انذبحت بعيون منصوريه

............ .................( الجزء الأول ) ........................
الظهر عقب الغدا ... ساروا الشواب يرقدون ( بوراشد و أم راشد ) .. سالم وروضه فالميلس وحاطين ع حواس ناصر المنصوري يغني ومطولين عليه وداقين تيبيس
سالم : يابس يابس عاشوا ههه
روضه : لبيه يالمنصوري روح وقلبي داعيلك
.. أحمد وسلطان ييولون فياهم ... دخلت عليهم شمسه ..
شمسه ( معصبه ) : ياسلام الإخت مشتطه .. شعليج افتكيتي من المدرسه
روضه : تفو تفو الله واكبر .. اللهم إني اعوذو بك من الحسد ههه
شمسه : يايبه شي وسبيعين وشاله الدنيا على راسج مادري لو يبتي تسعين شو بتسوين ؟؟
روضه : كييفي شي وسبعين وعايبتني إنتي شويخصج ؟؟
سالم : ايه كله ولا الشيوخ محد له خص في رواضي
شمسه : هيه رواضي بس .. أنا بنت البطه السوده
سالم : اووه فارقي فالسعه وخلي عنج هالتهنديقات ... صح ننحن ماعندنا عيوز فالبيت بس إنتي ماشاالله إنتي مكفيه وموفيه
الكل : ههه ... طلعت شمسه معصبه من الميلس وسارت تتصل لعديلتها شيخه ...
شمسه : ألوو .. السلام عليكم
شيخه : وعليكم السلام مرحبا ملايين ولايسدن
شمسه : وبج زود .. اف
شيخه : بسم الله شو بلاج تتأففين ؟؟
شمسه : قهرر أنا الصغيره وما يدلعوني شراتها
شيخه : ههه منو رواضي ؟؟
شمسه : هيه منو غيرها بعد خواني كله يبزونها وانا محد
يبزيني غير شوابي
شيخه : ههه بس عليج عيل .. ماشاالله عليها رواضي تدخل
القلب بثواني .. ولا نسيتي معجباتها اللي بيموتن عليها
وهيه طاف ولا حفلتهن
شمسه : ادري ادري ... انزين انتي علومج ؟؟
شيخه : والله يسرج الحال .. ومن صوبج ؟؟
شمسه : يسركو .. اقول فديت قلبج بسير ارقد بتصلبج
بعدين
شيخه : اوكيك نوم العوافي
.. في الميلس تعبوا الجماعه من الدبيج ويلسوا يستريحون ...
سالم : يالله عاد رواضي عرسي فخاطريه ادور ويل لين مانقع
تواير الكلوزر
روضه: لا والله حلف انته بس .. أنا اعرس واتورط وانته درو ويل
سالم : ههه
روضه : شهر 7 عرس خالي خلفان دور ويل لين ماتشبع .. وأنا
عرس هب معرسه لين ما خلص الجامعه
سالم : ههه فديتج انا ماصبر بلاج منو بيخاويني فالكلوزر يوم بنسير البر
روضه : ههه فديت القلب أنا
أحمد : رواضي اذا عرستي ياويلج بعدين منو بيدرسني ؟؟
روضه : ههه بس هذا اللي يهمك يالسبال ههه
سلطان : رواضي إن عرستي يوم العرس بذبح ريلج
أحمد : وأنا بعد بكسر درايش موتره
روضه : هبو هبو حشى هب خوان جماعة بن لادن ههه
.. الكل ضحك ... صااح تلفون سالم
..
سالم : مرحبا الساع
راشد: مرحبا مليوون وعليهن خرده ههه
سالم : ههه لا ماباهن الخرده ههه
راشد : شالحال بوغنيم ؟؟
سالم : رقيص ومن صوبك ؟؟
راشد : بخير وسهاله ... مبرووك نجاح أم لسانين
سالم : الله يبارك فيك .... وطالع روضه وابتسم ..
..
روضه : (بصوت واطي) : شووه ؟؟ ليش اطالعني ؟؟ شو معجب ؟؟ ولا تبا الرقم ؟؟ ههه
سالم : ههه أبا الرقم ههه
راشد : شوه ؟؟ رقم منو اللي تباه ؟؟
سالم : محد محد بسم الله رادار ههه
راشد : يعلني ماحلم ويهك يا سويلم ههه
سالم : بس عليك لو حلمتني حب ايديك مقفايات ههه
راشد : ههه انزين بوغنيم بسكر عنك عندي خط ثاني
سالم : اها نواري متصله ؟؟
راشد : جب لاتيب طاريها يعلها بلاك
سالم : وايه فقدت هذاك الويه المخبق .. حشى مشخله هب ويه
راشد : سالم لاتيلس تسب يلا برايك باي
.. سكر راشد عن سالم وهوه معصب ... روضه ناقعه عليهم من الضحك ..
روضه : ههه منو هذا ؟؟
سالم : هذا راشد ولد خالي علي
روضه : ههه اسميك ياسالم انك حطيت عليه ههه
سالم : والله مادري شو عايبنه فيها والله انها ما تتشاهد وهوه ميت عليها .. مادري شو مسويتبه هالريال
روضه : ههه الله يهني سعيد بسعيده ههه
... سارت روضه حجرتها وسالم وخوانه ساروا المسيد .
...
.... العصر ..... الكل يالس فالصاله إلا شمسه..
أم سالم : شمسه وين ؟؟
سالم : ههه قصدج عيوز البيت ههه راقده
أم سالم : روضه قومي وعيها بسها من الرقاد
روضه : ان شاالله
... سارت روضه صوب حجرت شمسه ..
روضه : شمسه ......... شمسه ......
شمسه : ها
روضه : يلا قومي تقولج امي
شمسه : ماعليه ماعليه طلعي وصكي الباب
.... دش عليهن سالم عرض ... شغل الليتات وسكر المكيف ...
سالم : يدوه يالله قومي
شمسه : سويلم طلع برا احسلك
سالم : شو بتسوين يعني ؟؟
شمسه : بخبر امي عليك
سالم : لا لا دخيلج بتقطع عني معاش الشونه ههه
روضه :ههه سالم شو تباها اطلع عنها
سالم : أنا بطلع بس عسب شيختج قالت ولا اعرف دواج
شمسه : يلا اذلف يعلني بلا هالويه
... فرها سالم بقوطي الكلينكس ...
سالم : جب جب يالعيوز ههه جاو
... طلعوا روضه وسالم ... روضه سارت عند الشواب .. وسالم لحق بوه وسار العزبه ..... شوي ونزلت شمسه تتهندق
شمسه : امي طالعي عيالج
ام سالم : تعالي فديتج خليهم يولون .. لاتحرقين اعصابج فياهم
روضه : هيه بزيها
ام سالم : تراج عوفه فختج
روضه : والله ماسويتبها شي حتى تخبريها
شمسه : هيه مالها خص هذا سويلم شغل عليه الليات وبند المكيف
ام سالم : هوه وين سار الحين ؟؟
روضه : سار العزبه
.... شوي ودخل عليهم سالم يغني ....
سالم : مساء الخير والإحساس والطيبه مساءٍ مايليق إلا بماماتي ..( حب عيوزه ع راسها )
ام سالم : هلا بو غنيم ... من وين ياي فديتك ؟؟
سالم : والله ياطويلت العمر توني ياي من العزبه مول ههه
ام سالم : ههه وبوك وينه ؟؟
سالم : بويه يسلم عليج يوزته منصوريه من رواعي غياثي ههه
ام سالم : سود الله ويه عدوك
.... دخل عليهم بو سالم ....
بوسالم : السلام عليكم
الكل : وعليكم السلام
سالم : ها بويه علومها المنصوريه ؟
بوسالم : يسرك حالها تسلم عليك
ام سالم : اني بنتك يا هالشيبه انا موجوده
بو سالم : ( بإستهبال ) : اووه انتي هنيه ما شفتج ههه
روضه : فديت إمايه انا اللي تغار ع شيبتها ههه
الكل : ههه
ام سالم : لا شيبتها ما يباها يهاذي ببنت عمه المنصوريه هه
روضه : ههه امي ماعليج منه الا رمسه ... ماسمعتي الجسمي شو
قال ... مالحب إلا للحبيب الأولي .....
الكل : ههه
سالم : ماشاالله عليج يارواضي تسجيلات المدام ههه
روضه : اي راسي امي لحقي عليه حسدني ولدج ههه
(اطالع سالم ) انته منو ما عرفك ههه فقدت الذاكره ههه
..... صاح تلفون سالم وطلع برا يرمس ... دقايق ورد الصاله عند هله ...
سالم : بويه
بوسالم : لبيه
سالم : لبية في منى إن شاالله .. يسلم عليك أحمد ولد عمي سعيد
بوسالم : الله يسلمه من الشر ... علومه ؟؟
سالم : والله يسرك حاله يباني أخاويه بيسير ليوا
ام سالم : لا ماشي سيرة ليوا
سالم : ليش ؟؟
ام سالم : بفجك فيا أحمد لين ليوا .. انته خريش وهو اخرش عنك .. صك الدعنه وماشي سيره
سالم : امي انا هب ياهل .. انا ريال ولحيتيه مازره ويهي
ام سالم : ريال ماقلنا شي بس سيرة ليوا ماشي
سالم : تراني العام ساير فيا محمد ولد خالي علي ما استولبي شي
...(سالم نسى أن روضه يالسه ...... روضه كانت تحب محمد ... ومحمد بعد كان يحبها .. والكل كان يدري .. بس محمد الله خذ عمره ... انجلبت به الدراجه وتوفى من 8 شهور ... نشت روضه عنهم وسارت حجرتها ) .....
ام سالم : سالم لاتغيضبي قلتلك ماشي سيره يعني ما شي سيره
... تغيض سالم وشل سويج الموتر وطلع مسرع من البيت ...
الشواب ساروا المزرعه ... شمسه يالسه تهذرب فيا عديلتها شيخه ... روضه يالسه فالحجره ...
و اتريا ردودكم .. عشآن انزل الجزء الثاني ...

أفآآآآآآآآ ..
الله يساآآمحكم ..*_*

م،ع إني ما شفت و لا رد بس بنزل الجزء الثاني
الجزء الثاني ..
////////////////////////////////
فحجرة روضه .....
... روضه كانت يالسه تشوف صورة محمد وتصيح وتذكرت اليوم اللي توفا فيه محمد ... هذاك اليوم كانوا فالبر.. روضه كانت يالسه عند الحرمات ومحمد عند الشباب .. عقب العشا محمد سار صوب الحريم ...
محمد : روضه ... روضه
روضه : لبييه
محمد : لبيتي في منى .. تعالي اباج
.. طلعت روضه وسارت فيا محمد ... محمد كان موقف موتره بعيد شوي .. ساروا صوب الموتر ... شغل محمد الاف ام وكان يرمس روضه ..
محمد : روضه .. بسمعج قصيده لج ..
روضه : اوكيه
محمد :
أريدك لي واعلنها على كل الملا كلمه
أريدك لو ذبحني ظرفي القاسي وحطمني
أريدك أكثر وأكثر من الضيقه إلى البسمه
من المعنى إلى الاحساس من الصوره إلى فني
من العازف لمعزوفه من الحالم إلى حلمه
من المحار للدانات من شوقٍ يلملمني
من الزهره إلى النحله من النازف إلى دمه
من العتمه إلى القمره واكثر عنك وعني
أريدك أكثر بمرات من طفلٍ فقد أمه
من غربه إلى أوطان من علمي ومن ظني
أريدك مثل ما انته اصيلٍ وافي الذمه
أريدك حتى لو قلبي بدنيا الحب بعثرني
فقير الحال والا مغتني اهدافيه شمّا
تسابق حلم من حلم السنين الحالمه مني
اريدك والذي أوفى قياس النور والظلمه
اريدك لو ذبحني الشوق من بعدك وحطمني
روضه : صح لسانك
محمد : صح الله بدنج ... رواضي
روضه : آمر
محمد :أ باج تشلين
روضه : لا مارووم
محمد: افا ترديني
روضه: لا بس
محمد : ماشي بس .. فديتج شلي عاد
روضه : ان شاالله .... (( لا خلاني الرب من شوفك .. يالغلا ياعمري الثاني .. زورني لوتسمح اظروفك .. لاتعذبني وتنساني .. مدخلنك خذني بروفك .. المحبه عطف واحساني .. لوفني وان شيت بالوفك .. قاصندك بالوفا عاني ))
محمد : واايه فديت هالصوت أنا
.. روضه قفطت من المستحى وما ردت عليه ..
محمد : ههه بلاج قافطه (( مستحيه ))
روضه : ههه ماشي ههه
يلسوا عالتراب .. ومحمد طول الوقت وهوه يطالع روضه ...
محمد : رواضي
روضه : عونك
محمد : ههه ياويل حالي انا ههه
... تقرب محمد صوب روضه ومسك كفها وصب في ه تراب ..
محمد : رواضي تعرفين انا احبج كثر حبات التراب اللي فيدج
روضه : ههه بس
محمد : ههه يالطماعه كل هذا وبعد بس
روضه : ههه
محمد : والله والله والله والله ياروضه انج ماتكونين لغيري دامني
حي ... الا اذامت عاد هذا شي ثاني ههه
روضه : بسم الله عليك من هالطاري
محمد : ههه تخافين عليه من الموت
روضه : محمد انته تدري بغلاتك عندي واذا يبت طاري الموت مره ثانيه والله لزعل عليك
محمد : وانا ائئدر على زعلك يا جميل ( بالمصري )
... روضه اكتفت بإبتسامه ومحمد كان يسولف عليها ويخبرها بسوالفهم هوه وسالم فالمدرسه ... وهيه تضحك عليهم .... يت ع الاف ام غنيه ميحد حمد ( لا تذكرني ) عند آخر مقطع (( ياحبيب الروح ابا اكتبلك وصاتي ... ان غديت اليوم في حبك جتيل .. انشدك بالله لي طبت برفاتي .. لا تخلي دمعت عيونك تسيل )) .. التفت محمد صوب روضه
محمد : رواضي هذي وصاتي لج اذا مت ماباج تصيحين
روضه (طول الوقت كانت مهمومه حاسه ان شي بيستوي ) : محمد انا شو قلتلك
... قامت عنه بتسير صوب الحرمات ... مسكها من يدها ....
محمد : رواضي حبيبي لا تزعلين
روضه :..............................
محمد : اوه زعلتي كيف برضيج
روضه : ...........................
..... يتهم شما خت محمد .........
شما : ها شو بلاكم ؟؟
محمد : رواضي زعلت
شما : افا رواضي تزعلين ع محمدوتج
روضه : ( كانن عيونها مغرقات ) : ..... ليش ماتبيني ازعل وخوج كل شوي يطري الموت
شما : ليش محمد ماتستحي تزعل رواضي ترضا
محمد : فديت قلبج والله ماطريه مره ثانيه يالله عاد أنا محمدوتج اهون عليج (بخبث)
روضه : ............ ( من المستحى ما ردت عليه )
شما :اونها استحت
روضه : جب يا هالراس
محمد : جب سكتي عن حرمتيه اخجلتيها .. فديتها تستحي هب انتي ويهج لووح
شما : ماعليه انا ويهي لوح .. زعلييت ^^
الكل : ههه
.... سالم وراشد كانوا يلعبون بالدراجات ....
محمد : تعالن شوفنا ونحن نلعب بالدراجات بنستعرض عليكن
شما : انزين يالله رواضي سرنا
روضه : بسير اييب الكيمره من الموتر وبيي
شما : اوكيه اترياج
... تمن البنات يشوفن الشباب وهم يلعبون .. روضه كانت تصورهم بس اكثر شي تسوي زوم ع محمد ... فاللحظه اللي كانت روضه مسويه زووم ع محمد .. محمد كان مرقي عرقوب طويل .. انجلبت به الدراجه ع طول هالعرقوب .. الكل ربع صوب محمد .. إلا روضه ... تيبست في مكانها ... سووا للإسعاف بس محمد ماات ... ساروا كلهم البيت ... مرن يومين من العزا وروضه ماصاحت ولا نزلت لها دمعه .. الكل مستغرب منها ... عقب العزا بأسبوع شما كانت عند روضه فالحجره .. قامت روضه وشغلت الكيمره ... شافت محمد .. إلتفتت صوب شما ..
روضه : شما محمد وين ؟؟ من فتره ما شفته
شما : رواضي محمد مات ..( وصاحت شما )
روضه : شموتي لا تيلسين تفاولين ع محمد
شما : روضه خلاص محمد راح .. رااح ياروضه
روضه : انتي جذابه هذوه محمد فالكيمره يضحك ويسولف .. فديته والله اني احبه ..احبه ..(يت فالكيمره لقطت محمد وهو ينجلب)..
شما محمد انجلب .. شو استوابه ؟؟
شما : مات يا روضه مات
روضه ( استوعبت ان محمد مات ويلست تصيح صياح يقطع
القلب ): ليش سار عني ؟؟ ليش خلاني ؟؟
شما : حراام رواضي اللي تسوينه فعمرج .. محد يقدر يرده لا انا ولا انتي ولا امي ولا بويه خلاص الله عطانا اياه والله خذاه عنا
... تمت روضه تصيح .. طلعت عنها شما لانها ما تستحمل تشوف روضه بهالحاله... حالها كان يعور القلب يصيح اليهودي اللي مافيه رحمه .....
مرن ليام وكل ما يطرون محمد روضه كانت تصيح ...آآهه يامحمد ياليتك ترد عشان اقولك كم أنا احبك إلا امووت فيك
و أتمنى اشوف ردودكم وراايكم بالروايه ..

الجزء الثالث )
طق ... طق ... طق ... طق ( شمسه ادق ع روضه الباب )
شمسه : رواضي
روضه : ... (مادرت عليها لانها كانت تصيح )...
شمسه : رواضي فتحي الباب شمامي بنت خالي تباج ع التلفون
روضه : انزين بيي ... ( قامت روضه وغسلت ويهها .. روضه وشما قلب ونبضه ما يصبرن عن بعض .. فتح روضه الباب وسارت الصاله )
روضه : ألوو
شما (تغني) : يامرحبا ياناعم الصوت والعود ..( شما وروضه ثنائي صوتهن حلو وهن دايمن فالمدرسه يشلن والمعجبات طايحات عليهم بس هن طاف مايدزلهن ويه )
روضه : ههه
شما : شالحال فديت قلبج ؟؟
روضه : تنشد عن الحال .. همٍ جديدٍ على لول تحملته
شما : افا ليش ؟؟
روضه : عاودت ذكرى الحبايب ... والجروح المؤلمه
شما : رواضي تأكدي انه مستحيل ان محمد يرد ولو صحتي دم خلاص محمد مات
روضه : مامات حبه حي .. وهوه بعد حي .. موتٍ يفرقنا .. وطيفٍ جمعنا ...(صاحت روضه)...
...( فاللحظه راشد دخل ع شما فالحجره ويلس يترياها )...
شما : رواضي حراام لاتصيحين لاتعذبين عمرج بذكرى محمد
روضه : أااحبه والله أحبه .. ليش سار عني ؟ ليش خلاني جسد بلا روح
شما : رواضي استغفري ربج هذا حكم ربج وحراام اللي تقولينه
...( روضه ماردت عليها كانت تصيح )....
شما : روضه سمحيلي بس إنتي كذابه ما تحبين محمدوه خويه
روضه : شما حراام عليج انتي اكثر وحده تدرين كم احب محمد
شما :عيل يوم انتي تحبينه لا تصيحين ..حرام جي تعذبينه فقبره ..ادعيله بالرحمه .. ولو تفارقتو فالدنيا ان شاالله بتكونون رباعه فالجنه ان شاالله
روضه : ان شاالله .. شموتي
شما : عونج
روضه : فديت قلبج مشكوره مادري لو مارمستج اليوم كنت بموت ..( تمسح دموعها )
شما : ولوو خيتو أنا بنتو لخالك وهيدا واجبي تؤبريني (لبناني)
روضه : ههه بحبك كتير كتير ياشموتي ههه
شما : ههه بلانا جلبنا لبناني هه
روضه : ههه عادي لبناني هندي مصري كل يوم لغه ولا نسيتي ايام المدرسه ههه
شما : ههه والله بتوله ع ايام المدرسه وتقردين البنات ... انزين فديت قلبج انا بسكر عنج الحين وبتصلبج عقب شوي
روضه : اوكيه فديتج
شما : يالله فداعت الله
روضه : ربي يحفظج
... ( سكرت شما عن روضه والتفتت صوب راشد )....
شما : رشود
.. ( راشد كان سرحاان )..
شما : راشد
راشد : بسم الله الرحمن الرحيم .. منو طلع المارد من الفانوس
شما :ههه
راشد: طفرتيبي الله يطفربج
شما : ههه اللي ماخذ عقلك يتهنابه
راشد : ههه يعلج تفدينها
شما : تهبي الخايسه
راشد: جب جب مالج خص فيها
شما : اوكي اوكي مالي خص .. في شوه كنت تفكر؟؟ اتوقع كنت تفكر تحكم العراق عقب صدام ههه
راشد: ههه هم رشحوني بس انا مابا
شما : ههه صدق في شوه كنت تفكر ؟؟
راشد : في روضه بنت عمتيه مريم
شما: مبروك والله انك عرفت تختار
راشد: حوه شو مبرووك أنا ماقلت أبا آخذها
شما: بس عليك لوخذتها تحمد ربك
راشد: عدال عاد الليدي ديانا
شما : تهبي الليدي ديانا تيب رمش من عينها
راشد : وشوه فيها زد عن البنات ؟
شما : قول شو اللي هب فيها .. ماشاالله عليها جمال وأخلاق وحشمه ياراشد حشمه
راشد: شو قصدج يعني ؟
شما : اقصد هالخايسه نوروه اللي مافيها مذهب .. مخليتنك شرات الخاتم فصبعها .. يعل صبعها الكسر
راشد : شما مالج خص في نواري .. أنا احبها وهيه بعد تحبني ..
وعلى فكره اول ماخلص الجامعه بسير اخطبها
شما : قصورك تاخذ هالخايسه
راشد : باخذها ومحد له خص فيه
شما : ههه وشوه بتقول باجر لعيالك لو قالولك بويه كيف عرفت امي .. هه بتقولهم كنت ارمسها فالتلفون ههه فكر فجدام ياراشد .. وفكر بعقلك هب بقلبك .. واعرف من خان لجلك يخونك
...طلعت شما عن راشد وسارت الصاله .. تم راشد يفكر في كلام
شما .. شوه مستحيل نواري ترمس غيري لانها تحبني ..اووه مستحيل اتفارق فياها عسب رمسة شموه هالياهل ... قام راشد وسار حجرته يرقد

أفا وينكم ؟؟
ماهقيتكم جي ..!!

....................( الجزء الرابع ).............................
الساعه 12:30 فليل .. الكل راقد إلا روضه .. مارقدت لان سالم من طلع العصر من البيت ما رد ... تتصل به بس تلفونه مغلق ...يلست تترياه وكل شوي تتصل بس ماشي فايده كله يرد عليها مغلق ..... اتصلت بشما ..
روضه : الوو
شما : مرحباا السااع
روضه : ربج هب راقده وغثيناج
شما : لافديتج يالسه اطالع فلم ع ام بي سي اكشن
روضه : شموتي راشد فالبيت ؟
شما : مادريبه احيده المغرب نش تسبح وطلع من البيت
روضه : طالعيه وتخبريه جانه شاف سالم .. سالم من طلع العصر من البيت مارد اتصلبه وكله تلفونه مغلق
شما : اوكيك فديتج بتخبره وبرد اتصلبج
... شما اتصلت لراشد بس راشد تلفونه مشغول كان يرمس نوره .. وكل شوي تتصل بس بعده تلفونه مشغول .. اتصلت بروضه ..
شما : هلا رواضي
روضه : اهلين ..
شما : رواضي راشد اتصلبه وتلفونه كله مشغول .. بعطيج رقمه وانتي كل شوي اتصليبه
روضه : لا لا استحي منه
شما : وابويه الا ولد خالج .. هاا هذا رقمه *******050 وانا بسير ارقد
روضه : اوكي نوم العوافي
.. سكرت شما عن روضه .. روضه تتصل براشد بس تلفونه مشغول .... الساعه 2:45 صاح تلفون راشد
روضه : الوو
راشد : مرحباا
روضه : السلام عليك راشد
راشد : وعليكم السلام والرحمه .. منو الشيخه ؟؟
روضه : أنا روضه بنت عمتك مريم
راشد : اهاا ام لسانين ..شحالج ؟
روضه : ههه بخير وسهاله .. ومن صوبك ؟؟
راشد : آآآآآآآآآآآآآآآآآآآه أنا بخير واخير عن الخير
روضه : مديم ان شاالله ... راشد
راشد : لبيه
روضه : شفت سالم اليوم من عقب العصر ؟
راشد : لا والله .. ليش ؟؟
روضه : سالم من طلع العصر مارد .. طالع من البيت متغيض
راشد : ليش ؟ شوه مغيضبه ؟
..... خبرته روضه سالفة سالم وسيرة ليوا ...
راشد: اها .. انزين اتصلي به
روضه : اتصلبه من المغرب لين الحين والتلفون يرد عليه مغلق
راشد : يمكن فالعزبه ؟؟
روضه : مادريبه
راشد : اوكيه انا بسير العزبه اطالعه جانه هناك
روضه : بس الحين الساعه 3 خالي بيستهم عليك اذا مالقاك فالبيت
راشد : لا ما عليج .. بسير اطالعه وبتصلبج
روضه : اوكيه اترياك
... سكر راشد عن روضه وسار العزبه دور سالم بس مالقاه .. اتصل بأحمد ولد عم سالم بس أحمد قال انه ما شافه .. شوي وصاح تلفون راشد ..
......: السلام عليكم
راشد : وعليكم السلام
......: راشد علي الرميثي
راشد : هيه نعم
.....: ولد عمتك فالمستشفى سوى حادث
راشد : شووه ؟؟ اي مستشفى ؟؟
.....: مستشفى *******
راشد : اوكيه دقايق وياينك
... سار راشد المستشفى ودخل ع سالم ..
.
راشد : سلامات بوغنيم .. رب ماشر ؟؟
سالم : كنت مسرع ونقعبي التاير وانجلب بي الموتر.. الله سلمني من الشاحنه
راشد : الحمد الله ع سلامتك .. شوبلاها ايدك اشوفهم لافينها
سالم : ماشي كسر بسيط وشويه كدمات
..يلسوا يسولفون وعقب ساروا البيت راشد وصل سالم عند الباب ورد بيتهم .. دخل سالم الصاله ولقا روضه راقده عالكرسي ..
سالم : رواضي .. رواضي
روضه : عونك .. شو بلاك فديتك .. شوبلاها يدك ؟؟
سالم : ماشي كسر بسيط .. امي وبويه يدرون اني ماضويت
روضه : لا
سالم : زين يالله انا بسير حجرتيه بترياه يصلي وانتي سيري
حجرتج صلي وخلاف رقدي
روضه : ان شاالله
..... سار سالم حجرته وروضه بعد سارت حجرتها ........
..الصبح الشواب وعيالهم فالصاله الا سالم وروضه محد ...شوي ودخل عليهم سالم ....
سالم : السلام عليكم .....( وايه بوه ويحب امه ع راسها )...
الكل : وعليكم السلام
ام سالم : فديتك بويه شوبلاها يدك ؟؟
سالم : ماشي كسر بسيط البارحه نقعبي التاير وانجلب الموتر
ام سالم : الحمدالله ع سلامتك يوم الله سلمك
بوسالم : اكيد مطيرنه الموتر بين ارضه وسماه
سالم : ههه اكيد ههه
بوسالم : والموتر وين ؟ ماشوفه فالقراج
سالم : ههه يسلم عليك غدى قوطي بيبسي
ام سالم : فدوى عنك يابوغنيم باجر بيذبلك هذاك الموتر الفنان
سالم : ههه امايه ابا رنج سبورت
بوسالم : تراه مابات من همك الرنج .. ماشي رنج تبا تجلبه بعد
سالم : ههه ان خذتولي رنج هب مدور ويل
بوسالم : انته من يبتك وانته تدور ويل حتى سيكل راعي الدكان كنت دوربه ويل
الكل : ههه
أحمد : بويه أنا اشل سيكليه ع تاير واحد
بوسالم : انته الله يعيني عليك هالشعيرات السود اللي فراسي بتبيضهن لي ههه
الكل : ههه
بوسالم : بتخبركو روضه وين ؟؟
شمسه : راقده
ام سالم : شو هالرقاد لين الحين ؟؟ قومي وعيها
سالم : لا لا لحد يوعيها الفير راقده .. خلوها ترقد لين صلاة الظهر محد يوعيها
ام سالم : وانته منو ضواك ؟؟
سالم : راشد ولد خالي
ام سالم : يعلني افداه بوسنيده مايقصر
شمسه : وانا حليلي محد يتفداني
ام سالم : يالله ع الغيره
... في بيت بو راشد .. الشواب يالسين في الصاله والبنات عندهم .
. شوي ودخل عليهم راشد .
.
راشد : السلام عليكم
الكل : وعليكم السلام
شما : هلا راشد علوم سالم ؟
راشد : يسرج حاله
ام راشد : شوبلاه بو غنيم ؟؟
راشد : ماشي سوا حادث الباحه وانكسرت يده
شما : الحمد الله ع سلامته
راشد : الله يسلمج
شما : بسير اتصل برواضي بتحمدلها بسلامة خوها
... طلعت شما من الصاله ولحقها راشد ...
شما : نعم راشد شو تبا ؟
راشد : مالج خص
شما : بسم الله الرحمن الرحيم
راشد : شو شايفه جني جدامج
شما : ههه لا ورايه ههه .. انزين لو سمحت ذلف شوي برمس عديلتيه
راشد : هب ذالف الا ايلس ع جبدج
شما : ههه عادي
..... اتصلت بروضه ...
...
روضه : ألو (صوتها مبين انها راقده)
شماا : وا فديت الراقدين أنا
روضه : ههه
شما : الحمد الله ع سلامت سالم
روضه : ربي يسلمج من الشر
شما : علومج ؟؟ متى رقدتي البارحه؟؟
روضه : عقب ماصليت الفير رقدت
شما : فديتو
روضه : ههه لا خليتو
شما : ههه شحالج ؟
روضه : ههه تمام .. ومن صوبكو ؟
شما : يسركو حالنا ههه من سمعنا صوتكو نحن والخير واحد
روضه : ههه
شما: رواضي
روضه : هلا
شما : غناتي
روضه : هلا
شما : قولي تم لشموتج
روضه : تم شموتي
شما : ابا ج تشلين
روضه : ههه توني ناشه من الرقاد ويهي ماغسلته
شما : فديتج .. بزعل
روضه : كله ولا زعل شموتي
شما : يلا عيل شلي شلة سلطان الكتبي .. وصفت الدكتور .
.
راشد (يرمس شما بصوت واطي ) : حطي سبيكر
شما : لا هب حاطه
راشد : ماعليه كنت بوديج المول بس الحين تعايزت
شما: لا لا لاتتعايز بس والله انها أول مره وآخر مره
راشد : اوكيه
روضه : الو نحنو هناا
شما : هلا رواضي
روضه : حد عندج ؟؟
شما: لا .. بس شويخ كانت ترمسني
روضه : اهاا سلمي عليها
شما : ( تطالع راشد وتبتسم) شيخوه تسلم عليج رواضي
راشد :ههه الله يسلمها من الشر
شما (تحط سبيكر) : يالله رواضي شلي
روضه : من عنوني .....(( وصفت الدكتور خلوها ... هوب هاذي وصفت اعلاجي .. روحي إنتو لي نزعتوها .. وسببت والله بزعاجي .. عندكم تمت وخذتوها .. ومن عقبكم صرت أنا شاجي .. لا رحمتوني ورحمتوها ... ولا سمحتولي بلفراجي )) اخوكم سلطان الكتبي اتمنى انكم تصوتولي ههه
شما : ههه
راشد (في خاطره) طر يا ام لسانين طر في ذمتيه انه مافيج حيله ... فديت هالصوت أنا
روضه : انزين شمامي أنا بسكر الحين عنج
شما : انزين فديت قلبج
.... سكرت روضه عن شما ... شما التفتت صوب راشد .
.
شما : ها راشد شو رايك ببنت العمه طرر صوتها صح ؟
راشد : مب لين هناك صوت نواري احلى (( في خاطره .. هيه الا ابو الطرر والله يانواري ما تي عند صوتها ))
شما : وع وع وع لا تقارن رواضي بهالخايسه
راشد : ميت مره قلتلج مالج خص في نواري .. وماشي سيره للمول خلي لسانج ينفعج
شما : عاادي مابا اسير بسير بيت عمتيه وايد احسن
راشد : صح وايد احسن ... منو بيوديج ؟؟
شما : انته بعد منو غيرك
راشد : انا هب مودنج .. خلي الدريول والخدامه يودونج انا مواعد نواري اتعشا اليوم فياها
شما : قول آمين
راشد : آمين
شما : ههه منو قال ولا الضالين ههه
راشد : ههه
شما : يعلج يانوروه تغصين بعشاج وتموتين ههه
راشد : هبي يعلني بلاه هالويه .... قام وضربها بالمخده ...
شما : ههه خلاص والله توبه مابدعي مره ثانيه
راشد : هيه توج حرمه
شما : ههه وقبل شو كنت جنس ثالث ههه
...طلع راشد عن شما وركب موتره وسار ... شما سارت صوب بيت عمتها ..
في بيت بوسالم .. دشت شما الصاله وكان سالم يالس بروحه .. كان منسدح وشعره طالع من السفره .. شكله كان يهبل ... آه ياسالم فديتك محلاك والله انك تهبل ...
شما : السلام عليكم
سالم فز من مكانه : وعليكم السلام مرحبا
شما : الحمد الله ع سلامتك
سالم : ربي يسلمج من كل شر .. شحالج شما ؟؟
شما : بخير دامك بخير
سالم : مديم ان شاالله
شما : وياك .. رواضي وين ؟؟
سالم : سارت المطبخ .. يلسي الحين بتي
... طبعن شما تباها من الله يلست مجابله سالم .. وهيه اطالعه من ورا الغشوه وهوه بعد كل شوي وطالعها .. شوي ويتهم روضه ..
روضه : مرحبا ملايين بمزيونه الرميثات
شما : ههه وبج زود فديتج
روضه : تعالي بنسير حجرتيه
سالم : يلسن هنيه سولفن عليه
روضه : سو لراشد وخله ايي يسولف عليك
سالم : اتصلتبه السبال ههه مواعد اليوم يعشي نوروه يعله ما ينفعها
شما : آمي ن
روضه : ههه من الخاطر يايبتنها
شما : يعل فرقاهم قريب .. عنبوها ساحره خويه مايهاذي الا بإسمها
سالم : ههه الله يهديه
... يلسوا يسولفون وشما طول الوقت تطالع سالم ... وسالم ميت ع صوتها وسوالفها .... عقب العشا .. شما اتصلت لراشد
شما : هلا رشود
راشد : اهلين
شما : وين انته ؟؟
راشد : فالدار .. شو تبين ؟
شما : انا هنيه في بيت عمتيه جانك قريب خطف عليه
راشد : اوكيه دقايق وياينج
... وصل راشد وسارت روضه توصل شما للموتر .. راشد كان مشغل فالمسجل يديد ناصر المنصوري ..
روضه : راشد
راشد : نعم ام لسانين
روضه : نعامه ترفسك .. عطني السيدي هذا اللي مشغلنه بنسخه وبرده
راشد : كش كش يالله الخلا هب عاطنج
روضه : ماعليه يارويشد شوق نوروه انا تقولي الخلا .... مدت يدها وطلعت السيدي من المسجل .. قبل لتسحب يدها مسكها راشد ..وحاسلها يدها
روضه : اي يلعن شكلك فجني
راشد : هب فاجنج اول شي ردي السي دي
روضه : هب رادتنه
راشد : عيل والله لحيسها يدج لين ماكسرها
... راشد حاس يد روضه قو ...
روضه : اي ي
شما : راشد فديتك فجها حرام عليك بتكسر يدها
راشد : اول شي خليها تفج السي دي
روضه : لا لا هب فاجتنه فيه نويصر فديته
راشد: تفدج الياعده ريلج هوه تتفدينه
روضه : كيفي بن عمي منصوري
راشد : يالسباله وانا ولد خالج
روضه : انته خل نواري العنز اليربا تتفداك
... راشد يوم سمعها تسب القلب ماله حاس يدها اكثر ...
روضه ( غرقن عيونها صدق كان يعور وايد وخاصه ان روضه ضعيفونه وراشد بعد ضعيف بس هوه قوي ) فجني يالسبال اندوك السي دي خله لك ولليربا
.. راشد فج يدها ..
راشد : يعلج تفدين التراب اللي تمشي عليه
روضه : تخسي الخايسه ام الشباب ههه انته رقم كم عندها
راشد : جب مالج خص
... تحرك راشد بالموتر وهو متغيض ...
شما : راشد حرام عليك مايسوى عليك هالسي دي كسرت يد البنيه عسبه
راشد : الله سلمها اليوم ماذبحتها ام لسانين
شما : هيه قالتلك بتنسخ السي دي وبترده لك
راشد : عاد أنا مابا اعطيها ... قهرتبي وهيه تتفدا نااصر
شما : وليش تنقهر ؟؟
راشد : ماشفتيها كيف تتفداه جنه ريلها
شما: لا والله ترا العنز ماتشوف ذيلها تشوف ذيل ربيعتها
راشد : شوقصدج ؟؟
شما: تراك انته تتفدى نوراري اللي يسمعك يقول جنها حرمتك
راشد : اوه تنجلع تروم تسير تحبه مالي خص فيها
شما : رواضي محشومه عن هالشي .. انزين ترانا الاسبوع الياي
بنسير عزبت عمتيه مريم..هيه عازمتنا نبات
راشد : يستوي خير لين الإسبوع الياي
أفا وينكم ؟؟

أوكي انا بتوقف عن تنزيل الاجزاء .. لحد ما أشووف رايكم بالرواايه او حد يقرأ ..
** _ **