لمن رحل

1. (((رحمة الله عليك يالغالي..رحمة الله عليك..

ايه يبه اشتقت لك.. اعد ايام غيابك واحسبها..محتاجتلك اكثر مماتتصور..والحياه عقبك احس انها صعبه..ابيك يايبه وربي محتاجتلك..ابيك تنبهني لخطاي..اشورك فأموري ومشاكلي..توقف معي وتسندي..تعاتبني لاخطيت وترشدني للصح..ماعرف
لمين اشكي يايبه فرقاك وجمرته اللي مانطفت..مالي غير رب العالمين..احتاج لشريك لي فدنيتي..يحس فيني ويفهمني من غير ماقول آآه ياقلبي..يايبه للحين موتتك غصه فحلقي تنشب فحلقي كل يوم وفكل مناسبه..فكل لحظه اتذكرك وكلامك
ودلعك لي..كل حركاتك وسكناتك ..صوتك لاقريت القرآن يرن فأذني..احلم فيك انك رجعت وافز من نومي..وتخنقني عبرتي..ماعندي من اقوله حلمي فيك..واقعد ابكي وتدمع عيوني قهر..حسبي الله على من بلاك يابوي..
حسبي الله عليه..حسبي الله عليه..مابي منه شي هالحين..ابيه فالاخره عند رب العالمين..يايبه انا مقهوره..كل شي عندي والحمد لله..بس مادري شفيني احس اني احيان مو مرتاحه..ولا اقدر اقول هالكلام لاحد....
اخاف من الكلام والناس ..ماحب احد يجرحني ..ياما اجرحت وانهنت يايبه وتهزئت بغيابك..مالقيتك تدافع عني وترد عني كل واحد..تعبت ادور عنك فغيابك فوجه كل من حولي واعجز القا لك ملامح بينهم..وينك يايبه؟؟
ابي انطق هالكلمه( يبه )..وش قد اشتقت لها حيل من كل قلبي..اشتقت اناديك فيها..اشتقت اصلح لك الشاهي..اشتقت ادق عليك تلفون الدوام واكلمك..اشتقت اقعد بحضنك وتدلعي..اشتقت العب بلحيتك وانثر عنها المويه..اشتقت لريحة
العود فجسمك ولحيتك..اشتقت للمسواك حقك..اشتقت لكل شي فيك..برتك وصراخك وحنيتك وعصبيتك..اشتقت لكل مافيك..تعال واغنيني عن هالعالم وربي مابيه..ماقدر افضفض لاحد عن همومي يايبه..ولا احد قدر يدخل قلبي ويشوف وش فيه
حتى اهلي مايقدرون..اخاف من فراق اللي احيهم ..اخاف امي تتركني مثلك يابوي والله لانهار ماقدر عليها..اخاف ملاك روحي يتركني مثلك.. قويه علي ماقواها يابوي..
اخاف من كل شي..احب اخواني يايبه..احبهم حيل لانهم من ريحتك..دمك..عروقك..
آآآآخ يايبه..لو تشوف النار اللي شابه في ضلوعي كان اقولك قليل قليل قليل عن اللي فخاطري..ربي بس يعلم عن اللي يسكن بين ضلوعي..يبه انا انظلمت كثير..انظلمت وكرهت الظلاّم واللي يظلمون..حسبي الله عليهم..
اكتشفت ان الناس فيها الحسد..ليه يايبه؟؟ليهّّ!!
ماكت اعرف ان الدنيا كذا..كنت محافظ علي من النسمه لاتجرحني..غطيت علي حتى ان الدنيا غداره..خبيت عني وجه الدنيا الحقيقي..ذقت الهنا كله..
آآآه ياعمود البيت يوم رحت..انكسرت وانكسرت نفسي..شفت من الدنيا اشكال والوان..
شفت القلوب الحاقده..شفت الاهل ماكنهم اهل..شفت الاصحاب خوانين..شفت الحبايب مايتحملون اي شي..
شفت صبري يخونني فبعدك..توني دريت يايبه قدرك فدنيتي وش كان كبير ومهم..ايه يايبه وربي محتاجتلك..ابي ارمي نفسي فحضنك وابكي ابكي حيل..
ابي ابكي فحجرك وانام انام..ا بي ارتاح يابوي ..احس قلبي يعصر روحي..مخنوقه يبه مخوقه والله العظيم..ضاقت فيني الوسيعه..مدري يايبه انا رافعه راسك ولا لا؟؟
مدري اذا انا الحين نفس اللي كنت تحلم فيه لي ولا لا؟؟مدري شرفتك ولا لا..مدري تفتخر فيني ولا لا..؟؟
كنت ابي اسمعها منك....كنت ابيك توقف بيوم عرسي..كنت ابيك تسلمي بزوجي بيديك..كنت ابيك تزفني له..كنت ابي احب راسك انت بيوم زواجي واشكرك على كل اللي قدمته لي..
مدري يايبه اذا انت زعلان مني ولا لا..سامحني اذا غلطت عليك فيوم..او رفعت صوتي..او عاندتك او رديت عليك..سامحي اذا فيوم نسيت اصلح لك كوب الشاهي..او نسيت افتح لك الباب او كسرت دباستك حقة الدوام وانت ماتدري وانا فأول ابتدائي
وللحين ماعترفت..كنت خايفه منك تهاوشني يايبه..شكرا على كل شي جبته لي وقدمته لي وماقدرته فوقتها ولا عرفت قمته الا يوم رحت عني..مشكور على القلم الاحمر اللي كنت كل اسبوع تجيبه لي لان كنت اخلصه اسوي نفسي مدرسه واصحح
كنت تساعدني احقق حلمي..واكون مدرسه..كت تجيب لي الطباشير واقعد ورا الباب اشخبط..كنت تقعدني جنبك عالاكل..كنت تقرا على وانا نايمه واحس فيك تلحفني وتحب راسي..
كنت اشوف دموعك اذا انت اخطيت علي..توني اعرف انك تحبني..اول كنت اعرف بس مثلي مثل اي احد عادي عندي اقول ابوي ولازم يحبني..ماعرفت ان حبك هو كان قوتي..ماعرفت الا يوم رحت وحسيت بالضعف من دونك..
سامحني يبه ان زليت فيوم عليك انت وامي الغاليه..وربي ماكان قصدي..كان لعب طفوله ومراهقه..
يابوي اكتب كل كلمه والدموع ذبحتني وماشوف منها شي..يايبه انا مضغوطه حيل بدونك..اكتم واصبر واقول مايخالف واتنازل واسكت عن كل شي..حتى اللي يحشون فيني ويهاوشون ويسوون لي اي شي اقول اللي علمتي اياه..
حسبي الله ونعم الوكيل..تدري ليه؟؟ابي اكون طيبه حيل مثلك..ابي لامت مثلك كل يذكري بالخير..انت لو تشوف الناس كيف يحكون عنك..وربي افتخر اني بنتك كل لحظه ودقيقه وساعه..
انت قدوتي..انا ماحب المشاكل ولا اعرف اواجهها..يايبه الخوف ذبحني..وحزني قهرني..ودموعي اسرتني..ايه يايبه والله ان فصدري تنهيده كبر اليوم وامس..تعال شق صدري وشل اللي فجوفي يايبه..
يعلم الله ان انت وامي اغلى ماعندي فدنيتي..يعلم الله اني ابي رضاكم وجنتكم..ياليتك عايش كان قلت لك فكل لحظه مثل ماقول لامي الحين..كل ماشفتك اقولك ادع لي..ادع لي..ادع لي..ارضا عني واصفح..
اغفر لي الزله..والله يابوي مجروحه حيل من اللي حولي ومن زماني ومن دنياي..يايبه انا مو سوداويه ..انت تعرفني زين..بس وربي لو تشوف حالي تقول وش هالضنك وانا ابوك..
آآآه اتذكر كلمتك يوم تقول موتي مظلومه ولاتموتين ظالمه ..هذا اللي ابيه..يايبه انا اخاف من الموت ولا لو علي كان تمنيته كل لحظه..بس ادري ان عقب الموت حساب وجزاء..لو الموت بس ماعقبه شي تمنيته ولا اخفيك اني م القهر
احيان اتمناه وارجع لاهديت اتعوذ من ابليس واستغفر..شسوي يايبه..تعبت م كل شي ..تعبت من الدنيا..وظنون الناس والاهل والربع والاحباب فيني..تعبت من كل شي..احبهم يابوي وربي يشهد..وانت تعلم هالشي وش قد ..
لكنهم يتعبوني..يتعبوني حيل..وانا ماعندي من اقوله اللي فخاطري..مالي احد..
قلت لك يابوي اني انكسرت..قلبي ماعاد هو قلبي وضحكته..ادور البرآءه اللي كت فيها قبل مارتبط والضحكه والمرح واللعب والهستره..القاها اختفت..القا نفسي تغيرت..حتى نفسي ملت من نفسي..تعبت يابوي تعبت..اطق على صدري
كل يوم واقول يامن يشوف ويحس ويحن...!
يامن يداوي ويطمن قليبي ..!!
آآآه يامن يزرع فقلبي الراحه بدل الشقا ..!!
واقعد ابكي لحالي ..ابكي واشهق يايبه لحالي ..واصلي ركعتين وادعي الله من كل قلبي..
اطلع كل اللي فقلبي..
ثم اروح فراشي وانام..
حتى لازعلتمن من احد ..اصلي وابكيي وادعي وطلع اللي فخاطري وارجع انام..وخاطري داخله قلب مذبوح..مذبوح..من الضيقه والكمد..والهم
ايه يايبه ..لو ترجع تركت ناسي وربعي وخلاني وجيتك..ماعاد ابيهم كلهم ..جميع..ابيك انت..
بطير فيك واتركهم كلهم..بتخلى عنهم جميع..
انت بس ارجع يابوي..يالغالي..ياللي ترابك تسوى الخلايق كلها..

(((رحمة الله عليك يالغالي..رحمة الله عليك..

الله يرزقك الجنه..ويبرد عليك ويجعل قبرك روضه من رياض الجنه ويسكك الفردوس الاعلى يارب..ويجمعني معك تحت مستقر رحمته..
اللهم اغفر له فهو عبدك ابن امتك..ناصيته بيدك..فلا تكله لنفسه طرفة عين..اللهم انه بين يديك..راجيا عفوك..فامنن عليه يارب العالمين برحمتك..واجره م سخطك..وحرم عن وجهه النار..واذقه نعم الجنان..يارحمن يارحيم)))
لاارغب منكم سوى الدعاء..الحمد لله على ذلك اللهم الهمني الصبر والسلوان..مؤمنه بقضاء الله..لكن هذه مجرد فضفضه لما اشعر به احيانا
وانا لله وانا اليه راجعون
اللهم الهمنا الثبات في الدنيا والاخره ..وحسن الخاتمه..وقنا فتنه القبر وعذاب النار..