تعبت من زوجي والله تعبت

السلام عليكم فراشات اول مرة اكتب ليكم ولاني واثقة فيكم وما عندي غيركم افضفض ليه مشكلتي هي اني متزوجة صار لي ثمان سنوات وعندي ثلاث اولاد كنت مرتاحة من زوجي وعايشة وياه حياة سعيدة على الرغم من ان ما كان يشتغل شغلة دائمة شهر يشتغل وشهرين ثلاثة قاعد في البيت بس كنت مرتاحة وياه واصبره واقول ليه انشالله بتحصل شغلة زينة وبترتاح ويوم عنده ويوم ما عنده وقفت وياه وقفات وساعدته بالي عندي كله قصرت على نفسي بس اشوفه هو مرتاح بس كنت صدق مرتاحة وياه ولانة اني احبه واموت فيه كنت صابرة وياه وما يطلع الا اني وياه على طول وياه بس من اربع سنوات اشتغل عسكري والحمدلله ارتحت واتعدل حالنا لكن للاسف السعادة ما اكتملت مرة وحدة اتغير علي ونسى اللي وقفت وياه وساعدته وصبرت وياه على الحلوة والمرة قام يتعرف على بنات ويطالع صور وافلام اباحيه في التلفونه والكمبيوتر وتلفونه كل ارقام بنات ومسجات واذا اواجه يقول لي انا ما سويت حرام ولا سويت شي غلط وهو الحمدلله يداوم على الصلاة ما يخليها بس اني اعصب واصيح ويقول انتين مو مقصرة وياي واحبش بس هادة الشي يسري في دمي ما اقدر اهده يقصد البنات وهالسوالف وانا قاعد اسوي حلال مو حرام بس اني ما اقدر اتحمل اللي اشوفة
ساعات اسكت واصبر وساعات اتمنى الموت والله العظيم وطلعاتة كثرت ما يقعد في البيت قد ما يطلع
يا نايم يا في الدوام يا طالع لا يطلعني لا يطلع اولاده ولا يقعد وياي والله حاسة اني مو متزوجة لانة ما اشوفه كلمته وعجزت بس بدون فايدةالاول ما كان جدي بس ما ادري ويش اللي غيره اقول ليه طلقني انت ما تبغيني يقول لا بلعكس انا احبش وما ابغي زوجه غيرش بس ماني قادرة اتحمل الا يسويه اعطوني حل ترى والله تعبت ويش اسوي واللي ما عندها رد تدعي لي الله يخليه لي ويبعد عنه بنات الحرام