بنات قطر الغاليات همتكن ويايه

أم ميادي

20-10-2022 - 09:06 am

السلام عليكم ورحمة الله وبركاته.......
بنات قطر ..............عندي استفسار حول طبيعة العرس في قطر...............عاجل وضروري
يعنى .......حجز الفندق.....الكوشة ...........الكروت ..........الحلويات............... ..واسعارهم بليز
انا من الامارات ............واخوي بيتزوج باذن الله ...........وخطيبته قطرية .........وبصراحة محتاريين من ناحية المهر المقدم للعروس ....الشبكة كيف....؟؟ ....القنادق الزينه ......وأهم شي الأسعار ............؟؟؟
لا تبخلون علي بردودكم ...........اتمنى الاجابة اليوم اذا ما في ازعاج .... .....
واذا تعرفون اسماء صالونات حلوه وراقية ... ......بكون شاكرة لكم وبدعيلكم بالجنة ...آمين يا رب
بالتوفيق للجميع...
أم ميادي

التعليقات (4)

أم ميادي

20-10-2022 - 12:08 pm

زعلتوني ...............ليش محد يرد عليه ...............

*عطر قطر*

20-10-2022 - 01:09 pm

حبيبتي ....
احنا في قطر المهور تتفاوت ....
حسب البنت واهلها ....
بس أقل شي المهر 100 ألف أو 150 ألف ...
بالنسبه للقاعات ...
عندنا أهم قاعات الاعراس هي:
قاعة الدفنه في فندق الشيرتون .... ضخمه وايد وحجمها مبالغ فيه ... حتى لو تصغرت اتحسين المعازيم ضايعين فيها .... مادري كم بالضبط سعرها ((اكيد البنات بيردون عليج)) بس هي أغلى قاعه
قاعة سلوى في فندق الشيرتون بعد .... متوسطه وحجمها ايهبل للي عدد معازيمهم متوسط ... يعني اتشيل 300-500 شخص .....واسعارها ((الي اعرفه)) انها ممتازه ومناسبه بس مادري كم بالضبط (( ردوا عليها يا بنات قطر ))
قاعة الجيوانه في نادي الدانه ... كبيره وحلوه بس اذا معازيمج اقل من 500-600 ايضيعون... وسعرها بعد زين ومناسب ((يالله يا بنات... الهمه))...
قاعة الفورسيزنز (ماعرف اسمها..بس هي القاعه الوحيده للأعراس في هالفندق) .... وايد فخمه وحلوه وشوي غاليه بس والله سوري ماعرف الاسعار :(
قاعة الوسيل فالريتز كارلتون .... حجمها اوكي وحلوه وفخمه... وسعرها ................ مااعرفه :(
وفي قاعة الوجبه في فندق الانتر كونتننتال .... م ... زينه بس ديكورها شوي عنقاش والالوان مالها خص في بعضها لول.... وسعرها مااعرفه طبعاً
أما بالنسبه للصالونات ,,,
أحسن صالون فالدوحه صالون جاك ديسانج .... تسريحاتهم حلوه ... مكياجهم حلو ...
وصالون باتشي اي لوتشي في الرتز كارلتون ... ممتاز ..
وصالون يونيك ...
و .....
احسن مكان للكوش والطاولات عندج اثنين: المناسبات ..... والثاني اسمه ماسيس ....
المناسبات غالي شوي ...
ماسيس اسعاره تمام ....
والبطاقات والله مادري ... وايد ناس ايسوون الحين في لبنان ودبي مايسوون فالدوحه :(
اسمحي لي اذا ماافدتج وايد ... بس والله حاولت باللي قدرت عليه ... أكيد البنات بيردون عليج بخصوص اللاسعار
بالمبارك والله يوفقهم ان شالله

الجمان

20-10-2022 - 02:10 pm

حبيبتي اولا المهر مثل ما قالت 100 او 150 وفي بعضهم 80 على حسب العائلة
القاعات عندج افخم ثنتين الريتز وسعره شوي غالي يمكن فوق 60 الف والدانة قاعة الجيوان 42 الف
التنسيق والكوشة اكيد المناسبات بس غالي شوي وماسيس حلو واسعارة اوكي حتى انه مقارب حق المناسبات
البطاقات يا حبيبتي انتي من الامارات يعني احنا اهل قطر نجي الامارات نسوي البطاقات احلى وارخص بوايد
ودام عروستكم قطرية لاتحاتين هي اكيد تعرف الصالونات والل يمكيجون واحنا عندنا عبير ودينا اكثر شي حق العرايس
اما الشبكة طبعا اللحين محد يتعامل الا بالاماس عاد على حسب عروستكم

الجمان

20-10-2022 - 03:11 pm

اتمنى لكم التوفيق والله يتمم على خير عاد لاتنسين تعزمينا على العرس

بليز ساعدويني←
مكياج عرايس آخر نعومة روعة→