الله يسعدكم خففو عني انا ح انفجر

1. السلام عليكم ورحمة الله وبركاته..

السلام عليكم ورحمة الله وبركاته..

اخواتي سبحان الله انا عمري ماادخل دا القسم بس من اسبوع سرت دايما ادخل واكتب مشاكلي والله والله كنا عايشين انا وزوجي سنه و8 شهور على احلى مايكون ويحبني واحبو ويفهمني وافهمه خلال هدا الشهر اتغير حالي ميه وتمانين درجه سرت عايشه في نكد وتعاسه كل يوم نتضارب وكل يوم والله من غير اي مبالغه ننام زعلانين من بعض ومانتكلم يوم هوا زعلان مني ومايكلمني ويوم انا زعلانه منه ومااكلمه واحيان نحنا الاتنين مانكلم بعض..
والله انا تعبت نفسيا زوجي سار متعب جدا ومااققدر افهمه اتغير عليا فجأه والله كان يحبني ويعشقني دحين ورب المصحف احسه سار يكرهني ومايطيق الجلسه معايا انا ماقصرت معاه واحبو واموت فيه لكن هوا جالس يكرهني فيه بتصرفاته فعلا انا خايفه يجي يوم الاقي نفسي كرهته..انا خايفه مشاكلنا تكتر وتكبر ونحنا بيننا بنت وبنتي لسا صغيره نفسي ترحع المياه لمجاريها..بسبب هذه المشاكل سرت دائما على اعصابي ومتوتره وطول وقتي معصبه ودا الشي اللي زاد الطين بله وخلاني من اتفه مشكله اكبرها لكن هو السبب ماسار عندي ثقه في نفسي ابدا تخيلو زوج يقول لزوجته انتي ملابسك مو مره تعجبني مو دا ئما يكون ذوقك حلو او ينتقد طريقة كلامي او ضحكتي وربي عقدني ونفسيتي سارت في الحضيض..اليوم حاولت نقرب من بعض حطيت راسي على صدره وقلتله انا عندي كلام كتير وهموم ونفسيتي تعبانه وبدأت افضفضله وبعدين سكت شويا اتأمل الا شويا اسمع صوت شخيره ونام وانا قاعده افضفضله بأمانتكم مو شي يحطم..كنت اتخيل انه راح يضمني لصدره ويخفف عني ويحاول يحل المشاكل اللي اتعبت نفسيتي..
والله اني مجروحه منه ارجوكم ادعولي ادعولي ادعولي ربي يصلح الحال واعطوني رأيكم وحلولكم وكيف اتصرف معاه...؟ مع العلم اني جربت كل الطرق وآخر طريقه كانت اني ارحت بيت اهلي وجلست اسبوع ياخد نقاهه مني ويرتاح شويا بس ماحسست اهلي بشي طبعا..وطبعا مافاد شي..:(