امضغى الطعام جيدا وعيشى اللحظه

انا بشوف ناس تبلع الاكل من غير مضغ -- رغم ان اللذه الوحيده للاكل وهوه داخل الفم لانه هوه ده المكان الوحيد اللي فيه تذوق
يعني هيه كده لما بتبلع الاكل من غير مضغ -- حرقت احلي مرحله في الاكل وهيه مرحله التذوق
اوك يا باختصار --هوه ده الموضوع -- هنبقي نمضغ الاكل كويس -- بت متخلفه صحيح --ههه
استنوا بس -- هااحكيلكم حكايه تاني
امبارح كنت باتمشي انا وصديقتي ولقينا طفل صغير جميل اوي ما شاء الله عنده 7 شهور شايلاه مامته وبتلاعبه
لقيت صديقتي هتتجنن -- وبصت وقالت لي -- انا اولادي ما شاء الله كانوا وهمه صغيرين احلي من الطفل ده مليون مره
وكنت لما انزل الشارع البنات تتلم عليا وتقعد تلاعبهم -- بس انا عمري ما استمتعت بيهم -- كنت دايما خايفه عليهم
خايفه عليهم من البرد --من الاسهال -- من الحسد -- وخوفي ده خلاني مش استمتع بيهم -- وانا دلوقتي ندمانه اوي
نفسي يرجعوا تاني للسن ده والاعبهم واتمتع بيهم واتصور معاهم واستمتع بالمرحله العمريه بتاعتهم دي اللي ضاعت مني
قلت لها (( ولماذا لم تمضغين الطعام مضغا جيدا عندما كان في فمك )) -- ليه حرقتي المرحله دي والوقتي ندمانه انك مش اتمتعتي بيها
بت يا باختصار --لخصي في الحوار -- وقولي لنا عايزه ايه بالضبط
عايزه اقول لكم الاتي
انا شايفه بنات في الجامعه -- ومش مستمتعه بالمرحله الجامعيه -- عايزه تحرق المرحله دي بسرعه -- علشان تخلص مذاكره وتتوظف
وبعدها كل ما تشوف بنات في الجامعه بيضحكوا ويهزروا ويتمتعوا --تندب حظها -- طب --لماذا لم تمضغين الطعام مضغا جيدا
ليه مش عشتي المرحله دي بكل جمالها وحلاوتها -- ليه كنتي مستعجله اوي علي انها تخلص لدرجه حرمتك من الاحساس بيها
وبعد كده البنت تتوظف --- وتبقي مستقله ماديا -- والي حد ما عندها حريه في تصرفاتها -- برضه -- عايزه تحرق المرحله دي ---
عايزه تتجوز بسرعه --- وتقعد مش مستمتعه بحاجه خالص ولا حاسه بجمال المرحله اللي هيه فيها --
يا بنتي ليه بس مش عايزه تمضغي الطعام وتتمتعي --ليه عايزه تبلعي -- تبلعي -- تبلعي -- عيشي اللحظه -- برضه لا
بعد كده البنت تتجوز -- ها -- عيشي بقي -- امضغي شويه --اتمتعي -- لا -- لازم تحرق المرحله دي --
وتلف علي الدكاتره علشان تخلف وتدخل بسرعه مرحله الامومه -- وينتهي الحلم بسرعه وهيه مش اتمتعت بيه
وتقعد بعد كده كل ما تشوف عروسين جداد تقر عليهم وتندم انها عاشت عروسه شهرين بس
بعد كده ربنا يرزقها بالطفل الجميل -- تستمتع بقي -- تمضغ بقي شويه -- لا -- طول الوقت قلقانه عليه وخايفه ومش مستمتعه
وبعد ما يكبر تتمني لو رجع صغير تاني علشان تعيش المرحله دي (( علشان كده الجد والجده بيستمتعوا بالاحفاد اكتر ))
بعد كده -- وبعد كده -- ونفضل نحرق في مراحل الحياه --كل مرحله علشان نوصل للمرحله اللي بعدها -- ومش فيه استمتاع ابدا
كله قلق في قلق -- بعد الطفل الاول -- ناخد اجازه بدون مرتب لتربيه الطفل -- وعايزينه يكبر بقي بسرعه علشان نرجع الشغل
ونحرق مرحله استمتاعنا بالطفل -- عايزينه يكبر --عايزينه يذاكر -- عايزينه وعايزينه -- ومش بنمضغ ابدا -- كله بلع --بلع
سؤالي بقي -- ليه مش بنعيش اللحظه -- ليه بناكل واحنا بنفكر في حاجه تانيه -- بنذاكر واحنا عايزين ندخل علي النت --
وندخل علي النت واحنا ندمانين اننا مش بنذاكر -- ليه مش بنعيش في المرحله اللي احنا فيها ونركز فيها ونتذوق حلاوتها --
ممكن اعرف بقي كام واحده -- (( بتمضغ الطعام مضغا جيدا ))
وممكن اعرف كمان مين بعد الموضوع ده (( هتمضغ الطعام مضغا جيدا )) و(( تعيش اللحظه )) وتستمتع بالمرحله اللي هيه فيها
وتدي لكل مرحله حقها في المضغ