يوم أن حضرت مناقشة الدكتوراه

<<<< هي يا عمري كانت بحضر .. بس بجد يوم طلّينا واثر الدعوة دكتورات .. وجايبين صبابه بعد وحركات فقالت : ماله داعي نجلس .. فراحت :( وبقيت البطلة أنا
مشيت بثقة << يعنني
وتوجهت للباب ودخلت منه
شافتني دكتورة مدرستني قبل سنتين بنظرة استعجاب ..
أحسّه تقول وش جابه ذي
وأنا اللي اروح وأجلس ورى وأقعد ..
كان القاعة مو مليانه مرّه ..
فيها دكتورات ومعيدات زي ما قلت ..
وأهل وصديقات اللي يناقشونه ..
اللي يناقشونه كنا نشوفهم بالشاشه ..
واللتي تُناقش هذي قدامنا ..
عن جد عن جد كانت وناسه
أحس عالم أول مرة أدخله
لدرجة إني تخيلت نفسي مكانه وجتن الصيحه
كان فيه ثلاث دكاتره بالشاشه ..
بالطبع أول مرة اشوفهم ومدري وش سالفتهم ..
بس كأني فهمت أنه واحد منهم جاي من كلية الشريعه ..
والثاني مصري كأنه مدقق لغوي مدري ..
بالطبع السعودي هذا اللي من الشريعه ما لحقت على مناقشته لها :(
بس المصري لحقت << قهر يناقش نحو وفيه اشياء ثانية بس كنت ابي اللي يناقش المادة الدينية عشان هو موضوع البحث << بس يالله اللي شفته خير وبركه
قعد الدكتور المصري يناقش ..
ويخليها تقرا الجمل اللي كتبتها وتطلع أخطائها ..
وأحياناً يقول ليه ما اثبتي رأيك بعد أن قلت الخلافات ..
وأحياناً يقول : المصطلح هذا ليه ما عرّفتيه وهذا ليه ما جبتي له مسألة تشرحهه ..
و .. و .. و ..
صدّع براسها المسكينه وصدّع بروسنا :(
البحث ماشاء الله يمكن حول 800 صفحه ..
ولكم أن تتخيلوا مناقشة الدكتور :(
بجد يا عمري رحمت اللي تتناقش ..
هذا أنا وأنا ما حضرت الا بعد ساعه وثلث ..
وهذي المناقشة الثانية لكتابها ..
أجل وش سوّت بمناقشة السعودي ..
طبعاً كل ما زهقت قعدوا الدكتورات يأشرون لها تصبر ..
ويبتسمون لها وهي تبتسم ثمن ترجع تناقش ..
كانت تأشر ادعوا لنا وحنا ندعي لها بالتوفيق
فاصل :-
جابت لي الصبابه شاهي عشان أشرب ..
لكن استحيت آخذ عشاني داخلة المناقشة غلط ومنب دكتورة ولا شيء ..
لكن يوم جابوا لي فطاير أكلت وحده

نرجع لصلب الموضوع : -
بدو الناس يسولفون بالقاعه ..
وكل وحدة تشوف ناس تعرفهم وتروح تسلم عليهم ..
وجو صديقاتي الثانيات << مهب اللي معي أول شيء
وازداد الهرج بالقاعة ..
فقامت وحدة من الدكتورات وسكتتهم << أشوى إنها سوّت كذا قبل ما انا أسويها
بجد رحمت البنت اللي مع الدكتور له سنة وذولي يسولفون ..
الدكتور المصري زاد نقاشه حدّه ..
والبنت يا عمري زاد زهقها وطفشها ..
وما زال البعض يهدّيها ..
فاصل آخر :-
جابت الصبابة لي انا وصديقاتي قهوة الحين
بالطبع ما شربنا
لكن يوم جابت الشكولاته اخذت وصديقاتي لا << ليه أخذت طيب ؟! << عشان كنت باقرا المكتوب على الحلاوة << مهب ملقوفة أبد
كان مكتوب على الحلاو ..
تاريخ يوم المناشقة ..
وبعدين كاتبين مناقشة الدكتوراة ل
ثمن كاتبين اسمها &&&&& << مشفّر
بس بصراحة ماشاء الله بجد كانت فخمه مرّه
نرجع لصلب الموضوع تاني مرّة :-
كنت أشوف وحدة من اللي جايين مع الدكتورة تبكي ..
ومير قلت ذي أمه ..
ومير اصيح << تخيلت شكل أمي جايه لمناشقة الدكتوراة حقتي
بعد ما انتهى الدكتور المصري من الشرح ..
رجعنا للسعودي ..
وبدا يشكر الطالبة ويعرّف باسمه .. واسم بحثه ومنين جابته ..
ثمن قال الحين سوف نخلوا للحكم في درجة الطالبة ..
<< يا حليلهم زي المحكمة
راح الدكتور واللي معه وصكّوا عليهم غرفة << نشوفهم بالشاشه ..
ومير تجي البنت وتدعي ..
ومير الكل يدعي معه << جو ايماني بجد

وشوي وراحوا صديقاته يسلمون عليه ..
بعدين راحت تسلم على أهله وتقولهم ادعوا لي ..
ثمن قعدت تتكلم مع الدكتورات عن المصري اللي ناقشه ذا وتحلطم << توني ادري وقتها ان الاستاذات والدكتورات زيّنا لما نحلطم اذا احد جاب لنا أسئلة صعبه << اكتشاف
بعد فترة يمكن حوالي ربع ساعة ..
رجعوا الدكاترة .. وسكتت القاعة كله ..
وبدا يظهر الارتباك على البنت بوضوح ..
وأنا قلبي معه << جايتن الصيحه بس مسكته
ومير يقول السعودي حق الشريعه ذا : لقد منحنا الطالبة الدكتوراة بدرجة الامتياز ..
ومير كلنا نقول : ماشاء الله ماشاء الله ونكبّر ..
أما أنا فخلاص الدموع تنزل << يا عمري عليّ حساسه
قامت الدكتورة ومير يوم سمعت هالكلمة حمدت الله ..
وقامت ونزلت من الكرسي وسجدت بالأرض ..
وأنا عاد اللي ما تحمّلت وصحت
ومير تقوم امه من كرسيه وتروح تسجد بالأرض ..
وأنا اللي اكمل صياح << بجد سوّيت فلم هندي مهوب صاحي
وشوي ويقومون من سجود الشكر ويسلمون الدكتورات على البنت ..
سلمت عليهم مستعجله ثمن راحت لامه ..
سلمت عليها وحبت راسه وخمّوا بعض وصاحوا ..

دورون أنا ما تلقوني :(
شوي والا اشاهق
والله استحيت على روحي أنا وهالصياح اللي جان ..
بس أشوى يوم لفّيت ولقيت فيه ناس تدمع ما استحيت وقمت اصيح اكثر
عاد انقلب الوضع لبسمات ..
وضحك .. ومباركات ..
بجد بجد حسيت اني عشت بجو ثاني
صديقاتي راحوا المحاضرة وانا مزلبه ابو الدنيا وجالسه
يوم حسيت اني ملّيث عيوني من هالمنظر طلعت وأنا ادعو لها بالتوفيق وإن ربي يبارك لها

يوم طلعت رحت للفت << بالدراسات العليا بس فيه لفت والا الباقي طقّيه رجليه
المهم يوم وقفت استناه وأثر الدكتورات طالعين ..
أنا جاية قبلهم بالطبع فقالوا لي الا تدخلين << تشققت
قلت : لا والله أنتم أول
يوم دخلوا قالوا : ادخلي ..
- لا لا .. عقب شوي عادي ..
- لا والله تركبين ..
قمت وركبت
تخيلوني بين دكتورات وأستاذات ومعيدات بلفت واحد
قسم حسيت إني كشخه
عاد إن شاء الله هالمره ركبته معهم وأنا طالبه ..
لكن بإذن الله كلها سنوات وأنا معهم دكتورة
<< قايلة لكم من الأول طموح << عاد ليته على سنع
تساؤل :-
هل ممكن نصير بمكانها يوم ؟؟!
هل ممكن نحصل على لقب دكتورة بيوم ؟؟!
هل ممكن نحس بفرحتها يوم حصلت على هاللقب بيوم ؟؟!
ما يندرى ؟!!!!
لكن الله يوفقنا يارب مع بداية العام الجديد ويجعله فاتحة لنا لكل خير
خاتمة :-
إذا بالغت في شرف مرومٍ ** فلا تقنع بما دون النجوم
بقلم : حديجانة بنت حديجان ولد أبو حديجان آل حدج دج ..
( لا أبيح النقل وال لو ذكر المصدر والوعد يوم القيامة) ..

*
*
*
معليش صارت بأكثر من رد
بس عيّا يحط الموضوع لحد ما قسمته ..
لأن الابتسامات كثيرة
*
*
*

حديجانه ؟؟
توي قاريه هالموضوع لك في منتدى ثاني .. هع هع
ماشاء الله عليك
بنات ترا بنفس اليوزر موب تشكون بالبنيه انها ناقلته

بلونه خ ..
اعترفي من أنت ؟؟!
وبأي منتدى ؟؟!
أصلاً الفراشة ما قد حطيت فيه الا موضوع موسوعة الهدايا ..
لكن اليوم من الفضاوة حطيته هنا ..
قلت مدام بنات المنتديات اللي حطيت به الموضوع دعوا لي اصير دكتورة ..
خلين أحطه بالفراشة عشان يدعون لي بعد خ ..
أقول ترى عندهم هنا رسايل << وحده فرحانه << وكبت العفش بنفس الوقت
شاكرة مرورك وردك ..
وجزاك الله خير ..
تحياتي ..

هع هع
روحي اقري الرسايل