تكفون أبي رايكم بها الزوجة

مرحبا فراشات
كيفكم إن شاء الله تكونون بخير يارب
حبيت انقلكم قصة وحدة قالت لي اياها وماقدرت افيدها احترت
قلت مالي الا فراشاتنا الغاليات نشاورهم ونستفيد منهم واللي ماعندها راي يكفينا دعواتها الله يجزاكم خير ويوفقكم
هذي الله يسلمكم وحدة في النفاس يوم من الأيام راحت لبيتها يتجيب بعض الأغراض وقالت خلني أفتح جهاز زوجي(الكمبيوتر) وفتحته ولقت فيه العجب
انهبلت انهارت لأنها ماكانت متوقعة انه يشوف هالأشياء بحكم انه انسان محافظ وراعي صلاة وضاق صدرها ماتدري هو الغلطان والا هي مقصرة لأنه كان يقول
لها دايم تعالي كملي النفاس في بيتك مع العلم بأن هذا ثاني طفل لهايعني ماتقدر تروح لبيتها بدري لأن مافيه احد يراعيها
بعد ماشافت هالأشياء سكتت ماقالت شي
وماعرفت تتكلم وجهزت له رسالة بس هي محتارة ترسل الرسالة له والا تواجهه وتقول له والحين لها يومين على ذا الحال تكلمه عادي بس تقول مبين ان في خاطري شي
اكلمه بدون نفس ،،، انتو وش رايكم ؟؟؟؟
أتمنى تفيدونا
عموما ماأطول عليكم هذي هي الرسالة.....
زوجي الغالي ......
يمكن ماعندي الجرأة اني اواجهك بالموضوع وفي نفس الوقت ماأقدر اسكت على اللي قاعدة اشوفة تعبت وانا ساكتة انحرق دمي وتلفت اعصابي
وكل يوم افكر في الموضوع وحسيت اني اتعب اكثر واكثر ذبحني التفكير
انا اكتشفت انك تناظر اشياء والله ماأقدر اوصفها انهبلت يوم اكتشفت هالشي يمكن ماأقدر أوصف لك شعوري وقتها
(صور خلاعة ، فيديو جنس وصور بنات مالها داعي وأشياء ماأقدر أقولها......)
والله الفرق بين اللي قاعدة اسويه عشانك واللي قاعد تسويه انا اهتم في نفسي وشكلي وبيتي واشياء كثيرة والله عشانك بس!!!
وانت تشوف اشياء تدمرك وتدمرني لاتقول ماتدمر حياتنا ؟!!!! لان هالأشياء سبحان الله تأثر عليك وبعدين علي... أنت فاهم قصدي!!!
وإذا ماراح تترك هالشي عشاني ولا هميتك اتركه عشان ربك ومن ثم عشانك انت وعشان ذريتك
وأحب أذكرك ببعض الأشياء:
ربي معطيك ذرية وزوجة حافظ على نفسك عشان تحافظ عليهم
ربي من عليك بنعمة الحج ولله الحمد المفروض ماترجع لذنوبك الي كنت تسويها أحمد الله على هالنعمة
ربي عطاك نعمة البصر اشكر الله عليها بالنظر الحلال كم واحد غيرك يتمنى هالنعمة
وسبحان الله النظر الحرام يقودك للفعل الحرام
كيف تغار على زوجتك وانت مافيك غيرة على نفسك اصلا
واطلب من الله حسن الخاتمة لايجيك ملك الموت يقبض روحك وانت تناظر هالاشياء كيف بتواجه ربك ؟؟ ترضى انك تحبط أعمالك من صلاة وصيام وصدقات
وفعل للخير عشان مناظر سخيفة مامنها اي فايدة الا الذنوب والوقوع في الحرام واحمد الله ان عندك زوجة تحصنك
والسؤال الأخير عطني فايدة وحدة بس من النظر للأشياء هذي؟؟!!

• إذا انت مقتنع بالي جالس تسويه لا تكلمني ف الموضوع ولا تفتحه معي

وإذا انت مااقتنعت رد علي وكلمني ..... أنا في انتظارك
زوجتك اللي تحبك اولا وبعدين تغار عليك وتخاف بعد عليك وعلى بيتها
لا تخلونا من ردودكم الحلوة ودعواتكم الأحلى
تحياتي