الكل يدخل ويدعي لاسامه بالشفاء

هادي قصة ولد جارنا واسمه اسامه الله يشفيه هو وكل مرضى المسلمين يارب قولو آمين
المهم انتقات انا واهلي لبيتنا الجديد في المدينه المنوره وفي يوم كنت مع اخويه في السياره رايحين مشوار فقال اخويه ليه شوفتي هذا الرجال اسمه اسامه اتعرفت عليه مره يحزن فقلت له ليه :
فقال لمن شافني قال ليه انتم السكان الجدد قلت له ايوه وعزمني عنده في غرفته في بيت اهله فشوفت في غرفته اسلاك ولوحات وانوار وخردوات كتير فقلت له ايش هذا فقال هادي اشياء اتسلى فيها واسوي منها اعمال فنيه بسيطه لان ماعندي عمل وبدأ يحكيلو حكايته :
اسامه كان عمره عشرين سنه تقريباً لمن خلص الثانويه الصناعيه وزي أي شاب كان له اصحاب وشله يخرج ويسافر معاهم وكانت له احلام كتير بعد مايخلص الثانويه انو يشتغل في أي شركه ويتجوز ويخلف ويعيش حياته الطبيعيه لكن سبحان الله بعدها بكم شهر اكتشف انو مصاب بورم في الدماغ طبعاً دخل مستشفى الملك فهد بالمدينه وسوى عملية فتح في الدماغ من الامام عشان يشيلو الورم لكن بقي من هذا الورم كثير عشان للأسف الورم انتشر واتشعب في الدماغ وماقدرو يشيلوا كله وحالياً بيراجع في مستشفى التخصصي بالرياض فأحياناً يسافر في الشهر مرتين الى ثلاثة مرات واحياناً تجيلو مراجعات كل شهرين او اكثر عشان يصرفولوا ادويه وفي نفس الوقت يتابعوا حالته وتطورها المهم بعد مرضوا راحو الأصحاب وطاروا زي ماطارت معاها الأحلام الصغيره قبل الكبيره وصارت حياته عباره عن حبوب وإبر وادويه كتيره ياخدها يوميا عشان الورم يفضل على حجمه ومايكبر وعمره دحين تقريبا33 سنه
وصار يسلي نفسه بجمع الخردوات ويسوي منها اعمال فنيه لانو مايقدر يشتغل لانو عندو صداع مزمن غير الادويه الي ياخدها تخليه ينام كثير وطبعا مافي احد حيرضى يوظف احد بهادي المواصفات .
وواحد من اخوانه بيقول لاخويه انه عندو اكتئاب شديد والدكاتره في مستشفى التخصصي بالرياض قرروا يصرفولوا ادويه مضاده للإكتئاب بس ايش تسوي الادويه وهو في وحده وعزله من كل الناس....!!
مين حيرضى يجلس مع واحد تعبان ماعندوا أي شي ممكن الناس تشاركه في الكلام فيه و......و.........و..........حسبنا الله ونعم الوكيل , الله يشفيك يااسامه ويجزلك بالأجر والثواب والصبر
فجات في بالي فكره حلوه فقلت لأخويه ايش رأيك سخانة المويه حقت المويه في مطبخنا خربانه وامي تبغى ترميها ، والأباجوره في غرفتي كمان خربانه اعطيها اسامه واسألوا لو يقدر يصلحهم وبالفعل اخدهم اخويه واعطاهم لاسامه وصلحهم ماشالله وقلت لأختي فأرسلت سيارة ولدها الكبيره وهي تشتغل بالشحن كمان خربانه وصلحهم واعطيناه ثمن تصليحهم ومره فرح
ففكرت انزل قصته في النت ولي يبغى يساعده بنفس الطريقه هو مايبغى فلوس هو يبغى يشتغل فياريت كلنا نساعده في هذا الشهر الفضيل ولي عندو أي حاجه خربانه يعطيلو هي بس يروحلو البيت لانو ماعندو سياره والحكايه كلها اجر انشالله وفي ميزان حسناتكم يعني لاتقولو مشوار علينا الين مانروح بيته وتذكرو الاجر والفرحه الى حتدخلوها على قلبو وعلى فكره اخويه كلمو اننا حنزل رقمه في المنتديات فوافق وفرح كتير وتراه يحب الناس كتيير ويحب الناس تزوره
واللي يحب يتواصل مع اسامه يراسلني على الخاص عشان ياخذ رقمه