هيلب مي يالمملكات فزعتكم قلت لخطيبي ما أحبك

بسم الله الرحمن الرحيم
السلام عليكم ورحمة الله وبركاته
أخواتي الفراشات,,
هذا أول موضوع لي في المنتدى توي مسجلة طازه
أنا كنت ادخل المنتدى باستمرار واقرا فيه واستفيد بس ما خطر ببالي إني أسجل
لكن ألحين وقعت في ورطة كبيرة وتوهقت ماني عارفة كيف أحلها؟
وعلى طول تذكرتكم وتذكرت فزعاتكم الله يجزاكم الجنة
ومالي بعد الله غيركم
ساعوني
ما بأطول عليكم أكثر بأدخل بالموضوع ع طول
أنا مملكة لي سنة تقريبا وعلاقتي بخطيبي فيها شي كبير من الخجل من ناحيتي أنا ومن ناحيته هو بعد خجول لدرجة كبيرة وهو يعترف بهالشي
وأنا مرات أتضايق من كذا ومرات عادي على حسب الموقف
والمكالمات مرات تكون مره بالأسبوع وبعد مانلقى وش نقول
ومرات تكون كل ثلاث أيام وهكذا عادي ماعندي مشكلة
المهم إحنا الفتره هذي نكلم مره بالاسبوع بس كل يوم قبل النوم مسجات ومقالب حلوه وضحك وتريقه الى الفجر بس كله بالمسجات طبعا
وتونا نفك مع بعض شوي هو طبيعته تريوقي مره ومايحب يطوف شي من دون مايعلق
بس معاي انا فيه خجل يعني يتريق مايصبر لكن بخجل شوي
يمكن لأن أنا خجولة بزيادة وان كنت أحيانا أعطيه جوه وأتفاعل معاه وأخليه على راحته ما أنتقده
طبعاً أنا قلت لازم أفك الخجل شوي مابقى ع الزواج غير شهر ويوم بالضبط
مع إنه يقول خجلي حلو عادي>>بعذره لأنه خجول مايبغى أصير أجرأمنه
وزي ماقلتلكم ع الحركات والشغلات اللي أسويها
شغلات رومانس تخرب جوه وهو قاعد مع الشباب أو تطير النوم من عيونه ويقعد يقول أتخيل وما أتخيل ومن هالحكي بس كله مسجات بس ما يتجرأ يتكلم بهالأشياء وأحسن أنا راضية
ومرات مقالب بس على خفبف ونفس الشي مسجات
وألحين نجي لأهم مافي الموضوع
جبت العيد معاه أمس واللي صار
أنا امس قبل الفجر كنت هنا أفرفر بمنتداكم وقبل لا اقفل النت شفت مسج يقول:
ما احبك ما أحبك ما أحبك
قلتها بس استفزك
تبغى الصدق ما ذبحني غير حبك
أنا ع طول لطشتها وقلت بأرسلها لابو الشباب
كل مره أرسله مقلب أبين له في اخر الرسالة انه مقلب وهو مستانس وانا بعد أستانس وماشي الوضع
بس أمس كنت مره طفشانة ومتضايقة لن امتحاناتي بالجامعة بتبدأ يوم السبت إن شاء الله
وبعد الزواج مابقى عليه شي خلاص
المهم كان ودي يكلمني يخفف عني شوي يمكن لو أسمع صوته أتسلى
فارسلت له الجزء الأول من الرسالة
ما احبك ما احبك ما أحبك
بس من دون ما أكمل المسج قلت لعله ينخض ويتحرك شوي ويكلم يقول وش فيك
وعاد نا كذا بأقول التكمله وأقول إنه مقلب واني كنت مشتاقة لك وكان ودي اسمع صوتك بس ماكان فيه حل غير إني أخوفك
طيب وش اللي صار؟؟
كانه حس انها تخييشه
أرسل على طول مسج يقول: اعوذ بالله من الشيطان
وش صار وش فيك
أنا ما رديت عشان يتصل
رجع يرسل : قلبي وش فيك امانة
وهم بعد انا مارديت>>ترى يقول أني عنيدة
وبعد كمان أرسل : حبيبتي والله بديت أقلق
اذن الفجر ورحت أصلي وما رديت
أرسل بعد الفجر: يارب صبرني حتى تردين علي لأن أعصابي والله تعبت
أنا هنا بدا فيني النوم وماعاد لي خلق أكلمه واعلمه
وبعد أنا عنيدة حطيت براسي أعلمه باتصال لازم اعلمه باتصال مابأقوله بمسج
فرديت عليه : يعني ماتعرف وش فيه
رد بمسج: قولي تكفين بسرعة>>كان متوقع اقوله كالعاده اموت فيك ونخلص
لكن عنادي اللي كان يعجبه وهقني هالمره
وقلتله : ما ينفع أقول بسرعة يبغالها كلام وأنا تعبانة فيني نوم وأرسلت ليتني ما أرسلت
هو انصدم ومازاد يرد
أنا جيت بعد ساعة وزدت الطين بله وأرسلتله: شكلك انت اللي نمت مو أنا
عادي أحر ما عندي ابرد ما عندك لكن ما يخالف نام ألحين وعليك بالعافية وأنا بعد بأنام وبعدين يصير خير يحلها ربي
ولا عاد أرسل ولا اتصل الى ألحين
وللمعلومية عمره ما زعل مني وأحياناً أسوي اشياء تزعل ولا يزعل الحمد لله
ومره سألته فيه مره تضايقت مني قال : لا يمكن أزعل ولا اتضايق منك وسمعني كلام حلو شوي
لكن أنا ألحين أبغى اعرف هو بيزعل مني
لأنه أكيد ألحين قاعد يفكر وش اللي سواه وخلاني أقول ما احبه
أعرفه يقعد يلوم نفسه كثير ويفكر كيف بيرضيني
وفي النهاية يطلع حركة سامجة مني
والله لو زعل ما ألومه
لكن كيف أوصله اللي كنت ابغاه وبدون ما يزعل واوضح له الامر ببساطة لان ماأعرف كيف أراضيه الحمدلله ربي ما قد بلاني
أبغاكم تساعدوني بحيث أقلب الموقف عليه وأخلي المكالمة رومانسية هذا إذا اتصل اليوم في الليل
وما أبغاكم تلوموني لأني عارفه ان اللي صلحته غلط وندمانه والله العظيم
خبرتكم يالذكيات والرومانسيات تراني من جد متوهقة
واسفة طولت عليكم لكن حبيت أحطكم في الصورة تمام
وكلي أمل فيكم بعد الله انكم راح تساعدوني وألقى الحل عندكم
ومشكورات مفدماً والله لا يحرمني منكم