هديل الجزء الاول كامل

اهلين بنات اخباركم زوجات اولى او زوجات ثانيات وثالثات ورابعات
والمقبلات على الزواج وحتى الي يحلمون بالزواج
اليوم راح اتكلم لكم عن تعارفي وحواري و زيارتي لبيت زوجه ثانيه
وش شفت فيه بالتفصيل لممل والمغامرات الي سويتها فيه وايش قالت لي عن الازواج
وقبل كل شي حابه اقولكم ان البنت موافقه اني اقول كل شي عنها يعني مافي افشاء اسرار
بالعكس قالت خلي البنات يستفيدوو ....
في يوم من الايام زرت ناس يقربون لي وكانت اول زياره لبيتهم رحت كأداء واجب لان ولدهم متخرج ومسوين له غداء رجال وحريمهم
وشفت عندهم بنت غريبه اول مره اشوفها
فارحت سألت بنت صاحبه العزومه وهي اصغر مني بشوي وامون عليها وكل المناسبات نجلس جمب بعض سوالف وحش..
الجازي >>هلا دلوعه
أ،نا >>من هذي البنت اول مره اشوفها(( تعرفون لقافه حريم))
الجازي >> هذي جارتنا الي مستأجرين عندنا (( انتي ماتدرين اناا حنا ضبطنا الدور الثاني وحطينه له مخرج ثاني واجرنها))
أنا >> لا مدري عن شي..!! المهم زين سويتو اخوانك كلهم تزوجو مابقيتي الا انتي واخوك الصغير ومشاء الله الدور الاول مكفي وموفي
الجازي >> ايه احسن من كل شوي طالعه نازله من هالدرج ((الاخت كسلانه)) لا وبعد المطبخ شلناه من البيت وحطينه برا هو مع غرفه الغسيل وغرفه الشغاله
أنا >> يالله عقبال ماتتزوجين وتفضين البيت لهم
الجازي>> والله ماضنيت يادلوعه شوفي هذي جارتنا طقت ال35 وتوها معرسه لا وبعد واحد متزوج (وبحكم اني متزوجه بققت العين وكرهتها على طول))ا
أنا>> الله يتسر على رجالنا هذا هم البنات يتشرطوون لين ما يكبرون وبعدين مايحلى لهم الا المتزوج وبعدين تقول شسوي هذا نصيبي
الجازي>> بس خلاص لا تفضحينا قصري صوتك ولا تطالعي فيها وانتي تتكلمي لا تحس يووه اكلتي البنت بقشورها .. والله تراها طيبه وحبوبه .. تدرين بتصك السنه وحنا مأجرينهم وامي تقول
يارب يمددوون من كثر ماهم ذوق وتحبهم..
وساد الصمت لمده 10 دقايق (( او بالاحرى قمت اطالع فيها واراقبها والف فكره وفكره تدور ببالي ..ياترى زوجته الاولى تدري؟؟
ياتري هو ليش متزوجها؟؟
من وجها وابتسامتها باين انها مبسوطه ومرتاحه(اخ يالقهر منكم يالرجال الاولى خلاص يطيح كرتها والثانيه دلع وحب وغرام))
يعني يابنات مااتخيلو قد ايش الافكار جات ببالي
الجازي>> يابنات يابنات تعالو المجلس الثاني اريح لنا المكان ضاق شوي تعالو حياكم الله وتهمس الجازي خلو العجايز لحالهم كل شوي قومي صبي قهوه جيبي حلا ...وقمنا وحنا نضحك
رحنا المجلس الثاني كان صغير شوي وقمنا نسولف وانا بس اراقب جارتهم
االجازي>> اعرفكم على جارتنا الحلوه العسوله هديل
هديل>> هلا والله لي الشرف اتعرف على احلى بنات ويارب ماتكون اخر مره فديتكم (مع ابتسامه حنونه)
الجازي>> اعرفك على دلوعه ست الحسن والجمال و ساره ام السواليف و حصه لبنانيه(عشانها بيضاء وشقراء ) والدافوره نوره زين جات وفكت الكتب منها ... هههاي كلنا قمنا
نضحك
المهم يا بنات قمنا نسولف سوالف عاديه لين جاء وقت الغداء وتغدينا وخلصنا وكل الحريم طلعو بعد الغداء على طول خبركم عزيمه رجال عبو كروشهم ويبون يرحو ينامو وكل وحده راحت مع بو عيالها
مابقى الا انا لاني جايه مع حرمه كبيره وهي متعوده اذا جات تجلس لين صلاه العشاء وترجع بيتها
و الام راحت توقف على الخدم وتتابع التنظيف والعيجز الي معاي ماخذه قيلوله
بدايه التعارف
انا وهديل والجازي >>بغرفه الجازي
انا>> الجازي ياحلو غرفتك كامله من مجمعيو (( ثلاجه وتلفزيون بلازما و لاب توب وغلايه ومكتب وكنبه صغيرا وستريو ومشغل ديفيدي)) ومرتبه غرفتك كأنها غرفه فندق 5 نجوم بس على كيوت ودلع
مشاء الله لو هذي غرفتي وانا بنت ما اطلع منها
الجازي>> اي الحمدالله الله يخلي هديل هي الي عطتني هالافكار وكل شي من ترتيبها ولا قبل احس بملل فضيع الحين احس غرفتي هي مملكتي الخاصه وقبل كنت احسها قبري طول ما انا فيها بس اهوجس فديتك
هديل جعلني مانحرم منك
الجازي تناديني دلوعه >> هلا
الجازي>> تعالي شوفي هذا الكورنر الي فيه صوري هذي من افكارها قالت لي احط احلى صور وذكريات وعطتني افكار ارتبها بالفوتوشوب
أنا>> اي مشاء كل صورك فيها روعه ودلع بدلع
الجازي>> ادرري
انا>> جلست اطالع هديل وتكلمت وقلت لها >> مشاء عليك ياهديل افكارك روعه وينك عني وانا بنت تعطيني من هالترتيب وهالافكار
هديل>> انتي متزوجه دلوعه؟؟
انا>> ايووه
هديل>> وعندك عيال
انا >> ايوه عندي
هديل >> مشاء الله مو باين عليك >> فيك روح البنات
انا >> اي لاني مو مصدقه اني للحين متزوجه الزواج ماعقلني ابد
هديل>> لا لا مافهمتيني
انا >> ايش تقصدين
هديل>> لا لا مافهمتيني يوه اسفه ماحب اتفلسف واجد
الجازي>> هديل بدينا بحركات الفلسفه دلوعه ترا هديل بس تتفلسف وتقول كلام وكل كلامها عن روح البنات
انا>> !! فهموني وش روح البنات خوفتوني .. لايكون تتعاملون مع الارواح
قامو يضحكون
هديل >> لا ياقلبي روح البنات يعني الوحده يكون فيها دايم تخيلات ونشاطات وتتكلم بعفويه وتحسين وياها انك مرتاحه
عكس المتزوجه يعني اول ماتتعرفي عليها بعد كم دقيقه تبتدي تسولف عن زوجها وعيالها وهمومها ومسؤليتها
بس انتي غير حسيت فيك روح البنات ماتوقعت متزوجه
انا >> اي اي تعرفين المتزوجه لازم تبي تفضفص وانا عندي اختي افضفض لها وبس
هديل>> ليش انتو يالمتزوجات دايم شايلين الدنيا على راسك يعني اذا تشكيتي ولا تكلمتي بيفيد؟؟ ليش ماتعيشون روح البنات
انا>> صعبه يا هديل المراه كتله من امشاعر لازم تشتكي وتبكي
هديل>> طيب لو افترضنا ان الوحده حياتها جزئين جزء فيه مشاكل الي هو جزء البيت او الشغل والنص الثاني من حياتها تشتكي من الجزء الاول ((فهمتي ايش اقصد))
انا >> اي فهمتك تقريبا
هديل >> وعشان اوضح نقطه بسيطه ليش ماتسوي لها بحياتها جزئين (جزء روح متزوجه_ وجزء روح البنات) وتشوف كيف تتبدل حياتها
الجازي>> هديل يعني انتي بتصلحي افكار المتزوجات كل تفكيرهم واحد وخذيلك من الشكاوي
هديل >> والله اني احبك يالجازي واذا اتزوجتي بتوصي فيك مراح اخليك زيهم
انا>> هديل يعني انتي غير عن كل المتزوجات
هديل>> دلوعه بقولك شي وخلينا نكون صريحات شوي عادي كلنا بنات بعدين راح اقولك اذا انا غير ولا لا
انا>> تفضلي
هديل>> قبل ماتزوجين ايش كنتي تقولي لنفسك يعني مثلا تتخيلي اذا تزوجت بسوي كذا وكذا او اذا شفتي وحده متزوجه وزوجها مو معبرها تقول لو انا مكانها والله لا اسوي كذا وكذا
اناا>> ايوا ايوا ايوا صح
هديل >> لا ياعمري ابي منك اجابه وش تخيلتي وش فكرتي بالزواج
انا >> ام
الجازي >> يلا طلعي طلعي المستورر اكشفي عن افكارك واسرارك
انا >> طيب يابنت الي يسمعك الحين يقول ماكأنك كل يوم تتلوي على المخده تتخيلي زوج المستقبل
هديل مقاطعتنا >>> جبتيها يابنت هذي اول شي
الجازي >> وش تقصدون فمهوني وراي عرس ابي خبرتكم
هديل>> معليش على اللقافه بس هل انتي كل يوم تتحضني زوجك وهو نايم ؟؟!!!
انا>> لا والله مو دايم
هديل>> ماتسويها الا كنتي مشتاقه له ولا مزعلته او تبين شي
انا >> يعني تقدري تقولي
هديل>> شفتي كيف يا الجازي بكرا كذا بتصيري خلي عنك المخده
انا >> والله مافهمتك
هديل>> شوفي يادلوعه انا لي 35 سنه وتوني متزوجه وكل هالتخيلات والافكار الي تطري على بالبك ولي ماتطري تخيلتها مع زوجي
ولحين ربي رزقني بزوج مستحيل يوم واحد يمر ماسوي الي بخاطري طبعا انتي ماتحسي فيني لانك مافقدتي هالشي على طول اعرستي بشبابك
تخيلي افكارك الي تجيك وانتي بعمر 18 انا كل يوم تجيني لين ما وصلت هالعمر وكل وحده اكيد مثلي مرت بنفس الشي
دلوعه يلا كملي قولي وش كنت تتخيلين ابي اوضح لك نقاط وتفهميني اكثر
انا>> ها ام >> وجهي صار الوان
كنت اتخيل انو مثلا انا وزوجي نركض نركض ونلاحق بعض وكنت اذا شفت وحده متزوجه زوجها مو مدلعها اقول والله لو زوجي كان اوريه كيف لما يدلعني ويسوي الي ابيه وكنت اتخيل وش البس له وكيف ادلعه
وايش بنسوي وشلون لو زعلت يراضيني
وشلون بتدلع عليه (( كل ما سكت هديل تقول كملي طلعي كل شي)) وشلون راح اغريه ..ولما اشوف وحده بمطعم ساكته مع زوجها اقول لو انا بمكانها حطيت يدي بيده واقوله شعر واغني له وانكت
وافرفش
لو اشتري اي شي جديد بلبسه قدامه قبل الناس وبس هذا الي اذكره ياهديل
هديل>> تخيلي لو انك تفكري هذا طول 15 سنه انتو يالمتزوجات بنعيم ماتعرفونه.. ماتعروفو كيف تتعاملو معاه
مو عشان الرجال .. اول شي عشانك انتي سوي كل الي تتخيلينه ولي تبينه عيشي حياتي بكل هذي التخيلات الي كنت تتخيلنها لانها كلها تخيلات ودايم التخيلات هي الجزء الاحلى بحياتنا .. ليش تسوينها شهر
شهرين وبعدين تنسيها ..ليه وين روح البنات خلاص ماتت!!
عادي اركضي وخليه يركض وراك امسكي يده بالمطعم وغني له سوي كل شي كل شي هذا حلالك لا تقولي لا راحت علي اذا قلتي كذا هذا اول طريق تهدمين فيه وناستك وسعادتك بالحياه
واغلب الحريم ذابحين اعمارهم بالمشتروات وتجهيز الليالي الرومنسيه وتبي افكار وخاصه ااو فتور او حست ان زوجها ابتعد عنها
ليش ماتتعاملين معاه بالاشياء الي انتي تحبينها مو عشانه هو عشانك انتي
شغلي عقلك الباطن ..شغلي ذاكرتك .. كلها افكار رومنسيه.. الي كنتي تفكري فيها >> ليش حارمين نفسكم منها ومشتغلين تزين وافكار لليالي الحمراء والورديه و الخ
افكارك انتي عقلك الباطن ساعدتك انتي تخيلاتك ايش بلبس ايش بسوي كيف بزعل كيف ارضيه كيف بأكله بيدي ..يوميا سوي كل شي تبينه
مو ليله حمراء تنتنهي بطلوع الصباح
افكار تجهيزات ليالي حمراء سعاده زوجك = ومن بكرا نسينا ما اكلنا = يرجع الفتور والملل
انا كنت اشتغل وتعاملات مع متزوجات كثير للاسف ماعرفو كيف يكسبو ازواجهم ويسعدو انفسهم ..كئيبات بشراتهم شاحبه تجاعيد بعينهم من التفكير والصياح
فجأه صوت ينادي من بعيد الجازي وينكم
الجازي>> هلا يمه
ام الجازي>> يلا تعالو مخليني لحالي
هديل>> يوه اسفه شكلي طولت عليكم خلاص انا رايحه زوجي بجي بعد شوي ياقلبي عليه ربي يحميه وخليه لي
انا والجازي >> امين يارب وتتزوج الجازي وتفك المخده منهاراحت هديل
وجلست انا والجازي وام الجازي والعجيز نايمه على الارض
وقمنا نسولف بخصوص هديل
انا >> خالتي ام الجازي كيف وافقتي ان واحد ماخذ على مرته يسكن عندكم؟؟
طيب وزوجته تدري؟؟ وهو ايش اسمه وكيف وضعه؟؟ مدلعها ولا منكد عليها ؟؟ يجيها كل يوم ولا يوم لها ويوم الاولى؟؟
ام الجازي>>> ياساتر ياساتر
شوي شوي ما اخبرك ملقوفه كذا وتحبين العلوم
انا>> لا بس تعرفين الفضول شوي لعب فيني
ام الجازي>> ولا ماتفرق عندي سكنت الزوجه ولا الضره اهم شي عيال ناس ومرتاحين
انا>> طيب زوجته تدري؟؟
ام الجازي>> لا لا ماتدري
انا>> معقول بتكمل سنه ولا درت؟؟ زواج مسيار هو ولا ايش؟؟؟
ام الجازي>> هو ماقال حق حد بس احنا وزوجته بمنطقه ثانيه تبعد نص ساعه عن منطقتنا
انا>> وكيف يجيها؟؟ وزوجته ماتلاحظ
ام الجازي>> قايل حق زوجته ماخذ اوفر تايم مويجي الساعه 3 لها ولا يطلع الا 9
انا >> يعني مايبات عندها !!
ام الجازي>> ايه ايام الربوع والخميس مو دايم
انا>> شكلها ماعندها بيبي
ام الجازي>> لا ماعندها تبي تسناتنس
الجازي>> ماما حتى انا اذا تزوجت بجلس سنه بستانس
ام الجازي>> انكتمي يابنت جيل مافيه حياء الله يخلف علينا يجيبو لنا سيره الزواج تجينا ام الركب
انا>> اي والله ههه
وجلسنا نسولف وقامت العجيز تصلي المغرب وخلينا ام جازي وياها
واحنا رحنا الغرفه
انا والجازي بالغرفه
انا>> ياحلو غرفتك مريحه وخري بس بتمتدد على سريرك الله يجازي هديل خير سنعتك ولا قبل الله وعلم وش غرفتك كانت
الجازي >> عندي صوره بغرفتي اقديمه كانت بالطابق الي فوق واكبر بس هذي ارتاح فيها احس اني ملكه ببملكتي
انا>> طيب يالملكه يلا وريني قبل وبعد
الجازي >> لحضه اجيبها مع اني معاهده نفسي ماشوف وانسي هالايام بس يلا عشان تشوفيها وجلست تدور شوي وعطتني اياها
اانا >>> يوه يوه صدق صدق يوم قلتي قبر بصراحه فرق من نجمه الا نص نجمه الى 5 نجوم بس مره حلو ذوقك
الجازي >> هذا ذوق هديل
انا>> شكلها مأثره فيك هالانسانه غريبه بجد صحيح كلامها اثر فيني من اول مره
بس تعرفين احسن شي سويتيه خذتي سرير نفرين عشان اذا جيت انسدح عندك
الجازي>> تعرفين تقولي هديل انتي ماتحبي نفسك باخله عليها بسرير كبير وش الي حاشرك بهالسرير غيريه وبعدين بدت تقولي اقترااحاتها واهلي كانو رافضين اشياء كثيره وخاصه التلفزيون
بس اقنعتهم ليين وافقوو
انا>> بس غرفتك متكامله لا وبعد حاطه سله فيها بسكويت وشوكلت الي تجي حبه حبه مغلفه ليش متعوده على الضيوف قالت لا هذي لي انا قلت لها لا تقولي فكره هديل قالت ايوه
الجازي>> لو تشوفي بيتها يجن يجن كأنك بعالم الاحلام
انا >> ودي اشوفه
الجازي >>مشكله زوجها لصقه يموت فيها كل يوم يجي مايتأخر لو ماجأ يوم يكون في ضرف قوي والله انه يجلس وياها اكثر من عايلته
تخيلي من سكنت مارحت لها الا مرتين وتعرفين ارتاح ببيتها راحه غي طبيعيه
انا >> ليش وش فيه بيتها زود
الجازي >> ودك تشوفينه وتحكمين .. باقولها بوم نزورها ..باين عليها ارتاحت لك .. اول مره اشوفها تتكلم كذا بطلاقه .. هي دايم تنزل لنا وماخذنا على بعض الا بعد فتره
انا>> طيب هي قالت ان هي تشتغل ليش ماتشتغل الحين هي وش وضعها كلميني عنها
الجازي>> ممكن تسكتسن وتاجلين الموضوع جاني النوم تراي جالسه من فجر الله ويا امي نجهز للعزومه
انا>> الجازي بلا سخافه انا جالسه اسأللك .. الجازي الجازي>> تشاخر الاخت خلاص اوف
جلست افكر بروح الشباب وايش قصد هديل فيه ام حيرتني هالبنت
طرأ على بالي شي مو بس مع الزوج
روح الشباب>> لما كنت صغيرا ((بنات ترا عمري 28)) اقصد لما كنت صغيرا عمري 19 كنت اقول مستحيل اخلي ولدي واطلع بخليه معاي وبدلعه وبشتري له كل شي وبسولف وياه
ولحين الله يخلف شوفوني وين مسيرا ولدي بالبيت ومو دايم اشتري له لعبه واسولف وياه >>وين راح روح الشباب ليش انا مو كذا ليه ليه ما اسعد ولدي زياده وش ناقصني يارب ياهديل فتحتي عليا
باب
وقمت اسرح واسرح رحت بعيد يابنات ماتتخيلون وين رحت >> حسيت نفسي انانيه مع نفسي وزوجي وولدي واهلي وناسي >> الهدرجه الاهمال وين الكلام الي قبل لما كان فيني روح الشباب
يابنت توك صغيرا ماتخطيتي العشرين الله يستر اذا زادت المسؤليه شكل روح الشباب بتموت فيني يارب الحق عليها يارب الحق عليها هديل ساعديني كيف الحق عليها مابي وجهي يصير شاحب مابي
تجاعيد بعيني من صياح ولنكد وينك ياهديل وينك الحين مع زوجها اخ من زوجها خاين كل الرجال كذا كلهم عينهم فارغه اوف اوف
فجأه يطق الباب >>الخدامه >> بنات يلا تعالو
المهم طلعت انا والجازي نايمه وقالت لي العجيز يلا نمشي انتي وراكي ورع وانا تعبت
قلت لها اي مشتاقه لولدي يلا نروح يا احلى جده بالدنيا انا احبك ياجدتي احبك ربي يطول بعمرك واجيب لها عبايتها وشيلتها وتقول وشفيك يابنت انهبلتي وراك تقولين كذا ترا عيالي كلهم معرسين وانتي معرسه
قمت اضحك من كل قلبي
وصلت البيت مشتاقه لولدي ولدي هذا الي تعبت عليه 9 شهور ولدت وشف الموت مادلعه وصرت طول اليوم ادلعه واحبه وابوسه واقابله واذا صاح ماتنرفز احاول اتكيف
تذكرت اني كنت اتخيل قبل ماتزوج واقول بنفسي اول مايجي زوجي من الدوام افصخه ملابسه وافتح زر زر واجهز له حمامه زي لما اشوفه بالافلام المصريه واتذكر المسلسلات السوريه تحط له سطل لرجله وكنت اقول بسوي كذا
مو هذا زوجي الي يكرف عشاني وعشان ولده
بتقولن عادي احنا نسويها صحيح تسونها بس مو من قلبكم بس كذا تبون تسون تغير
المهم جاء زوجي من دوامه اليوم الثاني وكشخت ولدي وقلت له والله اشتقنا لك مره وفصخته ملابسه استغرب يقول شفيك يدي مو مسكوره قلت مو انت تتعب بالشغل عشنا خلاص احنا نريحك بالبيت
وجهزت له الحمام ماعرفت وش قصدهم المصرين يجهزون الحمام >>بس حطيت له شور جل جديد وشامبو ريحته حلوه وفوطه بالحمام وحطيت بجامه على السرير
ماتتخيلون يابنات شلون استانس وانا استانست مرا حست نفسي راضيه عن نفسي
شلون كنت انانيه يجي زوجي يشوفني على التلفزيون اسلم عليه اورجع اتفرج ولدي يلعب قدامي التفت شوي عليه وشوي للتلفزيون يقولي حطي الغداء احطه بسرعه ما ارتب عادي يعني
وهو مسكين كل راتبه لنا وتعبه وشبابه مستخسره عليه شوي دلع وش هالزوجه الانانيه
بديت اكتشف نفسي بأشياء واشياء
خلاص ماقدر اتكلم اكثر عن حياتي الشخصه عشان نرجع الهديل