أهمية الزوج في حياة الزوجه من خلال تجربتي

1. عزيزاتي ..............


2. بتكلم الحين باللهجه العاميه يمكن عشان البعض مايحب يقرأ الفصحى

اخواتي العزيزات ...
احببت ان أنقل لكن تجربه مفيده وان كانت بسيطه من حياتي. مازلت أخوض هذه التجربه حتى الآن ولكنها أبرزت أهمية زوجي في حياتي

عزيزاتي ..............

كل منا يعرف دور الزوج في حياة الزوجه ونعلم ان الإسلام أكرمها فجعلها ملكه عند زوجها فأوكل إليه نفقتها وحمايتها ورعايتها فالزوج له اهميه كبيره ودور فعال في حياة زوجته لا تستطيع انكاره أو التغاضي عنه .....
هي أيضا لها دور كبير بل وعظيم في حياته ....فكلاهما مكمل للآخر
زوجك مهم بحياتك له دور.. قد يكون غير ملاحظ بالنسبه لك أو انه دور صغيراً أو هامشياً.. ولكنه بالتأكيد هو دور كبير بالنسبه للأطفال
اهمس في أذن كل زوجه لاترى اهميه لوجود زوجها أنها لا تستطيع إحصاء تلك الأهميه إلا اثناء غيابه ..هنا ستعرف الفرق بين وجوده وغيابه
دعوني اخواتي ....أسلط الضوء على بعض جوانب اهمية دور الزوج في حياة الزوجه من خلال تجربتي فقد كنت اعلم جيداً اهمية زوجي بحياتي ودوره الفعال والعظيم في حياتي وحياة اطفالي ولكني لم أكن اعلم ان المرأه قاصره عن تأدية دور زوجها مهما كانت قويه وصلبه حتى لو ظنت أنها قد تؤدي دوره ولكن يبقى مكانه فارغاً في نفوس أطفاله على الأقل .......

بتكلم الحين باللهجه العاميه يمكن عشان البعض مايحب يقرأ الفصحى

سافر زوجي سفره إضطراريه مفاجئه ماكان متجهز لها ( الله يرده بالسلامه والعافيه )المهم هو احيانا يسافر سفرات خفيفه وسريعه وما احس بمسؤوليه كبيره بس سفرته هذي طولت شوي وحسيت بقيمته اللي عمري ما انكرتها حسيت بضعف الأنثى وأنا اللي كنت دايم احس نفسي قويه وصلبه >>>أثاريني طلعت خرطي خ
طبعاً ما احب اطلع من بيتي وزوجي مسافر لانه زي ماتعرفون المدارس جات وكمان انا بطبعي ما احب انام إلا ببيتي المهم بسفرته هذه تعرضت لعدة مواقف حسيت بأهمية زوجي وكيف كان شايل ومتحمل >>> يا عيني عليه ههه
أول موقف لما رحت أقضي لبنتي أغراض المدرسه ماراح أقولكم على الجشع اللي لقيته من أصحاب المحلات يالله مايصدقون يشوفون الحرمه لوحدها عشان يستغلونها ويرفعون الأسعار رغم اني ماعمري جيت بدونه احب اروح معاه ..كنت ماخذه عيالي معي على أساس يتمشون ويا ليتني ما أخذتهم ..ربكه وربشه وهذا يتكلم وهذا يطلب وهذا الكيس يطيح وشيل ولا تشيل .....ههه
مسؤولية العيال بالسوق مسؤوليه مميته كان زوجي شايلها معي وحتى الأكياس اضطريت أشيلها والحمد الله وبصراحه بيني وبينكم قلت بنفسي الله يذكرك بالخير يا أبو حتوم عمري ماشلت كيس واحد ولما خلصت من أغراض بنتي رحت السوبر ماركت وماراح أقولكم على الزحمه والهم اللي شفته وانا واقفه أحاسب بين الرجال طبعا وصلت البيت وكنت ببكي لما شفت الأكياس وش بيطلعها الحين البيت كان المسيكين زوجي متحمل وساكت خ الله يعينه عمره ماشكى يشيل الأكياس من فم ساكت ههه الله يرده سالم يا كريم
وأصعب موقف مريت فيه بنتي الصغيره مرضت زي ما انتوا عارفين الجو بدأ يتغيروبدأت تظهر عليها أعراض الأنفولونزا وقتها حسيت بالهم يعتصرني وانا شايفه بنتي تعبانه وماعندي احد يوديها المستشفى ( نسيت أقولكم ان اهلي بعد مسافرين ) المهم اتكلت على ربي وجبت لها علاج من الصيدليه والحمد الله عدى هالموقف على خير.. ما اقدر أوصف لكم احساسي باهمية زوجي ودوره وأبوته القويه لعياله اللي انا مهما كنت قويه ما أقدر أقوم فيها
احد المواقف الصعبه اللي مريت فيها وهي أنبوبة الغاز ..ايه ليش مستغربين !!!خ
عمري ما فكيت انبوبه أو أشبك الثانيه ولا اعرف هالأشياء احس هالأمور يبيلها قوه فهي من اختصاص الرجل تخيلوا وانا أسوي الحليب الصباح لعيالي خلصت الأنبوبه والحمد الله انه كان فيه وحده غيرها مليانه وإلا كان شفتوني وانا شايله الأنبوبه على ظهري رايحه أعبيها خ
المهم حاولت أنقل البوتغاز على الكهرباء بس ماعرفت لان فيها بعض الخطوره ففضلت أشبك الأنبوبه الثانيه والحمد الله تمت بنجاح ...يالله الإنسان مايعرف قوته وضعفه إلا لما يتعرض لمواقف ممكن تكون بسيطه او تافهه بس على الأقل ماهو متعود عليها ..زوجي كان شايل هالأختصاصات لوحده >>>>عرفت قدره ههه
وطبعاً ماراح اقولكم على أسئلة الأطفال عن ابوهم بكل دقيقه وثانيه فلما يجي أي واحد منهم يسألني وين بابا ؟ ليه لسا ما جاء ؟ اعرف وقتها اني مستحيل أغطي مكانه
اطالع بأركان البيت لما ينامون العيال أشوفه موحش ..فاضي لو كان مليان >>بتقولين قصايد خ
انا من زمان عارفه قيمته ودوره المهم بس عرفت فضله أكثر وان المرأه مهما كانت قويه وشديده لابد لها من لحظات ضعف تحتاج فيها إلى الزوج القوي الذي يستطيع حمايتها ........فكل إمرأه لديها نقطه ضعف تحتاج فيها إلى الرجل لانه مكمل لها كما انها هي أيضا مكمله له في حياته
نعم كل منا تحتاج للرجل في حياتها سواءً أب أو أخ أو زوج أو ابن فسبحان من أكرمها وجعلها ملكه وأوكل إلى الرجل حمايتها >>>>ياهو رجعت للفصحى خ
كثير مواقف مريت فيها اثناء سفرة زوجي ولساتني بمر فيها لانه لسا مارجع الله ( يرده بالسلامه ) ..مواقف كثير حسيت فيها بإن مكانه خالي مستحيل أقدر أملاه انا لوحدي اعذورني ما راح اقدر اقولها يمكن عشان خصوصيتها أو يمكن مافيه وقت أذكرها ..لكن الأهم العبره والفايده اللي ابغى أوصلها
على العموم اتمنى اني قدرت أوصل الفايده من تجربتي لكم ,واللي اتمناه انو مايبقى بيننا ناكره للجميل أو كفارة للعشير
لابد من ان نفهم مغزى هذا الحديث النبوي الشريف
( لو كنت آمرا أحدا أن يسجد لأحد لأمرت المرأة أن تسجد لزوجها). اخرجه الترمذي
وصلي اللهم وبارك على سيدنا وحبيبنا خير البشر وعلى آله وصحبه وسلم
والسلام عليكم ورحمة الله وبركاته ......................