افتح شبابيك الهوي جيتك اليوم

افتح شبابيك الهوي جيتك اليوم
بحساس من زود الوله عده يطير
جيتك مثل طفلن له ايام محروم
عن حضن امه بعدته المقادير
وجيتك مثل عودن له ايام مهموم
وده يلاقي باخر الوقت تقدير
وجيتك حصن عاشق وهايم ومغرم
وده يضمك لين تصبح علي خير
متي تحس ان الهوي شي مقسوم
من قسمة الخالق علي خلقه ويصير
ومتي تحس أني لك أطيح وأقوم
وأتعب علي شانك واقدرك وأغير
لي في هواك أحلام وآمال وعلوم
واحزاب واصحاب وقصيد وجماهير
هموم وافكار وهواحيس وحلوم
وادروب واخطار وعذاب ومشاوير
وحب وغلا واخلاص ومعاند ولوم
واحساس والهام وشعور وتفاكير
وصحبه سهر ومقاطعه لذه النوم
وأشواق جياشه وعشق تعابير
في ذمتك ما بان لك شي مكتوم
من بعد ماصورت الأوضاع تصوير
لاتحسب انك شي عابر ومعدوم
تاريخ حبك فاق كل الأساطير
كني لقيتك بأغنية لام كلثوم
وكنتي قريتك في رواية شكسبير
في كل شي اتخيلك واسمعك دوم
واتاملك في الوقت الاول والأخير
من ماضي الايام لايومك اليوم
وغلاك عندي ماحصل فيه تغيير
وانا لك الله ماقبل البيع والسوم
ولا ارضي علي وعليك المخاسير
لاني الوحيد اللي علي بحرك يعووم
واللي عرف مرساه في رحلة السير
لحظه حبيبي قبل يسبقني النوم
بضم صدرك لين تصبح علي خير