انا زوجي اهله اهلي

السلام عليكم
صباح الخيرات
كيفكون صبايا؟؟ >> بكتبلكم و بتفرج مسلسل صبايا هع
المهم انا حابة اليوم اتكلم عن مشكلة منتشرة بيننا سواء في المنتدى او براته
لمن الوحدة فيكم تجي تشتكي من اهل زوجها او من زوجها او من اي كان
ما فكرتي ايش السبب؟؟؟
مع احترامي لك
انتي اللي عملتي نفسك بنفسك الضحية
انا هقولك كيف؟؟!!
لمن يكون في شي صدر من اهل زوجك و ما عجبك تسكتي و ما تفتحي فمك
و تجلسي تراكمي في نفسك و لا تتخذي القرار اللازم
و يجوا هما اخرتها يتحكموا فيكي و بحياتك
هتنفجري اخرتها لانه كثر الضغط يولد الانفجار
لمن زوجك يعاملك معاملة مش و لا بد
هتتضايقي تجي تناقشي عصب عليكي و تركلك البيت و مشي
هتسكتي وقتها و هتراكمي في نفسك
عشان لا تسوي مشكلة ثانية
مع انك وقتها كنتي بتطالبي بحق من حقوقك
لمن اي احد انتي بتعامليه بالحسنى و يردلك هي بالاساءة
فاعرفي انه انتي السبب
ما بقولك دا كله عشان تقلي ادبك عالناس
او تردي على اهل زوجك و تشدي بشعرهم و هم يشدوا في شعرك
او تتطاولي على زوجك لحد ما توصل لقلة الاحترام و من بعدها للطلاق
او عاملي الاساءة بالاساءة و انتقمي لنفسك
لا ....
انا بقولك قوي شخصيتك خلي للناس حدود في حياتك و مين ما كانوا دول الناس
يعني اللي تتضايق من اهل زوجها بشي تكلم زوجها مرة اثنين ثلاثة
كان عديم الفايدة و ما سوالها و لا شي و المشكلة زي ما هي
ترد عليهم بس بالادب
حتى لو زعلوا او اتكلموا فيكي عادي هما عمال على بطال بيتكلموا
بس في الاخير هيسكتوا عنك لانك وقفتي كل واحد عند حده
الزوج و ما ادراك ما الزوج..!
الرجال بصفة عامة يحبو المراة قوية الشخصية اللي تطالب بحقوقها و بكل ثقة
حتى لو قالك لا انا ما احب كدا ما احب تكون قوية
فمع احترامي له كداب
لانك لو اتكلمتي بكل ثقة و طلبتي اللي تبغيه هيعملك الف حساب
حتى لو زعل و قفلت معاه
طنشيه ايوة طنشيه
اغلب الرجال علاجهم الطناش
هيتعب من طناشك و يمل
انتي كمان خليكي ذكية و افهمي تفكيره
هو لمن هيزعل عارف انك هتجري وراه عشان تعرفي سبب زعله
و هو وقتها هيتمادى بالزعل و يثقل >> مع نفسه
انتي نفسيتك هتتعب ما اقولك لا
بس طنشيه هو لمن هيشوفك مو مهتمة و انك ما سويتي شي
هيجيكي و يحاول يراضيكي و يتكلم معاكي
وقتها فهميه كل شي بالادب و اتفاهمي معاه
" طبعا دا علاج اغلب الرجال و في نوع ثاني الله يعين حريمهم على ما ابتلاهم"
باختصار اي احد اتجاوز حدوده معاك و مين ما كان
حطي حد و بالادب
ام زوجك على عيني و راسي بس حدودها بيتها و ولدها عشان رضاها
غير كدا مالها اي حق انها تتدخل في حياتك او في تربية اولادك
زوجك برضو عالعين و عالراس
بس له حدود في طلباته و في تصرفاته
انتي بنت ناس ما جابك من الشارع او غلط معاك قبل الزواج و جا ستر عليكي
زي ما هو ولد ناس و له حقوقه انتي كمان بنت ناس و لك حقوقك
و اكبر غلط بتعملوه انكم بتتجاوزوا عن كثير من التصرفات و بتتنازلوا عن حقوقكم
و لمن يفوت الفوت ما ينفع الصوت
تفوقوا في الاخير و تطالبوا بحقوقكم و اللي صعبة تصير لانكم عودتوا ازواجكم على كدا
الناس اللي حولكم عاملتوهم بالحسنى و قابلوها بالاساءة
عادي لا يلدغ المؤمن من جحر مرتين
مو تكوني ساذجة يعني حتى مو طيبة مع احترامي هبلة
و ترجعي تكوني معاهم زي اول و عادي ما كانه صار شي
لا اعملي حدود و مو لازم امة محمد تدري عنك
ما تقدري تعيشي من دون ناس
اوك قابليهم اتعاملي معاهم بما يرضي الله
لكن برضو خليكي سطحية
لا ضرر و لا ضرار
انا هقولكم على كم قصة حصلت في مجتمعنا و حصلت لناس كثيير اعرفهم
بس عشان تفهموا الموضوع كويس و توصلكم فكرتي بالطريقة اللي انا ابغاها يعني لا تشهير و لا شي
وحدة من قريباتي زوجها ما شاء الله تبارك الرحمن طيب لابعد حد
بس المشكلة فين؟؟ في اهله
هي عندها اطفال مقويين بنتها الكبيرة عليها
يعني الجدة و العمة بيقولولها لو مامتك ضربتك تعالي قوليلنا و احنا نوريكي فيها
دا كلام عقال ؟؟؟؟
بس برضو انا اقول هي الغلطانة لانها سمحتلهم و اعطتهم الفرصة للشي دا
و للاسف ما فاقت الا بعد فوات الاوان
الثانية زوجها مع كل الناس جدا محترم و افظع منه مافي
اتنازلت عن حقوقها تحت مقولة اصبر و مصيره هيتغير
بس للاسف ما اتغير لانه الحكاية وصلت لحد الاهانة منه و من امه
انسان ما بيصلي و لمن تقوله صلي يقولها الصلاة الوحيدة اللي هصليها صلاة جنازتك
سكتت و ما اتكلمت
ضرب اهانات يجيها اخر الليل ماجر عقله و انتو فاهمين قصدي كويس
شك يقوي اولادها عليها لدرجة ولدها يقول لابوه ماما قليلة ادب ما تستحي
ما غيرك انت و ابوك قليلين ادب دي امك اللي شالتك ببطنها و ربتك و سهرت عليك و لا ابوك مو داري عن هوى دارك
امه تبغاها تكون عندها زي الخدامة يمكن الخدامة افضل
لمن تخرج مع زوجها توقفلهم عالدرج فين رايحين و من فين جايين
برضو سكتت و لا فتحت فمها
و جات بعد عشرة 12 سنة طالبة الطلاق و في حلقها 4 اطفال
طبعا في البداية هددها باولادها ما راح تشوفهم و هي انهارت
بس لمن قوت نفسها رمالها الاولاد و راح
هذه مجرد نموذجين لالاف النماذج اللي بتحصل يوميا
ارجع و اقول انا ما بقويكم على ازواجكم و لا على اهلهم
انا بقوي شخصيتك في مطالبتك لحقوقك
عشان كفايانا نشوف قسم الحياة الزوجية شكاوي و 90% الغلط عليكم انتو
لانكم سويتوا زي النعام دفنتوا رؤوسكم تحت التراب عشان لا تشوفوا و لا تسمعوا اي شي
و ماخدين اسهل الطرق اللي هو الاستسلام
معليه لو هتستسلمي مع احترامي لك روحي موتي احسن لك
الحياة حلوة لمن تدافعي عن حقوقك و عن كل شي يخصك
لمن تكوني زي البسة " القطة " هادية و ناعمة من بعيد بس لمن احد يدوسلها على طرف تهجم و تدافع لانها عارفة انه البادي اظلم
اتمنى انكم تحطوا كلامي دا حلقة في اذانكم
و صدقوني دا في مصلحتكم انا ما راح استفيد و لا شي
انا مجرد ناصحة لكم لوجه الله
لاني زي ما قلت حسيت اغلب المشاكل بسبب الشي دا الضعف و قلة الحيلة
اعملي لنفسك قيمة و احترام و قدر عشان الناس تقدرك و تحترمك
اما لا ترتجي منم يحترموك و يقدروك و انتي اللي ما عملتي لنفسك اي قيمة
سوري طولت عليكم و قرقرت من صباح الله خير
دعواتكم لي
و اخر دعوانا ان الحمد لله رب العالمين
و سبحانك اللهم و بحمدك اشهد ان لا اله الا انت استغفرك اللهم و اتوب اليك
اختكم روح فيصل ...