بأفضفض لكم

1. لسه ماجاء النصيب زي كذا..

السلام عليكم كيفكم ؟ ان شاء الله طيبين
هذا اول موضوع لي في هذا القسم ان شاء الله,,
معرف من وين ابدأ او ايش اقول لانو احس الكلام كثير ..
حأبدا قصتي من وانا عمري 19 سنه تخرجت من الثانويه ودخلت الكليه وببدايتها تقدم لي ولد جيراننا وهو اول واحد تقدم لي..
تم كل شى الخطبه والشوفه والتحاليل على انو كان بعد سنه الزواج والملكه بعد الشوفه دقت الام وقالت الولد يقول يبغى الملكه الحين وبعد اقناع وكلام طويل عريض رضي بابا
وحددنا الملكه وبدأت اجهز وحجزت القاعه والطقاقه والصالون والمصوره ورحت لمصمم عشان الفستان وصندلي واكسسواري وفساتين ماما واخواتي كل شى جهزناه الحمدالله في هاذي الفتره كانت تدق ام الولد
وتستفسر وتشوف ايش سوينا وكل مره ماما تقول اليوم خلصنا الفستان ومثلا اليوم اللي بعدو تقول الصالون زي كذا ... الحرمه حسيتها تطلع من تحت الارض انتقادات وشروط مره تقول الفستان لاتسوي بنتك
عريان او علاقي عشان جماعتنا مع انو اعرف جماعتهم عادي مشيناها وشوي تقول ولدي ماتصوره الحرمه اخواته بيجيبون كاميرا ويصورنهم مع ان المصورهه تلبس نقاب ومومعقول ولدها مايشوف حريم منقبات
وشوي تقول اذا جاء وقت عشاء الرجال الطقاقه توقف دق عشان اخواني ملتزمين وشوي تقول ولدي مايدخل عشان مايفتن الحريم مع انو مو مملوح فقط يعني حتى مو حلو عشان تصير فتنه قلنا مو مشكله نجيب بروجكتر قالت ولدي يقول لا المهم انا مليت وقلت لماما تحسبني باموت عليهم قولي لها عيب تتشرط كذا خلاص ماابغاه
وماما صارت تسكت تقول استحي ايش اقولها وهيه تقولها بطريقه ماتخليك تقدرين تردين عليها يعني ماما معذوره مرت ايام وجاء ابو الولد عشان يتفقوا عالمهر والاشياء هاذي طبعا احنا جهزنا من قبل الاتفاق
لانو مره قريبين من بعض يعني كانت فيه ثقه وتفاهم وهما نفس الشى جهزو كمان المهم ابويا قاله المهر 50 والابو قعد يكلم بابا انو ظروف وكذا ووافق على 30 الف تخيلو انا وقتها انصطلت لانو قبل هذا المهر ماكان احد ياخذو الا وين وين
المهم اتفقو انو المهر 30 الف وعربيه الملكه وعلب الملكه بس.. ابويا جاء مبسوط وقالي لاتهمك الفلوس الولد طيب ونعرفه ويعرفنا ولو نقص عليكي شى باكملو لكي من عندي قلت طيب بابا من كثر فرحتو لاني اكبر بناتو
واكيد اي اب يفرح ببنتو باسثناء الترتيب بس اكيد الكبيره غير؛؛ قال يلا بنطلع نتمشى ونتعشى ونرجع بمناسبه انو اتفقو طلعت ابدل ملابسي نزلت الا جو البيت مكتم غير لما طلعت تخيلو الصدمه الام دقت وقالت طلباتكم كثير
خلاص فركش احنا بطلنا بهذا الاسلوب تخيلو وانا وقتها كان باقي على العقد يومين والحفله اسبوع حتى الكروت وزعتها وخسرت كثير بالتجيهزات ماعرفت وين اودي وجهي من اهلي تفشلت احس نظراتهم نظرات شفقه مع اني وقتها
مابينت لاحد وقلت لهم ليش زعلانين انا كنت استخير واقول يارب لو فيه خير هيأه لي واذا في شر اصرفه عني ولما صرفو ازعل لا معناتو مافيه خير والحمدالله انو بطلو هنا ولا اكون مملكه يعني شى احسن من شى وقلت الفلوس والتعب وكل شى ان شاء الله يتعوض مرت كم اسبوع وقال بابا بيسافر مصر عندو شغل وبياخذني معاه عشان اغير جو والصدمه والحركات هاذي غيرنا جو ورجعنا الحمدالله ..
صاروا يتقدمو لي ناس بس اهلي كانو يرفضون مثلا لانو بمدينه ثانيه او اشياء زي كذا وبصراحه ماعمري ناقشت او قلت ليه الين صار عمري 24 سنه وبدأت اخذ المساله جد صحباتي من اول مره او ثاني مره ماشاء الله
ويتزوجون ليش انا كم مره وكلها اسباب بنظري اشوفها تافه لان ممكن اخذ واحد بنفس مدينتي وبعد الزواج انقل مدينه ثانيه يعني حسيت هالسبب تافه شوي ..
يابنات صارو يجون الناس يشوفوني وماعاد حتى يردون لاهلي لا ايوه ولا لا كأنو فيني شى وانا الحمدالله مو مدح بنفسي الحمدالله مو ناقصني شى حلوه ونظيفه وعاقله وصلاتي الحمدالله مااقصر فيها, كأنو فيني عيب فادح حتى اشوف نظرات الاستغراب بوجه اللي يجون يخطبون وكل مره كان عادي حتى لو يسحبون كنت اقول خيره احسن لي ؛ومرت فتره بس يجيني احد ابكي مثلا تكون وظيفتو مو مره او شى زي كذا ابكي واقول لا مع انو احيان اسباب عاديه يعني مو شى مره كبير يستاهل البكاء ..وزي كذا كل مره يشوفون ويسحبون والا بس في اليوم اللي يجون بيشوفوني اهل الولد ابكي واتضايق الين ماما تعتذر لهم؛وبعدها يابنات صرت انجرح لما احد ياخذ موعد من ماما انهم يجون يشوفون وبعد يسحبون حتى بدون الشوفه ولايعرفون حتى شكلي مع انو بالاول يشوفوني ولاعاد يجون بعدين من قبل مايشوفوني يسحبون صرت اتضايق وابكي بيني وبين نفسي وارجع اقول ربي يبغى لي الخير اكيد اللي جاي احسن بس صرت انجرح مره, الناس بدوأ يتكلمون ليه للحين مع انو مو ناقصك شى ماشاء الله ماعندي غير اقول لسه ربي مااراد

لسه ماجاء النصيب زي كذا..

ماتحسست من الموضوع هذا الا لما صار عمري 26 تخيلو مره كنت قاعده بعزيمه عند بيت عمي فقامت تقول مرأه عمي ليا ليه ماعاد تقولين لي اومي والا خلاص كبرتي لاني كنت اقولها اومي وانا صغيره تخيلو جأتني زي الصاعقه بنت عمي اصغر مني ب 3 سنوات متزوجه وعندها ولد وبنت ماشاء الله الله يخليهم لها تخيلو قالت كبرتي وهيه تغمز 26 سنه ياعانس تخيلو رجعت لفيت وجهي عليها وانا كذا قلت يمكن يتهيأ لي قلت ايش قالت عانس هاه
قلت لها بأبتسامه انتي سخيفه قالت من جد مافي احد تقدم لك قلت قد شعر رأسك بس لسه ربي مااراد وهيه تحسبني باموت عالزواج تطالع بنظرات زي انها شفقانه عليا وانا والله ماهمني بس اللي ذابحني الناس ماترحم مااحد فاهم انو ربي مااراد ولو جاء نصيبي محد بيرده حتى لو انا هذا من غير الدعوات اللي تحسيها بشفقه وحزن كأني اشتكيت لاحد ..المهم مرت العزيمه عادي بعد ماركبت السياره قعدت استرجع كلامها قلت كلامها قوي وقليله ادب كيف تتكلم كذا يمكن انا وحده بتطق ونفسها تتزوج وتقولي كذا تسبب لي نفسيه اقصد انو مافكرت بعواقب كلمتها,, وطنشت وقلت ماعليا عانس والا يقولون زوجها معقدها او ليتها ماتزوجت وقعدت عند اهلها
قلت طز انا اللي قاعده ببيت اهلي وانا اللي باتزوج
طبعا كلام بنت عمي صار بعد زواج اختي اللي اصغر مني اهلي كلهم رفضو كل مااحد يتقدم لاخواتي اللي اصغر مني يرفضون يقولون اول شى الكبيره وكل مره كنت اقول يمكن ربي مو كاتب نصيبي الحين حرام توقفون نصيبهم
هذا من غير كلام اخوي اللي كثير يحز بنفسي..المهم كل اللي يعرفوني كويس مستغربين ليه ماتزوجت وفيه خطاب يجونها كثير ؟؟
وماادري كيف قالت لي خالتي انتي اكيد فيك عين روحي لشيخ ومااهتميت وفتره كذا وقلت خليني اجرب رحت كل احد يقول عين واللي يقول مس واللي يقول حسد بس اغلبهم قالوا لي حسد قوي دام انه يبعد الناس من قبل يجون يشوفونها حتى, زعلت واتضايقت وقلت زعلي مابيسوي شى خليني ابدأ بنفسي
صرت اقرا البقره كل ماقدرت واتعوذ بالصبح والليل والوضوء على طول متوضيه والصلاه بوقتها وكل فتره استغفر ووقت النوم اشغل البقره وانام عليها وابتعدت عن الاغاني طبعا وصار اي احد يدخل بيتنا نحط تمر واخذ نواه التمر وأغتسل بمويتها وكذا مره اغمى علي بس الحمدالله على كل حال . .
بعد فتره دقت صحبه ماما وقالت بتجي تشوفني لانها تعرف ماما من التحفيظ يعني علاقتها بس بالتحفيظ ؛قالت بتخطبني لولد اختها لان اختها متوفيه الله يرحمها وهيه زي امه قلت طيب وجأت شافتني
وطلعت وهيه مبسوطه وتمدح لماما فيني وفي بيتنا اقصد انو مرتبين ونظيفين وكذا .. هيه قالت انو لو عجبتها حيجي الولد يخطب رسمي بس ماما قالت لها استنى شويا على اساس ابو الولد كان اسمر بس الولد ابيض واحنا مانزوج سمر فقالت لها انتظري عشان نتاكذ احنا, بعد كم يوم راحت ماما كلمت الحرمه قالت لها ابو فلانه مو عارف كيف يسال وكذا لانو المفروض تعطينا معلومات تخيلو قالت الولد باقي مايدري بس لما اخوات الولد يجون يشوفون البنت اكيد بيدري لانه هو اللي بيوصلنا
لاحظو اتغير كلامها انا عصبت وقلت لماما انو مو فرجه كل شوي احد يجي يشوف خلاص خالتو جأت يكفي وطلبتها ماما صوره الولد قالت لما يجون اخواتو يجبونها معاهم ..المهم بعد محاولات رضيت ادخل مع انو مااقتنعت بس دخلت ارضاء لماما,جاوء ودخلت وبابتسامه قابلوني. ووكل وحده فينا تحس اكيد من نظرات الناس لها انا كنت مرتاحه الحمدالله بس طلعوا قلت لماما ماجابوا الصوره ليه هما كانهم يضحكون علينا كل مره كلام طبعا والحرمه خارجه ماما سالتها وين الصوره قالت مدري عن البنات كيف ماتدري خالتهم وانتي جايبتهم بوجهك
قالتلي ماما لو قالوا لا؛ قلت عادي معناتو خير وغير كذا هما اللي خسرانين كنت اقولها بثقه يعني ,, ربع ساعه دقت الحرمه تخيلو ايش قالت قالت معليش لا (هاذي عادي شوفو اللي اقوى )قالت ماما انتي قلتي بيتعرفون ماقلتي بيجون طالعين نازلين على بنتي انا مو عايفتها عشان كل اسبوع احد يجي يتفرج ياام فلان (ماما كانت مقهوره لانو كانت اختباراتي بالجامعه وماذاكرت وضيعت وقتك وكنت رافضه اقابلهم بس عشانها دخلت وكان عندها زواج بمدينه ثانيه واعتذرت كلو عشانها) تخيلو السبب قالت والله بنتك مافيها شى حلوه وجميله ومرتبه ونظيفه انا عجبتني عجبتني بس اخواتو قالوا لا عشان خطبوا وحده وباقي ماردت لهم_ وقالوا عيب نوافق( يقصدوني )و اللي خطبها(يقصدون اللي قبلي) لما تقول موافقه ايش نقولها
هما شافوا بنتك ولو الاولى مارضيت حنجيكم ؛؛قالت ماما لما انتو خاطبين ليش جيتو ؟؟ قالت مانبغى نكسر بخاطر البنت !!!!!!! قالت ماما بنتي على مااعتقد هيه اللي مارضيت وقلت لك؛ يعني مافيها كسره خاطر وبنتي مو اسبير اذا انتي ترضيها على بنتك انا ماارضها وقفلت الخط .. وجأت علمتني ماما بدون مااحس بنفسي رحت الغرفه وابكي عند اختي مو عشان رفضو عشان العذر الغبي مافيه اي احترام لمشاعر الناس مافيه ادب او اي اسلوب هذا وانا باقي حتى ماوافقت يعني موافقه مبدئيه بس وتمسخرت كذا وصرت اقول انا السبب انا اللي مسخرت نفسي وخليتني بموقف غبي زي كذا لاني دخلت وانا مو مقتنعه ..
وبعدين اسبوعين كلمتني صحبتي بتخطبني لاخوها وبعد مالطعتها شهر لاني كنت متردده عقدتني هذيك الحرمه حسبي الله عليها خفت يصير نفس الشى ايش منظري قدام اهلي واخواتي,,
الحين رديت للبنت وقالت انهم بيجون يخطبون رسمي وانا مرتاحه لانها صحبتي عارفتني يعني وتعرف شكلي وتعرف كل شى عني..بس حيجون عالاسبوع الجاي ادعولي ان الله يشفيني و اذا فيه خير ربي يهيأه لي واذا فيه شر يصرفه عني بدون مايجرحوني او انصدم هاذي قصتي صح طولت بس تقريبا حاولت اختصارها واقول ابرز "القصص اللاسلوبيه"<< بدأت الفلسفه
اللي صارت معاي من وانا عمري 19 الين الان باقي لي شهرين وادخل 27 سنه ...
اعذروني على اسلوبي ماعرفت اعبر بس حبيت اقولكم قصتي ومنها افضفض واكسب دعوه حلوه منكم..