إذا كنتي تبين تتزوجين اليوم قبل بكره لا تقولين مات

...
..
السلام عليكم ..
بنات فيه شيء يقرقع في قلبي ودي أقوله لكم وهو يخصنا جميعا ً هذا الكلام اللي أبقوله
السالفه وما فيها .. أني ألاحظ أغلب البنات اللي يتمنون أن رب العالمين يرزقهم الزوج الصالح ..
تلقين نفسها مشحونه ب التوكل على الله و التفاؤل و الأمل و الصبر وانتظار الفرج يعني
كل هالمعاني سكنت في داخل قلبها،اللي بهذه الأشياء انشرح صدرها وأضاءت
قلبها
لكن فجأة وبدون مقدمات تلقين هذا السور العظيم
اللي بنته أيام وشهور ( ينهدم ) في لحظات ...!!
ويموت الأمل وينقطع حبل التوكل على الله و لسان حالها يرثي حظها العاثر ..!
والسبب ...! تلقينه بسيط خلاها تهدم كل اللي بنته وأصابها الإحباط واليأس
يوم اصطدمت ببعض الأحداث وهذي الأحداث انتزعت من قلبها التفاؤل
وهو انها سمعت أن كل قريباتها اللي كبرها تزوجوا وهي ما تزوجت
أو ان قريبتها اللي اصغر منها تزوجت ‘‘ أو أختها اللي اصغر منها أنخطبت قبلها .
>>> طبعا ً هذا اللي تحس فيه مو حسد منها لغيرها ( لا ) إنما هذا
الإحساس لأن اصابها الحزن واليأس على نفسها
أو ممكن تكونين انتي بطريقتك ( دمرتي نفسيتك ) وانتي ما تدرين ..! مثلا ً تقولين ابتفائل إن شاء الله
و أبصبر وأ حسن الظن بالله تعالى و تكون نفسيتي قمة التفاؤل ،
وبإذن الله أتزوج قريب وأكون من عروسات 1431ه وأمهات 1432ه
>>> وش تلاحظون ...؟!
كلامها اللي قالته سليم وصحيح ومن باب التوكل لكنها ضرت نفسها بنفسها ...!!
لأنها وعدت نفسها وهي ما تعلم الغيب انها تتزوج في هذا الشهر أو في هذي السنة
وتتفاجأ بقرب الموعد وهي ما تزوجت ..!!!!!
وعند اصطدامها بها الموقف تتحطم ويقتلها اليأس وتلقب نفسها ألقاب البؤس
و التشاؤم و ينتزع الشيطان من قلبها كل نظرات التفاؤل .. ( وهذا اللي يبيه الشيطان منك )
و لا تنسين هذي الآية وتأمليها من أعماق نفسك وهو قوله تعالى :
(( ولا تيأسوا من روح الله انه لا ييأس من روح الله إلا القوم الكافرون ))
والله العظيم اذا غلبك اليأس وتذكرتي هذي الآية أنك تتعوذين من الشيطان وتقطعين هذي الأفكار المتعبه .
وبعدين يمكن ما تدرين وش الخيرة فيه ...؟ يمكن خير لك و تذكري
قوله تعالى : ( وعسى أن تكرهوا شيئا وهو خيرٌ لكم وعسى أن تُحِبُّوا شيئا وهو شرٌ لكم والله يعلم وأنتم لا تعلمون )
ولا تنسين حديث الرسول صلى الله عليه وسلم " تفاءلوا بالخير تجدوه "
لذلك لا بد وأن يكون أملك في الله أكبر وأعظم من أن يهزمك
الشيطان بخواطر الإحباط واليأس .
ولنا في موقف الرسول وصاحبه القدوة الحسنة وهم في الغار وقف الكفار على بابه وخشي 'أبو بكر'
على رسول الله صلى الله عليه وسلم فقال له: لو نظروا تحت أقدامهم لرأونا.. فقال النبي صلى الله عليه وسلم: يا 'أبا بكر' ما ظنك باثنين الله ثالثهما '!
وفي ذلك ليثبت فؤاد الصديق رضي الله عنه وليثبت فؤاد كل مسلم ضاق به الحال
وليُعلِّمَه أن الله م طَّلع عليه وأنه يراه وأنه سينجيه
ما دام العبد يتذكر مولاه، فليستبشر بالله وليطمئن قلبه به وليتفاءل مهما كان الحدث سلبيًا والأمور عظيمة؛
لأنه مهما كان العبد في ضيق فإن الله يخرجه ومهما كان العبد في عجز فالله القادر يعينه، فلنلجأ إليه ونستبشر به فليس لنا غيره
قال تعالى : ( أمّن يجيب المضطر إذا دعاه ويكشف السّوء ويجعلكم خلفاء الأرض أءلاه مع الله قليلا ما تذكرون )
واخيرا ً
لا تقولين ( مات الأمل ) قولي فيه يوم جديد
قولي فيه يوم شمسه تبي تكون مشرقه
قولي فيه يوم ابكون نجمه الحفل واكون عروسه
قولي فيه يوم ابفرح قلب أمي وأهلي واخواتي بفرحتهم لي في ليلة زواجي
وتذكري قوله تعالى:" إن مع العسر يسرا "
اخواتي انا كتبت هذا الكلام من حبي لكم خصوصا ً اني مريت بهذي التجربه لأن ماشاء الله تبارك الله
بعض قريباتي اللي كبري و اللي أصغر مني تزوجوا .. ما اقول إلا الله يوفقنا ويوفقهم ويسعدنا ويسعدهم
ويرزقنا جميعا بالزوج الصالح ..
اتمنى منكم ان تدعون لي في ظهر الغيب ان ربي يشفيني و يرزقني القوه في قلبي .
وادعوا لي بالتوفيق في دنياي وآخرتي و يرزقني رب العالمين الزوج الصالح اللي اتمناه .
اتمنى اني اشوف طرح أرائكم بخصوص هذا الموضوع
بقلم اختكم .. أميرة بدمعتي
.
.