.,[...حـڪٱيـٱټ ڂـبڷے يـٱٳٲړ ...],.

طراني اوب احب المقدمات
بدخل بالموضوع سيدا سيدا وأخذ يمين << سوو نفسكم ماقريتو
انا واعوذ بالله من كلمة انا أحب السباحين
"والسباحين هي القصص القصيره ويمكن تكون طويله حسب كمية التسذب اللي فيها" >> التوضيح هذا لجيل النيدو
من كثر حبي للسباحين سميت نفسي بالبلوتوث خبله يار مثل شهريار ام سباحين الف وليله تسذبه .. >> ترى لقب ريما ستايل للفشخره بس ولا ماحولكم أحد
عاد لاتحسبوني إحتك في شهريار مدري إسبوع يار ترا سباحيني اطلتس من سباحينه بمية مره ..
ولا عشان عندها سلطان وواحد بيغولونه تشوفنها احسن مني مالت عليكم >>>محد قال شيء
عاد الله وأكبر يالسلطان ..كومار سواق جارة خالة أمي لو نلبسه باروكة وكم سلسله وخواتم من قراشيع أبو ريالين يطلع ولا السلطان برناوي في زمناته >> قلبت شاميه
ونجيب إثنين متعافين الواحد كنه باب أبو صفاقتين ونمسكهم عراجد ونخليهم فوق راس السلطان يهشون عن وجه الذبان وكل شوي يصيحون
مولاي مولاي
وخلاص صار عندي سلطان والي يبي يغوله السلطان هذا عليكم شوفو لكم عضوه ماتحبونه وأشروو عليها ونخلي السلطان يغولها ..
طراي دخلت جو مع التسذبة اللي فوق
السلطان :
خبله يار مابالك شاردة الذهن ياملك الضعفه ألن تسبحني علينا سبحانية من سباحينك السقيمه !!
>>كم مره قال السلطان سبحانيه ؟؟أحسبها صح وأرسل الأجابه للسلطان تحصل على مهفة عسيب موديل 96
خبله يار تتحلطم :
بلا سوف أسبحن سبحوك بمويه بارده بعز المربعانيه ولكن ريقي يابس هل لي بقدح من الماء قاتلك الله ؟؟
السلطان :
أيها الحاجب أحضر لها قدحا من الماء خلها تطفحه ونخلص
قم قم قم قم قم >>صوت خبله يار وهي تشرب بالوعه مو حلق
خبله يار:
أع
السلطان :
مر وحرقان وتكه
خبله يار تقول بينها وبين نفسها :
يمرك قول أمين
إحم إحم
خبله يار تتعدل في جلستها وتستعد لتقول حكايتها :
كان ياماكان في حاضر الظهر والأوان ..كان هناك شاب إسمه طعفج >> إسمه بروحه نكبه الله لايبلانا
يعيش في قرية صغيره لكنها بعيون أهلها كبيره .. >>طراها شارع ومسجد وأثلتين
وأهم معلم حضاري فيها بسطة أم سعيد اللي تبيع فيه توت مثلج للبزارين وديرم للحريم و صراويل
مكسره للرياجيل
>> مو كأني سويت لها دعايه تستاهل هي خشيمها الي تقل خيمه أم أربع عمدان
طعفج منذ نعومة مخالبه كان يحلم بأن يكون رجل ثقافه ويألف كتب وروايات ويطيح سوق القصيبي ..ويطلع في القناة الأولى ويستضيفه المذيع ماجد الشبل في نشرة أخبار إستقبل وودع ..
المهم كبر طعفج وكبر الحلم بداخله لكن الحظ لعب في حسبته فكلما أرد أن يقترب من الثقافه يطيح في اللقافه ..
ذات ليله جلس تحت جدار مسجد القريه يهوجس بحلمه القديم شوي إلا مرزوق خويه شايته مع رجله ويقوله :
وشفيك ياخوي مغير تهوجس على بالك الموناليزا أقول قم بس خلنا نروح نتشتش على الجدران ترى بكرى مبارة فريقنا الهلال ولا نسيت
خلنا نقهر مقراط وهو فريقه الخايس
"مرزوق بإختصار شاب سعودي بجسم إفغاني ,, وجهه كنه وجهه نبيل شعيل ماص ليمونه .. دلخ بكل ماتحمله هذه الكلمه من معاني .. هدفه في الحياة يدوس ببطن مقراط وبعدها يمووت .."
طعفج يقوم يجيب رجله الي وصلت لراس العاير من الشوته ..>> قويه صح :40 6:
وهو راجع قال في نفسه هالمره ماراح أطيع مرزوق وبترك الحركات الصبيانه >>أوخس يالمثقف
شوف يامرزوق أنا ماني رايح معك رح تشتش بروحك
مرزوق :
أفا لايكون مقراط الهيس مهددك ؟
ماهقيتك تطلع جبان ؟ >> بكسر الجيم
طعفج :
يخسي يهددني بس أنا الحين مشغول بالثقافه
مرزوق يبط على الارض وتطيح البخاخات الي بيده >> يحلفون إن ذيك االليله أهل القريه حسو بهزه خفيفه يحسبونه بداية زلزال
أقول طعفج تكفى أنا خويك انا بعد أبي منها
طعمها زين ؟؟
طعفج :
وش الي طعمها زين ؟؟
مرزوق :
هذي الي قلت عنها الثقافه
طعفج :
هذي ماهي أكل يالخبل
هذي تخلي الواحد رزه
مرزوق يحك راسه ..:
يعني زي شماغ المراسيم
طعفج :
أقول وراى ماتلايط
إذا كبرت عرفت معناها
مرزوق جمع بخاخاته وقام
عساني عمري ماعرفتها
قوم نخلص شغلنا قبل الصبح
.
.
.
طعفج امام خيار صعب
هل ينسى أمر الثقافه هذه الليله فقط ويذهب مع مرزوق ؟
أم يرفض الذهاب ويكون عرضة لشماتة مقراط ؟
هذا ماسوف نعرفه في الحلقة القادمه من حكايات خبله يار على كوكب أكشن كوكب الغموض والتحدي
.
طبعا إذا شفت منكم تفاعل
.
.
تحذير كبر خشم مرزوق :
أبطال وأحداث حكايات خبله يار نسج من الخيال وليست من الواقع لحد ينط في حلقي ويقول ليه ووشوله ووراه ووشو تسذا
الحكايه سبق ونزلتها في منتدى تاني
>> طراي حذرت بكل اللغات والي بخاطره يشكي لايقصر الكفاله جاهزه
لكل من مرهنا ( )