نكدي زي الحريم هذا كلام الرجال طبعا مو الحريم نكديات في نظرهم

1. والحكاية التانية

كيفكم. بنات ااه بس انا ماكتبت الا لمن قلت حيلتي وإتسدت كل الابواب في وجهي. والله مليت وكرهت الزواج مره وحتى لو انفصلت مستحيل افكر اتزوج تاني. حقولكم القصة وانتو احكمو القصة الاولى
مره كنا في السوق كنت بدي اقضي كسوة العيد لية ولبناتي الله يخليهم لية انا احاول دائما اضغط على نفسي. واحاول ما اخرج من السوق الا وانا مشتريه شي لبناتي عشان ما اخليه ينزلنا السوق تاني واتعبه واكلف عليه دائما يهمني راحة بالة ودايما اعرف انو الرجال ما يحبو الاسواق وانا اراعي دا الشي فيه بس الله يسامحو لمن يتضايق ويزعل من المشوار وخصوصا من بناتو لمن الصغيرة تبكي او الكبيرة ضايقته في طريقو يعني قصدي لمن يمشي تعرفو الاطفال يحبو يحشرو نفسهم في اماكن ضيقة او تتمسك في ثوبو والمشكلة انو بناتي ما شاء الله عليهم نضاف و مرتبات. والكل يبغى يبوسهم و ويلاعبهم من الشياكة المهم هذا الادمي بس يحب يرفع صوتو ويهزئ فينا قدام الله وخلقو حتى انى اتفشل وينكسر خاطري قدام الناس ويحب يبين قدامهم وكأني انا قارفة عيشتو ومدينتو على فكرة حالتو المادية ماشاء الله تبارك الله ممتازة وبعد مارفع صوتو كلمتو حبيبي لوسمحت لو عندك كلام تبغى تقولو بيني وبينك بلاش تسمع الناس من حولك وتصغرني في عينهم صح الناس اللي هناك مانعرفهم ولا يعرفونا بس كفاية تلفت انظار الرجال علية مو الحريم. بس وهوه عاد غيور مره تحسبوه انو اقتنع من كلامي تعرفو اش رد قدام الناس بالله عليكم امانة. قولولي مين الغلطان فينا قال تبغيني اوطي صوتى زي البنت البكر والله قالها ولا استحى على وجهو قدام الحريم والرجال وبصوت عالي وسحبتو على جنب وقلتلو اش بكر ما بكر ماتستحي تقول كلام مو لايق تقولو ولا مناسب لو دا الكلام كان بيني وبينو كان عادي مادققت فيها ابدا. ومشيت وخسرتو ولمن و وصلنا البيت بستو وقلتلو تسلم مجايبك ياعمري وعديتها وانا مقهوره من الكلمة دي اللي مانقاها مزبوط وخلى الرجال يطل فيه وكل مره لازم نتكسف قدام الاوادم و خلاص.

والحكاية التانية

بنتي الكبيرةالله يحفظها عمرها 4 سنوات و ستة شهور بسم الله عليها وانا دايما لمن انام لازم تبكي وتعكر الجو ماتبغى تنام في سريرها مع انو عندها سريرين واحد عندي في الغرفة خدتو لها من سنتر بوينت كبير اللي فيها عجلات حق البيبي بس ماشاء الله الين دحين تنام فيها هوه واسع وانا كنت ضد انها تنام معانا من يوم ما جات اختها التانيه واشتريت سرير من ايكيا وعملت غرفة لها ولاختها لمن تكبر ولو تدخلو غرفتي حتقولو عندك توام. عشان السرير التاني حق الصغيره زي اللي من سنتر بوينت بس اصغر شوية المهم خلاصة الموضوع انا حابة اعودها انها تنام على سريرها اللي عندي عشان شوية شوية تنتقل لغرفتها وكمان صارت تفهم ماشاء الله ولا ابغاها تشوف حاجة كدا ولا كدا
والشيخ اللي عندي شوية مدلعها وكل ما جا وقت نومو يطلب منها تنام جمبو وانا اكون سهرانه مع الصغيرة الين تنام عشان ماتزعج ابوها.
هوه عودها انها تنام في حضنو وانا من جد اكون مكسرة من التعب والسهر والاقي بنتي في مكاني بسم الله عليها. حركاتها كتيرة في النوم ولمن تكون بيننا تحب تقشع البطانية مننا لانها في النص واكيد انا ابرد و اصبر عشان لا يفكرني اغار منها او انا قاسية على بنتو. المهم ي قلبو والله اللي حصل انو فجر الخميس اللي راح رجعنا البيت بعد السهرتنا عند اهلو وكان هوه يبغاني هداك اليوم واستعدينا للنوم بس بنتي قبل لا احط راسي عالمخدة قالت ابغى انام عندكم وما تبغى سريرها لكن انا قلت ازا تبغينا نحضنك انا وبابا ونبوسك هنا واحنا واقفين عندك وعلى طول تنسدحي على سريرك عشان تنامي بس ماقصرت بكيت وابوها قالها طيب نجيبها عندنا وبعدين ترجع لكن انا عارفة انو حينام وانا اللي لازم اشيلها وماشاء الله عليها بنتي تقيلة واتعب بعد نقلها. بس رديت عليه ازا تبغى تجي عندك انا اروح انام في غرفتها مع الصغيرة بلاش اصحى. متكسرة زعل ونمت وهوه صلى الفجر وغفي برا شوية وبعدين دخل ينام جمبي واستنيتو عشان الوعد اللي بيننا بس بطل ولا صحي الين قمنا الظهر وبعد الغدا سالتو ليش ماصحيت حبيت الطف الجو قلت لو انا حاولت كم مره اصحيك وحسيتك مالك نفس بس مو مشكلة يوم تاني اعوضك المهم بعدين علقت على اللي حصل الفجر وقلت حبيبي انا وانت ياعمري لازم يكون كلمتنا وحدة قدام بناتنا عشان ما نتعب في اقناعهم قال انا مو قلت اني اجيبها وارجعها وانتي قلتي ازا جايه هنا انا حنام برا لانها هيه لمن تكون بيننا ماتنام بسرعة. وليش زعلتي انا على فكرة ماقلت الكلمة دي الا لمن شفتك انك بشكل مستمر تنيمها جمبك وانا اعرف انو الرجال هما يبغو يرتاحو في نومتهم بدون الصغار يضايقوهم وانت العكس تنيمهم وبعدين تتذمر من كثرة ترفيزها لنا وبس صار يرفع صوتوا بزيادة وصار بس يحاول ينرفزني. الين طفشت وقلت انا اعرف انو الرجال يبغى الجو مهيئ وانت عكس وقام يهددني انه يبغى يضربني وانا اعيد انت دائما ماتحب تسمع وجهة نظري دائما انا غلط وفي الاخير تفل في وجهي وقال انتي اخس من مرت اخوكي وقلتلو خلاص بيكفي لاتخليني اركبك الغلط واكلم اخوية عنك انك اتكلمت في مرتو وهوه ياخد حقهإ منك رغم اني انا ابدا ولا شويه اشبهها الله يستر عليها لكن مارضيت انو يتكلم عليها اش بينهم عشان يقول الكلمة دي عليها هيه في حالها ولا مستو بكلمة ولاتدري عنو صحيح انا ما احب تصرفاتها واخلاقها الغريبة بس كمان ما ارضى عليها ولا على اخويا وبعدين قالي شي ما فهمتو انتي تبغي تدعسيني بالجهاز اللي جبتيلي هوه خديه وانا رديت لا حول ولا قوة الا بالله اشبك تلخبط في الكلام. ولمن انكسر خاطري وكسفني وربي يابنات واللي حييبس لساني في يوم زي مالبس لسان امي في قبرها رحمة الله عليها انو عمري ما اهنتو بالجهاز واني لمن اهديتو هيه ما جهزت اجابة لسؤالو كيف جبتي الجهازين دول حقي وحقو ولا كان سويت المستحيل عشان ما ابينلو اني بعت دهباتي واشتريتو له عشان لا يحس انو لية فضل عليه ولكن بعد اصرار وخفت انو يفكر بشي مو صحيح جاوبت عليه وكلمتو اني ما عملت حساب للسؤال دا ولا كان اضطريت اني اكدب عشان لا يفهمها انو ليه فضل عليه وكمان ماعمرو سالني سؤال زي كدا وكل مره أحيب هديه ثمينة ولا مره سالني من فين لك فلوس وانتي مو موظفة
والنهايه تعبت نفسيتي من اهانته ليا لمن تفل اعزكم الله وهاذي تالت مره ولاني احبو دست على قلبي وقلت البنات تتركيهم لمين لكن دحين زودها مره وغير ردت الهديه واتهامي بالتمنن عليه واللي يهدد بالضرب اكيد حيضرب والله والله والله اني ما اقدر اكلم بابتي عليه لاني ار حم ضعفو وكبر سنه وابغاه يرتاح بالو في دا السن كفايه تحملنا واحنا صغار وحتى بعد ماتزوجنا كانه ام قلبو علينا اخاف اقللو يروح من بين يداتي واخسر اغلى شي املكه واخواني مره مايسمعو في زوجي وهما كمان مشغولين بحياتهم وحتى لو كلمتهم لازم يغالطوني لانهم يحبوه وانا ما احب ابين لهم طبيعة اخلاقو وتعاملو معايا قولولي انا رايحة اصلي ركعتين. وراجعة اش اسوي سامحوني حبيباتي والله من شدة انكساري وعزابي وقلت حيلتي وهواني على الناس كتبت وطولت دمار وربي دمار وما خفي كان اعظم في اشياء نسيتها واشياء ماذكرتها. من كثرها