بحكيكم حكايهخ مريت فيها انا شخصيا اتمنى انكم تستفيدو

1. يعرف اني احبو .. واني ما اقصد ومو قادره اعدل من نفسي ..


2. الين بطل يسوي دي الحركه ..


3. اللي يشوف مصيبة غيرو تهون عليه مصيبتو

السلام عليكم
مدري ايش طرى على بالي اكتب الموضوع . بس كنت اقرا موضوع عن وحده عصبيه جدا مع زوجها وافتكرت نفسي ..
انا متجوزه من 3 سنين ونص وحكمل 4 بعد كم شهر . منهم سنه خطوبه . . كان عمري 17 ..
مرت عليا فترة غريبه جدا . . لان عمري ما كنت كدا ابدا ولا اتخيلت اني اوصل لدا الوضع !!
كنت عصبيه مره وبعد ما اطلع الكلمه على طول اندم
وياريت اصلح الموضوع . الا ازيد الطين بله
واكره نفسي .. وبرضو اسوي كدا تاني !!!! واخرب اي مفاجأه او خرجه او اي شي يعمللي هوا زوجي ..
قرفت من نفسي لدرجة انو زوجي خلاص عرف الحاله هادي .. وصار لما اجي ابدأ اخرب علينا ولااعصب يحط يدو على فمي ويقولي اسكتي انكتمي وما يشيلها
.. واحيانا يكتم نفسي بدوون قصد عشان يدو كبيره ووجهي صغير .. واصير افرفر فيدو .. وهوا يحسب اني ابغا اشيل يدو عشان اتكلم ويحط يدو اقوى .. وانا مو قادره اتنفس
الين اصير ابكي من الخنقه .. وبعد ما يشيل يدو واصير ابكي واصرخ و واهلوس وطبعا اخرب علينا .. وانتا تبغا تقتلني ومااعرف ايش وكلام لما الليل مافي احد يستحملو ..مع اني من جوا نفسي عارفه انو ماقصدو شي من دا كلو .. بعدها صار الوضع اسوء ...
وتجيني حاله بعد الصرييخ والبكا والهلوسه اضرب فنفسي واضرب زوجي وارفزو واحيانا افك باب السياره وهيا ماشيه .. برمي نفسي .. ومره خرجت من السياره وصرت امشي بالشارع!!<~ وهادا كلو ووالله مافي سبب يخليني اتجنن واعمل كدا !!!!!
تعبت يا بنات مني عارفه ايش فيا !! وماني ملاحظه اصلا اني اتغيرت .. وتعب زوجي كمان . .. وانا مو حاسه بنففسي ولا حاسه بالحاله هادي ..
ولما اهدى افهمو الاشياء اللي احس فيها لما اعصب واني ما امثل واني مااعرف ايش دي الحاله .. واني عمري ما كنت كدا !! .. احيانا يصدقني .. واحيانا احسوو مو مصدق ويحسب اني امثل!!! لكن يحاول ما يبينلي <~ مدري انا بفهمو غلط ولا ايش!
لما ابدأ اعصب ويبدأ شي جواتي يرتفع يرتفع فنفسي الين اصير مو قادره اتحملو ويخليني اعمل كدا .. مني عارفه اوصفو
بس هوا شي كدا احسو فصدري يبدأ صغير ويخليني اتنفس بقووه وصعوبه واحيانا مااقدر اتنفس .. ويبدأ يطلع من عند صدري ويطلع فوق الين راسي ويكبر يكبر .. وبعدها اسوي كدا وابدأ اضرب فنفسي .. !!
مني عارفه اوصفلكم .. وكمان ماقيد وصفت هادا الشي لزوجي عشان لا يفكر اني مجنونه :( :( ولا ينفر مني ولا يكرهني ..

يعرف اني احبو .. واني ما اقصد ومو قادره اعدل من نفسي ..

وصلت معايا لدرجة كنت اكره اني اسمع القرآن " الرقيه " الطريقه اللي يقرأ الشيخ فيها القرآن على واحد ممسوس او محسود ..
جابها ليا فالجوال وصار يسمعني ما جات ولا 5 ثواني بالعدد الا وشلت الجوال منو وسكيتها واترجيتو ما يفتحها تاني .. وكنت جدا متضايقه .. وكان يقولي اسمعيها .. وكنت واحذرو انو يسمعني هيا .. اقولو والله بنقلب عليك لو تسمعني .. ما ابغا اسمع ولا تفتحها قدامي.. وكنت اقولو انا عارفه ان اللي بسويه غلط .. بس ماادري مااقدر اسمعها اتضايق والله .. وما اقدر اتحمل الله يخليك لا تسمعني ... واهرب منو .. واحيانا يمشي ورايا وانا اهرب .. وهوا يضحك يقولي عادي اشفيكي ؟؟ .. وانا اصير ادمع واقولو والله ماادري بس الله يخليك ل اتفتحها والله ازعل وماعرف الخ الخ

الين بطل يسوي دي الحركه ..

قالي بوديكي عند شيخ يقرا عليكي .. وقلتللو لا ما ابغا .. اخاف اعرف ان فيا شي وادخل فصراعات تانيه .. <~ انا خالتي فيها مس من اكتر من 16 سنه .. وكنت عايشه فتره عند خالاتي .. ووحده منهم كانت دايما تقولي انا خايفه عليكي من اللي فالبيت !!! ما كنت افهمها .. بس بعدين فهمت . لما شفت خالتي الممسوسه تتصرع قدامي وتصرخ وتحبي فالارض زي الاطفال .. وتعصب يدها وتنشد .. زي علامات الصرع ..
وكنت اخاف يكون فيا شي من دا النوع .. واخاف اعرف .. وكنت افضل اني ماا اعرف ,, عشان لا ادخل فصراعات تانيه زي خالتي ..
مره يا بنات كان عيد ميلادو وكنت جايبتلو هديه وابغا اروح مطعم عشان اعطيلو هيا .. وكان متشيك ولابس توب. . ومدري ايش صار يومها .. صرت اصرخ وابكي .. وخرجت من السياره ومشيت فالشارع . . فمكان ما يمشو فيه الناس اساسا ومافيه احد كلو عماير .. وجات سيارة اولاد كانت بتشيلني !!! زوجي كان يدور عليا .. يحسبني طلعت من السياره ودخلت المطعم ..
واتجنن مسكين .. وجا شافني بعيد عن المطعم ,, " الين دحين يقولي مدري كيف وصلتي هناك بالمده القصيره هادي !!! "
وحصلني امشي وسيارة ااولاد قدامي .. جا ودخلني بسرعه ومشينا .. ضربني وصرت ابكي .. واضربو وارفزو ..
لما تجيني دي الحاله ما اهدأ ابدا وكل ما يفوت وقت كل ما تزيد عندي .. واسوي اشياء مجنونه اكتر .. وماا اهدى الا لما ينهد حيلي ومااقدر اتحرك ولا حتى ارفع يدي ولا اصرخ !!.. أو يحضني بقوه مع اني اقعد اضرب فيه ازا مو برجلي بيدي وازا مو بيدي براسي .. إالين اتعب اوصل لحاله ينهد حيلي فيها ولا اقدر اتحرك ..
يصير يحضني بقوه ويكتفني واصير مااقدر اتحرك .. ويقعد يهديني ..احيانا انام على طول بعد ما يصير فيا كدا او أحس اني ابغا انام .. ودايما احس اني مااقدر اتحرك .. لدرجة انو هوا يلبسني عبايتي ويرجعني على كرسي السياره ويغطيني ويفضل ماس يدي او ينومني على رجولو ..<~ الحاله دي بدأت معايا من ايام الملكه .. قبل الزواج .. واستمرت شي 6-7 شهور او اكتر ..
بس دحين الحمدلله انا صرت احسن ..
سويت شي واحد .. " انا كنت احكي كل صاحباتي عن اي شي يصير مع زوجي .. انا وهوا متجوزين عن حب وقصتنا يشهدولها كتير ويتمنو يعيشوها "
وصارلي 4 سنين معاه .. والحمدلله نحب بعض بجنون .. ومرينا بمشاكل كانت ممكن تسبب طلاقنا لكن اتفاديناها وكملنا احسن..
زوجي كان يكره الشي دا فيا اني احكي الناس وكنت احكيهم عن طيب خاطر .. وابغاهم يفرحولي وكدا ..
بطلت اهرج .. والحمدلله اتعدل حالي مره كتير .. مره مره مره كتير الحمدلله يارب الحمدلله
وصرت اقرأ صورة يوسف والبقره .. بنية الله يصلح حالي ويبعد عني كل أذى وسوء ..
وما صرت مجنونه .. لاني فعلا كنت مجنونه .. ولو وصلت لديك الحاله ممكن انتحر وانا مدري !! .. استغفر الله يارب ..
اتخيلو يا بنات ان دا كلو صارلي وانا مملكه بس.. ما عشت مع زوجي فبيت !! ..
كنت تقريبا كل ما يجي ونخرج سوا اعملو كدا !!! ..
الحمدلله انو زوجي عارفني وعارف انا ايش فالأساس وعارف ان جاتني دي الحاله اللي هيا اساسا مو عندي ولا كانت عندي قبل ... صبر عليا كتير الله يقدرني أعوضو .. وساعدني ..
انا ماكنت احس باللي يصير ليا .. بس دحين لما افتكر اللي صار مدري كيف ما اتخيل نفسي مريت بدا كلو
ولا اتخيل انو زوجي صبر لدي الددرجه !!!
كل ما افتكر شي مر عليا زي كدا .. ااحمدربي انو نجاني وخلصني من اللي كان فيا ..
الحمدلله ..
في آخر الموضوع حابه اني افكركم بشي
كتيرين يستهونو بالتحصين حصني نفسك وزوجك وبيتك .. انا ما كنت ابدا احصن نفسي ولا احافظ ع الاذكار .. واقول على ايش كل اللي عندي عند غيري . ومن دا الكلام ..
سورة البقره هادي كنز لا تستغني عنها ..
وكتير اقرا عن بنات يشتكو من ازواجهم ويكون بينهم عيال .. واحيانا مشاكل منجد تافهه يا بنات .. اتغاضو عنها . اتحملو ..
وقبل ما تكتبي مشكلتك خدي لفه على المنتدى وشوفي مشاكل الناس اللي منجد منجد مانعرف ايش حلها !! ولا كيف اتحملو دا كلو!!

اللي يشوف مصيبة غيرو تهون عليه مصيبتو

انا برضو عانيت من خيانه وكدا ومشاكل كتيره سواءا مع اهلو ولا بيني وبينو وحاجات من دي الاشياء زي اي وحده .. بس كل ما اقرأ موضوع وحده واشوف معاناتها اشوف ان مشكلتي صفر ع الشمال .. واحاول احل الموضوع بنفسي .. بيني وبينو ..
انا الين قبل ما اكتب موضوعي دا كنت كارهه اهل زوجي .. من حركات سووها وانهم رافعين سلفتي السما وما يشوفو الا عيوبي.. مع انهم ما يظهرو دا الشي قدامي .. لكن كرهتهم ..
الين شفت وحده ومعاناتها مع اهل زوجها .. !!! وكيف زوجها حتى ما يوقف معاها قدام الظلم ,,
انا وهادي مشاكلي .. وزوجي الحمدلله يعرف يفرق بيني وبين اهلو .. الحمدلله
وياريت تدعولي الله ييسر ليا ويسهليي اموري ويحقق ليا ولزوجي اللي نتمناه ويوفقنا ويسامحنا على كل خطأ وقعنا فيه ويتوب علينا . . .
حتى لو تدعولي بظهر الغيب