تجربتي مع نقل العفش

بسم الله الرحمن الرحيم
السلام عليكم ورحمة الله وبركاته ..
اسعد الله اوقاتكن بالطاعات ..
وانا جالسه اتصفح المنتدى قريت هالموضوع
http://alfrasha.maktoob.com/alfrasha135/thread1621872/
فقلت اكتب موضوع مستقل حتى يستفيد منه عدد اكبر ..
طبعا أنا من تزوجت لي 6سنوات وبعد كل سنه أنقل من بيت لبيت ..فصار عندي خبره في نقل العفش << ههه شكلي بأفتح مؤسسة نقل عفش..
طبعا أول شيء أحب أنبه عليه ..
شركات النقل جدا مريحه تريحك من تعب الترتيب وغيره لكن لما تجين ترتبين البيت الجديد راح تنحاسين بالمره .. وفوق كذا فقدت اغراض حلوه كنت احبها كثير << جربتهم مره وما كررتها ..
اول شيء أنا أبدأ بالمطبخ ..
اجيب كراتين وأرتب الأواني فيها كالاتي:
الزجاجيات ارتبها في كراتين وأكتب عليها البيانات التاليه بقلم سبوره :
المطبخ : قابل للكسر : اكواب : رقم (1)
المطبخ : قابل للكسر : صحون : رقم (2)
واكمل حتى اخلص من الزجاجيات ..
وبعدها مثلا القدور واكتب :
المطبخ : قدور : رقم (7) مثلا ..
الترقيم ضروري
واكمل حتى انتهي من المطبخ كله .. وأنصح في البدء بالترتيب قبل النقل بمده كافيه حتى ما ترهقين نفسك أنا أبدأ قبل النقل بأسبوع تقريباً.
قطع الفرن أنصح بوضعها في كرتون مع الأواني لأنه في اخر نقل العمال الله يسامحهم كسروا علي مفاتيح الغاز..
الثلاجه نظفيها زين وطلعي كل شي منها قبل النقل بيومين على الأقل وافصليها من الكهرباء وخليها مفتوحه وفي يوم النقل سكري ابوابها حطي عليها لصق شفاف عشان ماينفتح الباب والعمال يشيلوها وتتكسر ولا تتمخش ..
وكمان الفرن لصقي الغطاء بالفرن لأن العمال مايهمهم ينكسر ولا لا ..
وبكذا تقريبا خلصنا من المطبخ ..
وسجلي في ورقه عندك او بالجوال ..
المطبخ عدد (12) مثلا ..
ثانيا : غرفة النوم ..
أنا أبدأ بالتسريحه اجمع العطور والكريمات والأكسسوارات وغيره في شنطه . وبأمكانك
تحطيها في كرتون وتكتبي عليها ..
غرفة النوم : ادوات تجميل : (13)
وفي كرتون ثاني حطي الاغراض اللي بالكومدينات وغيره
واكتبي مثلا :
غرفة النوم : كماليات : (14)
وبعدها نجي للملابس اول شيء في شنطه حطي ملابس تكفي كم يوم لك ولزوجك واولادك في شنطه ..
وبعدها إذا عندك شنط كفايه
رتبي الملابس وحطيها في الشنطه بالترتيب ملابسك في شنطه وزوجك في شنطه وكل واحد في شنطه .. عشان في البيت الجديد يسهل عليك ترتيبها يصير تطلعيها من الشنطه وعالدولاب مباشره ..
وإذا ماعندك شنط كفايه حطيها في كراتين واكتبي مثلا
غرفة النوم : ملابس ريتال : (15)
غرفة النوم : ملابس ... : (16)
وكملي حتى تنتهي من الملابس .
بعدها المفارش اطويها زين وحطيها بأكياس كبيره << أنا حطيتها في أكياس زباله وانتو بكرامه .. ورقمي الاكياس اكتبي
غرفة النوم : مفارش : (17)
أما الأبجورات والتحف سواء غرفة النوم او غيرها أنصح بأخذها معك في السياره لانها غالبا تتكسر مع النقل ..
واكتبي في الورقه عدد كراتين غرفة النوم مثلا (9)
ثالثا : المجالس وصالة الجلوس :
في نقلي الاول والثاني تركت الكنبات مثل ماهي للعمال يتصرفوا فيها .. لكن لاحضت انو الوسادات صار فيها سواد في المره الثالثه جمعت الوسادات في اكياس زباله كبار
ورقمتها مثلا
مجلس الرجال : وسادات : (19)
وزي كذا
وبكذا تقريبا ما يبقى الا القطع الكبيره من الاثاث ..
بعدها سجلي كم عدد الكراتين كلهاعشان تتأكدي انو ما نقص منها شيء
بعدها اكيد زوجك راح يكون مع العمال لما يشيلوا العفش خليه ينبههم على الكراتين اللي مكتوب فيها قابل للكسر
وحلو انو يجيب عمال ينظفوا البيت الجديد ويغسلوه من الى قبل ينزلوا العفش فيه ..
بعدها يخليهم يحطوا كل كرتون في المكان المناسب اللي مكتوب المطبخ يحطوها بالمطبخ وزي كذا..
يصير عليك إذا جيتي تبدأي باللي يناسبك ..
أنا أبدأ بغرفة النوم ..
أبدأ بالفرش ارتب السرير وارفع الفرش الثانيه ..
وبعدها الملابس ارتبها في الدولاب ..
اليوم الثاني :
أبدأ بترتيب الوسائد وما تأخذ وقت خاصه إذا نظفوا البيت قبل النقل ..
وبعدها التحف .
وإذا فيني نشاط .. اروح عالمطبخ وارتب او اخليه اليوم الثالث ..
وبعدها بقية الترتيبات ..
هذا اللي يحضرني الان لان اخر مره نقلت قبل 11 شهر بالضبط يمكن نسيت بعض الامور ..
اتمنى أكون أفدتك ..
تمنياتي للجميع بالتوفيق