يوميات شغالتي الهندية وشعرها

1. زيت النارجين ابو علبة حديد خضراء


2. ) ابو خمسة ريال اظن سعروا كذا المهم ارخص انواع الزيوت

اولا: اكثر الاخطاء الشائعة هنا وانا كنت اسويها زي زيكم احط الزيت على شعر غير نظيف بمعني نكون جاين من نادي ومعرقين وفروة الراس مليانة دهون وعرق او جاين من فرة سوق او من تمشية بحر في الجو الحار او او مرة وحدة نتزيت ونتنظف غلط غلط غلط الزيت لازم ينحط على شعر نظيف بمعني تستحمي وبعدها تحطي الزيت كيف؟
الهندية كانت قبل ماتنام تدخل تستحمى واول ماتخرج تنشف شعرها ويكون شوية مبلول وتدهن شعرها بالزيت واحيانا تنام والصباح لما تصحى تدهنوا بالزيت <يعني مايهم يكون ناشف او مبلول > المهم يكون نظيف .
بعد ماتصحى من النوم تمشط شعرها بمشط اسنانوا كبيرة عشان الدم يجري بفروة الراس ومساج خفيف لفروة الراس وهيا بتدهن وهيا بتمشط وبعدها تفرق من النص وتظفر شعرها تجدلوا جديلتين وتقوم تنظف البيت <والجدايل معروفة انها تطول الشعر سواء جديلة او جديلتين بشرط انك ماتشدينها يعني جديلة مرتاحة عشان مايتقطع ويتقصف الشعر>واخر اليوم قبل ماتنام تفك الظفاير تستحمى وتنام وشعرها مفرود يعني تخلية يرتاح من الجديلة تخلية يتنفس وتكرر ماسبق يوميا والله يابنات يوميا لمدة سنتين على ذا الحال واحسبي قد ايش يكون الزيت على شعرها من تسعة الصباح لتسعة المساءواليوم الي يخلص فية الزيت وماتحط فية الزيت تقول اصدع خ زبدة الكلام مو ضروري تخلية ذا الوقت كلوا زيها انا سويت زيها لاكن من ستة الي ثماني ساعات ويوميا لمدة ثلاث شهور
وكانت تقص اطراف شعرها كل شهرين بنفسها وهيا بالجديلتين تمسك المقص وتقص الاطراف بالزيت طبعا انا كنت اقص اطراف شعري في صالون
وسرت اكل اكل حار زيها يعني فلفل الحار الاخضر او الاحمر دخلتوا في اكلي لان من ابحاثي في مجال الشعر قراءت معلومة ان الفلفل الحار يساعد الدورة الدموية من الوصول لجميع اطراف وانحاء الجسم مما يساعد على وصول الدم لفروة الراس ومن يومها وانا اكل الفلف الحار زي زيها واكل الاكل الهندي لاني بصراحة احب الاكل الهندي لاكن ماكنت اكلوا حار لاكن من بعدها اطلبوا واسوية سبايسي وسرت اكل من طبخها ههه وزي زيها
المفاجاة لو اقلكم ايش الزيت حتنصدموا لاني انا نفسي كنت احس ذا الزيت بالذات مايسوي شي لية ماادري كنت مستهينة فية وهيا الي كبرتوا بعيني المفاجئة الزيت هوا
(

زيت النارجين ابو علبة حديد خضراء

) ابو خمسة ريال اظن سعروا كذا المهم ارخص انواع الزيوت

وسالتها عن املا قالتلي عندنا بالهند وفي علب معدن حديد مو بلستك لاكن احنا نحب النارجين لان ريحتو عندهم زي الخمرية عندنا بالعربي ازواجهم يحبون ريحة جوز الهند والنارجين في شعورهم نوع من انواع الاغراء لرجالهم ضحكتني احنا اغرائنا عودة وخمرية شعر وهم نارجين سبحان الله كل شعب وثقافتهم وعادتهم
زبدة الموضوع انا سويت زي ماتسوي بالضبط بزيادة حبوب الفايتمين للشعر وهيا الزنك ووقفت الاستشوارات والصبغات وكل شي يظر بالشعر لان هيا ماتحط ولا شي بشعرها غير الزيت والشانبوا والموية وبس
بعد ثلاث شهور
ماشاء الله رحت فرح صحبتي ووحدة من البنات شافتني وكنت وقتها مستشورة شعري فقط من غير سيروم من غير شي عارفين ايش قالتلي؟؟؟
قالتلي شعرك مرة متحسن وين شعرك الطافي الباهت الناشف من الصبغات لمعة وطويل وغزران
لاكن هاذي البداية يابنات وانا استمريت على طريقتها سنة كامة الان شعري سار احلى شعر اخواتي بعد ماكانوا يتريقوا عليا وانا اسوي زي الهندية
والنصيحة الاخيرة
الصبر الصبر الصبر والاستمرار والاستمرار والاستمرار لان البناء مو زي الهد صح ولا مو صح؟؟
واي سوال انا حاظرة
ورجاء اي سوال على العام عشان الكل يستفيد واي سوال على الخاص ماحرد والعذر والسماحة منكم
والي تبي تنقل الموضوع حياها والله يعم الخير علينا جميها
وارفعوا الموضوع الله يرفع قدركم جميعا