تجربتي مع القلايه الكهربائيه

بسم الله الرحمن الرحيم
الحمد لله والصلاة والسلام على اشرف الانبياء والمرسلين, وعلى اله وصحبه اجمعين..
غالياتي...
قبل شهر تقريبا قررت اشتري قلايه كهربائيه.. فحبيت اني ابحث بالنت عن مميزاتها وعيوبها قبل ما اشتريها وكمان عن افضل نوع..
لكن للاسف لما بحثت ما لقيت جواب كافي ..
ناس تذكر مميزات وناس تذكر عيوب
وناس تمدح نوع وناس تذم نفس النوع
هنا احترت
وبصراحه تراجعت لكن
فرني احبه واحس القلي على الفرن يخليه ينعدم<<اول مره اقلي عليه من 4 سنوات قبل كم شهر
لا تستغربوا زوجي ما يحب المقليات كثير ورمضان نصوم عند اهل زوجي
طبعا لما قليت لاحضت انو تنظيف الفرن صار اصعب وقررت اتوكل على الله واشتري قلايه كهربائيه
من شان احافظ على فرني العزيز
وقبل كم يوم رحت السوق اللي بالحي ولقيت مولونيكس صغيره مره ب220 ريال حسيتها صغيره مره
وماتنفع يبي لي حجم وسط
وكان نفسي في كينوود واذا مره مالقيت اخذ تيفال وبعدها مولونيكس
المهم رحت لمحل ثاني وما لقيت الا اليكتا وحجمها حلو متوسط وسعرها جدا معقول ب140 ريال
قلت اخذها واجرب وسعرها معقول لو ما ضبطت مو حسافه
وبصراحه ماندمت الحمد لله مره ريحتني
قليت فيها سمك وبطاطس وكانت نتيجه جدا مرضيه
وندمت اني مو من اول شريتها
حاولت ادور لكم نفس صورتها مالقيت بس لقيت صوره قريبه منها
طبعا يابنات لكل شي مميزات وعيوب ..
لكن لو احسنتي الاختيار اكيد راح تكون المميزات تغطي على العيوب
بالنسبه للقلايه اللي شريتها ما لاحضت في اي عيب حتى كمية الزيت صح اكثر من القلي على الفرن بس يبقى نظيف وتقدري تستخدميه مره ثانيه
كمان احرصي تاخذي قلايه يسهل تنظيفها تنفك السله والوعاء اللي نحط فيه الزيت والغطا
ومن مميزاتها ايضا تخفف رائحة القلي
هذي تجربتي مع القلايه حبيت اقدمها لكم يمكن تفيدكم
لاتحرموني دعواتكم الحلوه
واتمنى تدعو لعمي بالشفاء العاجل