حبيبة قلبي خدامتي

بعد رحلة جميلة قضيتها معكم في 9 قصص ...بانزل اليوم العاشرة ...والاخيرة...لسلسلة ازواج وزوجات بقالب كوميدي نال استحسانكم ولله الحمد
واعتقد اني المرة الجاية باجيب سلسلة بس بقالب تراجيدي >>>لاني اجد نفسي اكثر وسط الدموع...الله لايجيب االا دموع الفرح...امين
لكن بنستعرض اول القصص السابقة بحلوها ومرها
القصة الاولى : الزوجة الهبلة (ام الثقة العمياء )
1 ****** ر جلي (بفتح الراء يحب الزين )
:::::::::::::::::::::::::::
القصة الثانية : الزوجة الحريصة القلقة
2 ***** زوجي..ولاحتى يحلم بيها
::::::::::::::::::::::::::::::::::::::
القصة الثالثة : الزوجة الناقدة المعيبة لتصرفات زوجها
3 ***** زوجي طفل وافشيلتاه
::::::::::::::::::::::::::::::::::::::::::::
القصة الرابعه : الزوجة الغيورة المزعجة
4 **** جارتي مشكلتها انها ( حلوة )
:::::::::::::::::::::::::::::::
القصة الخامسة : الموظفة الناجحة في عملها الغافلة عن زوجها
5 **** الناس تصفق لي وزوجي يصفقني!!
::::::::::::::::::::::::::::::::::::::::
القصة السادسة : الزوجة الخجولة الحساسة
6 ****** زوجي وتلميحاته الجنسية
::::::::::::::::::::::::::::
القصة السابعة : الزوجة السمينة
7 **** مذكرات سمينة
::::::::::::::::::::::::::::::::::::::
القصة الثامنه : الزوجة اللحوحة المشاكسة
8 ***** يجي يوم وامسك الدركسون واسوق
::::::::::::::::::::::::::::::::::::::
القصة التاسعه : زوجة طموحة لكن مستسلمة
9 ****** فضفضة مجالس والحال هو الحال
::::::::::::::::::::::::::::::::::::::::::
القصة العاشرة : ماقدر اوصفها الا ب ( كالمستجير من الرمضاء بالنار )
:
:
:
تعبت!!
تعبت من شغل البيت
العمر يخلص وهالمواعين ماتخلص!!!
انا اشك انها تتوالد!!
اكيد!!
طيب جربوا حطوا كاسة عالمغسلة ( المجلى ) وشوفوا ايش يصيرلها!!
تخلف...!!...تنجب...!!....مو مصدقين!!...
"
"
:
:
"
"
:
:
>>>> حتى انا !!
طيب .....اجل ايش سر تكاثرها بعد كذا؟!!\
يعني ليه نرجع نلقى ان الكاسة صارت كاسات...والملعقة صارت درزن..والصواني صارت قبيلة لحالها!!
اها ...... يمكن ينادون بعضهم؟!!
ممكن...هذا تفسير اقرب للحقيقة!!
احيانا اتضارب مع الصحن عالمغسلة : اقول الحين انت كم مرة مار علي اليوم؟تقدر تعدها؟!! واحيانا
اعاقبه ماغسله...يقعد يستنى مناوبتي للدفعه الي بعده..اصلا مافيه مناوب غيري..انا بس الي
اغسل..وامسح واكرف...عيالي صغار ومافيهم فايدة...الا الا ...يساعدوني... بالاكل!!

• الله يحفظهم -

اما ابوهم...هذا لحاله حكاية!!
يمر من عند الثلاجة...ويتعداها ...ويجلس بالصاله..ويقول روحي جيبي لي موية!!(((ليه ان شاء
الله...ماتخبر محل الماء..ولا البيت مو بيتك ومستحي من اهله؟!))))
اذا جلس وشافني جايبة السفرة ( الظليمة شينه)يفرشها معي >>>مجهود جبّار!!..
واذا خلص اكله وقام..يقوم لحاله!!....يعني مامعه احد..يعني يديه فاضية مافيها ولا واحد من الصحون
الي بتضارب معها بعد ربع ساعه عالمغسلة...
احب الصحون والملاعق البلاستيك >>>فاتحه لهم فرع ببيتي
لكن انتظر يخترعون قدور بلاستيكية نطبخ فيها ونرميها >>متعشمة باليابان’ بارسل لهم برقية مايهمكم..
انظر للاكواب جنب برادة الموية بالمطبخ اشك ان عدد عيالي 10 ...ماهو 3 !!...لاني القى 10 اكواب
مطلعينها من الدولاب ...وصافينها لي !!
بنتي عمرها 6 سنين. ..دخلتها المطبخ ..
وفرحت وكانت متحمسه..... لكن شافت ان الشغلة يبيلها (عمال بناء ماهو ربة بيت )
قالت : اوف ياماما متى نخلص!!..
اقول لها : والله يابنتي بتخلص اعمارنا والمواعين لسه شباب!!...
وشوي القاها انسحبت بغفلة مني وهربت من الواقع المر!!
واشتكيها على ابوها...اقول : بنتك مامنها فايدة!!
يقول: خلي البنت اتعيش عمرها بدري على الهم!!
اها
يعني هو عارف انه هم!!...وراضي انّي اعيشه!!. ..بسيطة يابو همّ...
وقررت ...قرار....حازم..حاسم....لارجعه فيه ....اني اجيب خدامة!!...
لحظة!!
انتوا تحسبون ان المشكله صحون وقدور ومطبخ!!
لا...لا...فيه دواهي ...بس انا بديت معكم بأكبرها!
طيب تعالوا ندخل الصالة سوى..
هذا التلفزيون فيه مليون بصمة اتقول مختبر جنائي...واحد من العيال يأشر على برنامجه المفضل:يقول
هذا حبيبي , يقول الثاني : والله هذا بايخ كل اثحابي(اصحابي ) يقولوا بايخ..طبعا الاصابع لاصقة
بالشاشة ومغمسة بشوية شوكلاته او فراولة ..يعني بقع بنكهات!!...واحيانا يطبعون بوسة قوية (تاكيدا
للحب) واتخيلوا بانفسكم منظر الشاشة بعد بوسة طفل ياكل بطاطس كاتشب ويشرب عصير منجة بدون
مصاص!!
وسجادة الصالة حدث ولاحرج ..عليها بقايا صدام عنيف حدث بين المنظفات والبقع..يدل على ان هذا
الصدام متكرر ...ومفجع!!
ماتتخيلون منظر هالسجادة المسكينة وهي تسبح في بركة الفيمتو..او لبن المراعي..و ياكثر ماتعاني من
بقايا بسكويت عالقة بين ضلوعها ..ااقصد بين خيوطها...!!
الصالة ارتبها يمكن في الدقيقة عشر مرات >>مابالغ
دايم اشوفها مقلوبة راسا على عقب..لدرجة اني شكيت ان هذا شكلها الحقيقي !!
اي شي مفقود بالبيت ..اندوره بالصاله..يصدرون كل الاغراض لها...!!...ممكن القى مخدة مشحونة لها
من غرف النوم..او صابونه هاربة من الحمام ولكم الكرامة- او لعبة تم الاعتداء عليها وتحولت اشلاء فيها !!..
طيب تعالوا ندخل غرفة العيال!!...
ولا اقولكم...لا ..لا...لا...مابغى اكرهكم بالعيال..يمكن واحده فيكم ماجابت بزران لسه ومشتاقة لهم
وبسببي اتبطل اتجيب ..لا..لا..انا اعفيكم من الدخول.
طيب ايش رايكم ندخل غرفة العابهم ..ياسلام...اهو ناخذ راحه شوي ونرجع لايام الطفولة ونلعب سوى!!
لكن من الان اقول لكم؟!!..ترى ماراح تعرفون تلعبون ولا بلعبه !!
لانكم راح تاخذوا وقت كبير عشان اتفكوا كم لعبة متشابكة ...وتركبوا كم لعبة مفككة!!
ولان اغلبها مفقود ومازال البحث جاري..وبعضها نصف كائن!!صعب تتعرف على ماهيته
بسهوله!!؟؟اذكر مرة مسكت حاجة اسطوانية وقلت لولدي انا شاكة ان هذا اخو باربي ..لكن
لا..لا....اخو باربي كان مزيون وعضلات وشعره ناعم؟...الا وين شعره!!..وين عضلاته..وين
رجليه!!...وين راسه اصلا؟؟؟!!!!!!
قال ولدي: هذا ياماما مرة تأخر عن باربي ماجا يوصلها للزواج وجابت صاحباتها وكسروا ايديه ورجليه
ورموا راسه مع الدريشة >>>يالطيف ارهاب!!
بطلتوا..تدخلون صح!!..
طيب معذورين والله. ..حياكم لمجلس الضيوف!!
هذا المكان الوحيد الي مااسمح لعيالي بالدخول له!!...
لكن -بقدرة قادر -القاهم داخلين وجايبين العزبة بعد ومخيمين...يقولون:الله ياماما هذا مكان جديد
مرة حلو !!.. .>>صدقوني انا اقفل باب الغرفة واشك انهم يتسللون من مدخل المفتاح !!
"
"
"
لاتسالوني وين زوجك ابو عيالك عن هذا كله؟..ليه مايوقف الشغب الحاصل؟!..ويعلن الطاعة لولي
الامر!!؟ >>ماحولكم احد
يقول : عجزتي تفاهمين مع بزارين!!!
>>انا افضل اتفاهم مع اوباما واحل مشاكل الشرق الاوسط ولا احل معهم ربع مشكله وفيه مثل يقول :
قاضي العيال قتل نفسه!!
"""""""""""""""""""""""""""""""""
قلت لزوجي: انا موافقه انه حرمة ثانية اتشاركني بيتي!!
قال : ليه انا شكيتلك قلت بتزوج!!
قلت : وان شاء الله لو بتفكر بتتزوج بتجيبها لي بالبيت؟!!.(هي فكره اتشيل عني الهم
شوي!!(..لكن هيه فكرك لاينحرف هنا او هنا ...انا اقصد خدامة!!
قال: هذا انتي قلتيها اتشاركي البيت...وتحشرني انا في بيتي ومكان راحتي!!.. مليون مرة قلت لك بيتنا
صغير مايتحمل خدامة لازم يكون لها مكان خاص ودورة مياه خاصة.. تبينها تنام بالصالة ولا تحت
الدرج تقشع قدامي....ولا بتحطينها بمجالس الضيوف وريحتها فيها ويبطل احد يجيك لو عرف انها منام
شغالتك!!....ولا بتحشرين العيال فيها ماندري ويش اتسوي فيهم لارقدنا وصكينا باب غرفتنا علينا!!
قلت له : بيتنا مو صغير5 غرف و3 حمامات..واطفال...وطبخ ونفخ وضيوف!!...
ايش تبغاني اسكن قصر حتى اتجيب لي خدامة..القصر ماراح تكفيه حتى 3 خدامات!!..وانا ابغى واحده
بس اتساعدني وتخليني افضى لك ولعيالك ...
ماتبغى اتشوف زوجة فاضية لك ولامورك..وام رايقة لعيالك؟...
حتى هم صاروا يقولون ياماما انتي دايما معصبة واتهاوشينا على كل شي!!!.. مالومهم ولاالوم نفسي
والله من كثر الشغل والمكدة طول اليوم ...والمكان الي رتبته وتعبت فيه مابي احد يقربه!!
قال: نظمي وقتك ومايحصل هذا كله..!
قلت : يالله نظمه لي وانا مستعده امشي عليه!
قال: بلاها المسايير كل يومين للجيران..ومالها داعي تجيبين زميلاتك كل اسبوع...وبطلي جلسة على
التلفزيون...وتقليب بالقنوات...وقفلي الانترنت لاتدخلينه الا بالشهر مرة...وانتي بكذا اتكوني فاضية
لشغلك!!
قلت بعصبية:يعني احرم نفسي من متع الحياة ...عشان اقف مثل الالة الي تشتغل على 220 لا تكل
ولاتتعب!!...عشان ايش؟؟!!...عشان غسل صحون وتنظيف حمامات ومسح بلاط!!...هذا هدفي بالحياة !!
يجي ولدك يصيح يبغى احد يحل له الواجب..يلقى امه تكرف بالحمام !!!...هذا هدفي كأم!!... >>>قوية
بنتك تبكي اخر الليل ممغوصة ولا محمومة ..وتحتاجني جنبها وماقدر اقوم لها من مسح البلاط وجلي
الصحون طول اليوم..ولاّ اقوم لها وانا اصفق فيها واشتمها على ازعاجها لي!! هذي رسالتي كأم؟!! >>اقوى
ولاّ تجي انت يازوجي ياحبيبي اتدور زوجة عاشقة ولهانة متفرغه لاسعادك بكل الطرق..وماتلقى قدامك
غير واحدة يديها اسودت من المنظفات..وبوزها شبرين من المضارب مع العيال (لاتكب
لاتكسرلاتوسخ!!!)..وتعبانة بتنام!!!! > >> هذي يمكن تقنعه
ليه...هذا كله ليه...انت قادر ماديا...ومالها داعي خوفك من الخدم ورفضك الشديد لهم؟
قال: انا الى الان ماشوف لها حاجه..انتي توك شباب واولادك 3 بس..ولا موظفة ولاشي..وضيوفك
يساعدوك لادخلوا بيتك مايقصرون معك حتى شغالاتهم يجيبونهم لك!!
قلت : وانا بانتظر شفقة شغالاتهم...ليه ماتغنيني وترفع عني الحرج منهم!!!
قال:خدامة مافيه...الى ان اشوفك بعيوني مو قادرة على الشغل ..بعدها ابشري!!
قلت بنفسي:هو لسه ماشاف؟!!. ..معقولة كل هذا وماشاف بعيونه اني احتاج واحده اتساعدني!!
طيب ليه؟
اها
لاني ماشتغل قدامه...يروح والبيت نظيف..ويرجع والبيت انظف!!!
ولان عياله مكفولين محمولين...شايله عنه همهم وازعاجهم..ومعلمتهم ان سي السيد لادخل البيت ممنوع
الصراخ والشغب ..واذا نام اسوي لهم حظر تجول ..واي شكوى مؤجلة الى ان يخرج سي السيد برا
البيت !!
وضيوفه يجون وانا ارحب فيهم..ويروحون وهو مبسوط من اكرامي لهم-ويشكرني بعد -وهذا لحاله
يغسل تعبي ويخليني مااحكي له عن المجهود الكبير الي سويته عشان اسعده هو وضيوفه.
ماشاف وراء الكواليس ولا عاشها..!!
طيب .... انا ماراح اعيشه وسط الكواليس...الاّ باخذ الكواليس قدام عيونه..صوت وصورة؟!!
عزمت النية اني اخرج فلم قدامه...فلم يحكي واقعي المرير الي مايعرفه!!
يجي من الدوام يلقاني رابطه شوشتي لسه مابعد مشطتها..ولابسه قميصي القصير المشقوق من جنب
بسبب العيال >>هذا كان من المحرمات ظهوره قدامه.
واول مايجي اقول : هلا والله مو كانك جاي بدري ولاّ انا راح وقتي بتنظيف البيت والعيال!!...ومراقبة
الصينية بالفرن. .و...المهم اركض على غرفة النوم واضبط شكلي ..وارجع له...كذا يكون شاف قبل
وبعد!!... وعرف اني في سباق مع الوقت عشان انجز مهامي بوقت قياسي!!
وتركت العيال يصجون ويلجون ويركبون على ظهره ويسوون معركة عند راسه ...وبعد مايطفح الكيل
عنده ..اتدخل بمنتهى الحكمة واحول المكان الى واحه هادئة رغم ان مصدر الازعاج مازال حي
يرزق!! >>معجزة
واذا دخل يساعدني بالمطبخ -بناءا على طلبي والحاحي -يشوف بام عينه مجهودي وصلة وصلة مايفوته
شي ...واذا فتح الدولاب بياخذ شي ينزل على راسه وابل من الصحون !!...اقول : اسفة حبيبي هذول
رصيتهم على عجل لان واحد منهم كان يبكي ضاربه اخوه!!واعيد ترتيبها قدامه صحن
صحن!!... >>قلت لكم بث حي مباشر!
واذا جات بنته تبغاني اسمّع لها او ارتب لها جدولها...اقول انا عندي ترتيب الغرفة الفلانية او تحضير
وجبة او تجهيز لضيوف...الخ ..واخليه يورط معها ويتكفل بتدريسها وهو مايحب هالموضوع اطلاقا!!
>>>ابغاه يعيش لو لحظة مع طفل يتهجى حرف ..او يعيد في سورة مو حافظها!!
وكل ماجيت من زيارة ابكي واقول له احرجوني زميلاتي يقولون لي : انتي حلوة وقمورة
لكن باين عليك الكرف!!يرضيك ينظرون لزوجتك هالنظرة !!!
::::::::::::::::::::::::::::::::::::::::::::::::::
وكأن ساعة الفرج قربت...وزوجي مع الضغط بيوافق عالخدامة...و ماسكة اعصابي ومستمرة بطريقتي
الجديدة واحسب ساعة الصفر عشان اعيد تقديم اوراقي له !!>>>وبيني وبينكم خفت يقلبها على راسي
ويفهم قصدي او يمل مني ومن عيالي!!..خاصة ان امي دايم اتنبهني ان اسلوبي هذا غلط...غلط اجبر
زوجي عالخدامة طالما مايبغاها ببيته..ودايم اتقول ان بنات الحين مافيهم فايدة ومايعات ومايصلحن
للمهمات الصعبه!! >>>لو ماهي امي كان عرفت اتعامل معها
لكن سويت اذن من طين واذن من عجين...وقضيتي بأناضل من اجلها الى ان اصل لمبتغاي واشوف
حبيبة قلبي قدامي >>>خدامتي
وجا اليوم الي يعلن فيه زوجي الموافقة >>>مسكين شاف الهوايل
وفتح الباب...ودخلت خدامتي...وشفتها بشحمها ولحمها واقفة قدامي (مو مصدقة) ...حسيت اني ودي
اخذها بالاحضان..او افرش لها الارض ورد...ياه حلم وتحقق...معقولة..معقولة ماعاد فيه حرب
مع شغل البيت بالذات المطبخ ....والصالة..الصالة الي شيبت راسي ..ياسلام ...احس انها
نهاية سعيدة لفلم اخرجته بنفسي ونجح .....................
end
::::::::::::::::::::::::
ياترى فعلا نهاية سعيدة ..؟؟...او بداية تعيسة!!!
:::::::::::::::::::::::::::::::::::::::::::::::::
اللهم نسالك من خير الخادمات ونعوذ بك من شرهم
الله اغنينا عنهم
الله احفظ اطفالنا من شرورهم..
الله من ارادتنا بسوء منهن فرد كيدها في نحرها
اللهم امين