من اين لناالحب والدفء و الحنان والعطف

1. ) زينب ... امرأة طيبه


2. الله يهديهم لو هم مكان امهم صدقوني ماسابتهم لحظه


3. كنت مااروح الكليه إلااذا اخواتي اثنين عندها لأنها مره تعبانه


4. قبل اخر يوم من وفاتها يوم الأحد

السلام عليكم ورحمه الله وبركاتة
من اين لناالحب والدفء و الحنان والعطف
بكتب لكم قصتي مع امي كيف كانت تخدمنا حتى وهي مريضه جدآ ولماراحت ماأحنا قادرين نتحمل المسؤليه زيها
واحنا في المستشفى شفنا نماذج كثيره فيه بعضهم عاقين وفي بعضهم بارين وفيه اللي ماعنده ولد يسأل عنه والعكس.. بعد القصه نصيحه للي عنده ام انه يستغل الفرصه ويكسب رضاها بعد رضا الله
اصيبت امي بمرض خطير عانت منه سنوات بالرغم من انها تتألم إلا انها صابره على مابتلاها الله تصارع المرض من اجلنا و تقوم بخدمتنا
كنت ارجع من المدرسه القاها تستناني بشوق والغداءجاهز و اذا مااكلت تزعل .... واذا مرضت ماتسيبني لحظه حتى وهي مريضه بقوه
طلاباتي اوامر عندها كان كل يوم يمر من حياتها يزيدها تعلق بالله كانت تطلب منا نقراء مع بعض قران و نتحصن ونصلي الصلاه بوقتها وو....
في السنه الاخيره اشتد عليها المرض ... دخلت العنايه شهرين واكثر رافقنا معها مره انا مره اختي ... لما صحيت واحنا عندها طلبت مني اني مااسيب الكليه بعدين مرت ايام صعبه طلعت من العنايه لغرفه تحت والحمد لله عندنا مرافقات عسل يعني فيه تغيير جو جلسنا في المستشفى كثير وامي مرضها يزيد يوم عن يوم لكن نفسيتها مرتاحه لأنها متعلقه بالله واحنا حولها واخواني و جدتي وخالاتي .... شفنا نماذج وقصص كثيره وبحكي باإختصار قصص اخر غرفه اللي فيها الموت اخذ امي الغالية بدايه من الباب عن يميني دورات مياه وانتم بكرامه وبجنبها وحده اسمها زينب والثانيه فاطمه و نوره واحناواخيرآ ام راشد

) زينب ... امرأة طيبه

مريضه بالفشل الكلوي اعاذنا الله واياكم منه اسأل الله لها الشفاء اذاكانت على قيد الحياة والرحمة اذا كانت تحت التراب قصتها باإختصار طلقها زوجها لأنها عقيمه والديها متوفين لاأحد يزورها لا اخآ ولا قريب الا نادرآ مما ادي الى تدهور حالتها النفسيه والصحيه تتمنى ان يكون عندها بنت او ولد يقوموا برعايتها وتلبية طلاباتها لكن قدر الله وماشاء فعل... ننتقل الى جاره اخرى بجانب
زينب اسمها
) فاطمه امرأة مريضه بالورم الخبيث وبغيبوبه لديها ثلاثة بنات جميعهن يرافقن معها و الله كل ماشفنا بناتها وهم يقروا عليها قران باالدور طول اليوم ويناموا عندها بالدس ماقصروا معها ابدآ
وفيه أمر تعجب منه جميع اللي في المستشفى كانت فاطمه والله تستغفر وتسبح بيدها وهي بغيبوبه كنت لما اشوفهم احس اني مقصره بحق امي ماشاء الله عليهم
اسأل الله لها الرحمة فى الدنيا والآخره
قدام زينب
) نوره ام لتسعة اولاد وبنات كوكتيل ومايزورها الا نادرآ واللي مرافقه عندها اختها
تقول: خالتهم
يقولوا: البنات مانحب المستشفى قرف وماادري ايه ..
بالله عليكم هذا رد
طبعآ عارفين الاجابه
خالتهم زعلانه عليهم وماتكلمهم

الله يهديهم لو هم مكان امهم صدقوني ماسابتهم لحظه

) ام راشد امراة كبيره في السن من اهل الباديه كانت في غيبوبه مااعرف مرضها بالضبط لكن ترافق عندها زوجه ابنها ام ناصر بحضور ام ناصر ذهب السكون والهدوء فى الغرفه كانت مضحكه جدآ وثقيلة دم
اذكر موقف من مواقفها كانت تتقرف من ام زوجها العجوز وتجلس وتنام في الممر امام التلفزيون وجاء الدكتور وهي نايمه بسابع نومه في الممر وقال ايش هذا المنظر وقومتها الممرضه ... انتي مرافقه مع مين قالت مع عمتي ام راشد وسألها عن عمتها كيف حالها
طلعت ماهي داريه عنها الله يصلحها
ترى ماأحد يتحمل الأم والأب إلا ابناؤهم والعكس...
إلا من رحم ربي لاتخافوا فيه طيبين بس انتم اضمن ياقلبي
ارجع لقصتي معاكم ولله الحمد ماسبنا امي لحظه انا واخواتي كنا نتسابق انا واختي مين ينام بحضنها والثانيه تنام على الأرض والله كنت نايمه بحضنها وهي ماسكتني بيدها تخاف اني اطيح تعرفون سرير المستشفى يخوف
(شوفوا حنان الأم حتى وهي بتموت خايفه علي) هذا كله راح

كنت مااروح الكليه إلااذا اخواتي اثنين عندها لأنها مره تعبانه

قبل اخر يوم من وفاتها يوم الأحد

رحت الكليه جاني احساس غريب بذاك اليوم مشتاقه لأمي مره وانا جايه من عندها المهم خلصت محاضراتي وطيران على البيت اخذت اغراض وبسرعه على المستشفى المصعد كان مليان وانا مشتاقه لها مره طلعت الدور الرابع جري لما وصلت قلت لها تعبت وحضنتها بقوه وقلت يارب عسى يومي قبل يومك وضربتني كف خفيف احلى كف بحياتي جلسنا نضحك كاي يوم عادي قرأنا قران مع بعض وتحصنا وامي تستغفر وتسبح وهي مريضه جدآ يعني نزيف والأكل والنفس إلاباانابيب وو ...طلع فجر اخر يوم لأمي اللي هو( يوم الأثنين)
ذاك اليوم ماني داريه عن شيء من التعب عشنا لحضات صعبه اصدق اومااصدق كانت الغرفه مليانه مره ...واختي و خالاتي يقروا قران عليها وهي تردد وراهم كان وجهها مره منور نورها ساطع ذكرني بلنبت الكوع كانت اخر كلمة لها( أشهد ان لاإله إلا الله وأشهد ان محمد رسول الله) ولله الحمد رددتها كذا مره بعدها ضنيت انها نايمه كنت اقول بنفسي متى تنتهي الزياره و يروحوا علشان برتاح مانمت يومين
جاء الدكتور ونزلوا الاجهزه وقالوا اطلبوا لها الرحمة غطوا وجهها طبعآ انا ماني مصدقه مستحيل اعصابي تصلبت ماادري ايش اسوي بلحظه جدتي تصرخ واختي واخويا اغمى عليهم وو ...خرجونا ماادري عن نفسي اسمع اصوات كثيره اتذكر المرافقات اللي عندنا يقولوا ياليتنا نموت زيها شوفي وجهها هذي ماينحزن عليها جدتي تعبت بقوه اخذوها للطواري
ماادري عن نفسي الا وانا في البيت
ماني مصدقه- عزاء- ... قفلت على نفسي انا واخواتي لأن اللي صار مستحيل ،
بعدها مرت فتره طويله طويله وانا بصدمه رحت الكليه ماادري عن شيء جالسه مع صحباتي على الصامت يارب حلم ماهوحقيقه براسي اسئله كثيرة عن الميت وعن امي وعن وو...
كاني طفله ترجع امي ولالا؟
ماادري مين اسأل ايش اسوي؟
الحياه تمشي و كل يوم اسأل نفسي امي من بعدك
ماني عارفه شيء كيف اتحمل مسؤليه اخواني كيف نصلي الصلاة بوقتها كيف ادرس و اطبخ وانظف واللي مريض ايش اسوي فيه كيف اسأل عن اخواتي في المدرسه وكيف وكيف.. صارت حياتي كلها خوف وقلق و الدنيا ضايقه بي
(شوفوا كيف امي مريضه بورم خبيث و متحمله اكثر من هذا وفرحانه بعد واناحايسه ..)
طلبتكم : دعوه منكم لأمي اغلى انسانه
اللهم انها تحتاج إلى رحمتك وانت غني عن عذابها فارحمها ياأرحم الراحمين وارزقها لذه النظر الى وجهك والشوق الى لقائك
جزاها الله عنا خير الجزاء
امين
ولله الحمد سخر الله لي
اطيب قلب استاذه دين
قلت لها: بسألك
قالت: بإبتسامه اسألي
بعد الله خرجتني من اللي انا فيه تحملتني بقوه وهي ماهي ملزومه استشرتها بكل شيء سهل وصعب اسلوبها زي امي تمامآ كلامها مقنع ومسموع والله ماادري كيف ارد جميلها؟
لكن مابيدي إلا اني ادعي لها كل مادعيت لأمي
جزاك الله عني خير الجزاء
اللهم ارزقها ايمانآ لا يرتد ونعيما لا ينفذ ومرافقه (محمدصلى الله عليه وسلم )في أعلى جنة الخلد.
قولوا امين
اسألوا مجرب
حتي نتعلم لابد ان نتألم
) حينما تريد ان تعق والديك تذكر من ليس لديه ام واب حياته مالها داعي
)صدقوني لن تجدوا من يحبكم باإخلاص دون مقابل اكثر من والديكم
) سر التوفيق طاعتهم
)والديك رحموا ضعفك في صغرك فاارحم ضعفهم في كبرهم
)انت مدينآ لهم فعليك السداد فعجل قبل فوات الأوان
عرفتوا ان الحب والدفء والحنان والعطف... منهم
في النهايه:
مهما غلطوا في حقنا ننسى ونسامح ونتحملهم لأنهم احلى شيء في الحياة و صدقوني اذا فقدناهم الحياة حتكون مره ومالها داعي...
ارجوكم صلوا على حبيبنا محمد صلى الله عليه وسلم
بقلمي : محتاره في الحياة