ورق الكريشه مادري كريب بيبر وتعطيره للادراج بطريقه خنفشاريه

1. الشاهد انا كنت حاطه في دروجهم ورق معطر من زهور الريف طيب

ا ول شي سلامي للجميع وصباحكم عسل وهمه ونشاط
وبعدين ياحلوات ياللي انشط من النحلات حد منكم يعرف شيطان الشغل ههه على غرار شيطان الشعر
المهم ومالكم بالطويله مادريت ذاك اليوم الا وشيطان الشغل يخمني ويجيني نشاط مش عادي واقوم اقلب غرفة بناتي قلب الا عندهم خرابيط مادري وش تبي المهم واضفها وامسح الدروج وهلم جرا

الشاهد انا كنت حاطه في دروجهم ورق معطر من زهور الريف طيب

بس يوم تسلطت ذاك اليوم والا ماعندي ورق معطر وانا احوس وامخمخ والا الاقي قدامي ورق كريشه ولا يخافون المتطورين كريب بيبر تعرفونه كنا نسوي فيه ورود على زماننا المهم جايبته كنت بخربط فيه بحفلة مادري مين وما استخدمته واقوم اقصصه على قد الادراج واجيب فواحة دلع بنات من زهور الريف وارش منها على الورق ولحد الحين غرفة بناتي ماشاء الله تعج ريحة زهور الريف انا نقطت تنقيط من الفواحه المركزة ورق الكريشه مسك الريحه والعمليه كلها ماكلفتني الا لفتين كريب بيبر وشوي من الفواحه يعني كلها على بعض 8ريال وتعالي شوفي الريحه حتى بناتي انبهرو وارخص من الورق المعطر واحلى ريحه ممكن كل وحده تحط الريحه اللي تعجبها نسيت اقول ان الريحه مسكت بالملابس الداخليه والخارجيه وطبقتها بدولاب زوجي بس حطيت دهن عود مع مخلط ملكي وتعالي شوفي كيف الريحه صارت جونان
وبس يلامتكم والى خنفشاريه قادمه
بنات انا لي اسبوع مسويه الطريقه وقلت ماراح اعلم البنات عنها الااذا شفتها الريحه تستمر والا وبما انها استمرت خبرتكم