خلطه للعنايه اليوميه بالشعر ونظافته اعشاب بدون زيوت

1. السلام عليكم ورحمة الله ..


2. الحينه نتكلم عن المكونات وهن كلهن اعشاب تحصلونها عند العطار:-


3. الطريق:-

السلام عليكم ورحمة الله ..

هاذي الخلطه يستخدمونها الاوليين عشان تعرفون من قل الما هاذيج الايام .. ماكانو يغسلون شعرهم يوميا .. وهو من الصحي انج تعطين فترة راحه لشعرج ولفروة راسج من الكيماويات والشامبو والغسال .. هاذي الخلطه تخليج على الاقل تطولين ماتغسلين شعرج .. طبعا مش اكثر من ثلاثة ايام .. في نفس الوقت تغذي الشعر وتمنع تساقطه وتعطيه لمعان و صحه و تقلل من قشرة الراس .. والحلو فيها انه ريحتها زينه وخفيفه ..

الحينه نتكلم عن المكونات وهن كلهن اعشاب تحصلونها عند العطار:-

• سدر (هالعشبه تتكفل بنظافة الشعر .. كانو يستخدمونها الاوليين كشامبو )
• ياس ( له ريحه حلوه وفوايد عده للشعر )
• محلب ( عباره عن حب مفيد للشعر )
• حنا ( يغذي الشعر ويقلل من القشره ) .. انا ماحط الحنا لني ماحب ريحته ويصبغ شويه في فروة الراس : )

الطريق:-

هن طريقتين .. الاولى انج تطحنين المكونات كلها مع بعض .. وتحطينها في علبه .. ويوميا تاخذين مقدار ملعقه صغيره من الخلطه وتضيفين عليها فنيال ما وتخلطينه عدل .. وتقومين توزعينه في فروة الراس بطريقه انج ماتخرسين شعرج وايد يعني حطي كميات صغيره .. و وزعيه في شعرج طبعا مع مساج في فروة الراس على الاقل لمدة ثلالث دقايق.
والطريقه الثانيه انج تخلين المكونات غير مطحونه يعني العشبه مثل ماهيه والحب مثل ما هوه .. وتيبين دبه او غرشه صغيره وتحطين كميه متساويه من كل شي بس تكون كميه صغيره تكفيج ليوم او يومين .. لنه هالخلطه اذا حطيتي عليها الما وخليتيها تعفن في غضون 4 الى خمسة ايام .. فحاولي انج تخلطين الكميه المناسبه انج تستخدمينه في هاليوم .. صبي عليه شوية ما .. وخظييه لين تشوفينه زبد .. و وزعيه بنفس الطريقه الي قلناها في الطريقه الاولى .. طبعا الطريقه الثانيه وايد اخف من الاولى .. وكلن يختار الي يناسبه
واتمنى انكم تستفيدون
فيمينين ^-^