ابوي حطم اختي ورفع من قدر الخسيس

1. اخواتي

السلام عليكم ورحمة الله وبركاته

اخواتي

احاول اختصر الموضوع قدر الامكان وارجوو منكم التفاعل يارب تساعدوني على حل هالمشكلة اللي ارقت نومي
المشكلة ان اختي عمره 23-24 سنه زوجها ابوي من ولد عمتي على الرغم من معارضتي انا لهالموضوع وقلتلهم اني اعرفه من يومه صغير مغرور ووقح مع امه داعس على خشمها لكن الكل قال اسكتي ولا تتكلمين ومالك دخل بالموضوع << شلون مالي دخل وانا اختها الكبيره !!
رجعت احاول اقنعهم انه فيه فروقات هي ماشاء الله جامعيه وطموحه والبنت تتعب على نفسها وصارت معيده بالجامعه وولد عمتي ماخلص ثانويه قالوا مايعيبه
قلت صحيح مايعيبه ولكن تحتاج لشخص يكون متقارب معاها فكريا ولكن لا حياة لمن تنادي
مسوي انه حافظ القران وهذا الشي الوحيد اللي طمني انا واختي
لكن استغفر الله القران بجهة وهو بجهة وسيماهم في وجوههم
الولد وسيم وشايف نفسه ولكن وجهه مافيه اي ذرة من علامات الانسان التقي بالعكس الا وجه ابليس رغم وسامته!!!
وامه اللي هي عمتي << تخسى
ممثله دور الصلاح والتقى والموضوع كله ديكور
لما جا موعد الملكه شالوا وحطوا وماخلت عمتي شي الا وسوته وبالغت في تجهيزات الملكه
وخلال فترة الملكه اختي ماكانت مرتاحه ابدا واصلا وافقت عليه بعد ضغوطات من ابوي يابنات شوي وبيكسر باب غرفتها عليها عشان توافق
في فترة الملكه كان يزورها وتطلع من عنده وهي تبكي تقول ما احس تجاهه باي شي وما اطيقه
ومره ورا مره وتحت ضغط ابوي رضخت
جا موعد الزواج ونفس الحاله ماخلت عمتي شي الا وسوته بهالزواج
هل الدين اللي انتي تدعينه يحثك على الاسراف؟؟؟
ماعلينا
اختي ماجلست مع الخسيس 4 شهور يابنات الا وهي خلاص ماهي طايقته
كل يوم رايحه بيت اهلي تهرب منه
وكانت هذيك الايام توها متعينه معيده بالجامعه
وصارت تشوف الجامعه هروب من بيتها
حابسها بسجن يابنات
سجن بكل ماتعنيه الكلمه
صحيح البيت حلو ومرتب لكن تخيلوا الثلاجه فاضيه ويطلع من البيت ويتركها لحالها بدون تلفزيون ولا انترنت والجوال مفصول ولا عندها تلفون ثابت يعني مقطوعه تماماا عن العالم الخارجي محد يدري عنها ولا عن وضعها
وهو يطلع من البيت ويروح عزبة مسويها عزبة عبارة عن بيت شعبي وعايش فيه ومنعزل عن اهله من قبل الزواج وشوفي عاد مين اللي داخل واللي طالع
المهم ان امي صارت تلاحظ ان اختي تجيهم وكل مالها تنحف مع انه المفروض العروس الجديده تسمن وتجي تزور اهلها وروحها حلوة ومبسوطه بس اختي العكس
وفي يوم من الايام راحت للجامعه واتصلت عليه عشان ياخذها قال لها
روحي بيت اهلك يوسعك !!!!!
كذا بدون سابق انذار
طبعا اختي فرحت انها جت منه
الان المشكله ابوي كان يحاول يرجعها له شلون ترجع بنتك لواحد يهزأها ويطفشها حياتها
شلون ترجع بنتك لشخص ماخاف الله فيها ولا استحى منك ولا عبرك على انك خاله لو بالكذب
مجوع بنتك ومهينها ويقول لها انا ما اتشرف فيك كزوجة ومستحي يخليها تنزل تقابل ابوه !
كل هذا الكلام يايبه ومازلت تبي ترجع اختي له !!!!
طيب ليش ليش؟؟؟؟؟؟؟؟؟؟
ليش تحرق قلوبنا اختي يابنات متعلقه لها الان سنه ونص وابوي مو قادر يرفع السماعه عليهم يقول لهم فكوا بنتي
لا وفوق هذا يابنات اذا قابل الخسيس يسلم عليه وكان الامر عادي
يعني بنتك داعس على رقبتها انت وولد اختك
يابنات والله انا ما أنام من القهر على أختي
وهي توها صغيرة بالسن وتقول انا أدعي على ابوي واتحسب عليه
يابنات انا ما أنام ما اقدر اخر الليل تلعب فيني الهواجيس واضرب بيدي على الطاوله بدون شعور ولا احساس انام بقهر واصحى بقهر
مقهورة اني ماقدرت اسوي شي لاختي
ابي اثور على ابوي وخايفه خايفه عليه يصير فيه شي لاسمح الله
وعلى فكرة انا في ديرة واهلي في ديرة يعني لما اروح لهم ما اقدر مثلا اثور واطلع على بيتي لا ابضطر اكون بالبيت عنده والوضع يصير متأزم وبدال ما اروح انا وعيالي ننبسط تنقلب نكد
والله انا ماهمني نفسي يعلم الله بس ما ادري ليش مزروع الخوف بقلوبنا من ابوي
ابوي اللي يهز جبال ما فتح فمه على ولد اخته ليه
كل هذا خوف
خوف على المنصب الوظيفي
ولا خوف على سمعته ولا على ايش بالضبط!!!
يابنات حق اختي راح هدر بسبة ابوي
وصبرنا لين مل الصبر
ليه اختي تنهان بهالطريقه يبي يعني من ولد اخته يتفضل ويتكرم ويجي يطلق بنته ولا ايش؟
ليش مايرد اعتبار اختي
وين الصراخ اللي كان يصارخه وتكسير البيبان على اختي لما رفضته
ليش ماسوى هالحركات الان على اللي ذبح قطعه من روحه!!!
اغراض اختي الى الان مازالت في بيتها
وانا شرت عليها لما اجي ازورهم نروح انا واياها لان معاها المفاتيح واخذ اغراضها وبعين قويه
ونروح بدون مانقول لامي وابوي نقول لهم طالعين لسوق او اي شي
ولما نرجع نعلمهم اننا رحنا بيت الخسيس مع العلم انه ساكن فوق بيت اهله
والله يلوم اللي يلومها في اي شي تسويه
وياريت يابنات اللي عندها اي خلفيه عن الخلع تقول لي
كيف ممكن تخلع وايش يطلب القاضي منك
وبالنسبة للخسيس مستوفيه فيه كل الشروط
صلاة ومايصلي
ولا يعطي زوجته حقوقها الماديه حتى ابسطها وهي الاكل
يشتمها ويسبها ويقول لها لو انعرضتي على عشر رجال اثنين منهم مايقبلون فيك!!!
ويعلم الله ان اختي فيها من الجمال والعلم والاخلاق وشهادتي فيها مجروحه
وعلى فكرة 4 شهور وعمتي ساكنه مع اختي بنفس البيت عمرها ماقالت لها تعالي يابنت اخوي انزلي عندنا ولا تقهوي معانا تخيلوا!!!!!
انتظركم وارجو انكم تدلووني وش اسوي لان ضاقت فيني الوسيعه ولاعاد اقدر افكر
ولاتقولون شوفي احد يتدخل
لان ابوي كلم عماني وجوا تفرجوا على اختي وسمعوا سالفتها وطلعوا كل واحد يحكي لحرمته ماسووا لها شي
وابوي الظاهر عاجبه وضع اختي الله يسامحه قهرنا وخلى كل وحده فينا تعرف ان ماوراها ظهر ولا سند
يعني لو وحده فينا زوجها يدق خشمها تصبر وتاكل تبن لانها عارفه ان ماوراها احد
اخواني ماعندنا الا اخو واحد كبير وموقفه سلبي مثل ابوي للاسف
وجالس بس يفكر بنفسه ومتى اتزوج ومتى تشوفون لي عروسه وبس هذا اللي يفكر فيه
اما اخته شايتها برجوله هو وابوه كأن مالها ولي