جهد شخصي يستحق النقاش ليه البنت تطلب الطلاق بدون سبب ومن غير شعور بالمسؤلية

>>>>>>>><<<<<
بسم الله الرحمان الرحيم
السلام عليكم ورحمة الله وبركاته
والصلاة والسلام على خاتم الأنبياء والمرسلين
نبينا محمد وعلى آله وصحبه ومن تبعه بإحسان إلى يوم الدين
ماتلاحظن شي غريب يابنات
أحس هالأيام البنات فيهن وش على خربطه
في مخوخهن
والله العظيم ماتدرين وش تبي
مهوب كلهن بس الأغلب
يعني تقعد تتمنى الزوج
وتدعي وتبكي وشوي تحب السماء
أعذرني بس هذه الحقيقه
تعمل المستحيل حتى تتزوج
وبعدين بكل بساطه إذا تقدم لها الشاب وقبلت فيه بكامل إرادتها
وتكلف وسوا عرس كبير
وخسر مسكين والله بعشرات الألوف
وتلاقينه تدين إلين قال بس
علشان يفرحها وماظل شي ماسواه بالزواج
والشقه وأحيانا السفر
بعدين بكل بساطه
تجي تقول ماأبيه
والله كثير سمعت عنهن كذا
من أقاربي وأقارب زوجي
ومعارفي وصديقاتي
يالله وش قصدهن البنات
ليه كذا
والله تشوفينه بيموت عليها
وهي ولا شي
حتى أحيانا تكون مخلفه وجايبه عيال
وبالأخير تقول ماتبيه وعيالك خليهم عندك علشان تربيهم أنت
أنا بتزوج وأشوف حياتي !!!!!!!!!!!!!!!!!!
خليني أعلمكن ببعض القصص
القصه الأولى
زوجها يشتغل بشركه
وإجازته بس يوم الجمعه
يشتغل 12 ساعه
علشان بس ماتكون أقل من غيرها
كل طلباتها مجابه
وعندها طفلين
أصغرهم عمره تقريبا سنتين وزياده
المهم فجأه قالت ماتبيه
ليه سلامات وش القصه
قالت ليه عذرا فراشات بس بكون صريحه شوي
قالت ليه مايعطيني حقي الشرعي إلا مره بالإسبوع
قال هو أنا والله أجي هلكان
علشانها وعلشان عيالها
مافيني حيل
تخيلن 12 ساعه مهيب بسيطه!!!!
قالت بكل أنانيه لأنها تناست إنه يتعب علشانهم
قالت ماأبيه أنا توني صغيره وبتزوج غيره
وعياله خليهم عنده يربيهم إذا صاروا عندي ماأحد بياخذني
الله أكبر
وين عاطفة الأمومه الله أعلم
القصه الثانيه
زوجها مدرس
وأمه مدرستها في الثانويه
خطبتها لأنها عاجبتها
ماتوقعتها كذا!!!
المهم
تزوجت وخسروا بالزواج 170 ألف
وراحت معه ماليزيا شهر كامل
تخيلن
مهوب إسبوع وإلا إثنين
لا شهر كامل
وبعدين رجعت حملت
قالت خلاص بروح لهلي علشاني تعبانه
قال خلاص ياعمري روحي
المهم راحت ولا رجعت
ظلت طول فترة الحمل عند هلها
حتى بطنها ماشافه لما كبر
ولدت وجابت بنت
ولا رضت ترجع له
علما بإن بنتها هاللحين بتغلق السنه!!!!
وإذا راح لها تطلع له البنت يشوفها
ولا تقعد معه أبد!!!!
وش تحس فيه مدري!!!
قال لهلها وش السبب يقولون تقول ماتبيك وبس!!!!
سلامات وش شافت مني ماشافت شي بس ماتبيك ومانقدر نغصبها!!!!
وبزيد قصه بعد
في وحده قعدت مع زوجها سنه مخطوبين
أنواع الهدايا يجيب لها
وهي بنت عمه
وبعدين سوا لها زواج وسافرت شهر عسل
ويوم جت قال لها يافلانه
إغسلي ملابسي
قالت بعدين العصر
جاء العصر
قالت بروح بيت هلي
وإذا جيت غسلتها
المهم قال لها طيب
وراحت بيت هلها ومارجعت!!!
قالت أنا ماأغسل ملابسه
أنا ببيت هلي ماعمري سويت شي
كيف يبيني أغسل ملابسه!!!!!!!!!!
(سلامات ليه متزوجه)
قال لأبوها
قال أبوها إيه بنتي في بيتي معززه مكرمه ماتجي عندك تشتغل لك
سلامات وش هالعقليه
المهم جاء بيشتكي عليهم علشان المهر يرجعونه
قال أبوه والله ماتدخل عمك محاكم
طلقها وأنا أعطيك من ريال لمية ألف
بس لا تسوي مشاكل
وطلقها وتزوج واللحين مبسوط
وهي مدري عنها بس تتوقعن مبسوطه!!!!!
ووحده ثانيه
تزوجت وسافرت مع زوجها لبرى السعوديه
علشان عنده بعثه
المهم تخيلن تطلع كل يوم بدون إذنه ولا تعلمه أصلا تتمشى وتتسوق
وهو في المعهد
بعدين ربعه قالوا له يافلان مايصلح خطر على زوجتك
خليها تطلع مع زوجاتنا أحسن
أو معك أنت أفضل
المهم
لاحياة لمن تنادي
طبعا مارضت هو ماحب يسوي مشاكل
خلاها على كيفها
ويوم جو بالإجازه السعوديه
قالت له ماتزور أمك وأختك
يا أنا ياهم
قال لها ماقدر ذولا هلي
قالت لا قال هذاك تزورين هلك
المهم ومارضت وسوت مشكله وراحت المحكمه وسوت سالفه
وقالت مايصلي ومدري وشو
وقالت فيهم كلام ماينقال علشان تتطلق
المهم تطلقت والشيخ حكم له بنص المهر
وتزوج وحده مره مبسوط معها
وأمها اللحين سافرت للعلاج وجالسه عندهم
وبنت الناس محترمه بالعكس مرحبه بها شفتوا كيف الله عوضه
بوحده تحبه وتحب هله
والشاطره الأولى
يقولون تزوجت واحد على قد حاله
راتبه بسيط مره
بعد ما كانت تلعب بالفلوس لعب
اللهم لا شماته
بس دعوة المظلوم
القصه الأخيره
مع عندي قصص كثيره بس يالله
نكتفي بما ذكر
يقول لك الزوج وسيم جدا
ويشتغل بأرامكو يعني راتبه أقل شي لأنه موظف قديم شوي 14 ألف
ومعيشها ملكه وكان بينهم قصة حب عظيمه
الكل يتكلم فيها
وعندهم ولدين وبنت في الإبتدائي
وفجأه رفعت عليه قضيه ماتبيه
!!!!!!!!!
ليه وش السبب مقصر في شي
له علاقات له سوابق ماسكه عليه شي
لا رجل محترم
ولكنها ماتبيه علشانها تعلقت في مهند اللي يجي في الأفلام التركيه!!!!!
الحمد لله رب العالمين
شر البلية مايضحك
يعني جد هذولا البنات اللي يتصرفن كذا وش يحسن فيه
يعني بالله عليكن وش تقول
اللي زوجها سكير والعياذ بالله أو راعي بنات أو راعي سفر
ويضربها بالطالعه والنازله ولا يصرف عليها وعلى عيالها!!!!!
وش تقول الأرمله اللي تشم ريحة ثياب زوجها بكل ليله
وتبكي ليته بس موجود
ويشيل عني الحمل
ضعت من بعده
وش تقول المطلقه أو البنت
اللي تتمنى رجل أو نصف رجل
ولا كلام الناس اللي مايرحم
وسيطرة إخوانها عليها !!!!!
ليه حنا كذا نرفس النعمه برجلينا !!!
ليه تساهلنا بحق الزوج وتساهلنا بكلمة الطلاق
مع إنه الوحده لو سألت زوجها الطلاق من دون سبب
حرام عليها رائحة الجنه
تخيلن الرائحه يعني مهوب بس الجنه
ليه الأمهات صرن كذا
وماعندهن شخصيه لا تعرف توجه بنتها ولا تنصحها
ولاتعقلها إذا لزم الأمر
ليه تظن كل وحده إنها بتاخذ أحسن منه لا تطلقت!!!
سلامات يالشيخه
ترى البنات مهن لاقيات أزواج
تجين أنتي اللي سبقت لك تجربه وعندك عيال
بتلقين أحسن من اللي أخذتيه
وأنتي أصلا ماتطلقتي إلا ظالمته معك
خافي ربك يدعي عليك وتصيبك حوبته
يابنت الحلال
زوجي يقول والله
الشباب الجديد الكامل
اللي ماسبق له تجربة زواج
بيدور على اللي مثله
عذرا بس هذه الحقيقه
ماراح ياخذه وحده لها تجربه قبله
نادر جدا
يعني بالأخير بتاخذين واحد
يامطلق يامتزوج ووحده تشاركك فيه
ياماعنده وظيفه سنعه
فكرن الله منعم عليكن ليه كذا
تسون بأنفسكن
وهلكن ترى ماهم بدايمين لكم مردكن لزوجة الأخ والله الله وش راح تسوي بكن
وإلا زوج الأخت والله العالم وش معدنه
إتقين الله في أنفسكن وفي هالضعوف
اللي جبتوهم للحياه وتبن تدمرن حياتهم بإنفصالكن لأسباب تافهه
هذا اللي أقدر أقوله
يالله هاللحين يافراشات كل وحده
تدلي بدلوها وتقول لنا وش الأسباب لهذه الظاهره الغريبه
من وجهة نظرها يعني ليه البنات تتطلق بدون سبب وبدون شعور بالمسؤوليه
المايك للحلوات