بنات جامعة الأمير محمد بن فهد هيلب مي بليز

شوفي عزيزتي
انا نفسك متخرجه ، ورحت سجلت في جامعة الأمير
الي فهمته منهم
انه اول شي قدمي عاادي روحي مقر الجامعة هو بالخبر جمب بيتش ارامكو
وودي اوراقك وكذ1
بعدين بيحددون معاك موعد اختبار ومقابلة
الاختبار لغة انجليزية عشان يحددون مستواك
وهما مرنين في مواعيدهم يعني انتي تشوفين الي يناسبك
بعدين تختبرين عندهم وتسوين المقابلة وكذا
بعدين يردون لك خبر
طبعا في كورسات تحضيرية
( مبدتئ ، متوسط ، متقدم ، او ما يحتاج تحضيري انجليزي )
ف انتي مثلا لو حطوج مبدتأ
لازم تدرسين سنه ونص ( مبتدى بعدين متوسط بعدين متقدم ) بعدين تدخلين تخصص
بس مثلا انا حطوني متقدم خلاص بس ادرس المتقدم فصل بعدين ادخل التخصص الفصل الي بعده
صديقتي قالو لها ما يحتاج انجليزي فبتدخل التخصص على طول
يعني انتي ومستواج
بالنسبة للبعثة
هو الجامعه عندها نظام مدري لو هو نفسة الي انتي تقولينه
انه تدرسين كورس او سنه مو متأكده شنو الي لازم تدرسينه اول طبعا تدفعين لهل مدة الي درستي فيها
وبعدين يشوفون معدلج لو عالي و كنتي جايبة في القدرات فوق الخمسة وستين
يحولونج بعثة :
و بس
اما على الملابس انا رحت هناك وشفت يعني تقريبا كل البنات لابسين جينز
يعني عادي البسي الي تبينه بنطلون ، بلوزة ، تيشرت
احمر اخضر ازرق اي شي مو مهم على كيفج
مع مراعاة الإحتشام طبعا وهذا من قوانين الجامعه
أما على المبنى فهو قيد الانشاء
يعني الجامعه مو مخلصينها
بس طبعا في مبنى حق الطالبات وكل فتره يفتحون قسم في مبنى
و حلو يعني ونظيفة الجامعه كل يوم يمسحونها ههه
فمرتب المبنى
ان شاء الله اكون افدتك
وأتمنى لو في بنات بيدرسون في محمد بن فهد انه يكتبون انطباعهم عن الجامعه
وكذا :ق1:
والله يوفقج
دعواتكم بنات

يسلمو ع المعلومات
بنات بس قولولي كيف السنه التحضيرية تعتمد على ايش ؟؟ يعني دراسة الانجليزي فيها عن ايش ؟؟
والاختبار والمقابة اللي يحددونها لي كيف وش طبيعة الاختبار ؟ والمقابلة ايش ؟؟ يعني وش سالفته ؟؟ ابي اعرف كل شي بالتفصيل
بنات العام او هالسنة اللي يدرسون واللي مقدمين تعالو قولولنا بليز

التحضيري يعني تدرسين لغة انجليزي عادي
زي المدرسة بس يعني شو احسن
::
المقابلة المفروض مقابلتين وحده بالانقليزي عشان تشوف اللغة عندج
والثانية مدري يعني حق شنو بس مقابلة لول
لكن انا مثلا لمن رحت سوو المقابلتين في وحده اختصارا للوقت
عادي سألتي شتحبين وشنو تسافرين وشنو تبين تصيرين
يعني كوني مرتاحه وكل شي

احم ادري كثرت اسئلة عليك بس شسوي ماني عارفة ,, لان اغلب الجامعات مافيها مقابلة !
طيب كيف سوو لك المقابلة يعني بالانجليزي ولا بالعربي وكم سؤال تقريبا ؟؟ .. انتي كيف كانت اجاباتك يعني ؟؟ يعني تكونين دبلوماسية ولا عادي تفلينها << سوري كثرة اسألة !
وهل مثل مااسمع ان اذا مانجحت بالمقابلة مايقبلوني :s

بنات ياليت لو بس ترفعون الموضوع الله يعافيكم

السلام عليكم ورحمة الله وبركاته
اختي شموخ انا راح اعطيك كل المعلومات الي تبينها
انا اخوي سجل فالجامعة وراح اخليه يشرحلك طريقة تسجيله
اختي بالنسبة للمقابلة
المقابلة راح تكون بالأنجليزي لاكن لا تخافين او ترتبكين ان المقابلة بالأنجليزي
لان الأسئلة سطحية مش اسئلة معقدة
انا راح اقولك وش سويت فالمقابلة مع الأسئلة
اول شي دخلت غرفة فيها طاولة طويلة ( زي طاولة المقابلات الي فالأفلام خ )
وجالسين فيها اثنين ماسكين ملفي ويقرونه <<< انا مرتبك مرة
المهم جلسوا يقرون الملف ولما خلصوا جلس يناظرني وقالي لاترتبك راح نسئلك اسئلة عادية ( بالأنجليزي طبعا )
اول سؤال قالي وش اسمك : قلت له اسمي
الثاني سئلني ليه اخرت PMU ( جامعة الأمير محمد بن فهد ) : ما أذكر وش قلت بالضبط كنت مرتبك لاكني رديت عليه خ
وسئلني اذا كنت احب اتسوق او اروح للمجمعات : قلت ايه
قالي وش نوع الأسواق الي تحب تروح لها ( ملابس ألكترونيات محلات عطورات ) : قلت له ملابس وعطورات
وسئلني مين تظن يتسوق اكثر الرجال او الحريم : قلت له أكيد الحريم : ضحك وقالي ليه تظنهم
يتسوقون اكثر : قلت له لأنهم يحبون اي شي جديد : جلسوا ثنينهم يضحكون
قالي شكرا ولا تهتم مقابلتك كانت ممتازة <<<<< شكله لاحظ اني كنت مرتبك خ
قالو لي نتصل فيك بعد يوم او يومين
صح نسيت فيه اختبار الأنجليزي والمقابلة في نفس اليوم
بالنسبة لأختبار الأنجليزي راح يكون على الكمبيوتر
الأختبار سهل مافي شي تكتبيه يعني ( رتب الكلمات او خيارات وفيه بعض الأسئلة صوتية يعني يقولك رقم بالأنجليزي ويحطلك مجموعة ارقام وتختارين الرقم الي قاله )
وبعد يومين اتصلوا ....................
ألو؟ ...........
السلام عليكم.......
وعليكم السلام..........
معاك مدير القبول بجامعة الأمير محمد بن فهد انت اختبرت انجليزي وخلصت المقابة صح ؟.............
قلت : ايه نعم ...........
...............
قال : مبروك قبولك بالجامعة
وقالوا لي راح نتصل فيك قبل بداية السمستر عشان تجي وقالي اسم برنامج اوشي زي كذا
المهم انه عشان الطلاب يتعرفون على الجامعة وطريقة الدراسة بالجامعة
اتمنى اني افدتك اختي بهاذي المعلومات
وأي سؤال ثاني انا حاظر وموجود للخدمة

الله يعطيك العافية كفيت ووفيت ومبروك قبولك الجامعة وعقبالي ان شاء الله ...
الله يعينك على اسئلتي >> شكلك بالأخير بتقول ياليتني مارديت عليها < بس اعتبرني اختك ونشبت لك بالأسئلة ..
طيب بس سؤالين ..
1/ انا قالو لي من ضمن الاختبار اكتب مقال بالأنجليزي ؟ كيف ماسوو لك ولا شسالفة ؟ << انا بالأنجليزي مو مرا والله لا اجيب العيد ان كان فيه ؟
2/ وثاني شي الحين انا اوراقي فيصل بس التخصص ماابيه, طيب قبل لا اسحب اوراقي, اللي ابي اعرفه التسجيل بمحمد بن فهد مفتوح للحين ولا لا, يعني اقدر اروح اقدم اوراقي ولا بيشوتوني ؟
انت متى قدمت ؟؟ ومتى سوو لك المقابلة ؟؟
ويعطيك الف الف عافية =)
اعتذر عن كثرة الاسئلة ...

اي هذا السؤال هذا اللي احس انهم بيقبلوني ولا بيطردوني عليه ؟
ولاقالو ليه اخترتي جامعتنا وش اقول ؟ انت مدامك مقبول مشاء الله يعني اجابتك مضمونة اايش اجابتك واذا ماتذكر اجل ايش اقول لهم ؟؟ << طبعا هذا كله اذا فيه تسجيل للحين .. يارب

ربي يوفقكم
.......................