بنات أنتبهو من هذا الزيت

السلام عليكم ورحمة الله وبركاته
اول شيء بحكيكم قصة حياتي ومآسآتي
شعري أساساً نموه بطيء جداً أقل من المعدل الطبيعي ما اعرف ليش المهم ..
ماكنت أستعمل الزيوت بالمره ومع السنين والأيام والقرون صار شعري لين نهاية ظهري
وشعري ناعم وكيرلي ( ملفلف ) الكل كان يمدحه
بس ماكان يعجبني
المهم قصة شعري المعتاده ( مدرجة ) ما احب شعري يكون بطول واحد
وانشغلت وما مداني أروح للكوافيره فصحبتي الحت علي انها تسويلي شعري وتعدل التدريج قلتلها طيب
لانها كانت فنانة وتعرف للقصات وكذا
من هبالتي وثقتي اعطيتها شعري واستخريت
ولما خلصت ؟؟؟
طالعت بالمراية لقيت نفسي
" بويه "
مرة قصير نحتت لي شعري كله وربي يا بنات اقسم بالله
أقنعتني انه حلو علي القصير وزي كذا فمن غبائي اقتنعت
واهلي لما شافو خاصموني وهزأوني وصارت لي مشاكل
بعدين اكتشفت انها غيرانة وكانت تبغى تتخلص من شعري لانه شعرها خشن وضعيف هي طبعها ( غيورة البنت ذي )
المهم صحيت من غفلتي وبتجنن ابغى شعري طويل
لكن للأسف شعري مرة مرة قصير
وانا داخلة الحين على جامعة ومرة ما ابغاه قصير
والله فلوسي كلها راحت في الزيوت والخلطات ولا حياة لمن انادي ..
زيت أملا / ما يطول كثير عادي جداً بس يحسن من جووده الشعر المتضرر
زيت ام الجدايل / ما يسوي أي شيء يطول بس ببطء شديد و أصلا الكمية تجي قليلة مرة مايستاهل قيمته !!
زيت جوز الهند / سواء كان لحاله او مع الثوم ماهو ذاك الشيء
أخيراً نجي للزيت الخطير واللي احذركم منه
زيت الجدايل من عبدالصمد القرشي
والله يا بنات دايما اقرأ على شعري من العين ماشاء الله تبارك الله قوي قوي قووي ما تتساقط منه ولا حبه
قولو ماشاء الله خ !
والله يا بنات من اول إستعمال لهذا الزيت
وشعري يتسافط بشكل فظيع وربي
و لما وقفت الزيت ذا تدريجياً خف التساقط وصار التساقط خفيف جداً
بس من الاساس ماكان عندي تساقط
حسبي الله ونعم الوكيل
وأختي الملقوفة جربت منه من غير ما ادري وربي يا بنات نص شعرها طاح مع انها استعملته مرتين ووقفت
وسمعت عن تجارب بنات كثير من ورا هالزيت خصوصا اللي بصيلاتهم ضعيفة ونفس شعرتهم ماهي سميكة وتجي نحيفة مرة ينتبهو منه
هو الظاهر انه مركز بدرجة شديدة جداً مما يؤثر على فروة الرأس بشكل سلبي
انتبهو :(
وسوري طولت عليكم بس اتقلبت علي المواجع ..