تجربتي مع غسالة المواعين

السلام عليكم ورحمة الله وبركاته
اشتريت غسالة صحون من شهر تقريبا وحبيت تشاركوني تجربتي فيها
ماركة غسالتي اوجين ugine او يوجين
حجم صغير وهذي أول غلطة
مميزاتها
ريحتني من تغسيل الصحون بنسبة 70%
مساؤها
ما تجفف زين
حجمها صغير ما تاخذ مواعين كثييرة
أول ما شريتها ما أعجبني تغسيلها أبدا وطلع السبب طريقة ترتيب المواعين عندي غلط وهذا اللي يخليها ما تغسل زين
طبعا الغسالة تحتاج ملح وملمع وصابون وفيه معطر خصوصا اذا كنت بتحطين مواعينك وتنامين
الصابون ثلاثة أنواع مكعبات وسائل وبودرة في الكتالوج حق الغسالة ما ينصح بالمكعبات يقول أحيانا ما تذوب القطعة كاملة ويكون تنظيفها الله بالخير. البودرة قريت في النت وحدة تقول أنها تسبب خدوش خفيفة في الزجاج فأحسن شي السائل
الصحون اللي تدخل فيها الزجاج الستينلس ستيل الميلامين والصين وبعض أنواع البلاستيك اللي تتحمل الميكرويف
عندي كاسات بلاستيك حطيتها فيها أول غسلة حلو الثانية تمام الثالثة الرابعة....بعدها واحد من الكاسات انتحر فوقفت عن تغسيلهم بالغسالة
قدور المعدن ما تدخل مع الوقت يتغير لونها إلا إذا كنت بتطلعينها قبل التنشيف
التيفال لونه يقلب بني في الغسالة
البيالات والفناجيل المذهبة مع استمرار الغسل يروح التذهيب حقها لكن السادة ما فيها أي مشكلة
ترامس القهوة والشاهي تطلع لك خيال وكأنها مغسولة بكلوروكس لكن مشكلتها يدخل في وسطها موية كلما حركتيها سمعتي صوت الموية فيها يرج
الأباريق حلوة فيها مره لون الشاهي اللي يصبغ جوا اختفى
مرة حطيت فيها عيون الفرن والحدايد حقته وغسلتها لي بشكل حلو
الملاعق والسكاكاين والشوك تصير تلمع
بشكل عام ما بعد لقيت مشكله فيها الا عدم التجفيف والحجم
بعض الحريم ما عندها استعداد اذا بتغسل بعض الصحون تقول اغسلها كلها اصرف بالنسبة لي ما عندي مانع اغسل لي ترمس شاهي وقدر وكم كاس بلاستيك والغسالة تريحني من الباقي
والبعض الثاني يقولون مالي مزاج استنى ساعة إلا ربع انتظر حضرتها تخلص تغسيل عشان ادخل بالنسبة لي مستعدة انتظر
تغير نظامي قبل أحط الغداء أمسح دواليب المطبخ وأكنس الأرضية صرت وأنا ع الغداء أمسح كل الصحون بمنديل عن بقايا الأكل وأحطهم في الغسالة أغسل القدر والصينية والكاسات وأنظف الفرن وأروح أكنس البيت وأمسح السيراميك واذا فيه وقت غسلت الحمامات وارجع للغسالة افضيها كل هذا ياخذ مني ساعة وحده بعد ما كنت اجلس في المطبخ لحاله ساعة إلا ربع اغسل الصحون وأمسح وأكنس وأنظف
طبعا مثل ماأنتم عارفين الغسالة فيها أكثر من برنامج جربتهم كلهم ما لاحظت فرق كبير إلا كثرة استهلاك الموية وطول الوقت
أتمنى تكونون استفدتوا من تجربتي سواء لقيتوا إن الغسالة ماتستاهل تشترونها أو جزمتوا وشريتوها