنا وعشانا نواشف
العنود: أي والله تيبست بطونا
بدور: بس وناسه
دلال وهي داخله عليهم : السلام عليكم
الكل : وعليكم السلام
دلال : منى روحي لأمي تبيج
منى: وينهي ؟؟
دلال : في البيت
منى : انا روح برجع وابي ألقى العشا جاهز
العنود: مدام فيها عشا نادي ستات الحسن ريمو ودانو
منى: ان شاء الله
راحت منى الا تشوف ريم ودانه جايين
منى: ترى البنات يستنونكم بسوون عشا
ريم: واكيد العنود قالت ناديهم عشان يساعدونا
منى وهي تضحك: أي
ريم: اختي وانااعرفها
دانه : وانتي وين بتروحين؟
منى: امي تبيني أشوف شتبي وبجيكم
طلعت منى عند أمها الي كانت في غرفتها والبنات راحو بيت الجد دخلو عليهم الصاله
ريم ودانه : السلام عليكم
الكل: وعليكم السلام
العنود : أنا مشتهيه فول
بدور: فول اخر الليل انتي ناويه علينا
العنود: والله انا بسوي واتحداج لو ما أكلتي
بدور: لا تخافين أنا باكل باكل بس قلت اخاف بطونهم تعورهم
دانه: لا ماراح تعورنا
ريم: انزين يالله قومو
الجده وهي داخله عليهم: وين تقومون ؟
العنود: بنسوي عشا
الجده : وش بتسوون
دلال: بنسوي نواشف
بدور: يمى وين ابوي
فوزيه : الحين الساعه 9 ونص أكيد تلقينه نايم
ريم: الله ينام من ألحين
بدور: افا عليج ابوي من الي يتبعون قاعدة نامو مبكرا تصحو مبكرا ماتشوفين وجهه منور كأنه بو 30 سنه
فوزيه: أي 30 يا حافظ والله طول يومه نايم والا قاعد عند هالبعارين
دانه: حرام عليج ياأمي فوزيه اما طول يومه نايم ؟؟؟
العنود تغمز لبدور: اذا جدي ولد 30 ياعمري جدتي بنت 20
فوزيه: تطنزين علي يا بنت عبد العزيز
العنود: ينقص لساني اذا تطنزت اصلا انا من اكون عشان اتطنز عليج
دلال : عاد كلش ولا جتي بعد عمري قمر ولا حتى قمر 14
العنود تغني : أحلى من القمر هي وأحلى يمكن شويه <<وهي تطق أصبع
فوزيه: اما انتي ما ادري من وين تجيبن هالكلام الحلو
العنود: أعجبج هاه ؟؟
فوزيه : الا وين منى عنكم ؟
دلال : راحت عند امي تبيها
فوزيه: انزين يلا قوموا سوو العشا بدور دقيتي على أختج
الا يرت التلفون
بدور: اكيد هاذي منيره
الهنوف كانت جنب التلفون وترفعه : نعم
منيره: السلام عليكم
الهنوف : وعليكم السلام عمرج طويل
منيره: شتحشون فيني
الهنوف : حرام عليج توها امي فوزيه تسأل عنج
منيره: يابعد عمري هالأم عطيني اياها
الهنوف: جده عميمه تبيج ..
بدور: فتحي السبيكر ..اقول منيره وينج ترى بيفوتج نص عمرج
منيره: ليه شمسوين
العنود: عميمه فول
منيره: مالت عليج يابدير وتعرف تظنز بعد
كلهم ضحكو لانهم يعرفون ان منيره ما تحب الفول
فوزيه : اقول سكري ذا حق الصوت وخليني أكلم بنتي
بدور : يمه هذا اسمه سبيكر
فوزيه : الي هو المهم سكريه
الهنوف وهي تضحك : ان شاء الله
البنات راحو المطبخ الي تسوي فول والي فاصوليا والي بيض والي تقص الجبن والي تسوي تونه والي تحط زيتون وجام ولبنه وزعتر وقشطه <<<بقاله على غفله كل شي كتبته
العنود: يو بقى التمييس
الهنوف: دقو على السواق خليه يروح يجيب
بدور: قوليله يجيب تميس بالجبن والسكر وعادي وبر
ريم: حشى كل هذا بتاكلينه
العنود: لا انا وياها
دلال: بس هذا الي تبونه
بدور : على ما أظن أي
خذت دلال التلفون ودقت على السواق وقالت له
دلال : خلاص ماتبون شي ماشيات
بدور : كأني مشتهيه كبده
الكل مات عليها من الضحك
سكرت دلال : الحين في احد يبيع كبده في الليل
العنود: الدبب الي مثلي ومثلها
وقامو البنات سوالف وهبال <<<<يا حظهم ياليتني معاهم
شوي الا جات منى وهي هاديه : السلام عليكم
الكل مع بعض : وعليكم السلام ورحمة الله وبركاته
العنود: شرفتينا ونورتينا يا أبله منى
منى : وه اسم الله علي اصير ابله عشان يقوم الطناز علي
ريم: معلمة ابتدائي ما فيه طناز
بدور: الله يسلمج الحين الابتدائي يتطنزون اكثر من الثانوي والمتوسط لا تخافين
المهم خلصو العشا وحطو السفره وتوهم قاعدين الا تدخل عليهم منيره : يالخاينين بديتو قبلي
شهد نقزت من مكانها : عميمه جت هي هي سلمت على عمتها وقالت :جبتي رزان
منيره: والله اني داريه هالنقزه مب لي أي حبيبتي شوفيها عند الباب
بدور: تفضلي
منيره: لا تخافين من دون ما تعزمين حبت راس امها وسلمت عليها وقعدت
العنود: واحنا مالنا رب تسلمين عليها
منيره: شف ميت يتكلم
العنود: ههه بس جاملي
منيره : ولا يهمج السلام عليكم أجمعون
فوزيه: وين عيالج خليهم يجون ياكلون
منيره: لا تخافين متعشين وخالصين طلب لهم خالد من برجر كنج
العنود: الله اشتهيته من زمان عنه
فوزيه: اقول حمدي ربج الناس مب لاقين لهم لقمه ياكلونها وانتي قاعده تتشهين لي من اكل هالكفار
العنود: يا كلمه ردي مكانج
بدور : حدأصلا يذوق هالأكل ويفكر بمطعم صدق ماتستحين يا عنيده
العنود: ايوه شوف عاد من الي يتكلم
الهنوف : والله انتو الثنتين يبغالكم رجيم
بدور: والله افكر اني اسوي بس مب الحين تو الناس لين ألقى الرجيم الي يناسبني
العنود: لا لقيتيه قولي لي عشان ابدأ معاج
ريم: اجل لا حجت البقره على قرونها
منيره: الا وين خلود عنكم
دانه : ناديتها قالت الحين بتجي
فوزيه : يا شهد رزان تعالوا تعشو
خلود: السلام عليكم
الكل وعليكم السلام
منيره : حياج خلود (وتوسع لها ) توني أسأل عنج
خلود وهي تبوس منيره بخدها وهم قاعدين : والله توني مخلصه ترتيب الأغراض حق بكره
بدور : والله فله اول مره نسويها ونطلع كلنا
العنود: عيني بعينج بدور
بدور : لا ا قصدي يعني بننام وبنقعد أسبوع
العنود: اي قولي كذا من الأول
ريم : واي
دانه الي كانت قاعده جنبها : بسم الله شفيج
ريم: ولا شي بس مستانسه
فوزيه وهي فرحانه بجمعة بنات عيالها وبناتها وتشوف الفرحه في عيونهم: الله يجعلكم دوم بفرح وسعاده ويرزقكم بالزوج الي يسعدكم وبالذريه الصالحه
الكل الا منى :امين
منيره :تمد صحنها لدلال : دلول حطيلي ملعقه تونه
ريم: حطي ملعقتين أنا الي مسويتها تراها حلوه
منيره : والله تعرفون تطبخون يا بنات اخوي بس ما تطلعون مهاراتكم
الهنوف : ما تطلع الا في المناسبات
العنود: تعرفين نخاف من العين اخاف يحسدونا الناس على طبخنا
بدور : الا قولي أخاف نسمم الناس بأكلنا
الكل : ههه
بعد العشا قعدو يتقهوون وعلى الساعه 12 كان فيصل ومحمد توهم داخلين
سلمان أول ما دخل وشاف الأغراض مصففه عند الباب : الله الله الله الي يشوف يقول هذيله بينقلون عفشهم بيت جديد
محمد: والابسافرون لمده سنه ما خذين كل شي ياناس ياناس
بدور والعنود وهم جايين يركضون على صراخ محمد
بدور : شفيك شفيك تصارخ
سلمان : شهالعفش الي ماخذينه
العنود : حق البر بكره
محمد: كل هاذا
بدور : أي شفيها
سلمان : ما بقى شي ما خذتوه شهالسياره الي بتكفي
منيره : بتكفي ان شاء الله هي سياره والا ثنتين
محمد يسلم على عمته : شخبارج
منيره : بخير انت شخبارك الله يا حميد كل مالك وتحلو زين البنات ما كلوك بعيونهم
العنود وهي تطالعه من فوق لتحت : قولي عمي سلما ن يمكن اصدق اما محمد
محمد: الي ما يغار ابوه حمار
سلمان : هنود يابعد عمري انتي عادي وهو من وين له هالجمال والوسامه غير انه مكتسبها مني وبعدين ان كلوه البنات بياكلونه عشاني واقف جنبه
محمد: ياخوفي والله العكس يهربون من يشوفونك جنبي
بدور : المهم هاذي وصاية امي لكم شيلو الأغراض ودخلوها السياره عشان الفجر احنا بنتحرك
سلمان : تعالي عطيني كف احسن
بدور: والله الكلام كلام امي مب كلامي
العنود: عمي بساعدك لا تخاف
بدور: وانا بشرف عليكم
سلمان يطالعها من فوق لتحت : واذا ما عجبج الشغل يا المشرفه بدور
بدور : مو مهم يعجبني أهم شي الأغراض تدخل
سلمان : زين عرفتي ان الشغل مب لازم يعجبج
منيره : يلا عن المناقر وشيلو الأغراض العنود روحي جيبي مفاتيح الجمس عشان يحطون الاغراض فيها
محمد: رفع ثوبه وربطه على خصره وشال الشماغ وحطه فوق الطاوله: يلا سلمان على قول اخواننا المصريين استعنا عالشئى بالله
سلمان هم رفع ثوبه : يالله
بدور الي يشوف : بيذبحون ذبيحه
العنود: عميمه يالله نساعدهم
بدور : يالله

منيره راحت للبنات الي في الصاله وقالت لهم يقومون ينامون عشان وراهم قعده من الفجر
منيره بعد الحنه والزنه نامت عند دلال معاها بالغرفه وشهد ورزان معاهم
أما دانه وريم بغرفة دانه والشباب الصغار فرشوا لهم في غرفة سلمان ونامو الي طبعا يوم دخل الغرفه بغى يذبحهم على العفسه الي كانو مسوينها مطلعين السوني والحاله <<<عاد هي بدون شي معفوسه
بدور في غرفتها ومنى في غرفتها والثنائي الي مستحيل يفترقون <<<ماشاء الله الهنوف والعنود في غرفة منيره ايام العزوبيه (قبل لاتتزوج وما غيروها لان منيره بين فتره وفتره تجي تنام عند اهلها والهنوف والعنود احيانا ينامون فيها اذا تجمعو بيت جدهم وبغو ينامون )
طبعا الجد والجده كانو نايمين من زمان
بدور دخلت غرفتها واسبحت وبدلت وراحت لعند منى دقت عليها الباب
منى : مين
بدور فتحت الباب ودخلت : انا
منى : هلا دخلي شفيج واقفه
بدور مافيني الا سلامتج شخبارج
منى: الحمد لله زينه شفيج
بدور: ما فيني شي انتي الي شفيج
منى: وانتي شدراج ان فيني شي
بدور وابتاسمه خفيفه على وجهها: قلبي قالي
منى: بدور ما ابي افترق عنكم ابي اتم طول عمري معاكم
بدور : ومن قالج ان احنا بنفترق الله لا يقوله ان شاء الله مايفرق بينا الا الموت وبعدين وش جاب طاري الفراق
منى: اليوم وانتو تسوون العشا مو رحت عند أمي..
بدور: ايه قالت لج شي
منى : أي ..قالت لي شي امي فوزيه قالت لها اياه
بدوروهي تبتسم: عن سالفة الخطبه
منى وهي منصدمه وبنفس الوقت مستانسه: تدرين
بدور : أي قالت لي خالتي خلود لأنها كانت متوقعه انج بتقولين لي واذا تبين رايي وافقي تراه رجال زين ابوي سأل عنه صدق انه بعيد بس مو واجد يعني بنشوفج في الاسبوع مره
منى : بس خايفه
بدور: حد يخاف من الزواج الله ما عطاج من العنود
منى :ههه ياحلوها هالبنت
بدور: ايه هاذي منى الي أعرفها مو مكشره انا اول مره اشوف وحده تنخطب وتزعل
منى: مب زعلانه بالعكس
بدور: ايوا طلعي على حقيقتج
منى : ههه يالزفته مب قصدي بس عشانه في الجبيل
بدور : من بعد الجبيل كلها ساعه بينا وبينها على كل حال انتي فكري زين ومبروك مقدما
منى وعيونها تغارق وهي تلم بدور : الله يخليج لي يارب ولا يحرمني منج
بدور : بس عاد لا تصيحيني
الهنوف دخلت تسبح والعنود قاعده تستناها عشان تدخل وراها وحاطه ديوان حامد زيد الصوتي وتسمع قصيده الأم
الا يدق جوالها وتشوف الرقم : ياربي وطنشت ودق مره واثنين وثلاثه
العنود: يوه وتاخذ الجوال وترفعه : نعم؟؟
فيصل: نعم الله عليج السلام عليكم
العنود: وعليك السم الي ياكل بدنك
فيصل : استغفري حرام عليج
العنود : حرمت عليك عيشتك أستغفر عشانك والله لو تموت
فيصل : مب عشاني عشانج أخاف الدعوه ماتستجاب وترجع لج وياكل السم بدنج
العنود: وه اسم الله علي ان شاء الله في عدويني
فيصل : لايكون انا منهم
العنود: الا قول اولهم
فيصل: حرام عليج انا شسويت لج
العنود: انت والنهايه معاك
فيصل: ليه هو في بدايه عشان تصير في نهايه
العنود: شوف تراك مصختها تراني صبرت عليك كثير والله راح يكون لي تصرف ثاني يحسفك على الي قاعد تسويه قد شعر راسك
في هالوقت تدخل الهنوف : هيه انتي شفيج تصارخين من قمة راسج مأثره عليج روحة البر بكره ترانا ما بعد نروح
فيصل سمع الهنوف وهي تتكلم لان صوتها نوعا ما كان عالي : حركات والله بكره بتكشتون يلا بكشت معاكم أي بر ؟؟
العنود تأشر حق الهنوف اسكتي .. الهنوف استغربت واسكتت
العنود وهي تكلم فيصل : وانت شدخلك
فيصل : لا بس عشان نتقابل
العنود: هذا الي كان ناقصني بعد
فيصل : تدرين قبل فتره كنت انا وأخوياي بنكشت وقلت لهم أنا الي بسوق عندي مكان فلله مسوي فيها زعيم وقعدت ادور فيهم من الفجر الين غابت الشمس وبعدين رجعنا لا بر ولا شي
العنود: يعني تيتي تيتي مثل ما رحتي مثل ما جيتي
فيصل استانس يوو شكلها اندمجت : أها عليج نور
العنود : وهي تضحك والله الشرهه مب عليك عليهم هم الي مطاوعينك
فيصل وهو مستانس: فديت هاضحكه الي ما بغت تطلع
العنود الي انقلب وجهه احمر يااربي انا شسويت : لو سمحت احترم نفسك مع السلامه انا مب فاضيه لك
والهنوف الي مستغربه من اسلوب العنود وشكت انه فيصل وتحاول تسمع الصوت وحاطه اذنها عند الجوال وتتوعد في العنود
فيصل: هي تعالي وين بتكشتون أي بر
العنود: وانت شدخلك؟
فيصل: قلت لج عشان اكشت معاكم
العنود بضحه استهزاء : اتحداك
فيصل : انزين انتي قولي لي وين وبتشوفين
العنود: في النعيريه ياله اتحداك
فيصل : عاد النعيريه شكبرها وين فيه بالضبط
العنود: انت تعال بالأول وامسك الخط واذا وصلت ذيك الساعه اقولك
فيصل: وعد مو اجي وتقصين علي وما تقولين لي
العنود: وعد
فيصل : اوكي تشوفين بكره
العنود: نشوف
فيصل : يلا تامرين على شي
العنود: لا شكرا
فيصل : انزين علىالأقل قولي سلامتك لهالدرجه قاسيه
العنود: مع السلامه وعلى طول سكرت ما عطته فرصه ير
الهنوف أول ما سكرت العنود : أنت هبله والا مجنونه والا مضروبه على راسج
العنود: ههه لا هذا ولا ذاك
الهنوف: ولا بعد تنكت
العنود: مسويلي فيها مالت عليه وعلى وجهه
الهنوف: يالزفته واذا جاء
العنود: ماراح يجي
الهنوف : واذا جاء
العنود:خل يجي ماراح يقدر يلقانا انتي من صجتج
الهنوف: والله هالعيال ما عندهم ما اقدر كل شي يسونه
العنود: يوو انتي مصدقه الحين يجي بكره يقول ما اقدر والاكنت مشغول يعني يطلع كذبه من هنا والا هناك
الهنوف: طيب ما كأنج مصختيها داقه سوالف معاه تيتي تيتي والشرهه مب عليك وضحك
العنود: خذني بالسوالف الله يقطع بليسه
الهنوف: اتني وهالسوالف الي ما تصبرين عليها بتودينا بداهيه
العنود: لا تخافين يا ماما يلا انا بروح اسبح وانتي نامي ترى ورانا قومه من الصباح
الله أكبر الله أكبر .........................لا إلاه الا الله
أذان الفجر وكالعاده بو عبد العزير قايم من اذان الفجر
بو عبد العزيز: يالله صباح خير يافتاح ياعليم افتح ابواب رزقك ورحمتك في هالصباحيه لا إلاه الا الله
دخل على سلمان ومحمد وقعدهم للصلاه وشاف نصور ونواف وهم قعدهم
فوزيه من جهه قامت توضأت وصلتوراحت تقعد البنات راحت لبدور تقعدها
العنود صحت على صوت المنبه : الهنوف الهنوف وتهزها
الهنوف : هاه
العنود: قومي ترى اذن يالله
الهنوف وهي تتمغط : برد
العنود: الجو قام يبرد اكيد البر جوه حلو
الهنوف تاخذ نفس : واي ماتتصورين شقد مستانسه على هالروحه على انا كل سنه نروح بس ماادري هالسنه احس غيير
العنود: عشانها اخر سنه
الهنوف: اسم الله علينا ليه اخر سنه
العنود: يالخبله اخر سنه تروحين البر وفي مدرسه
الهنوف: ههه كلن في قلبه شقى ليله
الا تدخل فوزيه : السلام عليكم
البنات وعليكم السلام
فوزيه : صبحكم الله بالخير ها قعدتو
العنود والهنوف : الله يصبحج بالنور
الهنوف : أي قعدنا أمي
فوزيه : صليتو ؟؟
الهنوف : لا ما بعد ألحين بنقوم
فوزيه: انزين يالله قومو وطلعت
قامت العنود توضت وصلت وعقبها الهنوف العنود بع ما خلصت فتحت الدريشه وقعدت علىالسرير والهو الي يجي من الشباك يحرك شعرها
الهنوف بعد ما خلصت صلاه: واي الجو يجن
العنود: يجنن وبس
وتنسدح الهنوف على السرير وتغمض عيونها الله ياليت ندى ويانا
العنود: ايو الله هالخبله ليش ما قعدت هم رايحين للشغل
الهنوف : عشان لجين صديقتها بتتزوج
العنود: الحين الي بتتزوج هي لجين ؟
الهنوف: أي اجل مين تحسبين؟
العنود: والله ما ادري بس ماتوقعتها هي ياحليلها الله يوفقها
الهنوف : امين
الا تخل عليهم بدور الله الله شصاير بالدنيا قايمين لا ونشيطين بعد
الهنوف والعنود: بسم الله
بدور: شايفين جني
العنود: لا ولد عمه
الهنوف: خرعتينا
العنود: الناس يقولون صباح الخير
بدور: وانتو وجيهكم وجيه صباح خير أمي تناديني يالله بسرعه تجهزو وطلعت
الهنوف: ياحليلها هالعمه والله مو محلي البيت الا وجودها
العنود: انا عن نفسي ما اطب البيت اذا كانت مب هنا الصراحه هي الوحيده الي تعطي جو
الهنوف : فديتها
العنود: عن التفدي ويالله قومي تجهزي
خلصو ونزلو تحت وكان الكل متجمع شهد ورزان داايخين وقاعدين على الكنب ومغمضين عيونهم وناصر ونايف داخلين طالعين مب عارفين شسوون والشباب يرتبون الغراض الأخيره
سلمان : على كثر أغراض أمس ولا في بعد زياده
فوزيه : قاعدين فوق راسك والا شايلهم على ظهرك ما بضرونك قاعدين في الشنطه
سلمان : قلتيها في الشنطه والشنطه وين فس سيارتي
بدور: الله يرحم سيارتك عاد انا حاطه اغراض مالها داعي بس عشان اثقل على سيارتك
العنود: وي عمه شهالنذاله
فوزيه : بد ِير عن المناقر والخناق بس بدت من صباح الله خير
على الساعه 5 ونص الكل ركب السياره
فوزيه وفهد مع شهد ورزان في الوانيت ...سلمان في الجيب حقته ركب معاه منيره ومنر ودلال وخلود وبدور
ومحمد في الجيب مع الهنوف والعنود وريم ودانه وناصر ونايف والشغلات مع السواويق في سياره
طبعا في البدايه كله هبال بعدين شوي شوي ركد الجو ونامو الا سيارة سلمان الهبال قايم شلون مايقوم وبدور وسلمان موجودين ..اما سيارة محمد بعد السوالف كلن حط راسه بجهه ونام الهنوف تمت مغمضه عيونها فتح محمد الراديو وطلعت اغنية محمد عبده اختلفنا مين يحب الثاني أكثر
واتفقنا اني اكثر وانك اكثر
فتحت الهنوف عيونها محمد انتبه لها : ازعجتج؟
الهنوف : لا عادي شدعوه أصلا ما كنت نايمه ؟
لفت وجهها على الشباك وهي تطالع الشمس واشعتها على الرمل المنظر مرره حلوو والأغنيه من عدد رمل الصحاري أكثر وأكثر محمد يطالع بالهنوف من المرايا ويدندن مع الأغنيه رفعت الهنوف عيونها على المرايا وطاحت عيونها بعيونه والأغنيه وكل قلب له حبيبه وانت محبوبي وتدري ومحمد على صوته في المقطع هذا
الهنوف نزلت عيونها بسرعه وقلبها دقاته قوت وهي مو عارفه شتسوي كل الي سوته قامت تسب في العنود انا اقولها خلينا نروح مع عمي سلمان تقولي لا لا مع محمد احسن هناك زحمه ياربي شهالحظ طول الوقت حاط عيونه علي كاني بسجن يراقب كل حركه اسويها الا يدق جوالها فرحت الهنوف يوم شافت ان ندى المتصله
الهنوف : هلا والله
محمد على طول قصرالصوت
ندى: شخبارج ولا تسألين
الهنوف : امدى توكم رايحيين
ندى : أي قولي تبين الفكه
الهنوف : حرام عليج والله يا ليتج معانا
ندى :ان شاء الله مره ثانيه
الهنوف : شخبار امي وابوي
ندى : الحمد لله كلهم يسلمون عليج وينج غريبه قاعده هالوقت
الهنوف : في السياره رايحين للبر
ندى : الله يهنيكم
الهنوف: وانتي شعندج قاعده من الحين
ندى : على قومتي الفجر ولا جاني النوم قلت اكلمج
الهنوف: انزين لا أطول عليج سلمي على امي وابوي وعمي وخالتي
ندى : ان شاء الله وانتي سلمي علىالكل
الهنوف : يوصل يالله مع السلامه
ندى : مع السلامه

محمد وقف عند محطة بيعبي بانزين قبل لا ينزل الهنوف تبين شي ولو سمحتي لا تقولين لأ
الهنوف وضحكه خفيفه : لا ماني مشتهيه
محمد: يلا عاد عن خاطري
الهنوف وهي رايحه فيها كأنه مصخها اليوم : مشكور
العنود : لو سمحت جيب 2 حليب كاكاو
الهنوف فرحت ومحمد: بسم الله انتي متى قعدتي
العنود: توني
محمد: أي سمعت طاري الاكل شلون ما تقوم
الهنوف : ههه
محمد في قلبه فديت الضحكه : بس حليب يالأطفال
العنود: أي لو سمحت يالكبير
نزل محمد وجا ب حليب وعصيرات وخرابيط حق البنات والشباب الي ورى
على الساعه 7ونص 8 كانوا واصلين والكل فرحان ومستانس ومتنشط العيال يراكضون مع ان الحو بارد والحريم دخلو المطبخ عشان يجهزون فطور والشباب قامو ينزلون الأغراض والشغالات يرتبون
شهد: رزان سوفي الأنانب حلوه
رزان : أي حلوه بيضه
شهد: قومي ناخذها
رزان : أخاف تعظ
شهد: لا جدي يقول هم يحبوني ما يعضوني
شهد متعوده دايما تجي عند الارانب وتشيلهم المهم وقامو يلعبون
العنود راحت جابت الكاميرا وقامت تصور الجمال والأرانب والبنات وهم يلعبون
بدور وهي تصارخ : بنات يلا الفطور
العنود: يلا يلا جايين
بدور: اذا خلص ترى مالي دخل
الهنوف : يلا العنود
العنود: يلا قدامي بروح اصورهم
دخلت الخيمه وصورتهم وهم ياكلون
فوزيه : تعالي فطري وخلي عنج التصوير لاحقه
العنود : ان شاء الله ..سكرت الكاميرا وقعدت تفطر بعد الفطور الحريم قعدو في الخيام والعيال يلعبون والبنات قامو يدورون حول المخيم أما الشباب ويا جدهم حطو راسهم ينامون عشان يرتاحون شوي
العنود : اما هالأرنب عاجبني بروح اجيب جوالي وبصوره راحت خذت الجوال ولقت 5 مس كول و3 رسايل المكالمات كلها من فيصل فتحت الرساله الأولى ( وينج ردي )
الرساله الثانيه : ( أبيج ضروري بس دقيقه )
الرساله الثالثه( براحتج بس حبيت أقولج اني ماراح اقدر اجي اليوم عندي ظروف بس ان شاء الله بكره )
العنود ماتت من الضحك : عاد أنا الي مصدقه انك بتجي
وقامت رسلت له ( ههه مسكين عاد انا الي مصدقه انك بتجي ادري بس تفلسف أقول بس اقعد في مكانك ولا تقول شي الا وانت قده )
الساعه 4 العصر
نايف وناصر كانو يلعبون في الدبابات العنود أول ما سمعت صوت الدبابات نقزت من مكانها وطلعت بره تصارخ: نويصر نوافو
ولا من مجيب رجعت الى ادراجها
الهنوف : والله مصدقه روحج الحين بيسمعونج
ريم: حتى لو سمعوا ماراح يرجعون
العنود: وجع بس أوريج فيهم اذا مسكت الدباب والله ما أتركه
فوزيه : حشا مو بنت صبي لا بالله صبي
العنود: ألحين الي يركب دباب يصير صبي
فوزيه : أي صبي اجل الدبابات حق البنات
الهنوف: جده لا بس حق البنات والعيال عادي
فوزيه: أي دافعي عنها حتى انتي وياها نفس الطقه
العنود: انزين انا بطلع بتمشى بره أغير جو
الهنوف : وانا معاج
بدور : تغيرين جو والا عشان اول ما يجون تاخذين الدبابات
العنود وهي طالعه : والله ما جات على بالي الفكره زين منج قلتي
طلعو يتمشون وطبعا بجلا لاتهم الا محمد وسلمان عند السياره
العنود تتقدم لهم : وين بتروحون ؟؟
سلمان : بنصيد ضبان
العنود: احللف
سلمان: والله تخاوينا
العنود: يالله احسن من القعده
الهنوف : هي تعالي وين رايحه
العنود: وياهم يالله تعالي نغير جو
الهنوف خذت حجابها الي كان على كتفها تحجبت وتلثمت وحطت الجلال وركبت السياره
سلمان : مالكم داعي مع هالجلالات
العنود: اجل نطلع كذا
سلمان : عادي بر
الهنوف : لا أحلف قل والله واذا شافنا احد
سلمان : ما غير بيتخرع
العنود: والله انك شايف بنفسك مقلب ومصدق روحك بزياده ..من زينك ألحين
سلمان : ول ول ول كلتنا ماقلنا شي
محمد:ههه ما حد قالك تكلم عاد كلش ولا جمال العنود قيس نسى ليلى يوم شافها
العنود: شف تطنز بعد انت الثاني
الهنوف : والي مايطول العنب حامض عنه يقول
العنود: تحمد ربك وتبوس يدك وجه وقفا اذا جاتك وحده مثلي
سلمان : في هاذي صدقتي
العنود: احم احم عمي تعال انت من صجك بتروح تصيد ضبان
سلمان : شفيج مب مصدقه أي والله بنروح
الهنوف: وان شاء الله بتاكلونه
سلمان : اشرايج اجل نصور معاه
الهنوف والعنود: وع
محمد وسلمان : ههه
الا العنود تلمح دبابين : محمد والي يعافيك وقف
محمد: شفيج : هذا نويصر ونوافو
محمد يدق لهم بوري( هرن) بيب
شوي الا نصور نايف جاو العنود على طول نزلت نصور يلا انزل
ناصر : نعم نعم لا ياماما
العنود: نصور والي يعافيك حرام عليك والله خاطري اركب
سلمان : خلها تركب
ناصر : بشرط
العنود: والله وخوش نويصر يتشرط يالله وشو؟
اركب وراج
العنود: بس من عيوني عمي يلا معاي
سلمان: وين معاج
العنود: اركب في حق نواف وهو وراك
سلمان : لا مالي خلق روحي انتي
العنود: سلمااني عن خاطري بعدين ما عندي محرم
محمد: انزين اخوج اولى
العنود: اعرفك لو احن من اليوم لين بكره ما جيت يالله عمي لا تردني
سلمان : وانا اقدر يلا ونزل
الهنوف نزلت من السياره عاد لا تطولون احنا مب فاضيين نستناكم
العنود: لا تخافين خمس دقايق
الهنوف تورطت وانا هذا حالي كل مره كذا هالبقره العنود ما تفكر وي كان خذتني انا لا على طول سلمان
محمد: ههه خلتج وراحت عاد العنود ماتصبر
الهنوف : ههه لا عادي
محمد: ممكن سؤال
الهنوف الله يستر : أي تفضل
محمد : ليش اذا كان سلمان معانا تصرين هبله وعادي أما اذا كان مو موجود تصرين هاديه والا بس سلمان الي يوسع الصرد
الهنوف وجع هذا سؤال يمسئل المجنون يعرف يجاوب عليه : ههه لا شدعوه بس متعوده عليه
محمد: م عقبال نا تتعودين علينا
الهنوف ساكته راحت تتمشى شوي بعيد عن السياره محمد خذ الجريده وقعد يقرأ وعيونه كل شوي تشوف الهنوف ..... الهنوف قعدت على الأرض وتلعب بالرمل شوي تلف وجهها وتصرخ بأعلى صوت : وا ا محماد
محمد أول ما سمع صوتها نزل من السياره على طول وراح لها ......؟؟؟؟؟
ياترى الهنوف شنو شافت .....ومحمد وش راح يسوي ؟؟
عاشق بلادي ليش انصدمت يوم دلال قالت اسمها ؟؟...
فيصل راح يجي فعلا والا بس كلام مثل ما قالت العنود ؟؟
ومن الشخص الي راح يجيهم ؟؟
و..... وتساؤلات كثيره ان شاء الله في الجزء الجديد نعرف حلها
دمتم
م حبي ع
* أمي الذكريات رة *

روعه القصه .........
تسلمي يالغلا ........
اول وحده ارد <<<<<<<<<<< ههه مومصدقه .....
القصه حلوه ولاتطولين علينا ..........
ودمتي ل عربجيه دلوعه ي ...........