انتفض قلبي بغزال منصووري

تسلمين حبيبتي عالقصة
ها القصة روعه انا قاريتها من زمان في منتدى ثاني
أنصح كل الفراشات انهم يقرونها جنان

واو روعه والله حلووه ..
مشكوره خيتوو هنادي على القصه ..

يسلموا............. فيض المشاعر /moon
وين باقي الفراشات لهدرجة القصة مو حلوة
تحياتي هنادي

هنودي حبيبتي يعطيك العافيه انا للان ما قرأت القصه بنتظر نهايتها لما تكمليها بقرأها لاني مليت من كثر ما ننتظر الفراشات ونترجاهم عشان كده خلصيها انت وما عليك اكيد كلنا بنقرأها يالله شدي حيلك يا بطه

الله يعطيكي العافية اختي هنادي بس وينك؟ليه ماكملتيها لهلأ؟؟؟؟؟؟؟؟؟؟؟؟

قصه روعة
قد قريتها قبل كذاا
تسلمين والله

"انتفض قلبي بغزال منصووري "
الجزء الثاني
بس له هيبه في كل مكان ممكن يروحه ... هو مب صغير في السن .. عمره 27 .. و لا عرس لسبب يجهله الكل ... مغازلجي درجه اولى ... عمره ما رقم بنت .. كانن البنات هن الي يتصلن به ... بس عمره ما عشم وحده بشي .. بالعكس كان يقولهن ان هو مب راعي عرس .. بس هالشي ما كان يرضي البنات و خاصتن ان له اسلوب يذوب البنات ... كل وحده كلمته و الا عرفته كانت تتمنى انها تظويه .... بس ما في بنت قدرت انها تغير رايه في العرس ... من بعد موقف روضه منه .. تمت هالمنصوريه في خاطر مبارك .. يريد يعرف عنها كل شي .. من بنته ؟؟.. شو اسمها ؟؟.. ريم ؟؟..معقوله يكون اسمها ريم ؟؟.. بصراحه هي اكثر من الريم في حلاته ... و تمر الايام و خيال هالمنصوريه ما فارج اعيون مبارك .. كل ما خرت عينه يتخيل جسمها و هي تمشي في السكه ... و الين اللحين يسمع منطوقها و هي تقول مرحبا الساع ... اه من غزال منصوري غزاني ...كان هذا حال مبارك ... و روضه ما فكرة فيه و لا طرى عبالها مره .. بس في يوم تمت اتفكر فيه .. شو كانت ردت فعله بعد ما قرى الورقه ؟؟.. كان هذا همها الوحيد ما طرالها اسمه و لا جبيلته و لا أي شي عنه .. لانها مب من النوع الي يفكر في الشباب .. كان كل همها يداتها و خوانها و والديها قبل الكل مع ان روضه صغيره في السن توها مكمله العشرين ... و هي البنت الوحيده الي في البيت .. عندها خاوات ثنتين بس كلهن معرسات .. اخوها البجر محمد معرس بشما بنت عمه و هو الوحيد من خوانها الي معرس .. و باجي خوانها 4 ما لهم دخل بالعرس و لا بطاريه ...
بعد العرس باسبوع ..
في بيت هل مبارك ... عند الريووق ..
ام مبارك : امس رمست امي ... ترد السلالام عليكم ..
امنه : فديت يدوه ... من شهر ما شفتها شحالها ؟؟..
ام مبارك : الركب ملعوزتنها ...
عوشه: امايه خلينا نرووح الهم باجر .. باجر الاربعا بنيلس عند خالوه الين اليمعه و الله تولهنا عليهم ..
ام مبارك : هيه و الله صدق ... و الله فاطمه يلست تلومني يوم شافتني في العرس .. زعلانه علينا ..
امنه : فديتج امايه خلينا نرووح ... فديتج العيووز ..
ام مبارك : خلالاص انشالله بنرووح باجر العصر صوبهم ..
مبارك : خلاص انا بوديكن ..
الكل ألتفت صوب مبارك و هن مستغربات ...
عوشه : انت ؟؟؟..
مبارك : هيه .. و الا عندج مانع ؟؟..
عوشه : لا ما عندي مانع ... بس ما احيدك تحب ترووح الوثبه ... عقولتك مجلع ...
امنه : يمكن الريال غير رايه في هل الوثبه ؟؟..
مبارك : هيه غيرت راي و صرت اموت عهل الوثبه ..
عوشه : من متى ؟؟؟..
مبارك : من غزاني شووق منصوري ...
امنه : شو ...
مبارك : ههه ... ماشي ..
عوشه : فديتك بروك .. قولي شو سالفة شوق المناصير ؟؟...؟..
مبارك : مالج دخل ...
امنه : و الله يالسالفه فيها بنت ...
مبارك : جب جب ... و ظحك و نش عنهن و هو يظحك : الله يسلمني من ثنائي امي المرح ههه ...
عوشه : العيوز و الله يا ولدج عنده سالفه ...
امنه : بروك ... بروك .. فديتك قولي شو عندك في الوثبه ... فديتك بروك ..
عوشه : طبيه .. انا اعرف ..
ام مبارك : شوو شو ؟؟؟..
امنه : يالله الفضول ذابح العيوز ههه ...
ام مبارك : و الله محد عيزني الا انتن ....
امنه : فديت عيوزي و الله ... و تطرش بوسه حق امها في الهوى ...
ام مبارك : خييليه ما تنرامين ... العاش رمسي شو تعرفين ...
عوشه : اعتقد ان مبارك يبى شمامي بنت خالوه فاطمه ..
امنه : هيه صدق هو من شافها يوم كانت عندنا و هو يتخبر عنها ..
ام مبارك : الله يبشركن بالخير عسى ... امبونها فاطمه زعلت يوم ان محمد خذ الريم بنت عمه علي ..
امنه : بس عليه هو ان ظواها شمامي ..
عوشه : الا بس عليها هي ان ظوت مبارك ...
ام مبارك : بروح اتصل بفاطمه اقولها اننا بنعطنهم باجر ...
راحت ام مبارك عشان تتصل بختها فاطمه ..
امنه : يالله ليت صدق برووك ياخذ شمامي ...
عوشه : ليش عاد ؟؟..
امنه : بقولج شي بس لا تقولين لحد ...
عوشه : شو شو ما بقول شو ؟؟..
امنه : ام ... تعرفين سعيد ولد خالوه فاطمه ..
عوشه : هيه شو بلاه سعود ؟؟.
امنه: سعود في عينج .. شو اصغر عيالج هو عشان تقولين سعود ؟؟..
عوشه : يالله يالغيض ..
امنه : انا الغلطانه اني ارمسج .... و قامت امنه بترووح عن عوشه ...
عوشه و هي تمط امنه من كندورتها : و الله ما تروحين تعالي ..
امنه : لا ما بيلس .. فجيني .. ايه فجي كندورتي ..
عوشه : ايه حلفت ... ردي ..
امنه : لا عاد من طوعج .. حلفت .. حلفي من اليوم الين باجر و لا حفلتج و الله ..
و طلعت امنه عن عوشه و خلتها برووحها في الصاله ..
عوشه : حرام عليج امون .. ما ارووم اصوم ثلاث تيام .. دخيلج ..... مره ما عطتني ويه .. عنلاتها ..
طلع مبارك عن هله رايح صوب الشغل .. كان يشتغل في دايرة الاشغال في العين .... اف و اخيرا لقيت سبب يخليني ارووح الوثبه ... اه يا ذا القلب وش اعلومك ..؟؟...
كان مبارك يفكر في الريم ... (كان يعتقد ان روضه اسمها الريم (..
و سمع ....
هام قلبي في هواكم و انجبر ... صدقوني جيف اسلا ما يصير
يا حبيبي من نصابي في خطر .. و ارحم الي صار في حبك اسير ..
ااه يا ميحد يت عالعووق ...
تم مبارك يفكر في الريم .. و لا هب مهتم بالعرب الي عنده في المكتب ... يالله ليتني مخاوي حد من هل الوثبه ... جان طفيت نار يوفي من هالبلا الي بلتني به هالمنصوريه ...
عوض : اقول مبارك ... هاي الورقه وين يوقعونها ؟؟..... مبارك ... و يحرك عوض الورقه جدام ويه مبارك عشان ينتبهله ...
مبارك : حوه شعندك ..؟؟!!!..
عوض : انا شعندي و الا انت ؟؟!!... وين وصلت يالخييلي ..؟؟
مبارك : لا وصلت و لا رحت .. انت شفخاطرك .. حشى عميتني ..
عوض: اه فديت عيونك و الله .... مبارك جن خواتك شراتك ... يوزني وحده منهن ..
مبارك : شو !!!... حشى ما طرالي ابلي خاواتي بشامسي .. لا و الله
عوض : يالله عليك عاد بلاه الشامسي مب عايبنك ؟؟!!!...
مبارك : لا مب عايبني ..
عوض : و الله ؟؟!!.. المهم هذي الورقه عندك ؟؟ و عطى مبارك الورقه ..
مبارك : ام .. لا عند علي الظاهري .. الدور الثاني ..
عوض : تمام عيل ..
مبارك يقول لعوض و هو طالع من مكتب مبارك : الشامسي ..
عوض : عونك ...
مبارك : ياخي احبك ..
عوض : ههه ... اكرهك ...
مبارك : ههه عنلاتك يالخام ...ههه
في الوثبه في بيت خالتهم فاطمه ...
ام شما : شمامي ... ترى خالتج سلامه بتعطن باكر هي و بناتها ..
شما : و الله ؟؟؟ .. فديتهن من متى اعديبهن ..
ام شما : اوه حتى مبارك بيعطن عندهن ....
شما : و الله !!!!.... مبارك بايي ؟؟..
ام شما : هيه عقولت سلامه تقول مبارك بايبهن ..
شما : اها ... انا قلت .. واقع الا بينزلهن و بيرد رماح ...
ام شما : لا لا .. قالت بيتمون الين اليمعه .. و مبارك بيتم فياهن ...
شما : ام ... غريبه ..
بعد ما قالت ام شمامي لشمامي ان قوم خالتها بيونهم باجر ... ربعت شمامي و اتصلت بامنه بنت خالتها سلالامه ..
شما : الو .. السلام عليكم ..
راشد : و عليكم السلالام و الرحمه ..
شما : شحالكو.؟؟
راشد : بخير و نعمه الشيخه ..
شما : منو الريال ؟؟؟
راشد : شو ؟؟؟ ... انتي منوه تبين ؟؟..
شما : حشى عافانا الله .. شو اشحت منك انا ...
راشد : اف ... الشيخه منوه تبين ؟
شما : اريد اموني .... و بعدين لا تتأفف ..
راشد : انشالله .. لحظه ..
راشد : امونه ... امنيه ..
امنه : اوه شو هذا الواحد ما يعرف يرتاح في هالبيت ؟؟..
راشد : شعندج تتحرطمين ؟؟..
امنه : كيفي مواطنه .. كيفي يعني .... شو تبا .؟؟
راشد : وحده تباج في التيلفون ...
امنه: يالزفت و ليش ما قلت ... و ترووح امنه صوب التيلفون ..
امنه : الو
شما : بابا فين ..
امنه : بابا هينه هن هو .. أأوله من بيكلمو ..
شما : ههه ... فقتج ..
راشد : هيه يوم التلفون خاز عنج التعب .. و لو انا طلبتج بشي جان صميتيني عويهي ..
شما : الا بتخبر هالملقووف منوه ؟؟؟... عبيد ؟؟
اامنه : لا فديت عبودي و الله ... هذا بوثنيده ..
شما : ههه ... انا قلت هالغلاسه ما تكون الا في راشد ..
راشد : بو ثنيده ؟؟؟... الله لا بليتنا باليهال ..
شما : ههه .. فديتج سلمي عليه ..
امنه : رشود .. يسلمون عليك ..
راشد : الله يسلمهم من الشر ..
شما : عاد هو تراها ما عرفني منو انا ...
اامنه : و الله ؟؟... راشد معقوله ما عرفت شمامي بنت خالوه فاطمه ...
فز قلب راشد من سمع طاري شما بنت خالته ...
راشد و هو يكابر : لا عرفتها و لا اريد اعرفها .. و عن الحشره خليني اقرى الجريده ..
حزت فخاطر شما رمست راشد ... شما ما تحب راشد .. الا تموت عالتراب الي يدوسه .. كانت تحبه من هم يهال .. بس راشد عمره ما عطاها ويه ...و هي لها عزة نفس و ما تحق نفسها انها تعرض نفسها على واحد .. حتى لو كان هالواحد الانسان الي تحبه .. تأكدت شمامي ان قوم خالتها بيونهم و ان مبارك بييلس عندهم ..
شما : من وين ظاهره الشمس .. ما احيد برووك يطيق الوثبه و الا طاريها ..
امنه : ههه ... لا شكله الريال غارج ..
شما : غارج ؟؟!!!!...
امنه : ههه ... عقولته غزاني شوق منصوري ..
شما : شو يعني ؟؟؟!!.!!..
امنه : عنلاتج يالسباله .. شو يعني بعد ؟؟!!... الريال ذابحتنه وحده منصوريه نعرفها ..
شما : منوه ؟؟!!!... اعرفها ؟؟؟.
امنه : اوه ... عنلاتج .. انتي ..
شما و هي منصدمه : انا ؟؟؟!!!!.... تجذبين ؟؟
امنه : لا و الله ... حتى سألي العاش ..
شما : اووه .. امون امون .. برووح حق يدوه باي باي ..
امنه : سلمي عليها وايد فديتها ..
شما : اوكي باي ...
سكرت شمامي عن امنه ... يالله من وين ظهرلي هذا بعد ... اف .. قاصرني الا بروك الخقاق ... يالله يا رب ترأف بحالي ... بصيح ...
اتصلت شمامي بأعز رفيجاتها ... روضه ...
شما : الو ..
ام روضه : مرحبا ..
شما : مرحبا الساع ... شحالج خالوه ؟؟..
ام روضه : بخير يعني ايفدا ذا الصوت ... شحال فاطمه ؟؟..
شما : امايه بخير يسرج حالها ...
ام روضه : في البيت هي ؟؟؟...
شما : لا فديت رووحج سرحت صوب حلالها ... ههه و يدوه فطرفها اوين بخاوي بنتي ..
ام روضه : ههه يا ويلكن من العيووز ...
شما : ههه فديتها عيوزنا و الله ...
ام روضه : هاه بنتي تبين ختج ؟؟..
شما : هي .. بس لا تكون راقده عاد ؟؟..
ام روضه : لا فديتها وين راقده .. ناشه من الفير تعابل الفواله ... صبري بطالعها لج ..
شما : انشالله ..
روضه : وايه مرحبا ملاين و لا يسدن في ذمتيه ..
شما : ملاين بس ؟؟.. هذا قدري عندج ؟؟..
روضه : ههه ..و شحالكوو ؟؟..
شما : هب بخير ...
روضه : افا ليش عاد ؟؟؟..
قالت شمامي حق روضه ان بنات خالتها سلامه بيونهم و طبعا روضه من قبل كانت تعرف عن حب شما لراشد ..
روضه : فديتج و الله ... يعني اللحين مبارك بيخطبج ؟؟
شما : ااه شكله جذيه ..
روضه : شما دام ان مبارك حطج في باله .. اكيد انه رمس عند هله .. و يوم ان راشد ما رمس معناتها الريال مب حافلنج و لا امتحن منج ..
شما : حراام عليج روضوه ... بدال ما ترفعين معنوياتي تهدمينهن ؟؟؟..
روضه : شما الي باعنا بعناه و الي شرانا بعيونا حطيناه ... طبي عنج راشد .. شكله الريال مره مب مهتم منج .. و انتي الين متى بترقبينه .. ؟؟..
شما : اه ياروضه .. انتي ترمسين لانج ما جربتي الحب .. و الا جان ما قلتي هالرمسه ..
روضه : بعده ما يابته امه الي يظوي راسي ... الشباب ؟؟.. و لا حفلتهم ..
شما : ليتني مثلج ..
روضه : ههه .. لا انا حر ٍ مالي مثيل .. لا يصيدني صياد .. و لا لي بديل ..
شما : يا ويل حالي انا .... اه من هالدنيا ..روضوه شرايج باكر تينا .. دام ان بنات خالوه بيّنا .. يالله عشان اعرفج عليهن ..
روضه : تدريبي اني اموت عالحواطه .. خلالالاص ... بس هن متى بيّنكن باكر ؟؟؟..
شما : واقع الا العصير .. دام ان مبارك بيبهن .. لان عليه دوام ..
روضه : ما قدر ريته هذا مبارك ؟؟؟.... هب هو لي ريته عندكم في العيد ؟؟؟..
شما : لا هذاك محمد ... فديته بوجاسم ... هذا الي ما فيه خقت بل الخيل .. معرس ماخذ بنت عمه ..
روضه : اها .. اوه .. برووح ارقب يدووه .. احيدها عند درس الهوش في السكه ..
شما : خلاص باكر بنتشاوف عخير انشالله ...
روضه : انشالله ...
سكرت روضه عن شمامي و ظهرت من بيتهم راحت السكه و لقت يدتها و عندها الخدامه و الدريول ... واقفين عند درس الهوش .... و يدتها يالسه و تتحرطم عليهم ..
روضه : يدوه .. شعندج ؟؟؟..
يدت روضه : لالالالا ... هالبيداره ما تبات في الدار ... سفرووها ..
روضه : ليش يدوه شو سوت ..؟؟؟؟
يدت روضه : حماره تراددني في الرمسه ... لالالالا ما تبات ... ان باتت انا ودوني عزبتيه ببات هناك ..
روضه و هي معصبه من الخدامه : ألس .. شو سويتي حق يدوه ؟؟..
ألس : ما في ثي و الله ... بث هادي يده يليد انا سيل هادا باء ... انا ما يقدل سيل انا كووف و الله ..
روضه : يدوه شعندج عالخدامه ... شو تبينها تشل ؟؟؟.
يدت روضه : شل الله راسها مسودت الويه ... ماشي اباها تشل وحده من ذي الذبايح ... الا هي مستقويه ... امج كله من امج .. هي الي امبطرتنها ..
روضه : يالله و رزاق ليش ما يشلها دام انه هنيه ....
يدت روضه : لالالا .. حليله رزاق ما يرووم .... هي هي بتشلها دامها عحشمه ..
روضه : يالله الريال ما يرووم و هالمسيكينه ترووم ...؟؟..
يدت روضه : شو ؟؟ ما سمعج ما سمعج .... وه روضه لحقي امج تزقرج ..
روضه : و الله ؟؟!!!!....و ألتفتت روضه صوب باب بيتهم الي يفتح عالسكه بس ما شافت حد لا امها و لا غيرها ...
روضه : محد ..
يدت روضه : لالالالالا .. انا سمعتها ..
روضه : و الله ؟؟.. من ساعه انا اكلمج و انا لاصقه فيج و لا سمعتيني .. و سمعتي امي الي ما ادري من وين ظويتي صوتها ..
يدت روضه : شوه اه ؟؟..
روضه : سلالالامت قلبج يدووه ماشي ... برايج عند بياديرج انا بحدر عنج داخل ... راحت رووضه صوب البيت ..
ألس : ماما لوده ما يليد ... بلييز ماماه كم باك ..
يدت روضه : بليس يركبج عسى ... حوه ردي ... روضه .. حديها حديها ...ربعت .. عنلاتها .. و تقول جب بعد .. سلامتج ما بتباتين في البيت .. الرقعه .. ادلينها الرقعه ؟؟؟.. رزاق غربلاتك حدها ..
يوم الاربعا .. الظهر فرماح فبيت هل مبارك ...
مبارك : الله لا بليتنا بالحرمات .... يا بويه انقفظن ... حشى و الله كرهت عمري منكن ..
عوشه : اووه حرام عليك بروك .. بعدين احنا قلنا العصير بنرووح صوبهم ...
مبارك : جب جب يله يله ... و يرووح مبارك صوب امنه خته في حجرتها ..
مبارك : حراام عليج امنه .. حتى انتي ما خلصتي ؟؟..
امنه : انا اصلا ما سويت شي ...
مبارك : بعد ؟؟؟
يلس مبارك يطلع من حجره لحجره ذبحهم حتى نوره خته الصغيره ما سلمت منه ..
مبارك : ايه و انتي نوير خلصتي و الا بعدج ؟؟؟..
نوره : شو ؟؟.. لا انا مالي دخل ...
مبارك : يله عيل السياره ..و يدخ مبارك على امه ..
مبارك : يوم العيوز بعدها ما فججت راسها وين البنات بيخلصن ؟؟؟.
ام مبارك : يالله يا مبارك كلتلي فوادي ... يابوه استريح ..
مبارك : الله لا تبلانا بالحرمات ...
ام مبارك : اف ... بروك ظهر ظهر اقولك ... و في النهايه الكل قفل على عمره في حجرته و تم مبارك يتلفت على عمره في الصاله ... حتى نوره خته راحت المطبخ عشان تفتك من حشرته ... و عالساعه 4 العصر قدر مبارك انه يسحب خاواته من حجرهن عشان يروحون الوثبه ...
في هالوقت في الوثبه ...
روضه و امها و خوانها و يدتها يالسين في الصاله ..
روضه : امايه برووح صوب شما بنت سيف بعد شوي ..
ام روضه : هيه و انا اقوول هالفواله الي تعابليناها من الصبح عشان شوو ..
شما حرمت محمد خوها : حد بيخاويج صوبهن ؟؟.
روضه : لا ما ظني .. بتظوي خالتها سلامه و البنات .. و عاد بنسير صوبهم ..
سلطان : هاي الي ما خذنها الخييلي الي من رماح .. و الا الي ما خذنها الجتبي ؟؟؟
روضه : لالالا .. الي ما خذنها الخييلي ..
شما : و منوه بيوديج صوبهن ... ؟؟
روضه : يمعه مودي بويه صوب العزبه .. اظني الا رزاق بيوديني ..
يدت روضه : منوه ؟؟؟ ... لالالا .. رزاق تعبان ما يروم ...
ام روضه : و شو متعبنه بعد ؟؟؟.
يدت روضه : ترى بيدارتج البطرانه ما طاعت تحدر الدرس و تمسك الذبيحه عنلاتها عثرت رزاق قيّل الا في الدرس و رى الهوش ...
ام روضه : يالله يا عمتيه ... و انتي تبين الخدامه هي الي تمسك الذبيه و الدريول يطالع ..
يدت روضه : لالالالا .. سلامتكن هالخدامه ماشي تتكنسل ويزتها ... يعلها فدى عن ذيج السودى ربيعة شما ... لا تبات و لا تقيل .. هي تمام .. الا ربيعتكن .. غسلن يدكن منها ..
شما : يدوه ان بغيتيها شاطره تراها مره واصله ...
روضه : يالله يا امايه متى بتخلص فلتنا .. ؟؟.. شو هذا الكل ارتفع فووق الي احنا بعدنا ..
ام روضه : عاد المهندس يتلغون شو اسويبه ...
العصر عالساعه 6 الا شوي ... توهم واصلين الوثبه مبارك و هله ... روضه ما لقت حد يوديها لان يدتها ما خلت رزاق يوديها فأطرت انها تتريا يمعه الدريول و بوها عشان يوديها ... اول ما وصلوو قوم مبارك .. حدروو بيت خالتهم ... بعدين ظهر مبارك و سالم ولد خالته عشان ينزلوون الشنط و القشار الي في السياره ... في هالوقت كانت روضه في حووش فلة قوم شمامي ...
روضه : يمعه .. تعال الله يخليك شل مع ألس .. حليلها ما ترووم تشل كل هذا برووحها ...
اول ما شاف مبارك روضه جدامه عرفها .... ما قدر انه يتحرك و لا خطوه وحده ... كنت اتمنى اني اشوفها ... بس اني اشوفها اول ما اوصل الوثبه ؟؟؟.. ما كنت اتمنى اكثر من جذيه ... اه من طيف خل ٍ غزاني ... جن روضه كانت حاسه ان حد طلع من الفله ... فأفترت صوبهم .... روضه ما عرفت مبارك لانها اصلا ما شافته لانه كان ظلمي و فليل ... بس هو اول ما شافها عرفها .... اول ما طاحت عين روضه عمبارك فز قلبها بالقو ... حشى مب رحامه فيه هالريال ... تم قلبها يدق شرات الطبول .... يالله شو بلاني ...؟؟. .. مب قادره اوقف حتى ... و مبارك ميت ... يالله يالريم ... فديت شوفتج و الله و يت عباله غنية ميحد ( احيتنا بطلعت محياك ..وقف الدجى و اسفر بنا النور ..عقلي و قلبي غرم بهواك و لا بي مها و غيد مالحوور ..غالي و لا حد مول يسواك )........ نسى مبارك ان سالم عنده ..
سالم : اووه .. مبارك .. رووح فتح سيارتك و انا شوي و بيك ... و راح سالم صوب رووضه ...
شافت روضه سالم ياي صوبها ..
روضه : مرحبا الساع ..
سالم : مرحبا ملاين .. و شحالكوو ربكو الا بخير .؟؟..
روضه : بخير و نعمه .. ما نشكي باس .. و من صوبكو..؟؟؟..
سالم : دوم انشالله ... عايشين في ذا الدنيا و الله ..
روضه : هاه .. عربانكم عندكم .. ؟؟؟..
سالم : مره توهم ياين ..
روضه : زين عيل .. بترخص عنك صوب البنات ...
سالم : بتلقينهن في صالة الحرمات ..
مشت روضه عن سالم و هي تشوف نظرات مبارك و هي بتاكلها اكل ... اول ما وصلت روضه عدال مبارك ..
روضه : السلالام عليكم ...
مبارك و هو منصدم : و عليج السلام و الرحمه .. مرحبا ..
انتبهت روضه لسيارة مبارك ... بس ما طرالها مره ان ممكن راعي هالسياره يكون من هل شمامي .. و الا حتى له حد في الوثبه ... دخلت روضه البيت و هي حاسه بنظرات مبارك صوبها ...
سالم : صبر بزقر وحده من الخدامات تشل الشنط ..
مبارك : ما يحتاي .. بنوديهن رووحنا .. مب من كثرهن الا شنطتين و صغار بعد ...
سالم : عهواك و الله ..
مبارك و الفضوول ذابحنه : ام .. الا بتخبرك بو غنيم .. منو هذي الي سلمت عليها ...
ألتفت سالم صوب مبارك ... حس مبارك ان سالم نقمه لانه سأله هالسؤال ..
سالم : وحده من هلنا ..
سكت مبارك و لا قال شي ... الله يعيني عمخوت هالريال .. حشى تخبرته منو هالبنت بغى يذبحني ... اف ... معقوله بيني و بين الريم الا يدار و لا قادر اشوفها .. شوو هذا اف .... في هالوقت دشت روضه عالحرمات في الصاله و سلمت عليهن ..
ام مبارك : الا بتخبرج فاطمه هذي بنت منوه ؟؟؟..
ام شما : ودي .. ما عرفتيها ..؟؟؟!!!... هذي روضه بنت شطيطه حرمت سالم ولد خالتيه عوشه ...
ام مبارك : يعله في ذمتج ؟؟؟!!!.. وايه فديتج الغاليه ... شحالج بنتي ؟؟. و شحال هلج و تواليج ؟؟؟..
روضه : بخير و نعمه .. ما يشكوون باس ..
تمت روضه تسولف عند البنات عطرف في الصاله .. و الحرمات عطرف ... دخل سالم و مبارك البيت .. البنات ما انتبهن ان حد دخل ... و عموما شمامي و خاواتها ما كانن يتغشن من مبارك .. كانن يتحجبن منه بس .. كان امل مبارك انه يشوف روضه و هي عاقه الغشوه .. بس امله خاب لان روضه كانت عاطيه ظهرها للباب .. فما شافها .. و تمت ظاربتنه غصه ... اف انا حادر البيت عأمل اني اشوفها .. شو هالحظ المنحوس ..
سالم : هود .. هود ..
اول ما سمعن البنات صوت ريال يهود تغشن ....
يدت مبارك : شعندكن تقبعتن بالشيل ؟؟..
ام شمامي : هدا ,, هدا ..
قامن البنات اول ما دخل مبارك و سالم ... اعتقد مبارك انهن بيرووح مكان ثاني .. بس تفاجأ انهن رجعن عقب و يلسن بعد ما يلس هو و سالم ... كيف الريم تيلس عند سالم ؟؟؟... كيف سالم تحق نفسه و أيلسنا في نص الحرمات ؟؟.. شوو هالحاله ؟؟.. ما كان مبارك متعود عالاوضاع في الوثبه لانه ما كان اييها مره .. خاواته متعودات عالوضع .. فكانن عاد ..
خاطر مبارك انه ينش عنهم بس ما قدر .. لان بينه و بين الريم شوي .. يسمع صوتها .. يشوف حركاتها .. اه محلات ظحكتها ... و الله تذبح هالانسانه ... وقف قلب روضه من دخل مبارك الصاله ... تحس انها تعرف هالانسان من مية سنه .. و هي متأكده انها ما شافته من قبل .. لان مستحيل في حد يشوف هالرحامه كلها و ينساها .. كان خاطرها تسمعه و هو يسولف .. بس هو كان وايد هادي .. حشى سالم حاشرنا بسوالفه التافهه ..
روضه و هي تمط شمامي من كندورتها و تكلمها بصوت واطي : ايه .. منوه هالمزيون ؟؟..
شما : اف هذا هو مبارك ..
روضه : يعلج السل جنج ما تبينه ..
شما : عساج قبلي ..
روضه : ههه .. شو اظويه و الا السل ؟؟؟..
شما : ههه .. اذا تبينه ظويه ..
روضه : شمامي خلينا نطلع شوي ..
شما : حي وين تبين ..؟؟!!..
روضه : ما ادري .. خلينا نرووح المطبخ ..
شما : اوكي لحظه ..
شما : سمحولي بنروح انا و رويض شوي و بنرجع ...
اول ما سمع مبارك اسم رويض فج عيونه .. منوه رويض هاذي بعد .. ما يحيد حد من بنات خالته اسمها رويض ... معقول الريم اسمها روضه ؟؟!!!!!..
يدت مبارك : وين تبن ..؟؟..
شما : بنرووح شوي المطبخ .. ليش يدووه تبين شي ؟؟..
يدت مبارك : هيه .. خليهم يسولي دلة زعتر ..
شما : انشالله يدووه ..
نشت روضه و شمامي بيرووحن المطبخ .. ما كان مبارك يريد ايشوفهن .. بس ما قدر انه ما يرفع عينه عروضه و يشووفها و هي تمشي .. عذاب هالبنت ... اول ما طلعن من البيت ..
شما : شو بلاج خليتينا انش عن العرب ..؟؟
روضه : ما ادري .. بس ما كنت اريد ايلس ..
شما : و الله ؟؟؟..
روضه : يا ويلي يالنقمه ..

شما : جب جب .. خلينا نرووح نسوي الزعتر حق يدووه ... راحن صوب المطبخ .. في هالوقت حد اتصل بمبارك .. فترخص منهم و طلع برى البيت و تم يمشي في الحووش ..
انتبهت شما ان مبارك طلع من البيت لان المطابخ برى الفله .. و شافته و هو يتكلم في التيلفون ..
شما : حشى بيموت ان ما رمس وحده في يومه هذا ..
روضه و هي ما تعرف عن منوه تتكلم شما : شو ؟؟؟!!!!!!..
شما : تعالي وايجي .. راحت روضه تشووف .. سبحان الله في هاللحظه كان مبارك ميت من الظحك عسالفه يقولها له الي يكلمه عالخط ... حست روضه بشي غريب .. جن في حد قاعد يخونها ...
شما : و تقوليلي يعلج السل ان ما خذتيه ؟؟؟!!.. انا ما اقدر ااخذ واحد شرات مبارك .. ما ادريبه بيظوي و الا لا .. ايلس احاتيه و هو صايعله مع مية وحده ... لا و الله لو شو ما يستوي ما باخذه ..
روضه و هي تحاول ما تشووف مبارك و هو يمشي و يسولف فالتلفون : و الله انتي و هلج تتفاهمون .. و سكتت مب عارفه شو تقول و الا شو تسوي ...
خليفه : و عليه رفجه ان المنصوريه طيحتك ..
مبارك : ههه ... لا طيحتني و لا شي .. خل عنك ..
خليفه : انت خل عنك اللواته ... و الا من متى الحبيب يسير صوب الوثبه و يقضي الويك اند فيها .. الله يرحم ايام البحرين ..
مبارك : لا الغالي يايب الحرمات صوب يدتيه .. .. بس ياخي حياتهم غريبه .. عادي ييلسن عند الرياييل ..
خليفه : برووك معروفات المنصوريات انهن يظهرن و يقربن بالريايل .. البنت تسد البيت دام امها محد ...
مبارك : قل و الله ؟؟؟..
خليفه : و الله ...
خطرة ببال مبارك خطه .. عشان يشووف بها روضه ..
مبارك : الغالي بخليك اللحين ..
خليفه : وين تبا ؟؟.
مبارك : مالك خص ... انت خلك مع هالسودانيه الي الله بلاك بها ..
خليفه : حرام عليك .. لا تذكرني بمقلب حياتي ... ياخي الي قاهرني اني صدق حسيت بشي صوبها ... عنلاتها لو قالت انها سودانيه ما كنت بكلمها شهر و اخسر عمري ...
مبارك و هو ميت من الظحك : ههه ... خاطري اتخيل شكلك يوم واعدتها و اكتشفت انها سودانيه ..
خليفه : هيه تشمت انت ... مب منك .. متعود عبنات الجبايل يدقلك ..
مبارك : ما باهن مره واصلات كلهن من صوبك ههه ..
خليفه : و المنصوريه ؟؟؟..
مبارك : لا عاد هذي مره مالك دخل بها و لا تطري عبالك مره ..
خليفه : ههه .... بنتفاهم اليوم فليل انشالله ..
مبارك : انزين الساعه كم بتكون في الوثبه ؟؟..
خليفه : عقب العشى انشالله ..
مبارك : خلاص غايته ... سكر مبارك عن خليفه ... مسكين مبارك الكل كان ظالمنه .. كانوو يعتقدوون انه يكلم وحده و هو مسكين كان يكلم خليفه ربيعه .. كل شوي كانت روضه توايج من الدريشه تشوف اذا مبارك خلص و ا لا لا ... فجأه ما لقت مبارك ... قالت اكيد الا انه خلص و رجع داخل ...
بعد ما خلصن الزعتر .. ظهرن من المطبخ رايحات صوب الفله .... ما كانن متغشيات ... و تمن يمشن اللين ما دخلن الفله ... و لا وحده منهن انتبهت ان مبارك كان في سيارته ... بس هو انتبه لهن .. و شاف روضه ...... روضه كانت وايد حلوه و الي محلنها ان جسمها شوي مليان ... هي مب متينه .. بس جسمها روعه .. ما تحسين ان فيها لحمه زياده ... الي ذبحه غمازاتها و هي تظحك ... مصغر ثمها ... يا ويل حالي ... اه ... كيف ببات الليله ... تم مبارك في السياره مب رايم ينزل منها ... هو كان يتخيل الريم (روضه) انها حلوه بس ما كان متخيلنها جذيه ... جمالها غير ... ما قد شاف مثله ... هو عرف بنات وايد و ملكات جمال ... حتى في الاحلا من روضه ... بس فحلات روضه شي ثاني ... شي مس فواده ..
جمالها جمال عذري ما مسه انسان .. بدل ما يدخل مبارك الفله ... شغل سيارته و طلع يحووط في الوثبه .... تم يحووط و لا هو بداري بعمره اللين ما سمع صلاة المغرب .. وقف في المسيد و صلى و طلع ... و عقب راح بسيارته صووب العراقيب و يلس يتسمع المسجل .. ( صدفه قلبي غدابه .. ذاك الغر الحسين ... توه باول شبابه .. شروات حور العين ... لو ما تحسب احسابه .. يرمي بسهم العين .... اعياني له جذابه .. زين ٍ و فوق الزين ..) .. روضه .. يالله ليش وايد افكر فيها هالبنت ؟؟.. اف ... الله يعيني انشالله ...اتصلبه خليفه يقوله انه وصل الوثبه .. و تلاقو عند السووق الخضر .. و من عقب ركب خليفه عنده.. كانت الساعه 10:30 فليل .. تموو يحوطون و مبارك ساكت و لا يتكلم ..
خليفه : الخييلي ... بلالالاك مهموم .. رب ما شر ؟؟..
مبارك : الا الشر بعينه يالخوي ...
خليفه : افا و الله ليش ؟؟؟
مبارك : ريت المنصوريه اليوم ..
خليفه : شو ؟؟؟... مسرع .. الا من ساعتين و انت في الوثبه ..
مبارك : لا ريتها و اول ما وصلنا .. تعرف وين ؟؟؟.. فبيت خالتيه ... لا و يلست عندنا في نفس الصاله بعد ..
خليفه : جذبت ؟؟.
مبارك : لا و الله صدق ..
خليفه : انزين .. و بعد ؟؟
مبارك : ما شي طلعت هي و بنت خالتيه و انا ظهرت ارمسك .... بس الي ذابحني اني شفتها و هي مب متغشيه ... اه يالمري .. حرام انها صابتني ... الا ذبحتني .. اه ياقلبي ..
خليفه : و الله شكلها المنصوريه بتظوي راسك ...
مبارك : شو ؟؟؟.. لا خليفه انا صح معجب بها ... بس مستحيل اني ااخذها ... انا اريدها .. بس مب حرمه و ام عيالي ..
خليفه : عيل شو .., .. ؟؟
مبارك : اريدها خليله .. حبيبه ... ام ... أي شي .. بس صدقني عقب لطيفه مستحيل اني افكر بوحده تكون علاقتي بها جديه ... تعرف ايام او شهوور و من عقب في وداعت الرحمن ...
خليفه : ربي يهديك بس ....
في هالوقت كانن قوم شمامي و روضه و خاوات مبارك يتمشن من الفلل صوب الشعبيه و تواعدن مع قوم ميثه و بنات عم روضه و مريم بنت ييرانهم عشان يروحن و يمشن ... و تلاقن البنات و تم عددهن فوق الخمستعشر بنت .. و في الوثبه البنات متعودات يرووحن و يمشن ... خطف مبارك من عدالهن بس هو ما كان يعرفهن ... و راح عنهن ...
مريم و هي تباغم : روضوه ... عرفتيه منوه هذا ..؟؟!!!!..
طبعا خاوات مبارك عرفن انه هذا مبارك و روضه و شمامي بعد ....
روضه و هي منحرجه .. هاذي ليش تسألني عن مبارك : هيه .. و سكتت ..
مريم : شكلج طيحتيه و الله ...
روضه هذي شوو تقول ..
ميثه : حي طيحت منوه بعد ..؟؟؟!!!!..
مريم : راعي الرنج ...
شمامي : و روضه كيف بطيحه ؟؟؟..
مريم : ترى هو نفسه الي تواجعت معاه روضه الاسبووع الي طاف يوم العرس ... ما تذكرن ؟؟؟..!!!..
شمامي : شو ..؟؟!!!..
امنه : حي وين هي شافت مبارك خويه عشان تتواجع معاه ؟؟!!!!!...
و روضه جن مجبوب عليها ماي بارد ... مب عارفه شو تقول و الا شو تسوي ... يعني مبارك هو نفسه الي تواجعت معاه ... يا الفظايح ...
ميثه : و انتي كيف عرفتي انه هو يمكن واحد غير ؟؟..
مريم : لا هو انا متأكده .. لان رقم سيارته ثلاثي .. مستحيل عاد يكون صدفه و الا حد غيره انا متأكده انه هو ...
امنه : شو شو الي مستوي قوللنا حرام عليكن ... مخلياتنا شرات الاطرش في الزفه ...
و طبعا مريم الملقوفه ... قالت كل السالفه ... و روضه مب قادره ترفع راسها من الفشله .. انتبهت شمامي ..
شمامي : يالله يا مريوم دومه لسانج يحجج .. ما تكتمين شي ؟؟..
تمن البنات يسولفن عالسالفه و روضه ميته على عمرها ...
بعد ما رجعن البنات البيت .. ما طاعت روضه انها ترجع عند شمامي بيتهم ... كانت وايد مفتظحه من الموقف الي استوى ... رجعت روضه بيتهم .. و كل فكرها بمبارك .. يالله يالفضيحه .. اللحين لو اموني و العاش قالن له اني انا هي نفسها الي تواجعت معاه ؟؟!!!... يالله .. الله يسامحج يا مريووم .. دوومه لسانها يحجها .. يالله .. لو مبارك قال لسلطان و الا محمد خويه عن السالفه ... يا ويلي ... شو اسوي اللحين ؟؟!!!.. تمت روضه تهوويس بهالسالفه .. هي تفكر في مبارك و شو ممكن يسوي ان عرف انها هي نفسها البنت الي تواجع معاها ... و مبارك يفكر في روضه و في حلاتها ... كل ٍ يغني على ليلالاه ... بالباجر الصبح دخلت يدت مبارك عليه و عسالم و وعتهم الساعه 5 الصبح ... مبارك مب متعود ان حد يوعيه الفير ..
يدت مبارك : حشى مب رقاد ... نشو نشو ...
سالم : يدوه شعندج ..؟؟؟..
يدت مبارك : نش ابااك تسرحني صوب عزبتيه .. مستهمه عحلالي ما اعرف شو الحال عليه من يومين ما سيرت صوبهن ....
سالم : حرام عليج يدووه .. امس الصبح انتي سارحه صوب عزبتج .. شو هو الطرووق كل يووم ؟؟..
يدت مبارك : عن التحرطيمات نش اقولك نش .. لا و الله ارقعك بهالعيره عراسك مسود الويه .. بسك من الرقاد القايله اللحين ..
سالم : يدوه مبارك بيسرحج ..
مبارك : شو ؟؟؟!!!... اسرح منوه ؟؟ لا بويه انا ظيف عندكم لا اسرح و الا اعطن ...
سالم : ليش هي مب يدتك انت بعد ؟؟!!.. يله حس بمعاناتي لو يوم واحد ...
مبارك : بو غنيم .. نش ود عيوزك ..
يدت مبارك : بروك ... نش نش ..
مبارك : يدوه ..
يدت مبارك و هي تقطع رمسته : دامك عحشمه نش ...
مبارك : انا شالله بلاني بييت الوثبه حشى ...
سالم : ههه ...
مبارك : ظرس ..
سالم : يظرسك قبلي ههه
مبارك و هو ناش دهمان : خلني ارد بس و بتعرف شغل الله عدل ...
سالم : بروك ...
مبارك : شو ..
سالم : سلم عالهوش ...
مبارك : عنلالات صداك ...
يدت مبارك و هي تسحب مبارك من فانيلته : فديتك انا يدتك واجب عليك تنفعني ..
مبارك : انزين يدووه .. بس خليني اغسل ويهي اول ..
يدت مبارك : انقفظ هبابنا ما عندنا وقت ..
مبارك : توها خمس و نص ...
طلعت يدت مبارك من الحجره ... دخل مبارك الحمام و تسبح و تلبس و طلع عند يدته و كانت الساعه 6 و شوي .. لقى امه و خالته و ريل خالته كلهم واعين و يتريقون .... سلم مبارك عليهم و يلس يتريق ..
يدت مبارك : بروك نش نش بسك ورانا مسراح ...
ام مبارك : يالله يا امايه .. خليه يكمل كوب الحليب .. لاحجه عحلالالج ..
يدت مبارك : لا بعدني بخطف ع عوشه ختيه .. و مناك بخطف عزبتيه ...
مبارك يقول في خاطره ... لا حول بعدني بستحمل لمت العيايز ... الله ينطب الوثبه و الي ايي الوثبه .. راح مبارك بيدته صوب ختها عوشه ... ما انتبه مبارك ان بيت يدته عوشه هو نفسه بيت روضه .. لانه قد شاف بيتهم بس من ورى من السكه .. و وايد بيووت هناك .. و لا طراله انه بيرووح بيت روضه ... وقف مبارك جدام بيت روضه و نزل يدته و نزل معاها ... دخلو البيت و شافو ان حد يالس في الصاله .. كانت يدته عوشه و معاها وحده .. هالبنت كانت عاطيه ظهرها للباب ... يدتهم عوشه يوم شافت ختها يايه صوبها يلست ترحبها ..
يدت روضه : مرحبا الساع مرحبا الساع ... قربي ..
يدت مبارك : السلام عليكم ..
افترت روضه يوم سمعت التراحيب تريد تشوف يدتها بمنوه ترحب ... اول ما افترت شافت مبارك و هو يقود يدته .. هي شافت مبارك بس هو ما شافها لانه كان موخي تحت يشووف يدته و هي تركب الدري .. تغشت روضه و نشت صوب يدت مبارك تسلم عليها ..
روضه : مرحبا الساع .. فديتج يدووه شوي شوي ...
اول ما سمع مبارك صوت روضه عرفها فرفع عينه عليها و هي تظهر من الصاله تسير صوب يدته .. وصلت روضه عندهم و مسكت يدت مبارك من ايدها الثانيه .. و قادتها الين ما وصلن الصاله و مبارك يتحرقص .. اف شو هالصبااح و الله ... دخل مبارك الصاله عقب روضه و يدته و راح صوب يدت روضه و وايها و حبها عراسها ..
يدت روضه : من ولده هذا ؟؟؟...
يدت مبارك : هذا بروك ولد سلامه بنتي ..
يدت روضه : انا قلت رحامته مب من عيال فاطمه ..
مبارك : وين بروك الله يهديج .. ريال بلحيتيه و تسميني بروك ؟؟..
يدت مبارك : شو ؟؟؟!!.. الا انت برووك ...
مبارك : ههه عهواج يدوه ...
روضه : ههه ... فديتها يدووه تبى تصغرك ..
مبارك و قلبه يدق : ههه امبوني صغير ... ما تعديت العشرين بعدني ...
روضه : ههه و انا ما تعديت العشر بعدني
مبارك : ههه ...
يلست يدت مبارك عند ختها يدت روضه و يسولفن و يتقهوين ... نشت روضه و صبت حق مبارك حليب ..
مبارك : تسلمين الغاليه ..
روضه و هي مستحيه : ربي يسلمك ..
يدت روضه : ودي .. رويض شعندج متقبعه بالشيله ... ما تقولين غير ساحره بتطير ...
نقع مبارك من الظحك و بغى يغص بالحليب يوم سمع تعليق يدت روضه ...
روضه : حراام عليج يدوه ...
يدت مبارك : عووشه خاويني صوب العزبه بتقصرين الدوب عليه هناك ...
يدت روضه : امبوني بخاويج .. حتى روضه امبونها بتخاوينا ...
مبارك فرحان .... و روضه مرتبشه .. ما كانت تدري ان مبارك هو الي بيسرحهم العزبه ..
روضه : لا خلالاص يدوه ... انا كنت اتحسب الدريول هو بيوديكن ... خلاص
مبارك : لا ارجوج ما فيني استحملهن برووحي ... انا وحده و يالله يالله امشي عمري معاها ...
روضه : ههه ... شو تقصد ؟؟!!..
مبارك : لالالالالالا .. ما اقصد شي سلامتج ههه
و في النهايه سرحو العزبه العيايز و روضه و مبارك ... ركبت روضه و يدتها ورى .. و يدت مبارك جدام ..
و في الدرب شغل مبارك المسجل ..
يدت مبارك : بروك .. شو هذا ما عندك شي عدل ؟؟!!.. عنبوه حاطلنا هذا العله .. ما تقول غير عنز تطرب ..
مبارك : ههه ... انزين شو تبيني احطلج ..؟؟
يدت روضه : .. عليك بميحد ..
مبارك : ههه .. هب هينات العيايز ... انشالله يدوه ...
و حط مبارك مقاطع لميحد حمد ..( احبك يا نظر عيني غناتي .. و احب الارض لي تمشي عليها .. و احبك حتى اكثر من حياتي ... و اسوم الروح لجلك و اشتريها ..)... يلست يدت مبارك و يدت روضه يسولفن الين ما وصلو العزب .. طول الطريج و روضه ميته عشكل مبارك ... اول مره تشووفه و هو طاوي السفره .. كان لابس كندووره لا هي بيضى و لا هي بنيه .. كان شكله يذبح ... مره كان مبارك يكلم يدته و مفتر صوبها ... شافت روضه شعره تحت السفره .. يالله .. تمت ماسكه عمرها ... كانت تحس ان اديها بتخونها ... خاطرها تلمس شعره ... يا ويلي .. اف ... انا ليش ركبت وراه ؟؟!!.. عسى هالوقت يمظي عخير .. و اول ما وصلو العزب نزلت روضه بسرعه .. و من عقب التهت مع يداتها .. و لا انتبهت لمبارك .. في العزبه كانت هناك غافه متعودات يداتها ييلسن تحتها .. و كانن يالسات .. ياهن مبارك و يلس عندهن ... و يلس يسوولف مع يداته .. و شوي روضه تشاركهم في السوالف و مرات كانت تسكت و تسمع بس ... حس مبارك ان روضه فيها شي .. ام ... ممكن تكون معجبه ؟؟؟!!!... اوكي بشووف .. شوي و يرن تيلفون مبارك ...
مبارك : مرحبا ..
...: مرحبا مليار و زود ...
مبارك :ههه شحالك ؟؟..
.... : اول اول شي ... صباح الخير ..
مبارك : ههه صباح النور و السروور ..
... : شحالك حبيبي ؟؟..
مبارك : بخير و سهاله ... و من صوبكم الغالين ؟؟؟..
... : مب اوكيه ..
مبارك : افا ليش عاد ..؟؟.
.... : ليش ما كلمتني امس ؟؟..
مبارك : السمووحه منكم و الله ... بايت عند قوم خالتيه و لا فظيت ..
.... : اها ... شو تسوي اللحين ؟؟..
مبارك : شوي مشغول ..
... : و شو شاغلنك انشالله ؟؟..
مبارك : ههه .. مودي يدتيه العزبه ..
.... : اها ..
مبارك : اقول بدقلك بعدين ..
... : اوكي بستناك ..
مبارك : في وداعت الرحمن ..
كانت روضه شاكه انه يكلم وحده بس بعدين تأكدت ان الي يكلمها وحده مب واحد .... وايد حز في خاطرها هالشي ... مب من عادت مبارك انه يرد عحد من ربيعاته جدام هله بس هو كان يريد يشوف ردت فعل روضه .. بس طبعا روضه مب مهتمه .... و الله لا ايب راسها هالمنصوريه ... تمت روضه بالنسبه لمبارك مثل التحدي .. خاطره في هالبنت ... نشت روضه عنهم بترووح الخيمه تيب شي ليدتها ... تعلث مبارك انه بيرووح السياره .. و لحق روضه فالخيمه .. انتبهت روضه ان مبارك وراها
مبارك : ام .. السموحه منج بس بغيتج في سالفه .. و لا بغيت اكلمج جدام يداتي ..
روضه و قلبها يدق طبول : عونك ..
مبارك : عانج الرب الغاليه ... ام ... ما ادري اذا عرفتيني و الا لا ؟؟..
روضه و هي مستحيه من الخاطر : ... هيه عرفتك ..
مبارك : و الله ؟؟؟..
روضه : انا اسفه اذا كانت السالفه وصلت لخاواتك بس و الله مب انا الي ...
مبارك : لحظه لحظه ... شو الي وصل لخاواتي ..؟؟؟
روضه : ترى امس يوم كنا نتمشى و انت خطفت عدالنا .. البنات الي كانن عندي ذاك اليوم هن الي عرفنك و قالن انك انت نفس الشخص الي ... المهم و خاواتك كانن عندنا و عرفن بالسالفه ...
مبارك و هو ما كان مستعد لهالشي : ام ... يعني انتي يوم شفتيني في بيت خالتيه ما عرفتيني ؟؟؟.
روضه : لا .. و السموحه منك عالكلالالام و عالسالفه الي استوت ذاك اليوم ..
مبارك : ما حصل الا كل خير .. و بعدين طلعتي من هلنا .. يعني عادي ... ههه و ان بغيتي ترى الفرد موجود ..
روضه و هي مستحيه : ههه .. و الله السموحه منك
مبارك : لا عادي افا عليج .... بس يالريم ..
روضه و هي حاز في خاطرها ان مبارك نعتها بالريم : الريم ؟؟!!!!... لا الشيخ انا روضه مب الريم ..
مبارك : لا .. انا اعرف انج رووضه .. بس انتي فاهمه الموضوع غلط ...
روضه : لا عادي يا فلالالان ... انت من كثر ما تكلم البنات ما تعرف اسمائهن حتى ..
مبارك : و انتي شدراج اني اكلم بنات وايد ؟؟؟!!!!..
ما عرفت روضه شو تقوله ... سكتت و طلعت تربع عنه صوب يداتها .. مات مبارك .. يعني روضه سألت عني ... يعني مهتمه بي ... ام ... فاتحت خير انشالله ... راح مبارك السياره و اتريا يداته الين ما خلصن و ركبن السياره و روضه معاهن .. اول ما ركبن تحرك مبارك و تم يسمع اغاني ميحد ... و يوم يت هالغنيه طول عليها ( ااه وا ويلاه من خل ٍ ظلووم ..ظالمني و الظلم في نهجه حرام .. ) عرفت روضه انها المعنايه بهالغنيه و طنشته ... بس تم قلبها يدق بالقو .... نزل مبارك روضه و يدتها و راح هو ويدته بيت خالته .. كان يتوقع مبارك ان روضه بتيهم في بيت خالته بس هي ما راحت صوبهم ... تم يحوط بسيارته جدام بيتهم .. على امل انه يشوفها .. بس امله خاب و لا قدر انه يعرف أي شي عن روضه .. و رجعو رماح باليمعه العصر ... مره هالاسبووع كئيب على مبارك .. خاطره يعرف أي شي عن روضه .. اف يالله شو هالحاله ؟؟.. يوم الاثنين الساعه 2 الصبح كتب مبارك قصيده عانبها روضه ..
كان مبارك يريد يوصل هالقصيده صوب روضه .. بس ما عرف كيف ممكن يوصلها لها .. ما قدر يقول لخاواته لانهن بيفضحنه في العايله كلها .... يالله كيف ...
مبارك : خليفه .. اللحين شو اسوي ؟؟..
خليفه : اف ... يا بويه حشرتنا حشى ..
مبارك : خلوف دخيلك قولي ..
خليفه : مبارك .. انت تحبها .؟؟.
مبارك : شو ؟؟؟!!... احبها !!!... لا طبعا ..
خليفه : عيل شعندك عليها ..!!؟؟.
مبارك : ياخي ذابحتني هالبنت ... الا اكلمها ..
خليفه : لك الي تباه مني ان كلمتها ...
مبارك : و عليه رفجه انها بتكلمني ..
خليفه : بروك هالمنصوريه هب هينه ..
مبارك : و رفجه اني اظوي راسها ... و رفجت بوخليفه ..
خليفه : يا ريال ..
مبارك : ما عليه ... انا و انت و الزمن ..
خليفه : خلاص تم ...
تم مبارك يفكر في طريقه يوصل بها الرساله صوب روضه و لا هب عارف كيف ... خلالاص انا برووح الوثبه و ربي يساعدني .. و انشالله اقدر اوصلها لها .... يوم الثلاثا راح مبارك الوثبه و سلم عخالته و يدته ...
مبارك : هاه يدووه ما تبيني اوديج بقعه ؟؟..
يدت مبارك : لا استريح ما اريدك توديني بقعه ..
مبارك : ليش عاد ؟؟..
يدت مبارك : عوشه ختيه بتيني اللحين ...
تفاءل مبارك .. اكيد روضه بتي مع يدتها .. و تم مبارك مرتز يرقب روضه ... بس يت يدت روضه بدون روضه .. يالله يا هالحظ النحس ... اف ... شو اسوي اللحين ... يلست يدت روضه وايد عند ختها ..
يدت روضه : عاد انا بترخص منكم اللحين ..
يدت مبارك : وين تبين ؟؟..
يدت روضه : فديتها روضوه برووحها في البيت برووح عندها ...
استغل مبارك الوضع : خلاص يدووه انا بوديج بيتج ...
يدت روضه : اسميك بتتيمل فيني و الله ... حليله رزاق تعبان ما يرووم يرد عليه مره ثانيه ..
مبارك : لا افا عليج يدووه واجبج علينا ..
ودى مبارك يدت روضه البيت .. اول ما دخلوو زقرت يدت روضه روضه عشان تقرب بمبارك ..
روضه : مرحبا السااع ..
مبارك : مرحبابج زود ... شحالج .. روضه ؟؟..
روضه و هي منتبه لحركت مبارك : بخير ربي يسلمك ...
دخلت يدت روضه حجرتها عشان تعق عباتها .. يلس مبارك عند المخدات و تقهوي .. و قبل لا ينش خش الورقه تحت صنية القهوه ... انتبهت روضه لحركته .. بس ما عرفت هو شو حط .. نش مبارك بسرعه و ركب سيارته و راح عنهم ... نشت روضه و شافت هو شو حط تحت الصنيه .... لقتها ورقه .. فتحتها و لقت فيها هالقصيده :
انشدج يا لغلا ثواني بس في حظورج ... قاصد ٍ لطفج طالب ٍ باقي احقوقي
والسموحه بزلت اللسان والعذر منج ... و لكن حبج غزى ذا النفس و عروقي
و صرت اليوم في هالدرب معبودج ... ابفصح عن شعوري و اعترف بعشقي
انا إنسان ذايب ٍ ذا اليوم في حبج ... و انهدر عمري بالصبر و عز نفسي
ماني بهين في ديرتي مثل دارج ... و ياما ميالس بالرياييل اتفز لي
و لكنه ما انكتبلي العز في ديارج ... و انا قصدتج و حيلتي قلبي و حبي
ارتجي من المولى يرزقني بحبج ... منيتي حبج منيتي شوفتج و اعذريني
من غزاني حبج السامي و شووقج ... اختلط دمي بشوقي و اشتعل حبي
وأصبحت في هاليوم غارقة ٍ في حظورج ... ألتمس حبل أنجى لي منه ينجيني
رجوتي رجوة المظلوم في حبج ... يالله دخيلج ارحمي ذا النفس و ارحميني
ارحمي خل ٍ عايش الليل في عيونج ... ارحميني يا من ملكتي العين و أحلامي
أنتي مناة النفس و اليوم عانلج ... اطلب احظورج بالمحبة في حياتي
طلبتج فيها .. مبارك الخييلي

"انتفض قلبي بغزال منصووري "
الجزء الثالث ..
انصدمت روضه من القصيده تمت تقراها مية ألف مره ... في هالوقت كان مبارك عالخط رايح صوب رماح .. و قلبه يدق .. يالله شو بيكون رد فعلها ؟؟..!!... يالله ..
كان خاطر روضه انها تصدق مبارك .. و تصدق انها هي المعنايه بهالقصيده .. بس هي تعرف ان مبارك يريد ياخذ شمامي بنت خالته .... كيف ممكن تخون ربيعتها عشان واحد .. و هي متأكده ان هالواحد ما يريد الا يتسلابها .. مثل أي وحده مرت في حياته ... ما عرفت روضه شو تسوي او حق منوه تقول ... اكيد ما بقول حق شمامي ... يالله شو هالحاله ؟؟!!!.. تمت روضه مرتبشه ... مبارك بيكون ريل اعز ربيعاتي ... انا لازم احط هالانسان عند حده ... عشان شمامي .. و الله ما تستاهل ان الله يبلاها بواحد مثل مبارك ... تمت روضه تقرى قصيدة مبارك ثلاث ايام .. و مبارك مب عارف الي سواه صح و الا لا ؟؟.. اول مره فحياة مبارك ان تبدر منه الخطوه الاولى صوب أي بنت ... بس هالمنصوريه تستاهل ... و ترخص النفس و الروح فدوى عيونها ... شو ممكن روضه تسوي ؟؟؟.. لو قالت حق بنات خالته فاطمه ؟؟؟.. ..
بعد ما تعبت روضه من كثر ما تفكر في مبارك ... ردت على قصيدته بقصيده ... بس تمت محتاره كيف ممكن توصلها له ..
وايد تعبت نفسية روضه .. حتى ما كلمت شمامي .. خلاص ظاجت من هالوضع ... اول من خطر في بالها كانت ميثه بنت عمها ... ما في غير ميثه هي الي بتساعدني ...راحت روضه صوب ميثه و قالتلها كل السالفه ..
ميثه : فديت قلبج و الله .. و ليش ما قلتيلي اول ما استوت السالفه ؟؟؟..
روضه : ياويلي يا ميثوه شو اسوي الحين ...؟؟؟!!!..
ميثه : لا رويض هو من ردج بيفهم ان ماله مجال معاج ..
روضه : ظنج ؟؟..
ميثه : هيه ..
روضه : اوكي ... بس كيف بوصل الرد لمبارك ؟؟..
ميثه : الي خلاه ايوصلج القصيده .. صدقيني اكيد بيرجع عشان يعرف الرد .. و بيوصلج هو ... بس انتي لا تسوين شي تندمين عليه ...
روضه : شو تقصدين ؟؟؟..
ميثه : اقصد .. لا تتهورين و تتصليله ...
روضه : يخسي الا هو ... هذا الي قاصر بعد ... ميثوه انتي تتوقعين اني ممكن انزل نفسي لهالمستوى عشان واحد ؟؟؟.
ميثه : لا انا اعرفج زين ... بس رويض الريال من يحط وحده في باله .. يسوي المستحيل عشانها ... و انتي بروحج قلتي انه بياخذ شمامي ... يعني مالج امل معاه ... لا تقولين ان كلمني بياخذني ..
روضه : ميثوه صح انا صغيره ... بس حشمة هليه فووق كل ريال .. و ما في واحد يكلم وحده وياخذها .. انا اعرف هالشي ... بس انا الي مسوبي لو عرفت شمامي ان مبارك يسوي هالحركات معايه .. شو بتكون نظرتها لي ؟؟!!.. و الله انها بتكرهني ..
ميثه : شوفي روضه .. كلنا نعرف ان شمامي تحب راشد خو مبارك .. بس ما عليج من البنات .. صدقيني ان خطبها مبارك رسمي و الله بطب راشد و حبها له ... البنات في هالزمان يدورن الريال .. عادي وحده تبيع هلها عشان واحد .. تذكرين سالفة شموس يوم شردت مع الظاهري ... شو فظحت هلها .. خذها شهرين و ردها بيت هلها مطلقه ..
روضه : مب الا شموس وايد الي هذي سواياهن .. بس انا مب منهن ... انا حاشمه هليه في غيابهم زوود عن حظورهم ... يالله خاواتي قبلي ما نزلن راس هليه ايي اليوم انا و انزله عشان واحد لعاب .. لا و الله ما طرالي ..
واايد فرحت ميثه لكلام روضه ... ميثه مب صغيره بس ما الله كتبلها نصيب اللين اللحين ... روضه وايد ارتاحت من كلمت ميثه .. الحمدلله لقيت حد يفهمني و ارتاح بالكلالام معاه ..
كان مبارك يريد يعرف ردت فعل روضه ... مستحيل بعد هالقصيده ما تحن ...اف ... الله يصبرني اللين ما اعرف ردها ... مرت الايام و مبارك مب عارف كيف ممكن يعرف رد روضه له ... بعد اسبووع تعبت يدته ... و ودوها مستشفى خليفه ... اول ما عرفت ام مبارك روحت صوب امها هي و راشد ولدها .. لقو هناك فاطمه خت سلامه ام مبارك و شمامي و وديمه ختها و علي خوهن ... اول ما رجع مبارك من الدوام قالن له خاواته عن يدته .. اول ما عرف مبارك رووح سيده صوبهم المستشفى ... و لقى غير هله عرب ما يعرفهم .. مسكينه يدت مبارك .. يتها جلطت سكر .. كانت ممكن انها تذبحها او حتى تشلها .. بس الحمدلله الله ستر و مرة هالمره عخير .. تمت يدت مبارك مرقده في المستشفى ... تمت ام مبارك و ام شمامي يتناوبن عالمبيت عندها .... كان مبارك كل يوم عندهم .. و في هالفتره تعلق مبارك بيدته وايد ... عمره ما فكر انه ممكن يكون جريب من يدته بهالطريقه ... في يوم يت يدت روضه صوب ختها في المستشفى و معاها ام روضه و روضه و كان مودنهن سلطان خو روضه ... كان مبارك موجود .. عرف روضه من اول ما دخلت عليهم الحجره ... سلمو عالموجودين .. روضه ما كانت تتوقع انها ممكن تلاقي مبارك في المستشفى .. تشاوف مبارك مع سلطان خو روضه .. و كانت هذي بداية صداقه بينهم .. لان وايد من طباع سلطان نفس طباع مبارك .. و هم يالسين اتصل الشغل بسلطان .. كانوو يريدونه في الدواام ... سلطان متخرج من سنه من كلية الشرطه ... و كان يشتغل في العمليات في بوظبي ...
سلطان : لا حول ...
ام روضه : شو بلاك فديتك ؟؟..!!
سلطان : اتصلوبي يبوني في الدوام ...
ام روضه : واقع يبونك ضروري ... روح صوبهم ..
سلطان : انزين و انتن منوه بيردكن الوثبه ؟؟..
ام روضه : ودي اتصل بواحد من خوانك .. و الا خلهم يطرشوون رزاق و الا يمعه صوبنا ...
مبارك : لا عنبوه بتعنون العرب من الوثبه .. انا بوديكن خالتيه ..
سلطان : لا وين اتدق خط الوثبه و ترد بعد .. لا بتصل بالدريول ايي و يشلهن ..
مبارك : و الله ما تعنيها يالسياره .. انا بهن و بلاهن بروح الوثبه ..
سلطان : صدق و الا ؟؟..
مبارك : لا و الله امبوني برووح الوثبه .... يبون قشار من هناك .. و ياخي اريد اتسبح .. حشى احس عمري ميعف ..ههه
سلطان : ههه ...
روضه .. يا ويل حالي ... يوم انت ميعف جذيه .. عيل يوم ما تكون ميعف كيف تكون ..؟؟!!.... كانت روضه تحاول انها ما تفكر بمبارك ... عشان شمامي ... كل ما يخطر مبارك على بالها تتذكر شمامي ... تذكرت روضه القصيده و ردها عمبارك ..... اوكي هذي فرصتيه عشان اوصله الرد ... كانت روضه حافظه القصيده بس ما كان عندها ورقه عشان تكتب عليها الرد ... و هم طالعين من حجرة يدت مبارك .. راحت روضه صوب الممرضه و خذت من عندها ورقه ... اوكي في الدرب بكتبها له و بخليها في السياره عشان يعرف ردي ... اول ما ركبن السياره هي و امها و يدتها .. فتحت روضه شنطتها ادور على القلم ... انا متأكده ان في قلم في الشنطه ... بس ما لقت روضه قلم ... اف شوو هالنحاسه ... بس لقت قلم تحديد مال الرووج الي حاطتنه ... يالله ماشي الا انت ... و بقلم التحديد كتبت روضه حق مبارك الرد عالورقه الي خذتها من الممرضه ... طول الدرب كان مبارك منتبه لروضه .. كل شوي كان يشوفها من المنظره الي جدامه .. كان يشوفها تكتب شي .. عرف انها تكتبله الرد كان.. قلبه يقوله انها تكتبله الرد ... يالله متى بوصل الوثبه عشان اعرف الرد .. كتبت روضه الرد و تمت محتاره ما تعرف وين تحط الورقه ... ... اول ما وصلهم مبارك البيت نزلت امها و يدتها .. تأخرت روضه و هي تنزل .. و هي نازله فرت الورقه عالسيت .. تم قلبها يدق بالقو .. و الي ذبحها انها عرفت ان مبارك انتبه لها ... حست ان عينها طاحت ععين مبارك ... حست بشي غير ... اول مره تحس هالشي ... انتبه مبارك لحركة روضه ... ههه هالبنت ما تعرف تخرب ... ههه ... أي حد ممكن ينتبه انها فرت ورقه .. بس الحمدلله ان عيايزها ما انتبهن ...
ام روضه : قرب فديتك بتتقهوي عندنا ...
مبارك : جريب خالتيه .. هبابني اروح اشل قشارهم و ارد المستشفى ...
ام روضه : يالله عسى ربي يحفظك الغالي ...
مبارك : انشالله امين ... هاه شي في الخاطر من جدانا ..؟؟..
يدت روضه : سلالامت راسك ولديه .. رد السلالالام ععربانك ..
مبارك : سلامن يبلغ يدوه .. خالفتني العافيه عليكم ..
ركب مبارك سيارته و اول ما تحرك افتر صوب السيت الوراني و شل الورقه الي فرتها روضه .... لقاها كاتبتله قصيده بقلم التحديد
مبارك : ههه ... اسميكن صدق بنات ... ما لقت قلم كتبت بالروج ...
قرى مبارك القصيده و انصدم ...
يا من قصدني ما ودي اهينك ... قدرك عال و حشمتك فوق راسي
وبالحل في كل منطوق ٍبدر منك ... واحترم شعورك و لانك اليوم معبودي
انا انسانة ٍمالي علم بشعورك .... و العذر ما انهدر عمرك من اسبابي
لان مالي علم بحبك و مكنونك .... و علم الغيب امر ٍانكتب عند ربي
واشهد ان قلوب العذارى اتفزلك ... ماهي الميالس بالرياييل في ذمتي
والكل عايش ٍفي العز في دارك ... و لدارك اليوم فضل ٍعلى دياري
ترتجي من المولى يلطف بحبك ... و منيتك شوفت الحب من صوبي
و التمني ما فاد انسان من قبلك ... عيش ذا الواقع و ارحم فوادي
ترتجي رجوة المظلوم في حبك ... و انا الظالم في الامر وماهو بعلمي
تشتكي من اسباب الهوى و حبك ... غزاك الحب بس ماني الغازي
و بالمحبه تطلب احظوري في حياتك ... و لكن امر الفواد ما هو بايدي
و في الختام انسى ذا الحب و احلامك .. لان الامل منعدم في حب من صوبي
طلبتك فيها .... المنصوريه ..