تعبانة من آلام الدورة لشهرية تعالي أقول لك وش تسوين مهم للجميع بنات ومتزوجات

ترى هذا الكلام مو منقول بل هو من واقع تجربة شخصية،ولحد الآن اقول هالكلام لأي وحدة تشتكي من الدورة وآلامها.
طبعاً الآلام وقت الدورة الشهرية أغلب البنات بيعانو منها،لكن بعضهم بعد الزواج تخف هالآلام.
والعكس صحيح فيه بنات قبل لا يتزوجوا تجيهم الدورة عاد مرور الكرام،لكن بعد الزواج تجيها الآلام والعذاب.
مااعمم هالقاعدة لكن الأغلبية كذا
طيب وش الحل؟؟؟؟؟؟؟؟؟؟؟
أول شي :متى ماحسيتي ان الدورة قرب موعدها،تناولي بندول ،او حبوب مسكنه ،عشان تخف عليك آلامها.
تروشي بماء دافيء
حافظي عل نظافتك الشخصية
عودي نفسك أنك أول ماتصحين من النوم،تشربين نص كاس ماء معاه ملعقة عسل أصلي وحبة سوداء.
الجوع وقت الدورة الشهرية مو زين،حتى لو مالك نفس ،حاولي.
ابتعدي عن المشروبات الغازية ،والأشياء الباردة.
اشربي شوربة ،واشياء دافية،وانصحك بشوربة الحريرة،روعة ومفيدة وقيمتها الغذائية عالية
دفي نفسك زين،ولا تتعرضين للبراد،والمكيف
لا تمشين على أرض الرخام الباردة وانتي حافية القدمين.
لا تشيلين شي ثقيل وقت الدورة،واتركي عنك الهبال والركض والركيض خليه عنك.
سوي لك زمزمية ،او ترمس من الشاهي السحري.
أول شي الله يجزى الدكتور عبدالباسط كل خير ويوفقه دنيا وآخره،لأن فيه كثيرين استفادو منه،وبالذات بعدما تكلم عن فوائد البردقوش.
والحين بتقولون لين وش هو الشاهي السحري
والله العظيم انكم بتدعون لي.
جيبي بريق كبير ،وحطي فيه موية ،ونص فنجان سكر،لا تكثري السكر،وجيبي نعناع مجفف،وبابونج،وبردقوش،ومرمرية،وكم عود قرفة،وكمون.
طبعا النعناع والبابونج والبردقوش والمرمرية والكمون كل واحد منهم ننقعه زين بماء حار وبصحن لوحده،ونكب الماء ثم نرجع نغسله زين ،لين مايصير ماء الغسل نظيف وخالي من التراب.
وبعدها نحطهم في البريق،ونجيب كم عود من القرفة ونغسلهم ونحطهم بالبريق،واشربي منها أول ماتصحين من النوم ،طبعا بعد كأس الماء المضاف له العسل والحبة السوداء،وكل ثلاث ساعات اشربي وقبل النوم اشربي،وأذا خلصت سوي مرة ثانية،مو قولين وع مر،لا تكثرين السكر بس المقدار اللي قلته.
وترى المرمرية والبردقوش يخففون آلام الدورة،وينظمون الهرمونات،والبردقوش ينظم الدورة اللي مو منتظمة،والله العظيم يابنات على الله ثم على هالشاي السحري اللي صرت مااستغني عنه،ابد،حتى قريباتي المتزوجات صارو يشربونه.
والشاهي السحري مو بس وقت الدورة حتى الأيام الثانية،ممكن تشربينه مرة باليوم.
ودمتم بود
وأخيراً
مابي إلا دعوة منكم إلا دعوة من قلب (من جد محتجة لدعاكم ،وترى الملائكة بتقول ولكي ياأختي بالمثل)
أن رب العالمين يكتب لي التوفيق وادخل التخصص اللي ابيه،ويحقق اللي في بالي ويجعله من نصيبي عاجلا غير آجل ويسهل امورنا ويتمم لنا على خير.
واي وحدة بتدعي لي من قلب عسى ربي يحقق لها كل اللي تبغاه ويوفقها وين ماتروح ويسخر لها خيرة خلقه،ويبعد عن الحرام واهله،ويسعدها دنيا وآخرة،ويجمعني بها بجنة الفردوس الأعلى،ويثبت قلوبنا على دينه.