تعبآنه ملآنه طفشآنه

طفشانه زهقانه ملانه
.
.
.
..
..
.
الطفش يسوي عمايل
ام
طيب ليش الطفش وش منه وش علاجه
اول سبب من اسباب الطفش هو عدم الحركه والتسدح
لو كل زوجه اشغلت نفسها بالبيت ماطفشت
لكن تلقون بيتها حوسه المواعين اللي تبي غسل مليان المطبخ بالارض وعلى المجلى
وباقي من عشاء البارح بالصاله وريحة البيت مقرفه وهي منجطله من امس نايمه على سريرها ماتحركت وتتصل على ابوهم جب لنا غداء ترى ماسويت اليوم
ياشين بعض الحريم فيها عجز يكفي الف حرمه
طيب لو قامت وتروشت واستعدت ونظفت بيتها وبخرته وعطرته وطبخت غداهم مهوب احسن من تسدح يجيب لها المرض والضغط والسكر والقولون
ترى الحركه هي النشاط والجلوس هو الكسل لاتفكرونه العكس
هالنوعيه من الحريم يبي لها كرف لين تدخن من التعب
يعني بالليل يازوجها ودها مكان ممشى وخلها تمشى لاتوقف الين تطلع ريحتها
.
.
بس خلها تلبس شوز رياضي يساعدها وانتبه تمشون في سوق يروح تخططيطم عالفاضي لانها بتشوف وتشتري لو مالها غرض
وانتبه تمر بها يم السوق ترى اذا شافته قامت تتنهد وتنشطت وراح الكسل
مدري بعض الحريم لاقين شي في هالاسواق اما بياع يلعب عليهم او شي ماندري عنه
حتى لو هي دبه يوريها البياع الكلوت بكل وقاحه ويقول لها ( شو بيجنن عليك ) نعنبوك استح ع وجهك وش يجنن كنك تقول شايفك وانتي لابسته هع
ولو هي دبه وجسمها مسوي تعاريج ومسطحات قال بيجنن عليكي عشان بس تشتري الكلوت اللي بمحلات عاديه بعشره ريال تاخذه منه 300 ريال لكن الشرهه على اللي خلاهم يبيعون لحريمنا وه بس
يالله سطحت شوي سامحوني
.
.
نرجع لموضوعنا
.
اسباب الطفش حبايبي زي ماقلت ( الكسل ) وبيني وبينكم الزوج يبي حرمه سنعه قرمه على قولتهم هبة ريح تقابله بابتسامه وكشخه وتودعه بزيها
اكثر الحريم الله يهديهن هن اللي يجيبن لانفسهن الطفش من قلة الدبره والسنع
النشاط يجيب النشاط والكسل يجيب الكسل شي معروف يكفي انتي وياها تربية شحوم الوحده كنها فقمه من كثرة الشحمان اللي عليها لالالالاع
.
.
كل يوم امشي انتي وزوجك اقل شي ساعتين وارجعي للبيت خوذي لك دش سنع بارد تشوفين شلون نفسيتك تصير وجسمك شلون يشد وكل شي تبين تسوينه عادي
ماتقولين كسلانه ولا زهقانه والله الرياضه لها دور مهوب سهل والكثير مننا ماقدر هاالنعمه اللي ببلاش ربي عطانا اياها
نصيحتي للزوج لاتنشغل وتتركها خل لها وقت تطلع فيه تمشي مهوب كل يوم تردد نفس الاسطوانه ترجع من دوامك تملأ كرشتك رز ولبن وتطيح بفراشك الى المغرب وتطلع تخليها للفجر شرب
شاهي ودخان ولعب ورقه وبلع من الاكل وكرشتك قدامك كنك حامل بالتاسع بعدها تجي تنام وتقوم تروح لدوامك الضحى وهذي حياتك اجل وشوله معرس يامال الصلاح
وزوجتك كل يوم يزيد وزنها شوي وتنفجر وانت تطالعها وتتطنز وتعلق على جسمها من زينك انت وكرشتك صاير ثوبك مرتفع من قدام ونازل من ورا من كبرها
حرام عليك ترى انت السبب باللي يصير لها .. لاطلعه لاروحه ولا جيه شلون تبي جسمها يزين وانت مخليها تبلع من هاالحلى وتتسدح وقهوه رايحه وقهوه جايه وشاهي
يعني حلى يزيد الوزن وقهوه وشاهي يجيبون الضغط اجل لاتلومها اذا امتلت امراض وسمنه من جميع الاتجاهات هع
اقل شي يوم بالاسبوع اكرفها ودها تمشي بمكان هادي وشوف النتيجه والسنع
ادري بنات اليوم ماشاء الله اجسامهن تهبل بس بعد الزواج يختلف الوضع والراحه النفسيه تزيد الوزن وتجيب كثر البلع <<< يعني الاكل
مصيرها برقبتك وانت المسؤول عنها وبالاخير ترى اللي تسويه من رياضه وسنع من صالحك
.
.
انا صح
تمسوا على خير