محتاجة ترفعون معنوياتي بدعواتكم

1. مشكلتي يمكن عند البعض عادية لاكن بالنسبة لي كبيره

ما ادري كيف ابد احسني محطمة وبقوه
دخلت المنتدى وشفت هموم البنات واحس ردودكم تبرد ع القلب
قلت اجي واقول الهم الي كاسرني لاني ما احس ان فيني عقل يساعدني ع اني اساعد نفسي

مشكلتي يمكن عند البعض عادية لاكن بالنسبة لي كبيره

انا احب ولد عمتي وهو بعد يحبني لنا تقريبا 6 سنوات من يوم حنى صغار وحنى مع بعض كبرنا وكبر حبنا معنا مرينا بمشاكل بين اهلي واهله كانت كبيره جدا ومن ضمن المشاكل اني ليش احب ولد عمتي ما اقدر اوصف وش كثر تأثير المشاكل ع نفسيتي بشكل مستمر تتجدد المشاكل بعدها قعدة فتره وانا ادعي ربي انة يحل كل الي بينهم وان يجمعني بة بالحلال وان يرزقة بالوظيفة الي ترفع راسة ابكي ليل ونهار الي ذبحني كلام اهلي انه مايبونة عشان ظروفه المادية متوسطة تعبت تعبت وبقوه وبعد فتره مرض ابوي وجو الناس يسلمون علية ومن رحمت رب العالمين ومن الدعاء جت عمتي تسلم علية بعد مدة سنتين من الزعل سجدة لربي انهم تراضو وان دعواتي ماراحت عبث ..الي احبة كبري وهو الحين بوظيفة ولله الحمد جيده لاكن تحت التدريب لمدة سنتين المشكله هنا ؟؟
لما بدو الناس يتكلمون فيني بالمعنى انهم يبون يخطبوني خفت مره وقلت لاخته الي هي الوسيط الي بيني وبينة قلت فية ناس يبون يخطبوني قالت خلاص وبعد يومين جاء عمي يخطبني له لان ابو الي احبة ميت ابوي مو رافض عنده عادي المشكله امي رافضة رفض شديد وقلتلها وفهمتها وحاولت وماخليت شي ماسويتة مع العلم انهم يعرفون اني احبة من زمان وان روحي فية راحت امي وردة ع عمتي وقالت مالكم نصيب اقسم بالله اني اشوف الموت بعيوني وبعدها بأسبوع رجعت عمتي تخطبني
وانا يوم دريت حسيت فية امل 1% انهم يوافقون وبكل سهوله ردو عليهم مره ثانية مالكم نصيب ورب الكعبة يا خواتي من اكثر من 6 سنوات وانا ادعي ليل ونهار حتى مكة نروحلها مرتين في السنة وادعي ربي بحراره وبرمضان في التراويح والقيام ادعي اموت نفسي من الدعاء واستغفر ما اخلي وقت يستجاب فية الدعاء الا ودعيتة وصورة البقره اقراه كثير واطلب ان الله يجمعني فية وان الله يسهل امور زواجنا ويطرح فية الخير وفي الاخير ماحصل اي شي من الي دعيتة
مع العلم اني ما انام وامي وابوي مو راضين علي حتى يوم رفضت امي سكت وقلت في خاطري مابي اغضب الله .
الحين انا في حالة يأس شديد والشيطان يلعب في راسي اقول في بالي معقولة كل الدعوات الي ادعيها ما استجابت
معقوله الدعوات الي من قلب ما استجابت هذا وقت االدعوه انها تستجابة ليش ربي ما استجابلي يمكن اكون من الي دعواتهم ترد والله ياخواتي الهم هدني هد كرهت نفسي
كانت معنوياتي مرتفعه وكنت متفأله جدا رغم الالم وكنت بشوشة وراعية وناسه وفله وواثقة بأن دعواتي تستجاب وان اهلي رح يدخلوني علية ويباركون لي وني رح اكون احلى عائلة كأي بنت تحلم
انا ما اقول اهتزت ثقتي بالله بس يأست جدا كل شي فيني حلو راح حتى اهلي ملاحظين في التغيير واشياء كثير تموت اكتب لكم وانا ابكي من التعب حتى لا ابتسمت اغص في ابتسامتي
بنات تكفون ارفعو من معنوياتي الشيطاني لاعب فيني الوسواس ابعدني عن الدعاء ابي ارجع زي قبل ابي اثق وان لازال فية امل لاحد يعاتبني او يقول خيره ترا والله اتعب زياده
ماتصدقون انا كيف ادعي وكيف ثقتي كانت قوية ...
سامحوني ع الاطاله كنت ابي افض فض لكم ومحتاجتلكم حيل
ادعولي تكفون انا ما يأست من رحمت الله لاكن الشيطان يوسوسلي يقولي لاتدعين خلاص مافي امل والخ... وانا احاول لاكن الدعوه ماتطلع من قلب مثل قبل
الي ابية شيأين
الاول دعواتكم تكفون
والثاني ترفعون من معنوياتي لاني حيل تعبانة وكرهه حياتي
(والله يسعد الجميع يارب )