الصبر لو هو مانفعك ماهو بضار

ان ضاق صدرك ودك تبوح الاسرار
اعرف ترى هالناس اضيق صدرها
لا تشتكي هم ٍ كبر فيك وان جار
ستر الهموم اخير ترى من ذكرها
من شاف غيره في عنا الضيق ينهار
هانت عليه مْصيبةٍ يحتقرها
بيشوف وشلون الصغاير غدو كْبار
لا طاحت الجرّه و بيّن كسرها
المخطي ان جالك مع حسن الاعذار
سامح خطا الزلات و اكسب اجرها
والزله اللي تْكررت عدة امرار
الذنب فاضح و احتشم عن عذرها
والديره اللي جوّها عج و غبار
ما تمنع ظْروف اهلها عن هجرها
والنار جايز تضمر بْحكّ الاحجار
لا تستهين بْذات تجهل قدرها
والحايط ان كان اهدمه عود مسمار
وشلون تامن هالبيوت بْسترها
الشر طاغي ما عطى الخير مقدار
والا القلوب الطيّبه يا كثرها
واصعب سؤال اللي يبي منك تختار
لا صار حل المسأله يختصرها
من يتبع الشهوات لابد ينهار
احفظ قدر نفسك لجل ما تضرها
كل أزمه و تعدّي مع جهد واصرار
واقلع فروع المشكله من جذرها
وان كنت من سبّة بلاويك محتار
لابدّ يوم بْتنفرج و انتظرها
الصبر لو هو مانْفعك ماهو بْضار
للنفس طاقه واستعين بْصبرها
الحظ فوْجيه المقاريد غدار
لو تبتسم يطلبْك تدفع سعرها
وش مكسب المنحوس من عدّ الاصفار
غير الشقا و هموم يكبر كسرها
الله يعين اللي عليه الزمن دار
ضاقت به الدنيا و عاش بْعسرها
لا تشتكي للذيب عن هجعة النار
ترى المصايب ما ينومس ذكرها
وان ضاق صدرك بْسبب شِين الاخبار
بعض السوالف لا يهمك أمرها
مما راق لي