نصايح لكل وحدة دخلت الكلية انجليزي وأي قسم عن تجربة

1. في كل أقسام الكلية فيه أشياء جدا جدا مهمة:


2. 1- في أول أسبوع الحضور جدا جدا جدا جدا مهم بشكل ما تتخيلي ليش؟


3. 12- بالنسبة لمواد سنه أولى في الكلية:

السلام عليكم أخواتي
سألتني وحدة من الأخوات عن نظام الكلية في قسم اللغة الانجليزية جاوبتها على الخاص
لكن حبيت تعم الفايدة على الجميع وهذي نصايحي
السلام عليكم ورحمة الله وبركاته
أهلين وسهلين اختي
وحياك الله وكل سنة وانتي طيبة بمناسبة رمضان الله عيننا على صيامه وقيامه.... آمين
أولا: ألف مبروك لقبولك في الكلية وشدي حيلك لأن الدراسة فيها لكل الأقسام غير شكل..
مو حكاية صعب ولا سهل الحكاية حكاية جد واجتهاد وصبر واعتماد كبير بعد توفيق الله على النفس

في كل أقسام الكلية فيه أشياء جدا جدا مهمة:

1- في أول أسبوع الحضور جدا جدا جدا جدا مهم بشكل ما تتخيلي ليش؟

عشان تعرفي مين هم الاستاذات والدكتورات اللي حيدرسوكي، وعشان تعرفي ايش هي المواد، وعشان تعرفي مواعيد المحاضرات لأن كثير من الدكاترة ما يدخلوا أحد بعدهم من الطالبات إذا دخلوا قاعة المحاضرات، وكمان ايش اسماء الكتب اللي حتشتروها أو تصوروها أو يمكن يطلبوا منكم تكتبوا وراهم، واسلوبهم في المحاضرة وكل قوانينهم، وكثير منهم يحب يحدد موعد الامتحان في أول اسبوعين..
2- شي مهم لازم تعرفيه إنه لازم تعتمدي على نفسك في كل شي، لأن أول اسبوع مرة توهان ومحد فاضي لأحد ومحد عارف شي نصيحتي تكوني في القاعة قبل ما تبدأ المحاضرة وتجلسي دايما قدام وحاولي تكوني في الصف الأول يعني تجي من بدري لأن الدكاترة يميزوا اللي يجلسوا في الصف الأول بشكل كبير بعدين حتشوفي بنفسك، وكمان لمن تجلسي ورا حتتلهي وطالعي هنا وهنا وماراح تركزي لأن عدد الطالبات حيكون كبير.
3- كمان من الأسبوع الأول جيبي فطورك معاك من البيت ولا تحاولي تخرجي كثير بين المحاضرات إلا أن يضبط معاك موعد كل المحاضرات بعدين اطلعي وخذي راحتك واكتشفي الكلية..
4- صدقيني دايما في الأيام الأولى كله تايهه عشان كده اعتمدي على نفسك في كل شي.. طبعا حيكون دفتر محاضرات وأقلام تدوني كل صغيرة وكبيرة( الجدول-المواد-المواعيد-أسماء الدكاترة والاستاذات-اسماء المواد-اسماء الكتب .... الخ)
5- حاولي تخلي الدكتورات يشوفوا وجهك كثير.. أسأليهم وروحي مكاتبهم واستفسري عن كل شي منهم.. الحمد لله كانت علاقتي فيهم أكثر من ممتازة وأثر على مستوايا الدراسي بشكل أيجابي..
6- بديهي حتتعرفي على صديقات حاولي يكونوا كويسات عشان تكوني في حال اتصال معاهم في حال غيابك أو شي طارئ.. انتبهي من صديقات السوء والله العظيم إنهم يرجعوا البنت ورا يخلوها تسيب المحاضرات وتسوي أشياء مرة مو كويسة..
7- بالنسبة للإنجليزي أنا كنت أحبه كثير في الثانوي وكنت علمي وكان في بالي اتخصص في الأحياء أو أي شي ثاني علمي، بس مالقيت نفسي إلا دخلت انجليزي وكمان في الكلية وهو آخر مكان كان يمكن يجي في بالي إني أدخله !!! صحيح أول سنة تعبتني كثير لكن بالجد والإجتهاد تعدي وكل شي يهون...أهم أهم أهم شي يكون عندك رغبة شديدة في تعلم اللغة الانجليزية.. يعني يكون عند فضول تعرفي كل شي عن كل مادة وعن كل كلمة جديدة... حتحتاجي الأطلس أو القاموس بشكل كبير.. خليهم دايما معاك في كل مكان.. مو بس في الكلية في الزيارات حتى..
8- اهتمي بال Grammar بشكل كبير لأنه يبين مستوى الطالبة الحقيقي ولا كلامك كله حيكون كلجة !!!
9- أما إن الأنجليزي صعب ما أقدر أقول كده لإنه زي ماقلتلك يعتمد عليك بشكل كبير عليك انتي ومدى حبك لتعلم اللغة.. وترك اللعب وتضيع الوقت والمطلوب هوالجدية وتنظيم الوقت شي مذاكرة وشي لعب في نهاية الأسبوع ... عاد انتي أدرى بظروفك...
10- أهم شي كيف توظفي الظروف والأمور بشكل مناسب حتى تحصلي على أفضل نتيجة من الدراسة..
11- اشتركي في الأنشطة اللاصفية لأنها تزيد علاقاتك مع الدكاترة والطالبات

12- بالنسبة لمواد سنه أولى في الكلية:

(صوتيات-مقال-مسرحية-شعر-مهارات دراسية-ترجمة-قواعد-نثر هذا الإنجليزي، اللي بالعربي لغة عربية وثقافة اسلامية) طبعا المواد تزيد كل سنة زي كل باقي الأقسام لحد ما توصل 14 مادة في آخر ترم قبل التخرج... لا تخافي حتكوني خلاص متعودة
هذا اللي عندي الآن وأتمنى فعلا إني أفدتكم أخواتي.. وأي سؤال ثاني أنا برضه حاضرة
واللي عندها إضافة تضيف مافي مانع
تحياتي لكم
اختكم
arab beauty