بهذي الطريقه يكون اعتذر صح

1. الى الان هي زعلانه منه تقول ليش مايعتذر ويقول اسف عالحركه اللي سواها

السالفه ومافيها انه زوجة اخوي انسانه طيبه جدا الله يسعدها وتعتبرني اختها الكبيرة وتستشيرني في كل امورها امس قابلتها عند امي وكانت متضايقه وطلبت من اخويا انه يتركها تبات معانا في بيت اهلي عشان توسع صدرها وتفضفض قالت انه اختلفت هي واياه على سالفه وكانوا في السيارة وهو عصب مرة وقلها ماابغى اسمع ولاكلمه والا اضرب راسك في القزاز حق الشباك((ماله حق في ذي الكلمه)) المهم هي من حرتها قالت استغفر الله العظيم قام هو ضربها بيده على جبهتها وقعدت تبكي وماكلمته بعدها ابد بعد دا الموقف بيومين قلها يلا ننزل السوق عشان حوايج العيد تقول رحت السوق قعدت الف كل المحلات يمكن استغرقت 5 ساعات ولا اشتريت ولا قطعه وهو يقولي اللي يعجبك خذيه وكل شوي يحاول يسولف معاي وانا طناش حسب قولها رجعت البيت يتكلم معاها ولاكأنه صاير شيء اليوم اللي بعده راحت سوق ثاني نفس الموال المهم وهي راجعه من السوق قالت له مالقيت في السوق ولاشيء يعجبني اعطيني الفلوس في يدي وبس قالها ميزانيتك حقت السوق 1000 ريال قالت له ماتكفيني ابغى كمان 700 ريال عشان الكوافير قالها على طول ابشري حتى هي تقول استغربت موافقته السريعه..

الى الان هي زعلانه منه تقول ليش مايعتذر ويقول اسف عالحركه اللي سواها

انا قلت لها هو يحاول يعتذر لك بس بطريقه غير مباشره وداك السوق وسابك على راحتك واليوم الثاني نفس الحكايه والمبلغ اللي طلبتيه اعطاك اياه بدون مناقشه على غير العاده مو كل الرجال عندهم الجرأة على المبادرة بالأسف حتى لو الغلط راكبه من ساسه لرأسه((زي حالة أخويه))
وقلت لها دا الكلام مو عشان هو اخويه اي واحده عاقله بتقولك نفس الكلام واقترحت عليها انزل موضوعها بالمنتدى عشان تشوف اراء ناس محايده
انتم اقروا واحكموا فضلا وليس امرا.......