نقطة مهمه في الزفه لازم العروس تحط بالها عليها

في البدايه وقبل لا تهتم أي عروس في انها تحصل على أحلى زفه لازم تاخذ بالها من شي..
ليش العروس تنزف؟ أولا قبل لا تكون الزفه هاذي حق الناس هي في الأصل حق شريك حياتها اللي هو زوجها..عشان جذيه اللي تفكر في أرقى الزقات عشان الناس بس فهي غلطانه ولازم تعيد حساباتها من الاول..
الزفه هاذي لازم ما ننسى انها تعكس شخصية العروس انا وحده من الناس لما اروح عرس وما اعرف العروس احكم عليها من زفتها..لان فكرة ان الوحده تغالي في الزفه وتصرف كثير عليها فكرة في إعتقادي غلط حتى لو كنت من المليارديرات..حلو ان تكون الزفة بسيطه بس في نفس الوقت راقيه تظهر العروس فيها صفاتها وشخصيتها..
أما اللي تنزف في تابوت ولا على خيل ولا حتى انها تدلع أو ترقص فهذا مش راقي للعروس..لان العروس في هاللحظه لازم تظهر بصورة الملاك الناعم الرقيق..ولو العروس ما كلفت وايد على زفتها واظهرت بصوره رومانسيه وزفه بسيطه والله بتكون أحلى الناس عند زوجها وهذا الاهم من المظاهر جدام الناس لانها مراح تتزوج الناس..وبعدين في نقطه مهمة هي ان العروس مهما سوت سواء كلفت على زفتها او ما كلفت..هي في هاليوم تظهر بأجمل صوره وهذا من قدرة الله عز وجل..سبحان الله الوحده في يوم عرسها تطلع جميله بصورة غريبه..فلذلك قبل أي شي لازم الوحده تحط في بالها ان هالزفه حق زوجها في المرتبه الاولى والاخيره..وانها لو كلفت واصرفت الكثير فهذا دليل على انها تحب المظاهر حتى لو كانت ليلة العمر..وبالتالي وفي اعتقادي ان مافي زوج يحب ان زوجته تكون مسرفه..
في النهاية اتمنى ان تكون وجهة نظري وصلتكم,,وتعجب كل عروس,,لان الوحده تحب تتزوج مب عشان المظاهر بس لا عشان تنزف حق انسان اختارته شريك لحياتها وبتكون معاه في الحلوه والمره..في الفقر والغنى..في كل شي هي مع زوجها..لانه جنة الزوجه ونارها..
الله يوفق كل المعاريس..