تجربتي مع تجمع الأخت الحنونة أكثر من رائعة و مستمرة بإذن الله

باسم الله الرحمان الرحيم
و الصلاة و السلام على أشرف المرسلين
و الحمد لله ربي العالمين كما ينبغي لجلال وجهه الكريم
إن شاء اللع عيدكم مبارك و ينعاد علينا جميعا بالصحة و الخير و البركة يا رب
أنا كنت مشتركة بدورة الأفعى الحنونة الأولى ، الي استمرت 7 أسابيع ، و جاتني ظروف سفر و مشاكل بالكمبيوتر ما قدرتش ننزل برنامجي في موضوع مستقل
عاد أول ما جاتني الفرصة واجبي ننزل البرنامج بش الكل يستفاد و يعم الثواب
و قبل كل شي ، أكيد واجب نشكر الأفعى الحنونة على قلبها الطيب و مساعدتها المستمرة
ربي يوفقها و يفتح عليها و يديمها ذخر للمنتدى
بالله أي وحدة تتذكرها تدعيلها بالتوفيق و السعادة على المجهودات الي تعمل فيها، أي وحدة أخرى كان ممكن تقدم استشارات بالفلوس ، لكن هي قلبها باهي و تحب الخير للجميع
و أكيد لازم نشكر المساعدة الي أشرفت على التجمع و ساعدت الجميع على حسب مقدرتها
و ربي يجملنا في أعين الجميع خلقا و أخلاقا
آمين يا رب العالمين
باسم الله
هذا البرنامج ، إن شاء الله تكون فيه إفادة للجميع
ب النسبة للبشرة ، البرنامج أكثر من سهل : الوقت ضيق و الصيف و البحر و من بعده رمضان و الضيوف ,,,,
المهم ، فضلت نعمل روتين يومي خفيف و ساهل
في الصباح كيف نقوم ، نغسل وجهي بصابونة مناسبة لنوعية بشرتي (أنا نستعمل صابونة فايد أوت للتفتيح، لكن أي صابونة ترتح استعملها)
و من بعد نغسل ، غسول مش ماسك بالطينة السوداء
تكون مثل الأحجار جافة نغلي ماء معدني أو ماء ورد و نصبه عليها و ممكن نضيفلها شوية عسل ، تستعمل مثل المقشر ، و الي تخاف من المسامات ة الي بشرتها حساسة تستعملها مرتين ولا ثلاثة بالأسبوع كافي
فايدتها : نعومة + صفاء + تفتيح لكن مع الإستمرار
و من بعد مسحة بماء ورد فرش على الوجه و الرقبة أكيد : ينور الوجه و يعطي نضارة و يسكر المسام و ينعش خاصة إذا كان بارد
و في اليل قبل النوم ،نغسل بالصابون أكيد و مسحة خفيفة من زيت الزيتون : العلاج الرهيب لكل مشاكل البشرة ، يرطب و يطري و يصفي و يفتح مع الإستمرار ، المهم تبعد على الشمس و الضو و انت حاطته
و نصيحة لأي وحدة عندها جفاف بالأقدام أو الأيدي : زيت الزيتون أحسن علاج بإذن الله تعالى
و بس بالنسبة للبشرة ، يعني الماسكات خليتها استثناء
و إذا مستعجلة الياغرط (الزبادي) وحده ماسك ممتاز للنضارة و التغذية
و إلا ممكن مع حلبة و فول و خمص و عدس مطحونين : ممتاز لكن لازمه صبر و استمرار
و إلا مع نشا و عصير ليمون
كلها مجربة و مفيدة
توة نجيو للنتائج الحلوة بفضل الله ( و للعلم أنا ماكنتش مواظبة مواظبة تامة و يومية لأنه جاني سفر و ضيوف ، لكن الحمد لله حاسة بتحسن)
أهم شي ، أكثر آثار الحبوب الي كانت زرقا على سودا على بني قلنالها باي في معظمها و الحمد لله ، ما قعد كان شوية آثار خفيفة تمشي مع الوقت
النعومة أكيدة
و التفتيح واضح ، موش بياض ، لا تفتيح و توحيد في اللون ، و الله حتى بعد ما مشيت للبحر و شمس وجهي و الحمد لله ما ظهرش عليه سمار مقزز ، لا حافظ على لونه ما شاء الله
و هذا بفضل الله نتيجة الصبر و التعاون و الإستمرار
توة الشعر : و ياعيني على شعري المسكين الي ديما يعاني من تجاربي الشريرة \ ههه
المهم ، أنا بالنسبة للشعر نسيت الخلطات و الزيوت و الخرابيط الي زادت الطين بلة ، و قلت خليني مستمرة على حاجة وحدة ساهلة و رخيصة و سريعة و ما نخسر شي مع الصبر
مشاكل شعري : جاف
مقص ف دمار من التقصف
ما يطولش
تساقط أكيد
و المشكلة الأدهى ، مع كل هالدمار أنا رافضة بتاتا نقصه ، رغم انه منظره مزري ، و الله جاتني بنت خالتي زيارة و كنت عاملة ضفيرة ، قتلي : شنوة الدمار هذا شعرك محروق حرق
لكن أنا تمسكت بالله و حطيت برنامج ساهل و مستمرة عليه بإذن الله رغم الي عايلتي ديما يضحكوا علي
أما عادي : اظل رغم الداء و الأعداء كالنسر فوق القمة الشماء
المهم ، طولت عليكم :
خلطة الزيت للطول و الكثافة و توقيف التساقط و النعومة: زيت زيتون ( أو أي زيت يساعدك) + فلفلة مقصوصة + مغرفتين حلبة مرحية + مغرفة جلجلان (سمسم) مرحي + مغرفة حبة سوداء ، و شوية ورق آس إذا متوفر
و نحطها تخمر في مكان دافي 10 أو 15 يوم و من بعد نصفيها و نزيد عليها مغرفة ولا اثنين عسل و نحطها في علبة ساهلة للإستعمال مثل علبة زيت كازانوفا أو ماي فار
و بالنسبة للكمية انت عينك ميزانك حيب الي يناسبك
و ممكن تزيد ثوم إذا حابة ، أما أنا تتعبني ريحته في الغسل
قلت بلاه
الزيت هذا نحطه مرتين أو ثلاثة في الجمعة مش أكثر (بش ما نتعبش فروة راسي و الشعرة تاعبة أصلا)
نحطه في اليل و نعمل مساج خفيف بأطراف الأصابع
و مرة في الجمعة استملت هالماسك الساهل والي بإذن الله مع الإستمرار يجيب نتيجة حلوة
زبدة حسب طول شعرك
زيت زيتون : العلاج الأفضل للتقصف
عسل
نخلطها حتى تولي كيف الكريم من غير لا نذوب الزبدة ولا شي
و نحطها على كل الشعر من اليل للصباح
بإذن الله تخفف الجفاف و تطري الشعرة و تخلي التمشيط ساهل و الشعرة هادية (و هذا الي حسيته) و إن شاء الله تخفف التقصف مع الإستمرار
و ربي يعين على الروائح الي لا تطاق ههه
و نصيحة للي تحب كثافة ، تجرب زيت الجرجير ، جربته ممتاز للكثافة أما ريحته تقتل \ههه
و مرة جربته مع زيت زيتون و لوز و ذرة قبل الحمام بليلة ، يعطي نعومة و طراوة جميلة للشعر
بنات و الله تعبت و أنا نكتب
يا ريت الي تدخل تدعيلي ربي يوفقنا في دراستي و ننجح في الباكالوريا بامتياز
و ربي يوفق الأفعى الحنونة أكيد
و أي استفسار أنا حاضرة ، من عني
اللهم وفقنا لما فيه خير لنا
حسبي الله الذي لا إله إلا هو عليه توكلت وهو رب العرش العظيم
أستغفر الله العظيم الذي لا إله إلا هو الحي القيوم و أتوب إليه
لا حول و لا قوة إلا بالله