للجميع بلا استثناء ادخلوا الله يرضى عليكم يارب والله مليت والله صارت مصخره

1. وبعدين ليه كل هذا ؟؟ ماله داعي والله .. الشكوى لغير الله مذله ياناس

بسم الله الرحمن الرحيم
سلام عليكم . بنوتات حلوات امورات
موضوعي عباره عن نصيحه لان الساكت عن الحق شيطانُ اخرس
كثير مواضيع بهالقسم شكاوي عن الزوج او اهل الزوج او بين الجارات وكذا ...
لكن..
اللي لفت نظري بعض الردود (( اللي مالها معنى))
من ضمنها لما تجي وحده تطرح مشكلتها مع زوجها مثلا..
اغلب الردود تجي زي كذا/

• خوذي حقك منه

<< وشلون يعني تسبه وتشتمه ؟؟ والا تضربه وتعذبه ؟؟ والا حط له سم بالاكل والا ايش بالضبط قصدك ؟؟؟؟؟

• طنشيه وعيشي حياتك

هذا بالذات الرد اللي يستفزني مرره
يعني كيف مافهمت ؟؟ يعني تطلع لاي مكان و(تعيش حياتها) بدون ماتستأذن منه ؟؟ والا بدون مايعرف ؟؟ والا تاكل بلحالها وتنام بلحالها وتحط لها جناح خاص لها بالبيت وهو نفس الشي ؟؟ ابي افهم بس ايش المقصود ؟؟

• وريه نجوم القايله

كيف يعني ؟؟ تهدده؟؟ تبتزّه ؟؟ ياربيه بجد تفاهه هالاسلوب الله يهديكم بس
واغلب العبارات كذا
كل الرجال كذا ............. كل الرجال غدارين ونصابين ................. كل الرجال ماعندهم عاطفه ........ كلهم مايحسون مايحترمون اهتماماتهم محصوره بمصالحهم ....... الخ
ترى هالرجال هم ابوي وابوك واخوي واخوك .. ترى هالرجال هم الرسول صلى الله عليه وسلم تراهم ابو بكر وعلي وعمر رضي الله عنهم
بجد بجد وش تحسون فيه لما تفتنون بين الاخت اللي تستشيركم وبين زوجها ؟؟
تدرون اكثر شي يسعى له الشيطان اعوذ بالله منه هو الفتنه والتفرقه بين المرء وزوجه !!!
حرام عليكم اتقوا الله في انفسكم وفي اخواتكم !!
وبعدين اساساً اللي جايين يستشيرون العضوات هنا ؟؟ بصفتهم مين يعني ؟؟ شيوخ يفهمون وممكن يفيدونكم ؟؟ والا اخصائيات اجتماعيات دارسات وفاهمات وواعيات ؟؟

وبعدين ليه كل هذا ؟؟ ماله داعي والله .. الشكوى لغير الله مذله ياناس

تخيلي اختي لو تجين تشكين زوجك عندنا من وراه .. ودقايق يجيك خبر موته لا سمح الله وش بتسوين وقتها ؟؟ بتقولين ياليتي معاه لو مكدر عيشتي بكلمه او تصرف مره بالعمر ... يا حريم خافوا الله غيركم بنات ربي ماستر عليهم يتمنون الستر .. صكت اعمارهم الاربعين وهم ماتزوجوا .. احمدوا ربكم على نعمته ..
تراكم اكثر اهل النار بسبب انكم تكفرون العشير على قولة رسولنا وحبيبنا صلى الله عليه وسلم .. ومعنى كلمة تكفرون العشير هو انكم تشتكون وتشوفون عيوبهم وتتركون ايجابياتهم والاشياء الحلوه فيهم ..
صدقوني ركعتين بآخر الليل تشكون فيهن همكم لخالقكم سبحانه .. وهو مايخلي حق احد سواء بالدنيا والا بالآخره .. سامحوا اعفوا اصفحوا .. اتّكلو على ربكم سبحانه وحده وان شاء الله تبرا جروحكم ولانتسون ان ربي يبتلي العبد المؤمن ليراه هل يصبر ويشكر ام يكفر ..
يالله خل كلنا نقول بصوت واحد لا اله الا الله .. بنصبر .. بنعفو .. بنسامح .. بنتمنى الجنه .. صحيح بنكون مجروحين والكلمه الطيبه ماراح تطلع منا من قلب .. بس بنحاول ننسى الاساءه ونصفح عن كل من اخطأ بحقنا ,,
الكلمه الطيبه .. الابتسامه الحلوه .. الوجه البشوش .. السكوت والكلام عند اللزوم فقط >>> يخلون قدرنا فوق ويخلون الكل يحبنا ويقول >> الله هالبنت هاديه بشوشه بس تبتسم كل كلامها عسل .. وبس نرجي عفو ربنا ثم ان الكل يحبنا .. ولا تنسون رضا الناس غايه لا تدرك
احس كثرت كلام بس والله اني اتضايق لما اشوف اللي يشكون من اي احد واتمنى ان عقولنا ماتكون صغره والدنيا ماتوقف عند اي مشكله وربك رحمان رحيم
اتمنى من المشرفات عدم حذف الموضوع
اللي توافقني بالراي الله يكبر عقلها ويخلي لها احبابها
واللي ماتوافقني تقولي ليه باسلوب مرتب واناقشها برايي ولازم نحترم وجهات نظركم لاني يمكني اخطأت بكلامي !!
بالنهايه ان اصبت فمن الله وان اخطات فمن الشيطان .. والله غفور رحيم
تمسون على خير ,,