نفسيتي تعببانة وقرفانه من حياتي بليز شورو عليه

1. السلام عليكم اخواتي الفراشات .....

--------------------------------------------------------------------------------

السلام عليكم اخواتي الفراشات .....

بصراحة انا باعاني من اكتئاب واحساس بعدم الرضى عن حياتي، انا فتاه عمري 23 سنة متزوجة منذ سبعة شهور وانا بصراحة اعاني من صراع نفسي داخلي وماني عارفة افضفض لمين ، انا اتزوجت رجل يحبني الحمد لله ومتفاهم لكن مشكلتي مع زوجي هي في الامور الماليه فانا اتزوجت طالب في السنة الاخيرة من الدراسة حاليا ليست عنده وظيفة ونعيش على المكافئة من الجامعة وراتب المسجد 1500ريال مع المكافئة 2500 مستورة والحمد لله المشكلة اني كنت متعودة على حياة مختلفة انا كنت طالبة جامعية ولدي مكافئة وامتع نفسي واي شي نفسي فييه يجيني لحدي وانا الان اتخرجت وانا غير متعودة على المكوث من غير فلوس ،المهم انا زوجي مابيرفض شي من طلباتي ويحاول يأمنلي كل اللي نفسي فيه بس انا بصراحة حسيت انه في اشياء كتيرة بالبيت ناقصة كنت ابغى اشتري ثلاجة جديدة لانه الثلاجة اللي عندي لقيتها صغيرة وماتشيل شي وابغى غسالة اتومتيك لأنه اللي عندي قصمت ظهري مع الغسيل قلت لزوجي ووافق اخترتهم على اساس انه ياخدهم بالتقسيط مدة سنة لمن جينا حسبناها لقينا انه لمن ناخدها بالكاش اقل ب2000 ريال عن التقسيط وبصراحة مرة كتير الفرق فقلتله حاول تستلف من ابوك فلوس التلاجة والغسالة كاش ب5000 ريال مارضي ابوه يعطيله وماهو راضي يستلف من احد قام سوى حركة من غير مايقلي اتصل على ابوية وطلب منه ووافق يعطيه هي وانتهت الهرجة دي ، ابوه انسان جدا بخيل تخيله انه ماعنده سيارة للان وكل شوية ياخد سيارة زوجي يسافر بيها على مكة ويقضي مشاوير بيها انا قرفت وزوجي قرف وقرر يطلع سيارة بس من فين ياحسرة فكر يبيع سيارته وثمنها لقاها تسوى 50000 وقال ادفع فلوس السيارة بالتقسيط حقت سنة يصير لمن اتخرج اكمل الباقي طبعا ابوه حسبي الله عليه وعلى بخله ماوافق قله انا ابغى السيارة وانا محتاجها وايش تبغى تسوي ب30000 الباقيه تبغى تتهنى بيها بالله ياناس في ابو يقول لولده زي كده ، بعد الهرجة دي زوجي نفسيته تعبت وكان من باب الفضفضة بيحكي بابا على وضعة مع السيارة وايش يسوي ماكان يقصد شي بيها قام بابا من نفسه قاله انا اعطيك سيارتي ومع العلم سيارة ابويه لها 4 شهور بس واكملك اقساطها وانت بعد ماتتوظف تقسطلي الفلوس والمبلغ كامل يصير حق السيارة 70000حلو الكلام ...
زوجي رفض وقاله انا ماقلتلك الحكاية عشان تسلفني انا ابغى مشورتك المهم اصر عليه وزوجي وافق ، مع العلم اني حذرت زوجي من حركة زي كده وقلتله لا تاخد من بابا شي عشان مايجي في باله انه من يوم ما بابا جاله خير ماشالله بدأ زوجي يطمع فيه وانا اللي طمعته واعلمه الشي دا، المهم امس كلمت بابا على التفون وجلس يقلي ماعندك مشاريع جديدة قلتله بسلامة نية لا ماعرفت قصده قام قلي ارحمي الرجال ولاتكسري ضهره قصدو اني انا راكبته وانا اللي مسيطرة عليه وانا اللي قلتله روح خد من بابا وانا عشان طمعانه في فلوسه ومافكرتي في اخواتك والفلوس دي ماهي لكي لوحدك لاخواتك وانا ابغى اسثمرها لكم وقعد يترحم على واحد من اصحابه يقلي مات مديون من مرته كانت تخليه يستدين عشان يشتريلها اشياء تتفشخر بيها وانا ساعدته عشانك وانا مو انتي البنت الوحيدة اللي انتي عندي والله كلامه كانه كان سيف بيذبحني والله حرام والله اني مظلومة عمري مافكرت في الشي دا رخيت السماعة وقعدت ابكي من القهر انه ليش يقول عليه دا الكلام وحلفتله انه مالي دخل وماصدقني وزوجي ياغافلين لكم الله زوجي مرة نياتي ومرة طيب مايفهم التلقيح بالكلام ويحب بابا اكتر من ابوه ودايما يمدح فيه نفسي اقوله لاتكمل اجراءات السيارة ولا تاخدها بس بابا قده كملها نفسي اقله دبر الفلوس من اي محل وحاول تعطيها له بس اهم شي مااسمع الكلام دا دايما اهلي يحسبو انه ماعندي احساس مظهري يعطيني اني وحده قويه وانا من جنبها اقل شي يخليني ابكي وربي معد طايقة اهلي ولاعد ابغى انزلهم مكة لا وفوق دا كله حسيت اني صايره تقيله عليهم ومعد يبغوني اجيهم واله كرهتهم ومعد ابغى اروحلهم الا في المناسبات تخيلو بابا قاعد يقلي انه لمن سمعني قلت يمكن اروح جده عشان اشتري حاجات لام زوجي من ايكيا قاعد يقلي ياريت يفتحو ايكيا في المدينة مو انتي محاتجي الا في الصيف ،، اه ياقلبي لدي الدرجة والله نفسيتي تعبانه حاسة اني وحيدة وماليه احد نفسي اقول لزوجي الكلام دا بس ماني قادرة والله تعبانة وقرفانه ونفسي انتحر والله قرفت من حياتي والله حتى زوجي نازل مكة الاسبوع الجي عشان يجيب السيارة قلتله روح لوحدك انا ماابغى مافيه تعبانه كله عشان ماابغى اروحلهم قلتله روح وارجع في نفس اليوم بالله قولولي ايش اسوي في نفسي والله تعبت.انا شايله هم بايش كل مرة اتحججله اني ماابغى ازل مكة، اخواتي اتغيرو معايه من يوم مااتزوجت يتكلمو من ورايه وقدامي طيبين والله محتارة اقول لزوجي على اللي صار ولا لا بس والله خايفة اقوله ونفسيته تتعب وينصدم من بابا وهو قده مهموم وماابغى ازيده هم وانا الكلام اللي قاله بابا قاعد يذبح في كل ماافتكره
واسفة على الاطاله بس رجاء ردو عليه اول مرة افضفض لاحد بالله ماتخيبوني
اختكم :
مكاوية