نصيحه لكل وحده تلعب بنفسها بهدف التضويق

السلام عليكم ورحمة الله وبركاته
كيفكم فراشات؟
ان شاء الله تكونوا بألف صحه وعافيه
بنات راح ادخل في الموضوع على طول
إلى متى نلعب بأنفسنا!!!
اذا فتحت منتدى نسائي الاقي العجب من الخلطات والتحميلات والأعشاب وبلاوي كثيره يستخدمونها المتزوجات
ومايعرفون انه لها ضرر على المدى البعيد
قبل كم يوم قرأت لوحده من البنات نظام وقت الدورة تسويه
يؤ يؤ يؤ
من جد تعبت وانا أقرأه ما بالكم اذا جيت أطبقه
اليوم الأول من الدورة له شغل خاص
واليوم الثاني له شغل خاص
مشروبات ومنقوعات وبخور من تحت وتحميلات
ما ادري ليش حسيت كأن أجسامنا مكان للتجارب من دون مانعرف انه يمكن نضر أنفسنا ضرر كبير جدا
ونندم عليه
راح اذكر لكم قصتين من الواقع
القصه الأولى حصلت لوحده من قريباتي
استخدمت الشبه كغسول للمنطقه
وبعدها بفتره بدأت معاها نزيفات
راحت للمستشفى واكتشفو فيها ورم
قررو لها عملية استئصال لجزء من الرحم
وسوت العمليه وبعدها بيومين توفت الله يرحمها ويسكنها فسيح جناته بسبب خطأ طبي لأنهم نسو شاش على ما اعتقد جوا
القصه الثانيه
عن وحده أستأصلو الرحم كامل عندها ليش؟؟
لأنها كانت تدخل تحاميل من جوا
والتحميله اللي تستخدمها من محتوياتها رشاد
كانت تدخله حب وماتطحنه
بعدها بفتره حست بقساوه في بطنها وبدأ يكبر وآلام
وراحت للمستشفى وهناك اكتشفت الخبر المفاجأ
انه الرشاد نبت جوا الرحم !!!
وتشعب بقوه وسبب التهابات وتليفات ولازم استئصال على الفور
لاحول ولا قوة الا بالله
بنات من جد نصيحه من قلبي لكم
اتركو هالخرابيط وعليكم بالاشياء الطبيه والأعشاب الخفيفه وقت الدوره مثل الكمون والقرفه والحلبه والبردقوش
وبالنسبه للتحاميل انسوها تماما
واللي تعاني من الهوا او الخوا >> ما ادري ايش اسمه
اهم شيء وقت الدوره تهتمين بتدفئة جسمك
اما التحاميل والغسولات صدقوني مفعولها وقتي فقط
ولها سلبيات على المدى البعيد
سبحان الله - الرحم بطبيعته يابنات ينظف نفسه بنفسه وفيه بكتيريا في عنق الرحم مفيده جدا واستخدامك للتحميلات والغسولات الشعبيه يمكن يقتل هالبكتيريا وبعدها تجيك الالتهابات والقرحه وانت في غنى عن هذا كله
راح احكي لكم عن تجربتي أنا
أخذت نظام لوحده من البنات واستخدمته وقت الدوره وتحميلات وغسولات
وفي الاخير وش صار؟
بعد ما انتهت الدوره أحس الافرازات زادت وبين فتره وفتره الاقي شوية دم نازل مني وانا اول مرره يصير لي كيذا
هذا غير اللآم اللي جتني في بطني قبل الدوره بكثير وكانت قويه
وطول الوقت احس كأن بطني منتفخ ولما كشفت عند الكتوره قالت عندك تكيسات !!!!! وانا ما كان عندي
بعدها حرمت استخدم هالخرابيط وقلت راح ارجع لنظامي السابق اللي راح اقولكم عنه
بس قبل ما اقولكم عنه راح اقولكم انا ليش أخذت النظام اللي سبب لي هالاعراض السلبيه
وهو انه مره من المرات طلع صوت وقت ....... وفي وضعية معينه اللي هي الفرنسي
بس انا اللحين اكتشفت ليش
لأنه المكيف كان عالي
ومن بعدها وانا معلنه حالة الطواريء وانه انا فيني وفيني وبدأت ابحث والف وادور على هالانظمه الكثيره اللي ثلاث ارباع الاعشاب فيها ما اعرفها بصراحه
بعد فتره سمعت دكتوره تقوول انه هالشيء طبيعي يحصل للمتزوجة في وضعية معينه !!
سمعتوا يا بنات طبيعي
يعني لا تسويون حالة استنفار اذا طلع منك صوت في وضعيه معينه
لا هذا طبيعي بس حاولي المكيف يكون هادي والوضعيه مريحه أكثر
لكن بالنسبه للي يطلع معاها الصوت حتى من دون .... وهي تمشي .. تصلي.. جالسه مع الناس
راح اقولك نظام بسيط جدا وحلو بالمره اتبعيه وان شاء الله يرووح منك كل هالاشياء واتركي عنك هالخرابيط والأعشاب
النظام وقت الدورة هو :-
طوول أيام الدوره خلي عندك ترمسين
أول ماتصبحين سويها
الترمس الأول >>> قرفه +كمون+شوية حلبه علشان ماتطلع ريحتك + شوية مسمار اللي هو قرنفل + سكر
الترمس الثاني زنجبيل طازج مع شوية سكر
أول ما تصبحين أشربي كأس من الترمس الأول
والترمس الثاني تقهوي منه طوول اليوم مثلا بيالة العصر بيالة المغرب
وقبل ماتنامين أيضا أشربي من الترمس الأول
واستمري طول فترة الدورة
طبعا انتم تعرفون فائدة القرفه تنظف البطن وتسكن ألآآآم الدورة
والكمون يقول الدكتور عبدالباسط انه منظف طبيعي لأعضاء الجسم
والحلبه مثل ما قلت لكم يابنات شوي أنا احط ربع ملعقه صغيره لأني ما احب الريحه
والقرنفل حار وينزل الدورة
والزنجبيل مفيد جدا جدا ويدفيك ويطلع الهوا اذا شربتيه وهو تقريبا حار الى دافي
الخطوة الثانيه
3 ملاعق زيت زيتون مع ذرة زنجبيل تدفيها على النار >>> تدفيها موب تغليها
وتصبيها على بطنك وظهرك وبجامتك عليك وبسرعه لفي نفسك بالبطانيه واشربي وانتي تحت البطانيه من الزنجبيل حلوه يابنات تطلع الهوا من الرحم
سويها كل يوم من أيام الدوره
الخطوة الثالثه
اليوم الثالث من الدورة تعملين تمارين للبطن
سمعتو يا بنات
تمارين للبطن اللي تكونين مستلقيه على ظهرك وترفعين راسك
سوي بالتدريج مثلا اليوم الاول 6 مرات >>> لأنها في البداية متعبه
اليوم الثاني 8
الثالث اكثر وهكذا
يابنات انا لاحظت انه اغلب البنات المتزوجات أو غير المتزوجات اللي يشتكون من الهواء
ما يسون تمارين تلاقين البطن عندها كبير ومترهل شوي
يعني عضلات بطنها موب قويه
تتوقعون لو تسوون تمارين للبطن وتقوون عضلاات البطن الرحم ما راح يقوى؟
إيه نعم راح يصير الرحم قوي وهذي معلومه طبيه
أيضا لا تنسون تمارين كيجل
بالنسبه لتمارين البطن وكيجل تكون وقت الدورة وغير وقت الدورة يعني بشكل دائم
وبالنسبه للبسك وقت الدورة أهم شيء تلبسين دافي وما تتعرضين للهواء البارد
وآخر شيء
راح أقولكم على غسول حلو بالمره
طبي ويحتوي على البابونج وانتم تعرفون انه البابونج لها مميزات كثيره
اولا مطهر للمنطقه
ثانيها يفتحها بالتدريج
ثالثا والله اعلم سمعت انه يضووق
اسم الغسول
ROZETA
غسول روزيتا
ب65 ريال
غسلي فيه من أول يوم للدورة مرتين يوميا صباحا ومساءا الى نهاية الدوره
كلمة روعه عليه قليله ريحته حلووه ويخليك منتعشه
أيضا غسوول الملح
شوية ملح خشن مع موية دافيه غسلي فيها المنطقه في حالة اذا ما عندك غسول طبي
والمويه والملح ينصحون فيها الدكتورات علشان كيذا كتبته لكم
بنوتات أدري طولت عليكم
بس ماكتبت هالموضوع الا من خوفي عليكم وخصوصا بعد التجربه اللي مريت فيها
انتبهو لا تلعبون بأنفسكم
لو يوم يجي الوحده منكم شيء بسبب هلاخرابيط راح تندم وقت ما ينفع فيه الندم
تلفتو حواليكم وشوفو اللي تضررو من هالخرابيط
لا تقولون جداتنا يسوون ويفعلون أدري
بس بصراحه ماكانوا يبالغون لها الدرجه
واذا ولدتم لا تولدون عند اي دكتوره رحوو لدكتوره تكون خياطتها كويسه بعد الولاده
ووقت النفاس اهتمي بنفسك بالمعقوول ولا تنسين الرياضه ثم الرياضه ثم الرياضه
هي اللي تعطيك مفعوول طويل موب هالتحاميل الشعبيه
نهاية الموضوع اللي عندها تجربه قاسيه او حصل لها او لوحده تعرفها مضاعفات بسبب هالخرابيط ياليت تكتب قصتها هنا علشان البنات يتعظون
اللهم لك الحمد والشكر كما ينبغى لجلال وجهك وعظيم سلطانك
دمتم بود