خيانة زوجي أريد النصيحه

1. ولكن سوف اكتب الاحداث السابقه والجديده مع بعض دون الرجوع للرابط


2. المهم...


3. وفعلا دقيت وطلعت الكارثه مسجلها بأسم ابو رينا يعني اسم الحبيبه رينا


4. وفي اليوم الثالث جى من العمل وحاط لجواله رمز قفل انا قلت لهنا وخلاص


5. وخرج من البيت

بسم الله الرحمن الرحيم
اولآ أحب اشكر كل من ارسلت لي على الخاص لتطمئن عن حالي مع زوجي ماقصرتو الله يعطيكم العافيه
الحين انا رجعت ومعي احداث جديده فلا تبخلو علي بالنصيحه والدعاء جزاكم الله خير ياأخواتي الغاليات
وهذا رابط لموضوعي السابق
http://alfrasha.maktoob.com/alfrasha12/thread1328988/

ولكن سوف اكتب الاحداث السابقه والجديده مع بعض دون الرجوع للرابط

أولا..رزقني الله بالبنت والولد وحياتي كانت مستقره لاسيما كانت هناك بعض المشاكل البسيطه التي لا يخلو منها بيت
راتب زوجي زين والحمد لله وأمورنا ماشيه تمام الين حسيت أن في شي مو طبيعي صاير لزوجي...أصبح مهتم كثير بجواله تجيه رسايل كثيره في أوقات متأخره من الليل ولما أقوله مين يقول ذولي زملائي الأتحاديه يتريقون عليه وهو طبعآ اهلاوي ويرسل لهم محشات ويرسلوله محشات..في البدايه كنت مصدقه بس شوي شوي بديت احس ان الامر فيه شي وهناك أمور تثبت حدسي الا وهي ...
اهتمامه بالجوال زاد عن الحد , ولما يروح مكان وينسى الجوال يرجع على طول عشان ياخذه , أو اذا راح مكان وما يبغى ياخذ الجوال يحطه على غير متصل , لما نكون مع بعض في مكان عام يرن جواله ومايرد ولما أقوله رد يقول هذا واحد ماأبغى ارد عليه ويحول جواله على الصامت وكل شوي يطلعه من جيبه عشان يشوف أحد دق او لا ,وفي البيت اذا رن الجوال ومايبغى يرد يحطه على الصامت ويخلق اي حجه عشان يطلع من البيت وأول مايطلع يقوم يكلم بالجوال مدري من , واذا راح الله يعزكم للحمام يمسح السجل اللي في جواله مايخلي اثر , وكل هذا يحاول اني ماأحس
لكن كيف ماأحس وكل هذا يصير قدامي... لكن الله كان معي وفوضت أمري لله في ان يكشفه لي ويبين حقيقته اللي مخبيها وذي ألامور كلها بوادر خيانه الله يكفي كل متزوجه خيانة زوجها لها ..ويكون في عوني

المهم...

رحنا أحد المولات نتمشى ونتقضى لوازم لنا ونسيت أقول اني في السابق لما أطلبه تمشيه أو سوق يقعد يماطل ويفقع القلب لكن الحين اي شي نطلبه يقول طيب على غير العاده حسبي الله عليه ونعم الوكيل..
لما رجعنا البيت قال خذي الجوال عشان انزل الأغراض من السياره طبعآهذا بعد مامسح السجل... وحطيته في الشنطه وكان الوقت متأخر في الليل وبعد فتره رن جواله طلعته من الشنطه وكان اللي يدق واحد مسميه رينالدو دق مرتين واعطيت زوجي الجوال ورحت على طول لأني كنت مشغوله شوي بس مدري ليه قرصني قلبي من ذا ألاتصال وطبعآ زوجي مارد ولا سألته مثل العاده لأني اعرف رده بيقول واحد ماأبغى ارد عليه
اليوم الثاني لما جى من الدوام نسى يمسح السجل لقيت فيه مسجين مرسلهم لرينالدو ذا وبديت احس ان هذا الرقم هو سبب المتاعب وكل هذا بتوفيق من الله والا وش دراني انه هذا الرقم اللي مغير زوجي ماشفت الا اتصالين ومسجين وكلها مو واضحه لكن ارادة الله فوق كل شي
لما جى الليل دخل الحمام الله يعزكم وأخذت جواله و لقيته ماسح السجل وفتحت على الاسماء واسم رينالدو تحديدآ ولقيته مخزن ثلاث ارقام نقلتها كلها لجوالي في رقمين كان شكلها ارقام لجوالات عامه وفي رقم كان واضح انه رقم من موبايلي وكان قلبي يدق بسرعه ونبضات قويه حسيت ان قلبي بيوقف من شدة الخوف مدري ليه
خرج زوجي من الحمام وجلس وانا دخلت غرفة النوم ودقيت على هذا الرقم الثالث وهذا وانا حاسه ان قلبي بيوقف ورد الرقم وكان ساكت وقلت الو الاصوت بنت تقول الو قلت السلام عليكم قالت وعليكم السلام قلت هذا جوال ريناد طبعآ اقتبست الأسم هذا من الاسم اللي مسميه في جواله ..فقالت رينا قلت لا (ريناد) قالت غلطانه.. فقلت طيب هذا جوال مين قالت جوال ساره.. فقلت شكرآ...انتهت المكالمه
حسيت ان الدنيا ماهي سايعتني من الضيقه والهم والغم وجلست مع زوجي وهو قام عشان يروح ياخذ اغراض من البقاله وانا افكر وش اقول وش اسوي وكيف اواجهه ...
أكمل لكم المهم من زود العصبيه قلت لأخوي ابغاك تشتريلي شريحة وجوال اي كلام عشان اسوي خطه في بالي كل هذا وأنا متوكله على في أن يساعدني على حل هذا المشكله وكانت الخطه اللي في بالي اني ارسل من الرقم الجديد هذه الرساله (يامخدوعه في زوجها ومسويه نفسها صاحيه شوفي ذا الرقم؟؟؟؟؟؟؟؟ دقي عليه من جوال زوجك وشوفي من يرد بنت ولا ولد وبعدين شوفي هو مسجل الرقم تحت أي اسم يامخدوعه في زوجها ومسويه نفسها صاحيه ... وبكره اعطيكي التفاصيل).
. هذا الكلام كنت مقرره ارسله من الرقم الجديد على جوالي واوري زوجي , عشان اواجهه بالجرم المشهود وادق من جواله..
المهم... جى زوجي وجلس على النت ويكلمني وارد عليه على غير العاده من كثر الضيقه اللي فيني وأنا في الأصل مرحه وماني كئيبه واستغرب لما شافني كذا وسألني وش فيك قلت طفشانه ويرجع يكمل على النت وبعدين رجع يكلمني وكانت الدموع معبيه عيوني وسألني وش فيك مره ثانيه قلت ولا شي قال الا في شي ما قدرت اكتم غيضي قلت له جتني رساله فيها كذا وكذا وقلت يالله اعطني جوالك عشان ادق على الرقم هذا قام وانكر وقال تشكين فيه وتعالت الاصوات والصياح والاتهامات وليله الله لايوريها مسلمه على وجه الارض ورفض رفض بات اني ادق من جواله خايف لاينفضح وانا طول الوقت اناديه ياخاين تخونني ورحت الم ثيابي في الشنطه وقد تحول قلبي الى حجر ولكني مع ذلك افكر في عيالي ووش اللي راح يصير بعدين وهو يقول دامك ماتثقين فيني يالله عند اهلك وكنت ادعي ربي انه يحلها من عنده لأنه لا حول لي ولا قوة الا به سبحانه....
وكنا في وضع لايعلم فيه الا الله ولبست عبايتي وكان زوجي واقف يقولي يالله ومسكت جوالي وقلت اطلع من الغرفه ابغى اكلم قال تكلمين مين قلت ابغى اكلم وبس وقفلت الباب وكنت بدق على بنت الحرام ومدري وش بقولها ..........
وشوي الا ورجع زوجي يدق الباب وفتحت وقلت نعم قال تدقين على مين قلت بدق على اهلي قال خلاص لاتدقين وقام يهدي الوضع شوي ويقول وشلون تشكين فيني وانا اللي تعرفيني ماحب اطالع في الحريم ولا احب المعاكسات وانا جلست على الكنبه في صمت مدري وش اسوي أصرعلى موقفي والا اتهاون فعلآ كنت في حيره لكنتي كنت مفوضه أمري لله وقلت ليش ماتعطيني جوالك ادق قال لو اعطيتك معناته انك تشكين فيني ومخونتيني وكنت اتنازل شوي من عصبيتي عشان مااسمح لبنت الحرام هذي انها تدمرني وكنت ابغى أخلي لزوجي خط للرجعه ...
وبعدها تركني وراح يجيب عشى يقول اني ماأكلت وقلبه عليه وانا عارفه انه بيطلع يدق عليها وينبهها انها ماترد علي وعشان يمسح رقمها من جواله عشان ما اصيده ..
وعدت الليله وهو يقول ان الي ارسلي الرساله هذا واحد حاقد عليه ويبغاله المشاكل و كلام كثير يغى يبري نفسه بأي وسيله وقلت له ان اللي ارسلي الرساله راح يرسلي التفاصبل بكره وانا استنى وش بيرسل وزوجي على اعصابه (وفي الاصل لا تفاصيل ولا شي ماكنت اعرف وش ارسل من تفاصيل لاني ما اعرف شي عن علاقته ببنت الحرام اصلآ)
ونام ذيك الليله وانا جلست سهرانه افكر في ذي المصيبه وفي ذا الهم حسبي الله ونعم الوكيل
في اليوم الثاني راح الدوام وكان عند زوجي جوال ثاني لكن مايستخدمه الا نادر ودايم في البيت ..المهم اخذت الجوال ودقيت على رقم البنت عشان اشوف هو زوجي مخزنه في جواله اولا...

وفعلا دقيت وطلعت الكارثه مسجلها بأسم ابو رينا يعني اسم الحبيبه رينا

وفار دمي وارتفع الضغط والسكر وكان مخبي الأسم في اسماء SIM يعني لو دورت على الرقم بين الارقام ماراح الاقيه لكن لما دقيت ظهر الرقم على طول...
انا وبدون تفكير قمت وارسلت له رساله ( وش رايك في ابو رينا)..على طول اتصل وقال وش ذا الرساله فقلت له انا اللي ابغى اعرف وش قصة ابو رينا وقصة بنت الحرام وقلت له لا تقول هذا رقم فلان لأن هذا الرقم هو رقم بنت الحرام اللي رفضت تخليني ادق من جوالك العام امس ودقيت عليه وردت بنت وقام يقول مازلتي تشكين فيني انا حلفتلك على المصحف اني ماكلمت احد شوفو كيف يحلف على المصحف كذب كله بس عشان يبري نفسه...
وقال اذا جيت نتفاهم ورحت اصلي الظهر وادعي ربي انه يفك الضيقه اللي فيني ويفرج همي وغمي وكنت ادعي يارب اني فوضت امري اليك في ان تردلي زوجي وتنصرني على بنت الحرام هذي ...
وجلست ادق على البنت وهي ماترد عشان زوجي اكيد موصيها واحرقت جوالها من كثر ماأدق وهي ماترد وبعدين جى زوجي تعالت الاصوات يحاول يبري نفسه وكل كلامه كيف تشكين فيني انا وانا وانا ...
وجلس يتفاهم معي وانا مستعد اثبت لك اني ماخنتك وان في واحد يحاول يخرب حياتي واكيد هو اللي مسجل الاسم في جوالي يبغى يدمر حياتي مع زوجتي وعيالي(يضحك علي يحسبني اصغر عياله ولا يحسبني هندي يضحك عليه مادرى اني كاشفته وامشيها له بمزاجي)ويقول اللي تبغين اسويه بسويه ومن ذا الكلام وقال عندي طلب وتكفين نفذيه ؟؟؟ قلت وشو قال تكسرين الشريحه وانا اليوم اجيب لك احسن شريحه وبرقم مميز ..
وهو في الأصل خايف من التفاصيل اللي راح يرسلها الشخص المجهول وفعلا نفذت طلبه وكسرت الشريحه لأني مثل ماقلت لكم ابغى له خط للرجعه...لأني مازلت ابغى حياتي وبيتي وعيالي...
وفي نفس الليله طلعنا نتمشى ونغير جو وغيرلي الشريحه ورجعنا البيت وكل كلامه عن الشخص هذا اللي يبغى يخرب بيته و............

وفي اليوم الثالث جى من العمل وحاط لجواله رمز قفل انا قلت لهنا وخلاص

ليش تحط لجوالك رمز قفل اللى عشان تخبي فضايحك واكيد انت خاين وقمت اقول له اني لو تأكدت بس من خيانته اني لأخونه واحب غيره وهو مايدري واعيش حب حياتي واخليه المخدوع وبعدها اللي يصير يصير وكان كل كلامي كذب بس من زود الانفعال...

وخرج من البيت

جلست ادق على بنت الحرام وهي ماترد واخر شي قمت ارسلها رسايل وادعي عليها ان الله ينتقم منها ويجلعها بالمرض الخبيث اللي يشغلها في نفسها عن زوجي وعن حياتي وارسلت لها دعاوي كثيره (الله يغفر الذنب) وهي ولا ترد ولو بكلمه وانا بس ادعي عليها وادق وارسلها رسايل حارقه للدم واني راح ادعي عليها في كل صلاة وفي صلاة الليل واني مضلومه ومخدوعه وان ربي ماراح يرد دعوة المضلوم ...
والله يابنات انها قفلت شريحتها الحين لها 4 ايام مقفله ادق في كل وقت وهي مقفله ولاحظت على زوجي انه ماعاد تجيه رسايل مثل اول ولا اتصالات ؟؟؟
مدري علاقتهم انتهت ولا هو مطلع رقم جديد وهي مطلعه رقم جديد ويكلمها اذا طلع مدري ؟؟؟؟
الأفكار بس توديني وتجيبني وهو ماعاد مسح السجل يبغاني اتأكد بنفسي ...
مدري البنت ذي قفلت شريحتها وانهت علاقتها بزوجي ...أو أن كل واحد منهم طلع رقم ومازالو يكلمو بعض ..
ان فوضت أمري لله زي ماكشفه المره الاولى يكشفه المره الثانيه وقلت لزوجي اني ادعي عليك في كل صلاه ان كنت مازلت تخونني (ان يجعلك بحادث يصيبك بشلل يقعدك في مكانك) وهو بس يناظر فيني ومايرد...
هذي هي قصتي الاولى والحين راح اعطيكم وش اللي صار بعدين.......