محتارة أكمل وإلا لا طالبة مشورتكم لا تردوني

1. الزبدة ..


2. المهم اني ترددت ما ادري اتوكل على الله وأسويها ..


3. وإلا أأجل الموضوع وأحج السنة هذي ..


4. قال خلاص توكلي على الله وسويها وربي اللي كاتبه بيصير ..


5. وأنا ما أدري قلت بآخذ رايكم ..

بسم الله الرحمن الرحيم
السلام عليكم ورحمة الله وبركاته ..
أخواتي العزيزات .. أنا كتبت لكم موضوعي هذا طالبة منكم الاستشارة وكما يقول تعالى ( وَشَاوِرْهُمْ فِي الأَمْرِ فَإِذَا عَزَمْتَ فَتَوَكَّلْ عَلَى اللّهِ إِنَّ اللّهَ يُحِبُّ الْمُتَوَكِّلِينَ )
طبعاً أنا قررت بإذن الله اني اسوي برنامج أطفال أنابيب لعل الله عز وجل أن يرزقنا من خلالها الذرية انه على كل شئ قدير ..
ورحت للدكتور أمس عشان أبدأ البرنامج ..
لكن فيه شي ضيق صدري مرة وأحس أن راسي بينفجر من كثر التفكير وأنا محتارة وحبيت آخذ رايكم ..
طبعا أنا سويت عملية أطفال انابيب قبل كذا وما كتب لها ربي النجاح .. وعشان كذا أنا عارفة خطواتها واجراءاتها ..
وأمس من زود الفضاوة قمت أحسب تقريبا كم بستغرق حتى تطلع النتيجة بإذن الله ..
طبعا أنا أحسب بالتاريخ الهجري .. طلع ان النتيجة بتبان آخر شهر ذو القعدة بداية ذو الحجة .. وهنا مشكلة أنه لو قدر الله ما حصل حمل أنا ناوية أني أحج باذن الله .. لكن ممكن هالشي مايخليني أحج لأنه راح تكون علي الدورة ..
المشكلة الثانية أني أنا مقدمة على وظيفة وطلع اسمي ضمن الترشيح وسمعت من الاحتمالات ان المباشرة يمكن تكون في شهر ذو القعدة وبعضهم يقولون لا الترم الثاني ان شاء الله ( وهذا اللي أتمناه ) .. وهنا بيكون علي مشكلة كبيرة مررة لأن سمعت من كثير من اللي مسوين هذي العملية انه يبغالها راحة تامة وهالشي راح يؤثر علي سلبيا .. وأنا طبعاً يوم قررت أصلحها الحين على أمل أنه ما راح يكون فيه وظيفة حالياً ..
وانا طبعا لو ما صلحت العملية في هذا الشهر ما راح أقدر أسويها إلا عطلة الصيف القادمة بإذن الله يعني بعد 8 شهور لأني راح أكون مرتبطة بوظيفة وهذي أول سنة لي فيها لازم أثبت جدارتي ومن الصعب إني بصير آخذ إجازات خلال فترة الدراسة فعلى كذا ما راح يكون عندي فرصة إلا الإجازات ..
وأنا بيني وبينكم ما عندي صبر وصعب اني اجلس طول هذي الفترة بدون علاج علماً اني خلال سنة كاملة ما صلحت إلا محاولة علاج وحدة بس !!

الزبدة ..

أنا بصراحة صليت أكثر من مرة استخارة عشان هذا الموضوع واحس براحة بعد الصلاة لكن بعدها بشوي يرجع يضيق صدري .. المهم اني اليوم ضاق صدري مرة لأني أحس اني متحمسة عشان العلاج .. وفي نفس الوقت خفت انها تجي الوظيفة وتخرب علي ولا أقدر ارتاح في البيت .. وبكذا أكون ضيعت علي الحج ولا استفدت من العلاج ومثلكم عارف ان تكاليف هذي العملية غالية شوي فالواحد اذا تعب وخسر وده انه يمشي كل شي تمام ..

المهم اني ترددت ما ادري اتوكل على الله وأسويها ..

وإلا أأجل الموضوع وأحج السنة هذي ..

مع العلم إن قلبي يتقطع .. وما عندي صبر للسنة الجاية .. وفي نفس الوقت ما ودي اتعب وأخسر وبالأخير أجلس كل يوم طالعة نازلة من الدرج عشان الوظيفة .. وطبعاً راح أباشر كموظفة جديدة فما أقدر انه من أول يوم لي آخذ إجازة !! نفسي ما تسمح لي وفي نفس الوقت ودي أحج السنة هذي وما أدري وشلون أوفق بينها .. أتمنى إنكم فهمتوني ..
والله من ضيقة الصدر اني بكيت لين انفجر راسي .. أحس اني أملت نفسي .. وبعدها صار فيه عقبات في طريقي .. رحت استشرت زوجي .. قالي عادي سويها وإذا طلعتلك الوظيفة في نص البرنامج نقطعه .. قلت له وش الفايده نخسر ولا نكمل .. قال خلاص أجل أجليها .. قلت له ما أقدر نفسي تعلقت خلاص ..

قال خلاص توكلي على الله وسويها وربي اللي كاتبه بيصير ..

وأنا ما أدري قلت بآخذ رايكم ..

وعلى فكرة والله ما كان على بالي إني أسوي محاولات علاج إلا بعد ما أحج إن شاء الله .. لكن سبحان الله يوم شفت كل صديقاتي حملوا .. أحس إني اشتقت مرة للحمل ولا عاد فيني صبر وقررت القرار المتسرع هذا .. واليوم بديت آخذ حبوب عشان تنزل الدورة .. وقلت أستشيركم عشان أشوف أنا أكمل وإلا أخلي الدورة تنزل .. وأأجل العلاج ..
وجزاكم الله خير ..
ورب أخٍ لك لم تلده أمك .. وانتم والله أخواتي .. اللي أحس أني أحتاج أرجع لهم وأستشيرهم
دعواتكم ..